Read Fore Maka 8 Bible Online

Maka 8 - Fore bible

Maka 8

¹Pigoya, pi ntaga wayaꞌwa uwoma aki puntawe. Aki pumagini, nanintawaipa nawaegasuguna, Isu abagi kinaꞌwaka kegaꞌe yogini kanauguna maya uwaimintiye:

²Ma kina naege kakaga yaga miyepa, ibanto naninta iꞌmiyega nantara puwaitauwe.

³Kaꞌisa eꞌero marisa kanata kina kampa naninta iminta waꞌeri igarubakubopa keꞌi iyonanta puma iyegukiye, untiye.

⁴Piya yogini, abagi kinamiba: Mapa kaꞌme mpariwa, uwoma kina naninta imikenaba aetasabaya maema imukunema, abigantawe.

⁵Piyama abigauguna: Paretiba ayaki urite kanawema, Isu ibigantiye. Ibigaogini: Tonaentisa tara umaema waintiye, untawe.

⁶Piya yuguna, Aꞌyaꞌma kina maraꞌmiyiyo, yogini, maraꞌmiyuguna, kana tonaentisa tara umaema paretiba mae uꞌma, Kotiti aꞌmu potama, apako puma abagi kinawaka: Maema imiyo, yogini, pabi yomesa puma maete nasima, aꞌyaꞌma kina imintawe.

⁷Aibuguna to inoyanta taranto waintogana, pike maema aꞌmu potama imimagina: Maete wama imiyo, untiye.

⁸Piya yogini, imuguni maema nauguna igaꞌe pantiye. Pi kana kinapa 4,000 kinaꞌmi nantawe. Pigoya igeba nagate, kaꞌisa arita ataumepa, abagi kinaꞌmi nasima maema tonaentisa tara umaema ku iragintawe. Piya puguna, Isu aꞌyaꞌma kinapa igarubantana,

¹⁰karuꞌena abagi kinaꞌwake wanipisa karebi mima, Tamanuta mari wantawe. Kaꞌisa kinaꞌmiba awameꞌenaga abigantawe

¹¹Umintuguni, kaꞌisa Parasi kina aeti kanamagini tonarona kamana uwa abigantini: Kaeba mantarisa awameꞌena purayakega, agakubompepa Kotiba aꞌmu pugataye ukune, untawe.

¹²Piya yuguna, Isu antara puma aemu maema maya uwaimintiye: Nanagabaya ibasa kinaꞌmiba: Awameꞌenaba tayako, yewe. We, taga kauwe. Kanaenaba naeba matasa kinapa kampa tiyakikuwe, uwaimitegina,

¹³itate wanipisa karebi asumima maroteri wantiye. Parasi kinakabe Erotigabe Isu kamana uwaimintiye

¹⁴Waomepa abagi kinaꞌmiba nanintaba igeguꞌa puguna kaꞌanto wanipisa karebi waintogana,

¹⁵Isu: Aogima napiyiyo, uwaimintana: Paretibi yisiti atagana anosamisa puma, kiya yagara Erotibe Parasi kinaꞌmiba ata kamanaꞌwai anosasanaga kabiyiyo, uwaimintiye.

¹⁶Uwaimogini: Nanawebaya iyema, abagi kinaꞌmiba napimagini: Pareti tabe pukenaena kaite, tageguꞌa puma kanaompekabaya napimaiye, untawe.

¹⁷Piya yuguna, Isu abitegina mayama to ibigantiye: Nanagabaya pareti kampa waintemika yewe. Tige ibaba esegiyenanepa kampa agantawo. Kampa aogima napiyewo.

¹⁸Tigeba tiyoba waintiye. Kampa agawo. Tigeba tigeba waintiye. Kampa abewo. Aꞌyaꞌwaemaenagaba tigeguꞌa pewo.

¹⁹Nayakaꞌmu pareti apako puma, 5,000 kina imuwagini nagate, atunkapa ayaki ku iragintawema, ibigaogini: Nagisarisa tara tumpaemawe omintawe.

²⁰Piya omuguna, Isuba: Pigoya tonaentisa tara umaema pareti apako puma, 4,000 kina imuwagini nagate, atunkapa ayaki ku iragintawema, ibigaogini: Tonaentisa tara umaema kune, untawe.

