Read Fore Maka 6 Bible Online

Maka 6 - Fore bible

Maka 6

¹Pigoya, Isu pitasa itate mawati waogini, abagi kinaꞌwampiba aege wantawe.

²Pigoya sabati yagaba mono namapinti wama kamana yogini, uwoma kinaꞌmi abite pami puma maya untawe: Ma ntagara aetasabaya kana kamanapa maeye. Aetasabaya ma aogi napiyenaba maeye. Aya pumabaya kampa agaompentana aewapa esegima piye.

³Taeba agowapa abintune. Aeba kapenta yagara, Meri ntagara mintiye. Yemisige Yosesege Yutasige Saimonige igantowaimpa mintegini, ae imanapa mata taege miyewe, piya umagini Isuka abuguna kampa aogi puntiye.

⁴Aibogana, Isu maya uwaimintiye: Koti unti kamana yemi poropete yagarama kamanaka uwoma kinaꞌmi ibugaye. Pigoya mawatape namankapipe ageba kampa waintiye, uwaimintiye.

⁵Piya, aeba kana mariba kampa tabe yuga puntamikana, yoni kinapa taranto ita uꞌma aogi puwaitantiye.

⁶Aibogini igeba aekaba kampa napiyuguna: Nanagabaya kampa abewe, untiye. Piya ute, pabi kumata uwaena kumaꞌantontori nasima kamanaꞌwapa uwaimintiye. Isu abagi kinaꞌwa: Yogaenari waiyoma, uwaitantiye

⁷Isu abagi kina nagisarisa tara tumpaema kinaꞌwa igegaꞌe yogini menkaki puguna, ke kina agarubakena esegiyenaba imima tara tara puma to aukaꞌi to aukaꞌi igarubaꞌma,

⁸maya uwaimintiye: Tigeba nasikibepa, kotapa a-mpaete wantiri nanintabe kope uwa atantiri, tibamukantisa ikantana pukena yabapa a-nkurite waigina, Koti kabiritakiye. Pigoya, pusuꞌma nasikena asage,

⁹tigisa anage maentiri, kaiba kaꞌanto purite waiyo, uwaimintiye.

¹⁰Pigoya to kumati to kumati waigini, maru: Naege mikibewe ikibi ntagarama ntamapi wama, pi kumata aꞌyaꞌma yaga aege umigategiri, to kumati waiyo.

¹¹Pigoya to kumati waigini, kampa tiꞌmaꞌma kamanati kampa abigiripa, tigisarisa iꞌni asari puwaitate toriba waiyo. Piya piginaba: Kampa taekaba iꞌmupa pewema napikibewe, uwaimintiye.

¹²Isu uwaimogini, igeba nasima: Tigeba ataenaripa kasiyo uwaimintini,

¹³uwoma ke kinapa igarubantini, uwoma yoni kinaꞌmipa iꞌnoti masawae paiꞌitauguni ita wantiye. Yoni wani paiꞌitanti ntagara puꞌwantiye

¹⁴Pigoya, Isuka kamana mare-u me-u puguna, Eroti kiya yagara yome kamana abintiye. Piya, Isu esegi yuga pikana: Yoni wani paiꞌita pome ntagara puꞌwatitisa asima mintibayawema, kaꞌisa kinaꞌmiba napiyuguni,

¹⁵to kaꞌisa kinaꞌmiba: Iraiyabayawema yuguni, to kaꞌisa kinaꞌmiba: Pai Koti kamana unti ntagara kanta pikana kana yagaraba poropete yagarabayawema, napintawe.

¹⁶Piya yuguna, kana yagaraga Eroti maya untiye: Yoni wani paiꞌita pome ntagarabayawe. Nae uwaimuwagini anaꞌmu arisata ntagarama asima mintiyema, napima untiye.

