Read Fore Maka 7 Bible Online

Maka 7 - Fore bible

Maka 7

¹Kaiꞌisa Parasi kinake mono tisa kinake Yerusaremisa kanama Isuti ampa aki puguna,

²kaꞌisa aokinaꞌmi Parasi kinaꞌmi uwaimumesa puma, kampa iyantana punta, uwa nanintawai nauguni igantawe.

³Piya, Parasi kinaꞌmige aꞌyaꞌma to Yuta kinaꞌmige iyabami yume kamana aegaꞌma: Kumite aebasanaunema napima, iyankaota asu maꞌmaema iyantana pugaitegini, nanintaba nantawe.

⁴Pigoya, igeba maketibisa naninta maeyumepa, kampa wasimi punta, kana naninta kampa nantawe. Piya toma toma paisa kamana abintini, kankabebe tuꞌnape kaoꞌena punakena tinibe abumesa puma wasimi puntawe.

⁵Pigoya nanintawai uwa nauguni igate, Isuka Parasi kinaꞌmige mono tisa kinaꞌmige mayama abigantawe: Kabagi kinakampiba, nanagabaya tayabami untasa puma kampa iyapa wasimi punta, uwa nawe, untawe.

⁶Piya yuguna Isu maya uwaimintiye: Tigeba kumpari kinaꞌmitaba, pai Aisaya mayama tigeka Koti kamana taga kamana ago kaemarantine:Ma kinaꞌmiba iwamutasaba nae nage asagaꞌyuntini, iguꞌamaba pagasara miyewe, iye.

⁷Naeti monoꞌwaipa kampa yewa, uwa yewe, iye.Nae kamanaꞌnepa kampa unta, wasanami kamana yewema, Koti iyema, kaentiye.

⁸Piya, tigeba nanagabaya Koti kamana akayuma, wasanami kamanapa abewe, untiye.

⁹Piya untana to maya uwaimintiye: Tigeba ayabaya Koti kamanapa akayuma wasanami kamanapa wasiyewe. Pipa kampa kanarasaye.

¹⁰Piya, Mosese pai maya untiye: Kano kaba kamana abima wasiyo, untana: Wasanama anoke abakega kamparaga kamana ukibipa, aepa aeguma kaiyo, untiye.

¹¹Pigoya tigeba piya yepa: Anoba isimikenaenaga: Mapa kobaniwe umagina, tae kamanapisa: Mapa Koti amikenaenawe, umagina,

¹²ano aba kampa isimikibipa, Aerane yewe.

¹³Piya puma tigeti kamana yepa, nanagabaya Koti kamanapa uwa atawe. Piya, tonarona piyaena pewe, Isu uwaimintiye. Tantabaipinti ataena pusanaga Isu kamana uwaimintiye

¹⁴Pigoya, Isu pi kinaka kegaꞌe yogini, menkaki puguna maya uwaimintiye: Kamanaꞌnepa tigeba aꞌyaꞌma abibebe puma abiyo.

¹⁵Uwa marisaena wasanama maema nakibipa, agupa iꞌnintana kampa potakiye. Piya, wasanama atama napiyekanaba agupa iꞌnintana potakiye, uwaimintiye.

¹⁷Uwaimitegina wasanaba itate namapinti iyogini, abagi kinaꞌwampi kana meto kamanaka abigauguna,

¹⁸maya uwaimintiye: Tigege kana kamana agowapa kampa abintawa, a. Wasanama uwa marisa naninta maema nakibipa kampa iꞌnintana potakiyema, kampa abintawa, a.

¹⁹Pipa kampa agupipa waikiye. Agaꞌepa tunkwaiyekana uwa megaikiye, untiye. Piya, Isu kamana agowapa: Aꞌyaꞌma nanintaba aogi nakena naninta waintiye, untiye.

²⁰Pigoya to maya untiye: Wasanama age napikenaenawampa agupa kamparagaba pikiye, untana:

²¹Wasanama antabaipisa toma toma napima aguntaenaba piye. Pipa mayamawe: Ata napiyenawa, kupiyonawa, kuntanawa, wasana aegukenaenawa, kumiyenawa,

²²to wainantana maekenaenawa, aguntaenawa, kumpariꞌenawa, iꞌnintanawa, to waina mparu maekenaenawa, akayasukenaenawa, agebigoꞌenawa, aiboꞌena pikenaenawa sumawe.

²³Piyaenaba napiyenawatasa aborama agupa iꞌnintana potakiye, uwaimintiye. Ponisiya kumatasa waeꞌma Isupa aogima aegarantiye

²⁴Piya puntana, Isu asima pi kuma atate, Taya kuma agora wama napintiba uma migarakena pogini, wasanamiba: Ago Isu ampintiyema, napiyuguna,

²⁵ka waeꞌma abite Isuti kanama, agisabi uma parokaentiye. Kana waepa namuꞌisa wae, mawapa Siriya Ponisiya kumatasa waepa mintomepa, aragawapa ke kina antabaipinti minta aragawae mintogana, Isuti wama mayama abigantiye: Araganepa ke kina antabaipinti mintiya, wama agarubao, untiye.

²⁷Piya yogana, Yuta kinake to kinakega Isu meto kamana maya omintiye: Maru yakarantontomi ntaninta imigaite, karawama naninta aintiba imikena pewe. Aꞌyugu yakarantontomi ntaninta kara amisanagawe, omintiye.

²⁸Omogana: We naba-o, yakarantontomi naninta arita maema karantonto imegini nawe, untiye.

²⁹Aiyogana, Isu maya omintiye: Aogi kasa yena, waꞌegati wama aragagapa uma agao. Antabaipisa ke kinapa ago wagasaye, untiye.

³⁰Piya yogana aeba waꞌeri wama, aragawa sipara uwa waitamintogana uma agaomepa, kana ke kinapa ago wagaintiye. Ageba akunkanta yagara Isu aogi potantiye

³¹Aibogana, Isu Taya maba atate Saironi kumapa agaite, nayataraꞌmu kuma waintome kiꞌi wama, Karariya kotuta wantiye.

³²Wama umintogini, kaꞌisa kinaꞌmiba agekumpa kampa aogima kamana yome ntagara ababute Isuti kanamagini: Kaya aukaya pegana, ata wano, untawe.

³³Piya yuguna, Isu kana yagara abiri ababute wamagina, aya amarasa ageba purosa atate, kaisa puma antebura atama,

³⁴mantari mayo agauꞌmagina, antara potama: Epata, untiye. Piya, tae kamanapisa: Ageba aꞌwaiyo, untiye.

³⁵Piya yogana pabigo ageba aꞌwaiwaogana, awamupa kampa kunta abogana kamanapa uwa untiye.

³⁶Piya pogana, Isu: Makaba wasanaba a-nkuwaimiyo, untiye. Piyama toma toma: A-nkuwaimiyo, yogini, igeba uwaimome kamana uwa atate, to kinati mare-u uwaimi me-u uwaimi puguni,

³⁷aꞌyaꞌma kina abite tabera pami pumagini: We, aꞌyaꞌwaemaenaba aogiyena puntana, agekuninta kinake, miꞌmiꞌmaꞌma kinake aogi puwaitaye, untawe.