Read Fore Aruku 1 Bible Online

Aruku 1 - Fore bible

Aruku 1

¹Teyopiro, tabe yagarare, abakatepi Koti kaoꞌena puratama mono yuga punti kamanapa uwoma kinaꞌmi aogima arabama kaentawe.

²Pi kamanapa Isu nkagora mintanta kinaꞌmi agama abintini, piya mayaenama nkagowapa abinta kinaꞌmi nkuraminta kamana kaentawe.

³Pigoya, naeba pabiyama nabegi, agorasa aꞌyaꞌwaemaena aboraurite kananti, pika pasema aisuma aꞌya uritegi, kauꞌnana kamana uma kaeyuwe.

⁴Pigoya, pipa aisuma mayama abibebe po. Mono ugamintapa taga auꞌwantagaꞌena, kaꞌisa kinaꞌmi nkugaminta kamanapa kaeba aogima aisumagina, abibebe po. Yoniba aborakiyema, enisorewama Sekaraya omintiye

⁵Pigoya, Erotiba Yuta kinaꞌmi nkwaꞌega yagara mintome kanabi, mono kiye yagara ka mintantiye. Agewapa Sekaraya, aeba Abaisa ae mono yuga aruyenabisa yagarawe. Wayaꞌwapa Eroni mpono yuga aruyenabisa pi nkatutasa, agewapa Erisabeti mintantiye.

⁶Pigoya, isigeba Koti nkaobi isigupa aogima atamaginisi mima, aꞌyaꞌma Waꞌegawama unti kamanape arupu kamanaꞌwape aogima wasima mintantase.

⁷Piya, Erisabeti anamo wae mintika, isigeba yagarawaisi kampa minta mima, karena aenta tantase.

⁸Pigoya, Sekarayage aokinaꞌmige Koti mpono yugawai pikenagana aboraogini,

⁹irosaꞌmagini Koti ntuga uwaitantemi ntuga iyota iyota puma maentini, Sekarayapa kunka aguntaena kaeyanema otauguna, Koti ntamankama nkagupinti uma pasintiye.

¹⁰Piya pogini, wa waya uwa kinapa abeꞌi kumati aki puma mima, Waꞌega esotama mintuguna,

¹¹kunka aguntaena kaeyogana, Waꞌegawamatisa enisore aboramagina, kunka aguntaena kaekenaenara ayatakantisa aukaꞌi asima mintantiye.

¹²Asima mintogana, Sekaraya agate pami pumagina aekuru puntiye.

¹³Piya pogana, enisorewama maya omintiye: Sekaraya, kaeba a-kaekuru po. Waꞌegawamaba esotakanaba abintika, wayakampaba agaꞌe puma, yagara ka yakari pekanaba, kaeba ae ageba Yoniwe omo.

¹⁴Pigoya, kae kantawamaba aogi puma, asoya pekana kaꞌmu pikibene. Piyama aborakiniba, uwoma kinaꞌmi abigina iga pukiye.

¹⁵Pi ntagara Waꞌegawama nkaobi tabe kinaꞌena puma mikiye.

¹⁶Aeba esegi wanipa aꞌa-o uma miyekana, Aota Awamusaꞌamaba inamugantora agupi tumima pumaekiye. Pumaeyakana, Isureyo kina uwoma kina igu aꞌwae pekini, Waꞌegawama, tabe Kotiwaimpa agorasaena pikibewe.

¹⁷Piya, poropete yagara Iraiyati aumabe esegiyenabe waintanti, pabiyama waintantakana paitamagina, wama Waꞌegawama nkawaga kamana ikena kinaꞌena puma mikiye. Pigoya, abawampabe yagarawampabe ige igu maema paru puma kayone puwaitakini, kaꞌmasa puma mikiye. Piya, ikeri pakibe kinapa uwaitakini, to aꞌwae puma aegaranta kinaꞌmi nkaruyenaba uma mikibewe. Piya pekini, wasanamiba aꞌyaꞌwaema Waꞌegawamaka aseyo puma mikibewe, untiye.

