Read Fore Maka 16 Bible Online

Maka 16 - Fore bible

Maka 16

¹Pigoya, sabati aꞌya waogini, Mariya Matara kumatisa waena, to ka Mariya Yemisi nkanowampawa, to ka wae Saromiwa sumagini, aogi agunta yome tusaena ae auti yora potakena tusaena ika puritegini,

²sonta yagaba, abaya aseka asima aruri wantawe.

³Keꞌi wantini tabe yabaka: Kebaya aru ka awarasa aꞌwareragasaka paiꞌatakunema, igewai uta wantini,

⁴pi yabapa tabe yabapa uma agaumepa, aꞌwaima aꞌware wantiye.

⁵Aibogini, kabinti wama uma agaumepa, aogi wae kai amirinta masimabi yagara ayatakantisa aukaꞌi asima mintogini, uma agategini pami puntawe.

⁶Pami puguna maya uwaimintiye: Tigeba a-pamiba piyo. Isu Nasaretirisa yagara, yara itaginta ntagaraba agusagapa, aeba matapa kampa minta, ago asima waye. Agaiyo, mata kaitatawe.

⁷Piya, tigeba wamagiri Pitage abagi kinake: Paitama Karariya-i wakiri, urimintisa puma pita agakibewe, uma uwaimiyo, uwaimintiye.

⁸Uwaimogini, igeba iyekuru puma pami pute, arubintisa iroꞌma iyegaka wamagini, iyekuru puma, kana kamana kampa to kinapa uwaimintawe. Mariya Matara kumatisa waeꞌma Isu agantiye

⁹(Pigoya, abaya aseka sontara Isuba asima, Mariya Matara kumatisa waeꞌma agora aboraogana, agantiye. Kana waeꞌmapa pai Isu tonaentisa tara umaema ke kina agaruba agasome waekana mintantiye.

¹⁰Mintogini, Isu nkaokinaꞌmi intara puma kubeꞌena puma miyuguna, aeba wama: Isu ago asima mintegi agauwe, uwaimogini abite: Kampari kamana yene, untawe.) Tara yagararamisi keꞌi Isu agantase

¹²(Togana to tara yagarara uwa mari keꞌi wausuguna, Isu to kina kanta yagara aboraoginisi agateginisi,

¹³to kinati wama: Ago Isupa agause, yusuguni: Kampari kaese, untawe.) Isu aboraogini nagisarisa ka tumpaema kinaꞌmi agantawe

¹⁴(Pigoya, togana nagisarisa ka tumpaema kinaꞌmi naninta nauguna, pita Isuba aboramagina maya uwaimintiye: To kinaꞌmi ago nagategini, asima mintiye kamana nagata kinaꞌmi urimuguripa, nanaga tigeba akumpaꞌma miyewema, ka ibirantiye.

¹⁵Piya umagina aeba to amato puma maya uwaimintiye: Tigeba aꞌyaꞌma aukaꞌi nasima, aogi kamanaꞌne aꞌyaꞌma kina uwaimiyo.

¹⁶Wasanama nae kamana aegaꞌma wani maekibipa, aoꞌmaeyakana ikiye. Pigoya wasanama kampa nae kamana aegarakibipa Koti ataena potakiye.

¹⁷Pigoya nae kamana aegarakibe kinapa maya esegiyena pikibewe: Nae nageraka ke kina agarubakibewe. Kasa to kamana ikibewe.

¹⁸Kuya iyatasa maekibepe karaena nakibepe, kampa ata puwaitakiye. Pigoya igeba iyatasa yoni kinaꞌmi ikaya pikibepa ita wakiye, piya uwaimintiye.) Isu mantari intiye

¹⁹(Tabe Yagara Isu piya uwaimigasogana, ababogana mantari imagina, Koti nkayatakantisa aukaꞌi asu mintogini,

²⁰abagi kinaꞌwampiba aꞌyaꞌma aukaꞌi wama, kamanaꞌwa uwaimuguna, Waꞌegawamaba iyoꞌmaema, esegiyena tonarona pogini, agategini: Taga kaeyewe, untawe. Tagane.)