Read Fore Maka 9 Bible Online

Maka 9 - Fore bible

Maka 9

¹Piya untana to maya untiye: Tigeba abiyo. Kaꞌisa mata miye kinapa maru Koti esegima kabima mintintana agakibepa, aintiba purikibewe, piya untiye. Amuti Isu nkauꞌama eꞌwasa puntiye

²Pigoya, tonaentisa ka umaema yaga, Isuba Pitana, Yemisina, Yonina suma, ibiwai ibabute eꞌero nkamuti asu mintogini, igeba agaumepa aupa to au maeyogana,

³autasaenawapa wae kanta puma agasiyaena puma eꞌwasa puwantiye. Piya mampabisa kinaꞌma kai wasimi pekanaba kampa piyaba pikiye.

⁴Piya pogini Iraiyaga Mosesege aborama, Isuge kamana yuguni, pi kakaga abagi kinaꞌmiba agate,

⁵tabera iyekuru puma, Pita kampa aogima napinta Isupa uwa maya omintiye: Kiya yagarama-o, taeba aogima maba miyompeka, kakaga nama kikune. Kapa kaeꞌenawa, to kapa Mosesentawa, to kapa Iraiyantawa sumagi, kikune, untiye.

⁶

⁷Piya yogana, ibina pabita aborama amankama aerarikaeyogana, ibinapisa maya kamana tumintiye: Mapa nae nabugai ntagaranena, ae kamana abiyo, untiye.

⁸Piya yogini igeba to karuꞌena maeꞌaebuma agaumepa, to kinapa kampa mintuguna, Isu abiwa igege mintantiye.

⁹Aibogini, igeba amutisapa atate tumuguna, keꞌi Isu maya uwaimintiye: Ibanto agantanagaba wasanaba a-nkuwaimiyo. Wasanama Ntagara naepa puꞌwakubotisa asinatakibipa kanarana uwaimiyo, untiye.

¹⁰Piya yogini, pabi yomesa pumagini kampa wasanaba uwaimintini, igewai mare-u me-u puma: Ayagabaya puꞌwakubotisa asinatakiyeba iye, untawe.

¹¹Piya untini Isu mayama abigantawe: Mono tisa kinaꞌmiba: Nanagabaya Iraiya maru kanakiyeba yewema, abigauguna,

¹²aeba maya uwaimintiye: Taga kaewe. Iraiya maru kanama aꞌyaꞌwaemaena aogi puwaitakiye. Pigoya nanagabaya mono isapipa: Wasanama Ntagaraga ata potakenaenabe uwa atakenaenabe waikiye untiye.

¹³Piya, naeba urimuwe: Iraiya ago kanaogana, esapinti aekaba kaemarantisa puma, wasanamiba napima ata potantawe, uwaimintiye. Ke kina antabaipinti minta yagaranto Isu aoꞌmaentiye

¹⁴Pigoya, igeba to abagi kinati tumima, tumpa agaumepa uwoma kina aki puma mintuguni, kaꞌisa mono tisa kinake abagi kinake mima esegi kamana uma miyuguni,

¹⁵pi aki puntume kinaꞌmiba Isu agate pami puma, aeti wamagini: Aya pene, untawe.

¹⁶Yuguna Isu abagi kinaꞌwaka: Esegi kamanapa igege nanawebaya yewema ibigantiye.

¹⁷Ibigaogana, ka yagara wasana ikapinti mintometisa maya omintiye: Tisa yagarama-o, yagaranepa ababute kaeti kanauwe. Piya, yagaranepa ke kina antabaipinti mintegina, kamana kampa yegina,

¹⁸kana ke kinaꞌma ata potama, apasanakasagina mabi tumpa aeguyegina, akagawa tuwaruwa puma awara upababuma tagagabaꞌwagi, kabagi kinaka: Kana ke agarubaiyo, yopa, kampa pewe, untiye.

¹⁹Aiyogana Isu maya uwaimintiye: We, tigeba kampa tigupa aogi pe kina mintawa, ayaki yaga tigegeba mikuwe. Ayaki yagabaya kamanaꞌnepa kampa abikibewe. Pigoya, naeti ababute kanaiyo, untiye.

²⁰Piya yogini aeti ababute wantawe. Ababute wauguna kana ke kinaꞌma Isu agate, kana yagaranto aeguma aebasana kasogana, mabi tumpa wareware pogana, awamupintisa akagawe irintiye.

²¹Aibogana Isu kana abawampapa: Ayaki yaga kanaenaba abuntinema, abigantiye.

²²Piya yogana aeba maya untiye: Uwoma ntaga aegukena pumagina, yakupipe wanipipe aesagayuma mae maebiye. Tasiyoꞌmaekena napintanapa kantara purasitama tasiyoꞌmaeyo, untiye.

²³Piya yogana Isuba: Kae napintana unamempeno. We, napiyenaga naeti atakibempepa, aꞌyaꞌmaenaba Koti aogima kaoꞌmaekiye, omintiye.

²⁴Omogana, karuꞌena kana yagarantoma nkabawampa kegaꞌe uma: Naeba napiyenanepa uwaenanto kaeti atauwa, naoꞌmaeyo untiye.

²⁵Piya yogini, uwoma kina Isu nkagora ampa aki puma, agakena puguna igate, Isu ke kinapa maya esegima omintiye: Kaeba agebe awamupe akumpaꞌma miyempe ke kinakawa, kana yagaranto atate iroꞌma wagasimagina, toba antabaipintiba a-kanaoma, nae ugamuwe, untiye.

²⁶Piya yogana, kana ke kinaꞌma agasiya kegaꞌe uma, kana yagarantoba aeguyogana, aukomentanaga maeti tagaga paꞌwaogana, atate iroꞌwantiye. Iroꞌwaogana kana yagaranto puꞌwasu puwaogini, uwoma kinaꞌmiba: Ago puꞌwayema, napintawe.

