Read Fore Maka 5 Bible Online

Maka 5 - Fore bible

Maka 5

¹Pigoya, igeba kotu maronkateri wama, Kerasa kinaꞌmi mpari wama,

²wanipisa kare atate tumogana, wasana irubintisa ka yagara, ke kina antabaipinti minta yagarama, Isuti kanantiye.

³Kana yagaraba asi nasi wasana irubinti miyogini, wasanami kampa arakuꞌma esegi igaꞌnarasa kampa ayapa kirokaentawe.

⁴Pigoya kaꞌisa kinaꞌmi pai uwoma ntaga arakuꞌma, agisa ayatapa esegi igaꞌnarasa kirokaetauguna, ayapisa atisa kaitegina agisabisa airisa pugasi pogini, wasanamiba esegiyenawapa kampa asugaintawe.

⁵Kana yagaraba aꞌyaꞌma yaga arape asenabipe wasana irubinti mintana amuti mintana pumagina, ata kigaꞌe uma yaba kasu mpaema aupa airisa puntiye.

⁶Pigoya, aeba eꞌero marisa Isupa agategina, karuꞌena kanama aeti ampa arakabima mintogana,

⁷Isuba: Ma ntagarama nkantabaipisa ke kinapa irosao, omintiye. Piya omogana, kana yagarama taberasa maya untiye: Isu, kaeba inatisa tabe Koti Ntagaragawe. Nana punatakena kanane. Koti nkaobi suwa, a-nkata punatao, untiye.

⁹Piya yogana Isu aeba: Kagegapa kegawema, abigantiye. Abigaogana: Taeba uwoma mintompeka, piya puma nagenepa Uwomane unamewe omintiye.

¹⁰Piya omima: Mamparisaba a-tagarubaoma, esegima abigantiye.

¹¹Pigoya, uwoma ntaga amu ararabiri mima naninta nama miyuguni,

¹²ke kinaꞌmiba: Tagarubaga yaga intabaipinti wanoma, abigantawe.

¹³Piyama abigauguna aeba: Pigoya waiyo, uwaimintiye. Uwaimogini kana ke kinapa antabaipisa iroꞌma intabinti ubasuguni, kana yaga, 2,000 yagagini igeba karuꞌena ausari tumima, kotupinti tumpa naisuwaewantawe.

¹⁴Naisuwaewauguni yaga kiye kinaꞌmiba karuꞌena iyegaka wama, waꞌeribe yogaribe wama uwaimuguni, wabe wayape kanagana puma, kana pomentana ampa agakena kanantawe.

¹⁵Isuti kanamagini ampa agaomepa, kana pai ke kina antabaipinti minta yagara kaiwapa amitauguna maraꞌmima aogima mintogini, agate iyekuru puntawe.

¹⁶Aibuguni pomentana agaume kinaꞌmi kana yagaragawa pi yagagawa suma uwaimintawe.

¹⁷Pigoya pi kinaꞌmi: Mampa atate tori wao, ukena puguna, Isu atate tori wantiye.

¹⁸Tori wakena pumagina wanipisa karebi iyogana, kana yagara pai ke kina antabaipinti minta yagara kanama, Isuka: Nababo, yogana,

¹⁹Isu: Aꞌa-o, untana: Waꞌegati wama, Koti antara pugatama aogi pugatami kamana kaokina uma uwaimo, omintiye.

²⁰Piya omogana aeba wama, pi naya taraꞌmu kumaꞌi wama, kana Isu pome kamamapa uwaimikena pogini, aꞌyaꞌma kinaꞌmi abite pami puntawe. Isu kiya yagarama nkaraganto aoꞌmaekena puntiye

²¹Pigoya, Isu wanipisa karebi to wama maroteri wama awamori umintogini, uwoma kina aeti kanantawe.

²²Kanauguna ka mono namatasa kiya yagara, agewapa Yairasi kanama ampa agate Isu agisabi parokaema mima,

²³maya uma abigantiye: Aragantonepa agaro ntaganto purikena piye. Kaeba kanama auta uma arakuregana, aeba atawakanaba aogima miyeno, yogana, aege wantase. Ka waeꞌma Isu kaiwata aukaya puntiye

²⁴Piyama aege wausuguni uwoma kina aegaꞌma wama agora karare putanasuguna,

²⁵ka waeꞌma aeti kanantiye. Kana waepa iyegaena abogana nagisarisa tara tumpaema kabuba miyomepa kampa ata waogana,

²⁶tonarona tusa kinati waomepa, kampa aogi potauguna, aꞌyawaema yabankapa ige imiwaegasomepa, kana yoninkapa kampa ata waogana, to tabera ataena abuntiye.

²⁷Pigoya kana waepa Isu pome kamana abite, uwoma kina mintume ikapinti kanamagina, ampa napima: Kaiwata aukaya pukubopa nata wakiyema ageba napimagina, akaꞌi kanama kaiwata aukaya pogana,

²⁹korankapa ago tabagobu waogana age napiyomepa: Yonintepa ago natawayema, napintiye.

³⁰Aibogana Isu: Kaꞌisa esegiyenane wayema, age napigategina: Kainetapa kebaya aukaya piyema, ibigantiye.

³¹Ibigaogini, abagi kinaꞌmi maya omintawe: Uwoma kinaꞌmi kagorapa mintagana agana, nanagaba: Kebaya naukaya piyeba yene yuguna,

³²Isu: Kebaya piyema, marega mega puntiye.

³³Piya pogana kana waeꞌmaba potaomentanaga napima, aekuru puma tabaraba pumagina, ae agora ampa parokaema mima, aꞌyaꞌwaemaena pome kamanapa omintiye.

³⁴Omogana, Isu maya omintiye: Araganepa, kamatiti punatampeka aogi kabiye. Pika wama aogima miyo, omintiye. Isu kiya yagarama nkaraganto asitantiye

³⁵Pigoya, pi kamana uma miyogana, kaꞌisa kinaꞌmi kiya yagarama namapisa iroꞌma kanama, kiya yagara maya omintiye: Aragagapa ago puꞌwaye. Nanagabaya tisa yagaraba to kamanapa omima miyene, omuguna,

³⁶Isu kana kamana kampa napinta, ini nama kiya yagarapa: A-kaekuru puma, naeka aogima napima miyo, omintiye.

³⁷Omigaite wasanaba: A-kanaiyoma, akunkitate, Pitawa Yemisiwa Yemisi aꞌnantowampa Yoniwa suma, ibiwai ibabute wama,

³⁸mono nama kiya yagarama ntamapinti waumepa: A-e a-e, uma tabe kubeꞌena puma miyuguna, kana kamana abite,

³⁹namapinti ima maya uwaimintiye: Nanagabaya tabe kamana uma kubenaba pewe. Kana aragaba kampa agorapa puꞌwaye. Uwa waitamintiye, uwaimogini,

⁴⁰igeba kagi potantawe. Piya puguna aꞌyaꞌma igarubaogini abeꞌi irosaꞌma tumuguna, kana aragantoma anoke abake abagi kinake ibabute wama, araganto mintometiba intiye.

⁴¹Imagina kana aragantoma ayata uꞌma: Tarita kumi, omintiye. Kana kamanapa tae kamanapisaba: Araganto asiyo ugamuwe, untiye.

⁴²Piya yogana kana araganto karuꞌena asima nasi nasi puntiye. Pi nkaraga kabuwapa nagisarisa tara tumpaema kabu pome nkaragantowe. Asima nasogini igeba agasiyama pami puguna:

⁴³To kinapa pontanaga a-nkuwaimiyo, untana: Kana araga naninta amigina nano, uwaimintiye.