¹⁸Pigoya, enisorewama piya yogana abintana, Sekarayaba kamana mayama aꞌwae pomintiye: Naebe wayaꞌnepe tasigeba ago karena aenta tause. Pikaga kamanakapa ayama abibebe pukuwe, yogana,

¹⁹enisorewama maya omintiye: Abeno. Nagenepa Kebariyo, naeba Koti nkaobi miyoꞌnana, nagarubagi kaeti tumima aogi awaga kamana ugamoganapa,

²⁰kampa abibebe pene. Piꞌna antotapa aiboꞌena puma, kamana kampa unta kinaꞌena puma mintagana, kamana ugamo kamanaꞌamaba auꞌwantagaꞌena pikiye, piya omintiye.

²¹Pigoya, Sekaraya aeba tabe mono namapinti eꞌerota mintogini, wa wayapa igeba agawa puma mimagini, uwoma nkigi napintawe.

²²Piya puguna, ainti igeti tumimagina, kamana uwaimikena igiga puntiye. Aibogini igeba maya untawe: Aeba tabe mono namapinti to ka aosoꞌena agaiꞌnawe, yuguna, pigo aeba ayatasa awame puwaiyakintiye. Awamupisa kamanapa kampa untiye.

²³Piyama mintogana, yoga pikena kanaꞌwapa aꞌya pogana, atate kumati wantiye.

²⁴Pigoya, ainti wayaꞌwampa Erisabeti agaꞌe puntana, opa nayakaꞌmu kakama mintantiye. Piya puntana maya untiye:

²⁵Waꞌegawama aeba kana atanti, pipa aborakanaba aogi punatamagina anamo nanintanaba asuꞌa punagaintiye, untiye. Enisorewama: Isu aborakiye, Mariya omintiye

²⁶Pigoya, tonaentisa kaꞌumaema upa Erisabeti agaꞌe pogana, Koti nkenisore yagara Kebariyo agarubaogana, Karariya mari Nasareti kumati tumimagina,

²⁷aragawaeꞌmati tumintiye. Kana aragawaeꞌma nkagewapa Mariyawe. Pigoya, kiya yagara Tebiti nkayabama, agewapa Yosepe mintana, kana aragawaepa maekiyema ika potantiye.

²⁸Aibuguna, kana enisorewama Mariyati wama maya omintiye: Aya pene. Waꞌega Yagara kagora mima, kaeka aꞌmu pugatama abegina aogi piye, yogana,

²⁹Mariya kana enisore yagarama yome kamana abite aekuru pumagina: Kamana agowapa ayabayawema, napintiye.

³⁰Piyama napiyogana, enisore yagarama maya omintiye: Mariya, kaeba a-kaekuruba po. Koti antawamaba kaeka abegina aogi piye.

³¹Kaeba kagaꞌe puma masinto yakari potamagina, agewapa Isuwe omo, untiye.

³²Piya untana to maya untiye: Aeba ae age Inatisa Waꞌega Yagarama Ntagarawe omikibewe. Piya puma, ayabama Tebiti kabintemisa puma tabe yagara mima,

³³aꞌyaꞌma yaga Yekobu nkaokinatapa kabiwaitama, aꞌyaꞌma yaga Tabe Yagara miyaba miyaba mikiye, piya omintiye.

³⁴Piya yogana, Mariya enisore yagaraga maya omintiye: Naeba kampa nawaeba mintiye. Yempe kamanapa aya pikiye, untiye.

³⁵Piya yogana, enisore yagarama maya omintiye: Aota Awamusaꞌama kantabaipinti tumekana, Inatisa Yagarama esegiyenawampa aogi pugatakana, yagaragampa aota yagara, age Koti Ntagarawe ukibewe.

³⁶Kaeba abo. Kanogae Erisabetigaba, aeba anamo aentawe ye waeꞌma agaꞌe pumagina, togana kakaga u migaitegina, masinto yakari potakiye.

³⁷Piya, Koti kaꞌena pikenaba kampa igiga pukiye, untiye.

