Read Fore Maka 4 Bible Online

Maka 4 - Fore bible

Maka 4

¹Pigoya, kotu awamori Isu to kamana ukena pogini, uwoma kinaꞌmi aeti kanama aꞌyaꞌma ampa aki puguna, uwa marisa atate wanipisa karebi kotupi umintogini, aꞌyaꞌma kina kotu awamori mintantawe.

²Mintuguna aeba uwoma meto kamana uwaimintana, ka maya kamana uwaimintiye:

³Abiyo. Ka yagarama aintana pikena wantiye.

⁴Aeba wamagina aintanawapa maema aibarase pogana, aowa kaꞌisaba kepi tumpa waiyogana, kabarankama irosaꞌma ampa nawaegaintiye.

⁵Pigoya aowa kaꞌisaba yabankama nkabobori uwaena manto waintometa tunkwaima, karuꞌena irantiye.

⁶Piya pogana, abuꞌwapa kampa mabintiba tuminta, yaba nkabobori araꞌwaiyogana, pa taogana aeba karuꞌena asama pari puma puꞌwantiye.

⁷Pigoya, to kaꞌisa aowapa kabubinti tunkaima iraogana, pi yoninkama aibarusa pogana asa wantiye.

⁸Pigoya to kaꞌisaba apa mabi tumpa waima iꞌma anosama aosa pama, kaꞌisa 30-wa, to kaꞌisa 60-wa, to kaꞌisa 100-wa suma aboraogana, uwoma ntaninta waintantiyema, uwaimintiye.

⁹Uwaimintana: Ageyaga kinaꞌmaba ma kamana abibebe peno, Isu piya untiye. Isu meto kamana agowa uwaimintiye

¹⁰Pigoya, pi aꞌyaꞌma kina atate wagasuguni, nagisarisa tara tumpaema kinaꞌwake to aokinake meto kamana yomeka abigauguna,

¹¹maya uwaimintiye: Tigeba Koti kabiratakibintanagaba ago urimikenaba piye, uwaimite: Uwa kinaꞌmikaba kana amiyo kamana naeba uwaimogini,

¹²pigoya Aisaya pai kaemarantisa puma iba mayaenaba pewe:Igeba abepa agowapa kampa abewe.Agapa agowapa kampa agawe.Piya, ago aogima abesinta aguntaenawaiataigina, Koti mae igasasine, Isu piya uwaimintiye. Aintana punti kamana agowa Isu uwaimintiye

¹³Piya uwaimintana, to kamana maya uwaimintiye: Tigeba ma meto kamanapa kampa abintawo. Aya pumabaya aꞌyaꞌma meto kamana agowapa abikibewe.

¹⁴Pigoya, pi aintana punti ntagara aintana aibarase puntisa puma, aogi kamanapa aibarase piye.

¹⁵Piya, kepi tumintisa puma aogi kamana keꞌi aibarase pogini, pi kaꞌisa kinaꞌmi abepa, kewama karuꞌena kanamapa, intabaipintisa aintana kanta puma wainti kamanapa ampaeriye.

¹⁶Piya, kaꞌisa yabata tumima abuꞌwa kampa pantaisa pumaba, kaꞌisa kinaꞌmiba pewe: Aogi kamana abima maruꞌena iꞌmu puma, arontaganto aogima miyegina, aintiba kana kamanatakaba antaraꞌena aboraginabe ata potakenaena aboraginabe, karuꞌena uwa ataye.

¹⁸Pigoya, toba piya puma kabubinti tumintisa puma, kaꞌisa kinaꞌmaba maruꞌena aogi kamana abima,

¹⁹aintiba mampabisaenaga napima, kotaka ibugagina tonarona maekenaga napiyegana, kana kamanapa agora kaka waye.

²⁰Pigoya, to kaꞌisa aogi mabi tumima tabera irantisa puma, to kaꞌisa kinaꞌmiba kana aogi kamanapa abima aegaꞌma miyewe. Piya, aintanaba kaꞌisa 30-wa, kaꞌisa 60-wa, to kaꞌisa 100-wa suma, aborantisa puma, wasanaba tonarona aogiyenaba Kotiti potawe, uwaimintiye. Igiꞌmaete kampa kaka atakena kamana Isu untiye

²¹Uwaimintana to mayama ibigantiye: Pigoya, wasanama kane yaku igiꞌmaete namapinti wamaba, aeba kankabe maema aibarakitakibe, waikena sipa amentapinti metakibe, yara itagikibayawe, a.