²⁷Pigoya, Isu yagarantoma nkayata uꞌma asitakena aoꞌmaeyogana asima mintantiye.

²⁸Aibogana Isu namapinti iyogini, abagi kinaꞌmiba ibiwai aeti wama: Nanagabaya taeba ke kinapa kampa agarubaunema, abigantawe.

²⁹Abigauguna: Kana ke kina agarubakenaba uwaba kampaye. Nunamurasa ka agarubakenaenawe, uwaimintiye. Isu aewa purikena kamana to uwaimintiye

³⁰Pigoya, pi kuma atategini Karariya mari wama, Isu: Nabagi kina ago kamana uwaimikena pekini, aꞌyugu uwa kinaꞌmi nagate menkaki pusanagawema, napimagina, ibiri ibabute wama maya uwaimintiye: Wasanama Ntagaranagana, nababuma wasana imiginiba naeguyigi, puꞌwakubopa togana kakaga yagaba asima mikuwe untiye.

³¹

³²Piya yogini, igeba yome kamanapa kampa aogima napintini, iyekuru puma kampa pikaba abigantawe. Kebaya tabe yagaraba mikibi kamanane

³³Pigoya, igeba Kapaniyamu kumati wama, namapinti ima Isu abagi kinaꞌwaka: Keꞌiba nanawe yewema, ibigantiye.

³⁴Ibigaogini: Taepisa kebaya maru kiya yagaraba miyema, keꞌi marebiga mebiga puma napimagini, iyekuru puma kamanapa kampa omintawe.

³⁵Kampa omuguna, Isu maraꞌmima nagisarisa tara tumpaema abagi kinaka: Kanaiyo, yogini, kanauguna maya uwaimintiye: Wasanama kiya yagara misanaga abugakanaba: Pigo naeba uwa yagara mima, aꞌyaꞌma kinaꞌmi kayokaya yagara mikuwema napikibipa, pipa aogiyenawe, untiye.

³⁶Piya untana, ka yagaranto ababuma igora atama, ayatasa aepa uꞌma maya uwaimintiye:

³⁷Wasanama naeka napima pabiya yagaranto ababipa, naepa agupi nababiye. Pigoya naepa nababipa, nae unatanta yagarage agupi ababiye, piya untiye. Wasanami kampa kamaena puratakibepa taokinane

³⁸Piya yogana Yoni maya omintiye: Tisa yagaragama-o, ka yagarama taepa kampa taegaranta kaeka napima ke kina igarubagi agate: Uwa miyo omunema, untawe.

³⁹Piya yuguna Isu maya untiye: Tigeba uwa miyoba, a-siyo. Piya, wasanama naeka napima esegi yuga pikibipa, toganaba naekaba ata kasaba kampa karuꞌenaba ukiye.

⁴⁰Piya, wasanama yogare kampa aguya aikibiꞌnapa taoꞌmaeye.

⁴¹Pigoya abiyo. Wasanama: Karaisiti aegaranta kina mintawema, napima: Ma nkwani mpaema naiyo uma timikibipa, pi ntugabisa Koti taganaba ikantana amikiye, untiye. Wasana igu ataena pikenaga Isu uwaimintiye

⁴²Pigoya, Isu to kamana maya untiye: Piya maya yagaranto naegarakana, kaꞌwaina ayakekana kamparagaena pukibemipa, kana ayakikibi ntagara arakuꞌma tabe yabantama anaꞌmubi ubuꞌatama, tabe wanipi apasanakasasinta: Pipa kanara pewe, yesine.

⁴³Pigoya, kayankama kamparagaena pikena pekanapa arisaꞌma maebugaso. Piya, ka kaya kampa wainta yagara mintana miyaba kumati irosakibempepa, pipa kanarane. Aꞌyugu kaya tararasa aguntaena pekanaba, maebugatakana kampa tuꞌmakena yakupinti tumikibene.

⁴⁴(Piya, pi kumatisa kabaginaꞌma iba nakanaba kampa ita wakana, tabatikenaena kampa tuꞌma wakiye.)

⁴⁵Pigoya, kagisawama kamparagaena pikena pekanapa maebugaso. Piya, ka kagisa kampa wainta yagara mima miyaba kumati irosakibempepa, pipa kanarane. Aꞌyugu kagisa tararasa aguntaena pekanaba, kaepa aꞌabibinti maebugatakiye.

⁴⁶(Piya, pi kumatisa kabaginaꞌma iba nakanaba kampa ita wakana, tabatikenaena kampa tuꞌma wakiye.)

⁴⁷Pigoya, kaowama agama kamparagaena pikena pekanapa piꞌma maebugaso. Piya, togana ka kao wainta yagara mintana Koti kabiratakena kumati ikibempepa, pipa kanarane. Aꞌyugu kao tararasa aguntaena pekanaba, kaepa aꞌabibinti maebugatakiye.

⁴⁸Piya, pi kumatisa kabaginaꞌma iba nakanaba kampa ita wakana, tabatikenaena kampa tuꞌma wakiye, piya untiye.

⁴⁹Piya untana to maya untiye: Pigoya wasanama nanintabi kayo atama nagina, aogi igi pemisa puma, aꞌyaꞌma kinapa yakutasa aogi puwaitakiye.

⁵⁰Piya, kayoba aogi igaenawe. Piya, iꞌnisama kasigabekapa, aya pekana to kake asabama iga pikiye. Pipa kampaye. Pigoya wasanama nanintabi kayo atakena aogima pemisa puma, to kinaꞌmige aogima miyiyo, untiye.