Read Fore Maka 3 Bible Online

Maka 3 - Fore bible

Maka 3

¹Pigoya, Isu ini namapinti to waomepa, pitaꞌi aya puꞌwanta yagara mintogini,

²Pitasa kinaꞌmiba Isupa agategini, sabatira kana yagara aogi potakaba agate kamana otakunema napintawe.

³Pigoya, Isu aya puꞌwanta yagaraga: Mati kanao, omintana,

⁴pi kinakaba mayama ibigantiye: Ago kamanatepa ayama napiyewe. Sabatirapa wasana aogi puwaitakunema napiyebaya, ata puwaitakunema napiyebaya, iyogaitakunema napiyebaya, iyegukunema napiyewema, ibigantiye. Ibigaogini kamana kampa unta, asaba wantawe.

⁵Piya, igeba ige akuninta kina mintuguna igategina, antara pumagina, kampa aꞌmu puwaitanta ka ibirantiye. Piya puntana kana wasanagaba, Isu: Kaya paroso, omintiye. Omogana aeba aya parosogana atawantiye.

⁶Piya pogini, Parasi kinapa iroꞌma Eroti aokinake aki puma mintini: Aya pumabaya aegukunema napima, mare-u me-u puntawe. Uwoma kina kotuta aki puntawe

⁷Pigoya, Isuge abagi kinake pi kinapa itate kotuta wauguni, uwoma Karariya kinake, Yuntiya kinake,

⁸Yerusaremi kinake, Intumiya kinake, Yontani wani akaꞌisa kinake, Taya kumaꞌama agorasa kinake, Saironi kumaꞌama agorasa kinake, aꞌyaꞌma Isu pome kamana abima, uwoma kina aeti wantawe.

⁹Piya, uwoma kina Isu aogi puwaitaogini, aꞌyaꞌma yoni kinapa aibasanaꞌma mareta meta puta wama aeti wamagini: Auta uma arakurukunema, napintawe. Piyama napiyuguna, Isu: Aꞌyugu napasa nakibewema, wanipisa kareba nagora ataiyoma, abagi kinaka uwaimintiye.

¹¹Uwaimogini ke kina antabaipi minta kinapa agantiniba intagawarisa uma aigarepaꞌwama kegaꞌe uma: Kaeba Koti Ntagaragawe, untawe.

¹²Piya yuguna: Wasanaba piyaba a-nkuwaimiyo, Isu ke kinapa esegima uwaimintiye. Isu aeba abagi kinaꞌwa aisuwaitantiye

¹³Pigoya, Isu amuti ima aewa napiyome kinaka igegaꞌe uma: Kanaiyo, kegaꞌe yogini aeti kanantawe.

¹⁴Kanauguna nagisarisa tara tumpaema kina ibabuma: Tigeripa aposoro kinatawe uwaimite: Nae nabagi pumagiri, kamanaꞌnepa uwaimikenaba wamagiri,

¹⁵esegiyenanepa maema ke kinapa agarubakibewe, piya uwaimima ibabuntiye.

¹⁶Pigoya, abagi kinaꞌmi nkigewaipa maya uwaimintiye: Saimoni aoso ominti nkagiwapa Pitawa,

¹⁷Sepeti ntagara Yemisiwa, Yemisi nkaꞌnantowampa Yoniwa, isigewaisipa anagi isigi Powanagisiwe uwaisiminti, tae kamanapisa antaru yisa kina miyese uwaisiminti,

¹⁸Enturuwa, Piripiwa, Patoromayowa, Matiyuwa, Tomasiwa, Aopayesi ntagara Yemisiwa, Tariyesiwa, namuꞌisa kiya kina igarubakaikena abugai ntagara Saimoniwa,

¹⁹ainti Isu minagaꞌena punti ntagara Yutasi Isikeriyotiwa, sumagini, abagi puntawe. Ke kinapa aoꞌmaeyane, Isupa omintawe

²⁰Pigoya, Isu waꞌeri tumogini, uwoma kina aeti ampa aki puguna kampa nanintaba nakena puntawe.

²¹Kampa nakena puguni, waꞌewatisa kinaꞌmi piyama abitegini: Aeba aiboꞌenabaya piyema napimagini, Isu arakurikena kanauguni,

²²mono tisa kina Yerusaremisa tumume kinaꞌmi maya untawe: Piyesibu ababibayawe, untini: Ke kinaꞌmi kana tabewaimpa nkesegiyenawatasa kaꞌisa ke kina igarubakasabayawe, untawe.

²³Piya yuguna, kegaꞌe yogini aeti ampa aki puguna, imiyo kamana maya uwaimintiye: Kewama aeꞌwapa aya pumabaya agarubamisine.

²⁴Piya, ka marasa kinaꞌmi ige igewai maꞌena pesinta, kampa aogimapa miyesine.

²⁵Pigoya, wasanama aokinaꞌmage maka yesinta, kampa aogimapa miyesine.

²⁶Piya puma, kewama aokinaka ka ibiramisinta kampa uwa miyegina, esegiyenawaipa kampa waiyisine.

²⁷Piya, kaꞌwainaba to ka esegi yagarama ntamapinti wama aeꞌena kuntana maekena puntanaba, marupa kana esegi yagaraka arakuꞌma igaꞌnarasa kirokaetama, namankapisa kotapa kuntanaba piye.

²⁸Piya, taga kamana urimuwe. Wasanama aguntaenawape aꞌyaꞌma ka abirakibintanawape maegaikenaenawe.

²⁹Pigoya, wasanama Aogi Awamusaka ata kasa ikibipa, Kotiba kampa maegaikiye. Kana aguntaenawapa kampa maegasakana aꞌyaꞌma yaga uwa waikiye, piya untiye.

³⁰Piya: Aeba ke kina ababiye, yuguna, Isu kana kamana uwaimintiye. Isu anogabe aꞌnatabarabe kamana untiye

³¹Piya yogini, anobe aꞌnatabarabe abeꞌi ampima, aeka kegaꞌe untawe.

³²Kegaꞌe yuguni uwoma kina, agora maraꞌmintume kinaꞌmiba: Kanobe kaꞌnatabarabe abeꞌi ampa mima kagakena pewe, omuguna:

³³Nanobe naꞌnatabarabe ayabayawema, ibigantiye.

³⁴Isu piyama ibigategina, agora maraꞌmintume kina igategina maya uwaimintiye: Nanobe naꞌnatabarabe mampa tigege tige mintawe.

³⁵Wasanama Koti yemi kamana abe kinapa, pi kinapa nae naꞌnatabarabe nanobe mintawe, uwaimintiye.