Read Fore Maka 2 Bible Online

Maka 2 - Fore bible

Maka 2

¹Pigoya, to yagaba Isu aꞌwae puma Kapaniyamu kumati to kakema umintogini, wasanamiba: Isuba waꞌeri ago ampintiye, untawe.

²Piya yuguni uwoma kinaꞌmi namapa ampa pumaewauguni, kaꞌisa kinaꞌmiba kaberi ampa aki puma mintuguna, Isu aogi kamana uwaimintiye.

³Piya uwaimogini, wasanami agisa aya puꞌwanta yagara ababute kanama, tarawa tarawa kinaꞌmi wasirite kanantawe.

⁴Kanaumepa wasanaba pumaewauguni kampa Isu agora ababute inta, nama nkabobori imagini, asu akuritama, pitaꞌisa kana yoni ntagaraba wasa yara waitama motauguna tumintiye.

⁵Tumogini: Aogi potakiyema napiyuguna, Isu ibite: Yagaranepa, aguntaenagapa iba maegagasuwe, omintiye.

⁶Piya omogini, kaꞌisa mono tisa kinaꞌmiba pita maraꞌmima mayama ige napintawe:

⁷Nanagabaya pi ntagaramaba maya kamanapa iye. Kotika akaya kasa iye. Kebaya aguntaenarepa maeragaikiye? Koti ae abinto maeragaikiyema napintawe.

⁸Piyama napiyuguna age napima ibite Isu mayama uwaimintiye: Nanaga piyamaba tigebipa napiyewe.

⁹Nana kuntaenawema napiyewe? Yoni ntagara aguntaenagapa maegagasuwa, asima wasaga aesagabite wao yoka yewo, utegina:

¹⁰Tigeba abiyo. Wasanama Ntagara naeba ma mpabi esegiyenanetasa aguntaena maerigaikena esegiyenanepa waintiye. Naeba kuntaena pekiripa, agate napima yiyo uwaimintana, agisa aya puꞌwanta yagaraba maya omintiye:

¹¹Naeba ugaminta, kaeba asima wasagapa aesagabite waꞌegati waoma omintiye.

¹²Omogana kana yagaramaba asima wasawa aesagabite waogini, agate aꞌyaꞌma kinaꞌmi tabera pami pumagini, igeba: Taeba kampa agantompentanawe. Koti aogi potayema, Koti iꞌmu potantawe. Isu Aribaika kegaꞌe untiye

¹³Pigoya, Isu iroꞌma wama kotu awamori to umintogini, aꞌyaꞌma kina aeti wabuguna, kamanaꞌwapa uwaimintiye.

¹⁴Uwaimitegina to waomepa Aribai, Aopayesi ntagara, takisi opisiwapinti mintogana uma agate: Naegarao, omintiye. Omogana asima aegarantiye.

¹⁵Pigoya, uwoma takisi maeyume kinake kamparaga kinake aegarauguna, aeba Aribai ntamapinti umima, pi kinake Isuge abagi kinake mima naninta nauguni,

¹⁶Parasi kinaꞌmi nkarotu tisa kina kanama ampa igaumepa, pi kinake mima nama miyogini, agate abagi kinaꞌwaka mayama ampa ibigantawe: Nanagabaya takisi maenta kinake kamparaga kinake nanintaba nayema, ibigauguna,

¹⁷Isuba abite maya uwaimintiye: Wasana kampa yoni nkibemi kinaꞌmiba tusa yagaramati kampa wawe. Yonintana ibemi kinaꞌmi mana igeba wawe. Piya: Aogi kinatawe, ye kinapa aogi puwaitakenaba kampa tumintuwe. Naeba agunta kina igu aꞌwae pikibeka uwaimikena tumuwe, piya uwaimintiye. Naninta iꞌmikena kamana untawe

¹⁸Pigoya, Yoni abagi kinake Parasi kinake kaꞌisa yagaba naninta atate uwa mintuguni, wasanami kanama Isupa mayama abigantawe: Nanaga Yoni abagi kinake Parasi abagi kinake kaꞌisa yagaba monoka nanintaba aꞌa-o uma uwa mintuguni, nana piyema kae kabagi kinaꞌmiba nanintaba aꞌyugu nawema, abigantawe.

¹⁹Abigauguna Isu maya uwaimintiye: Pigoya, wasanami ibaꞌena puntiniba, aꞌyaꞌma kinaꞌmiba nanintaba umaerite kampa menkatama miyewa, karuꞌena ampa nawe, uwaimintana: Pi ibawaeꞌma nkawaewampa uwamintegini, ae aokinapa naninta imepa igeba kampa aꞌa-o unta maeyawe.

²⁰Pigoya, ainti ibaꞌwaeꞌma nkawaewampa ampa arakurite ababute to mari wagasiginiba, pi ntagaba aoꞌmiba intara puma kampa nanintaba nanta, uwa mima aeka napikibewe, uwaimintiye.

²¹Piya uwaimintana to kamana maya untiye: Pigoya, paisa kai atugekanaba, wasanaba kampa aoso kaiba kasama pitapa atama pugunikiye. Kampaye. Piya pikibipa to paisa kaiwamaba to tabera atugekana, tabe age waikiye, untana,

²²to ka kamana maya untiye: Piya, wasanama kasa yamanka antinkapa maema, kampa paisa yaga auꞌaribintiba ataye. Antipa piyama ataisinta, akapisa anosama, kana paisa yaga auꞌariba kampa aibakentama, karuꞌena muruꞌwagina wanipa pitaꞌisa tumiwasine. Piya, kasa yamankaꞌama nkantipa kasa yaga auꞌaribinti ataye, uwaimintiye. Sabatiraka kamana untawe

²³Pigoya, ka sabatirapa Isuba witi yugabinti waogini, abagi kinaꞌmi wamagini kana witi yugabisa maeyuguni,

²⁴Parasi kinaꞌmiba maya untawe: Aꞌyuguyena pewe. Tigeba sabatirapa akumparantaꞌenaba piyaba pewema, Isupa abigauguna,

²⁵maya uwaimintiye: Tigeba tayabama Tebiti puntintanagaba kampa napiyewo. Abayata mono kiya yagara mintogana, Tebitige aokinake igaꞌena ibogana, Koti mpono namapinti iyogana Abayata Koti nkamume ntaninta maema amogana nantana, aokinapa imogini nantawe. Pipa uwa kinaꞌmi ntanintaba kampaye, mono kiye kinaꞌmi ibiwai nakena nanintawe, uwaimintiye.

²⁷Piya untana to maya uwaimintiye: Kotiba wasanaga migaranema napima sabatiba puntiye. Sabatigaba kampa napinta wasanaba maru puntiye.

²⁸Piya puma Wasanama Ntagara naeba sabatirapa kabima miyuwe uwaimintiye.