³⁸Piya yogana Mariya maya omintiye: Abo. Naeba Waꞌega Yagarama kayokaya araganagana, pabi yempesa punatakiye, untiye. Yogana, enisore yagaraba atate wagaintiye. Mariya Erisabeti uma agantiye

³⁹Enisorewama kamana omigaite wagasogana, pabi ntaga Mariya kaꞌisaenawapa aogi purite, Yutiya mari karuꞌena wamagina, amu wainti mari ima, kuma ka waintiti imagina,

⁴⁰Sekaraya ntamapinti ima Erisabetika: Aya pene, asu untiye.

⁴¹Aya pene asu yogana, Erisabeti ntagara antabaipinti patagi pogana, Aota Awamusaꞌama Erisabeti nkantabinti pumaeyogana,

⁴²Erisabeti Mariyaka maya omintiye: Koti aꞌmu pugataye. Kaeba aogi waekagana, taberasa Kotiba aogi pugatakana, kantabaipinti aborama mintemi ntagara aogi yagara aborama miye.

⁴³Pigoya abo. Kae kamana yeka aboganaba, nantabaipintisa yagaranempa ago aꞌmu puma patagi piye. Naeba naꞌmu pugatauwe. Kaeba nae Waꞌega Yagarama nkanogawe. Ayabaya naeti kanama ampa nagane.

⁴⁴

⁴⁵Pipa Waꞌega Yagarama kamana ugaminta, kaeba abekana tagantana pemika, tabera kaꞌmu potane, piya omintiye. Mariya aꞌmu kamana untiye

⁴⁶Piya omogana, Mariyaba abite aꞌmu kamana maya untiye:Naeba nagu namankamaba Waꞌegaga naꞌmu potauwe, iye.

⁴⁷Piya, naumawamaba Koti aogi punatakenaenanempa naꞌmu potauwe, iye.

⁴⁸Abo. Ae kayokaya araga nae uwa miyogana nababuma aogi punatakini, ibabe aintibe Koti aꞌmu punatami kamana aꞌyaꞌma kinaꞌmi abimagini, naeka iꞌmu punatakibewe, iye.

⁴⁹Piya, Koti tabera aogi punatami, esegi yagara miye, iye.Piya, agewapa aota puma waintiye, iye.

⁵⁰Aeka abemi kinapa igepa agu kaoꞌena puwaitamagina, ago paipe ibabe abemi kinapa igepa aogi puwaitaye, iye.

⁵¹Aeba esegiyenawampa nkagowapa aboramagina, i maete iye kina igepa igarubantiye, iye.

⁵²Aeba kiya kinapa maema merunkaba puwaitaogini tumi wantawe, iye.Piya, tumima mintanta kina ababuma mesuba puwaitantiye, iye.

⁵³Aeba kusi kina ige piyamaenaba asaema imintana, pi tabe kutantaga kinapa igasogini, imu kampa wainta kinaꞌena puma mintantawe, iye.

⁵⁴Piya, tayabamagi Abaraꞌamupe agaꞌnugipe utawaitantiye. Pabi nkawameta piya purataika, kamanaꞌwapa uwa waita ikiye, iye.Pi kamanaꞌwaka napimagina, Isureyo kina, Koti kayokaya kinaꞌwa, agu kaoꞌenaga uma tabaibuntiye, Mariya piya untiye.

⁵⁵

⁵⁶Piya ugaite, Mariya aeba Erisabetige kakaga u migaitegina, kumaꞌwati aꞌwae puma wantiye. Erisabeti Yoni yakari potantiye

⁵⁷Pigoya, Erisabeti yakari pikena yaga aboraogana masinto yakari potantiye.

⁵⁸Piya, Erisabeti nkaotumpibe waꞌewatasa kinaꞌmibe abite, Waꞌegawama aogima aoꞌmaeyogini ampa agate, igeba aꞌyaꞌma iꞌmu potantawe.

⁵⁹Pigoya, Yoniba ka sonta migasogini, paisa mono kamanapi waintome kamana wasiyuꞌma au kasantawe. Au kasagasimagini, agewapa abawampa aukantana Sekarayawe omikena puntini,

⁶⁰abigauguna anowampa: Kampaye. Agewapa Yoniwe omiyo, untiye.