²¹Aiyuguna: Pigoya ibanto agowapa kampa napiyewoma, ibigantiye. Isu Petisaira kumata aorika yagara aogi potantiye

²²Pigoya, igeba Petisaira kumati waumepa, kaꞌisa kinaꞌmi aorikaenta yagara Isuti ababute kanamagini: Auta aukaya poma, abigantawe.

²³Piyama abigauguna, Isu kana aorikaenta yagara ayakana urite, kumatasa abeꞌi uwa mari wamagina, aobi kaisa potama, ayapa aora arakuꞌma: Ago aganoma abigantiye.

²⁴Abigaogana agategina: Wasana agaopa yawama nasisu piye untiye.

²⁵Piya yogana, Isuba aora to aya urogana aoba apinaꞌma agaogana ata waogana, aꞌyaꞌwaemaenaba aogima agantiye.

²⁶Agaogana Isu: To ma kumatiba a-nkwamagina, waꞌegati wao, omintiye. Kaeba Koti utaratanti ntagaragawe, Pita Isuka omintiye

²⁷Piya omite, Isuge abagi kinaꞌwake Sisariya Piripai kumati wama, keꞌi abagi kinaꞌwaka: Naekaba kebayawe yewema ibigaogini,

²⁸igeba maya omintawe: Kaꞌisa kinaꞌmiba Yoni wani paiꞌitanti ntagarawe yegini, kaꞌisamiba Iraiyawe yegini, to kaꞌisamiba poropete yagarabayawe yewe, untawe.

²⁹Pigoya tigeba naekaba kewema napiyewema ibigaogini: Kaeba Koti utaratanti ntagara Karaisitigawema, Pita omintiye.

³⁰Omogana: Pigoya naekaba wasanamipa mayaba a-nkuwaimiyo, uwaimintiye. Isu aewa purikena kamana uwaimintiye

³¹Pigoya, Isu abagi kinaꞌwampi kamanaꞌwapa agobima maya uwaimintiye: Wasanama Ntagaranaga tabe kuntaenabi mpikuwe. Monota kabiyume kinaꞌmige, mono kiya kinaꞌmige, mono tisa kinaꞌmige naepa uwa natakibewe. Pigoya, asa wasanami naeguyigi, kakaga yaga puꞌma mintakana asinatakiye, piyama pagusama untiye.

³²Piya yogana Pita abiwa ababurite wama kabiꞌmagina: Pi kamanapa a-so, omogana,

³³Isu aꞌwae pumagina abagi kinaꞌwa igate, to Pitati aꞌwae puma maya omintiye: Satanigawa, kaeba natate wagaso. Napiyenagapa Kotintaba kampa maeyane. Uwa wasanamanta maeyane omintiye.

³⁴Piya omitegina, Isu abagi kinaꞌwakaba aꞌyaꞌma to kinakabe: Mataꞌi kanaiyo, yogini, kanauguna maya kamana uwaimintiye: Kaꞌwaina naegarakibipa, kaeꞌenaenagapa atate naegaragana, wasanami igobi pugatakibikaba a-kaekuru puma maripogapa aesagaꞌuritegina naegarao omukuwe, uwaimintana:

³⁵Pigoya, kaꞌwaina mikenaenawaka owe yekanaba, aꞌyugu potakiye. Naeka aogi kamanaꞌneka mikenaenawaka aꞌa-o yekanaba aboramikiye. To kaꞌwaina aeꞌwa nkaguka napi napi pikibipa uwa purikiye.

³⁶Pigoya, kaꞌwaina mabi aꞌyaꞌwaemaena maemagina aguꞌamankapa kaiyekanaba, aya pikiye, a.

³⁷Agupa ayamabaya to kakema ika pekana kanarasakiye. Pipa kampaye.

³⁸Pigoya, ibasa yagaba wasanamiba Kotipa atate aguntaena pewe. Piya pekana, wasanama ibaba naeke kamananekega ani pikibipa, toganaba nabanempa nkeꞌwasaena yaga enisore kinake tumukubopa, Wasanama Ntagaranaga, pi naeka ani pikibi kinapa uwa atakuwe untiye.