¹⁷Pigoya, pai Eroti nkaꞌnantowampa Piripi nkwae Erotiyasi maeyogana, wani paiꞌita punti ntagara Yoni Erotipa maya omintiye: Aꞌyuguma kaꞌnantogampa nkwae maeyane, omogana, abigategina pika Eroti wasana uwaimogini, Yonipa arakuꞌma igaꞌnarasa kirokaetama, igaꞌna namapinti metantawe.

¹⁸

¹⁹Aibuguna Erotiyasi Yonipa kabiꞌma aegukena pogana,

²⁰Eroti, Kotiti Yoni aogima aegaranta yagaragana, agate aekuru pumagina, Yonitapa kabima mintantiye. Aibuntana Yoni kamana abisanaga abugaogana, asi nasi abite Eroti pami puma aekuru puntiye.

²¹Piya pogana ka yaga Erotiyasi Yonika ataena potakena agi napintiye. Pi ntaga awaewampa yakari potanta yaga aboraogini, kamani kiya kinake ami kiya kinake Karariya kumatasa kiya kinake menkaki puguna, Eroti taena puwaitaogini nama iꞌmu potantawe.

²²Piya puguna, Erotiyasi nkaragawaeꞌwampa wama waꞌena uma pogini, Erotige kiya kinaꞌmige iꞌmu potamagini, Eroti mayama abigantiye: Aragawae, nanaga kabiye. Kabikibintanaga unamegapa kamukuwe.

²³Taga kauwe. Kaꞌisaenaneka kabikibintanaga unamegapa uwa kameno untiye.

²⁴Piya yogana, kana aragawaeꞌma abeꞌi iroꞌma tumima anowampaka: Nana namoma abigasuwe yogana, anowampa maya omintiye: Yoni wani paiꞌita pemi ntagarama nkaꞌno arisa namoma abigao, omogana,

²⁵karuꞌena kana kiya yagarari wama maya omintiye: Ibanto Yoni wani paiꞌita pemi ntagarama nkaꞌnopa arisaꞌma tuꞌnapi atama namo, yogana,

²⁶kana kiya yagaramaba antara pugantiye. Pigoya, aki puntume kinaꞌmiba: Taga kauwe yome kamanapa abuguna pika napintana: Aꞌa-oba kampa unta,

²⁷irebu yagaraga: Wama Yoni nkaꞌno kasama menkamo, yogana, igaꞌna namapinti wama uma kasama,

²⁸tuꞌnapi atama maete aragawae menkamogana maete anowampati memintiye.

²⁹Aibogini, Yoni abagi kinaꞌmiba abitegini, abamupa maema mabinti kaitantawe. Isu uwoma kina nayakaꞌmu pareti imintiye

³⁰Pigoya, Isu nkabagi kinaꞌmiba yogawaipa atate Isuti wama, aꞌyaꞌma pume kamanape uwaimume kamanape ampa omintawe.

³¹Piya puguni uwoma kinaꞌmi pitaꞌi kanagate wate puguni, Isuge abagi kinaꞌwampige kampa nanintaba nauguna, pigoya abagi kinaꞌwaka mayama uwaimintiye: Tabire to aukaꞌi wama, kampa wasana mima aukaꞌi uma migarakune, uwaimogini,

³²wanipisa karebi ibinto kaꞌme mpari wakena puntawe.

³³Pigoya igeba wakena puguni, uwoma kinaꞌmi igate, aꞌyaꞌma kumatisa atate karuꞌena awamori wama, umikena pome mpara maru umintuguna,

³⁴Isu pita wanipisa karebintisa irosaꞌma, uwaena kina tumpa igaomepa, piyama yaga awaro ano kampa miyisa puma, igeba mintuguna, tumpa igate antara puwaitama, uwoma kamana uwaimikena agobintiye.

³⁵Piya, ase ikena pogini, abagi kinaꞌmiba Isuti kanama maya omintawe: Ibanto atamaisaya, mapa kaꞌme mpari mintuna,

³⁶aꞌyaꞌma kinaka: Kumaꞌibe yogaribe wama nanintarika uma agama ika piyo, uwaimintana igarubaoma, omintawe.