⁶¹Piya yogini: We, kae kaokinaꞌmi piya igiba piyamaba kampa waintiya, aya pukune, ugategini,

⁶²aꞌwae pumagini abawampaka iyatasa posenta pumagini: Agewapa kewe omusune, untawe.

⁶³Piya yuguna, Sekaraya esaka ibigaogini me nkamuguna: Agewapa Yoniwema, kaentiye. Piyama kaeyogini, wasanamiba agate pami pumagini: I-e, a-e, untawe.

⁶⁴Piya puguna, Sekarayaba pi ntaga kamana iroꞌma untana, Kotigaba tabera aꞌmupa puntiye.

⁶⁵Piya pogini, waꞌewatasa kinaꞌmiba pintanaga agate iyekuru puntawe. Piya pumagini, Yutiya amu waintome mpari nasima mare-u me-u puta nasintawe.

⁶⁶Piya umagini, abume kinaꞌmi: Aya yagarantobaya mikiyema, napimagini: Waꞌegawama nkesegiyenawampa aepipa waintiye, uma: Ayabaya pukiye, untawe. Sekaraya aꞌmu kamana untiye

⁶⁷Piya yuguna, abawampa Sekaraya Aota Awamusaꞌama pumaeyogana, maya untiye:

⁶⁸Isureyo kina, tae Waꞌegare Kotika taꞌmu potaune, iye.Ataenabisa aokinaꞌwa ampa taba puma aogi purataye, iye.

⁶⁹Piya, kayokaya yagaraꞌwa Tebiti nkayabamapisa ka esegi yagara asitakana aogi puratakiye, iye.

⁷⁰Pai poropete kinaꞌwa uwaitaogini, waiyaba mikena kamana umarantapa, iba aboraye, iye.

⁷¹Pigoya, kama kinatempi nkiyapisa tababumagina, aeba abima ata purata kinaꞌmi nkiyapisa iyoba tatakiye, iye.

⁷²Piya, tayabamagi kaoꞌena puwaitama iyoꞌmaekuwe, Koti piya untiye, iye.Pika maema ka agaꞌnaena puratama, agu kaoꞌena ibaba purataye, iye.

⁷³Piyaba Koti tayabama Abaraꞌamupa uma esegi potantika,

⁷⁴kama kinatempi igetisa iyoba tataka, aogima mpima kayokaya kinaꞌwa mpimagina,

⁷⁵aꞌyaꞌma yaga taeba ae aobi aota puma mima, aogi kiꞌi aegarakubompeka Kotiba ka esegi yagara asitakana aogi puratakiye, Sekaraya piya untiye.

⁷⁶Piya untana, Sekaraya aꞌwae puma yagarawaka maya omintiye:Pigoya, ma ntagaranto, kaeba Inatisa Waꞌega Yagarama poropete yagaragawe, ugamikibewe, iye.Piya, kaeba paitama Waꞌegawama kiꞌi atakibene, iye.

⁷⁷Piya, kaeba aogi puratakena kamana uwaimegini, aꞌyaꞌma aokinapa abikibewe, iye.Piya, aeba aruꞌenawaipa agaruba igasima ibabuntiye, iye.

⁷⁸Pigoya, tabe kaoꞌena Kotiba puratama, piya aogi puratamika, pi aeba mantarisa eꞌwasaena otakana taeti arakiye, iye.

⁷⁹Tununtanabi purikena kanta puma miye kina eꞌwasaena tamima aogi puratakiye, iye.Piya, paruyenama ki aboraka agama, kanara tanta paruyenabisa aegarakune, Sekaraya Yonika piya untiye.

⁸⁰Aiyogana, ainti kana yagarantoba anosama tabe pogana, aumawampaba esegi potantiye. Piya, aeba kaꞌme mpari umintogana, kanaꞌwapa aboraogana, Isureyo kinaꞌmi nkiyobipa aborantiye.