²²We, kampa agantintanaba agorapa kampa kaka wantiye. Toganaba kanewama eꞌwasa pisa puma meto kamanaꞌama nkagowapa aborakiye. Airari kaentaꞌenaba toganaba aborawaekiye.

²³Ageyaga kinaꞌmaba abeno, uwaimintiye.

²⁴Uwaimintana to kamana maya uwaimintiye: Pi abe kamana aogima abima tigebi ataiyo. Abimagiri tigeba wasana pabi aborawaimikibe nkawameta Kotiba aꞌwae puma timikiye.

²⁵Pigoya, wasanama kaꞌisa agowapa aogima napikibipa, uwoma to agoba Kotiba omikiye. Pigoya to yagarama kamana agowa kampa napikibipa, abikenaenawapa Koti maegaikiye, piya uwaimintiye. Aintana iranema meto kamana Isu untiye

²⁶Uwaimintana Isu to maya uwaimintiye: Pigoya, Kotiba mayama taepa kabirataye: Wasanama yogari wama, aintana pugaitegina,

²⁷asi nasi asekapa waimarate, arapa asima uma agateginaba: Aya pumabaya kana aintanaba iꞌma anosakiyema, napiye.

²⁸Piya, aewa mabintisa iꞌma aꞌyenka aboraurite ima, aosaba pama anontana pegina,

²⁹pi ntagaba yogari wama naninta umaeye. Pigoya nanintara kabiyisa puma Kotiba piyama tagutapa kabirataye, untiye. Ya aꞌwa meto kamana Isu untiye

³⁰Piya untana Isu to maya untiye: Pigoya, Koti kabiratamisa puma nanawe ukune. Pikaba ayama meto kamanapa ukunema, ibigantana:

³¹Pigoya, masiteti yawama nkaowapa uwaenantonto waintakana maema aintana pukibipa,

³²pipisa iꞌma anosama tabe ya ima, amaba tabera wagana kana pegina, kabarankamaba amari inapa kiyewe. Pintana piya pemisa puma Kotiba piyamakabirataye, uwaimintiye. Meto kamanaꞌwaka Isu kamana untiye

³³Pigoya, uwoma meto kamanatasa aogi kamanaꞌwapa uma ige abikena kamana uwaimogini abima napiyuguna, toma toma meto kamana aꞌyaꞌma kina uwaimitegina, togana abagi kinaꞌwa ibiwaipa meto kamana aꞌyaꞌma agowapa uwaimintiye. Pontawama Isu nkawamu wasintiye

³⁵Pigoya, pi ntaga ase yogana: Taꞌema maroteri wakune, uwaimitegina,

³⁶Isu wanipisa karebi mima, awamori mintume kinapa itaogini, abagi kinaꞌmi wanipisa karebi ababute wauguni, to wanipisa karebi kaꞌisa kinapa aege wantawe.

³⁷Piya puguna, agasiya ponta kanama wanipa tabera aigaꞌyoꞌya puma, kaꞌisa wanipa wanipisa karebinti iyogana, kunta puma ipirintakena puntiye.

³⁸Isu aꞌno aisagenawata waitamintogini, igeba aeti wama abage pumagini maya omintawe: Tisa yagara, kaeba taekaba kampa napiyeno. Taeba naisukena pune, omintawe.

³⁹Piya omuguna, aeba asimagina pontawamakaba tabe kamana umagina, waninkamaba: Pasebuma, uwa waiyo yogana, ponta aꞌya waogana wanipa uwasuwa puntiye.

⁴⁰Aibogana maya uwaimintiye: Nanaga tiyekuruba pewe. Timititiꞌenaba kampa waintiya, a, untiye.

⁴¹Piya yogini, igeba pami pumagini: Aeba nana yagaragana, pontawamabe waninkamabe ae kamana wasiyesema, igeba mare-u me-u puntawe.