³⁷Piyama omuguna Isuba: Tigeba naninta maema imiyo, untiye. Piya yogini igeba: Aya pusune. Moneba 200 torarasa nanintaba ika puma imisanagaba kabiyoma, abigantawe.

³⁸Abigauguna, Isu maya uwaimintiye: Ayaki nanintaba urintabayawa, wama agaiyo, untiye. Yogini, igeba wama ibiga ibiga pugate kanama: Nayakaꞌmu paretiwa, inoyanta tarawa suma waintiye, omintawe.

³⁹Piya omuguna, Isu abagi kinaka maya uwaimiyoma uwaimintiye: Tigeba apepati aꞌyaꞌma kina ka umaki ampaki puma miyiyo uwaimiyo, untiye.

⁴⁰Piya yogini, uwaimuguni maropi mopi ka umaki ampaki puma maraꞌmimagini, kaꞌisa auꞌi 100 kina maraꞌmiyuguni, to kaꞌisa auꞌi 50 kina maraꞌmintantawe.

⁴¹Maraꞌmintuguna Isu kana naya kaꞌmu paretiwa, tara inoyantawa suma mae uꞌma mantari ao maꞌmagina Kotiti aꞌmu potamagina, pareti apako puma abagi kina imogini maete nasima imintawe. Pabiya puma inoyanta tarage apako puma, aꞌyaꞌma kina imogini,

⁴²pigoyema aꞌyaꞌma kinaꞌmi naumepa igaꞌe pantiye.

⁴³Aibogini, abagi kinaꞌmi nasima paretibe inoyantabe aritapa maema, nagisarisa tara tumpaema ku iragintawe.

⁴⁴Pigoya, kana naninta naume kinapa waba 5,000 waba mintantawe. Isu wani nkabobori nasintiye

⁴⁵Pigoya, Isu abagi kinaꞌwaka: Naeba aꞌyaꞌma kina igarubakiri, tigeba wanipisa karebi paitama maronkateri Petisaira kumati waiyo, uwaimintiye.

⁴⁶Pigoya: Tigeba waiyo, uwaimitegina amuti nunamu ikena intiye.

⁴⁷Piya, abiwa mima nunamu untana asekapa abagi kinaꞌwa wanipisa karebi kotu nkakapinti mintuguna,

⁴⁸igaomepa tabe esiba kanama, wanipa aigaꞌyoꞌya aigaꞌyoꞌya pogini, wanipisa kareba kampa aogima pubasanantawe. Aibuguna, Isu igate tumima, aseka aba mariki wani nkaꞌeti ige igora wamagina uwaigaite,

⁴⁹wani nkaꞌeti nasogini, agate: Puꞌwanta kinaꞌma nkamapayawe, utegini, igeba aꞌyaꞌma agate iyekuru puma: A-e, a-e, untawe. Piya yuguna, Isuba: Naene kanauwa, tiyekuruba a-piyo, utegina,

⁵⁰

⁵¹wanipisa karebi igege asu miyogana, esiba to pomesapa kampa puntiye. Aibogini agasiya pami pumagini: Ayabaya piyema, napintawe.

⁵²Pigoya, atamaita pareti apako puma imomeꞌna nkagowapa kampa aogima napiyuguna, kunta ibuntiye. Isu uwoma yoni kina Kenesareti aogi puwaitantiye

⁵³Pigoya kotu maronkateri wama, Kenesareti mara iroꞌma wanipisa kareba ubuꞌatate wantiye.

⁵⁴Piyama wauguni, wasanamiba Isu agate,

⁵⁵aꞌyaꞌma kumati karuꞌena wama uwaimuguni, yoni kina wasirite Isu mintometi kanagana puntawe.

⁵⁶Piya, Isu tabe kumatibe uwaena kumaꞌantontoribe yogaribe nasima agaogini, yoni kinapa wasirite kuma akapi meta menkata puma mintini: Kaeba kanagini kautasaenama nkatuta urigina ita wano, yuguni, aꞌyaꞌma kina autasaenara uruguna ita wantiye.