Read Fore Aruku 10 Bible Online

Aruku 10 - Fore bible

Aruku 10

¹Pigoya, Isuba to sebentiwa ntagara aki puwaitama, yoga kamana uwaitantiye. Piya, aewa wakena pome kumatiba tara tara uwaitama maya untiye:

²Yogaba tabe waintegina piya naninta aꞌna pukena kinapa tarantowe. Pika tigeba yoga agowamaka esotaigina naninta aꞌna pukena kinapa aboraigiri yogawatapa waiyo, Isu piya untana,

³Tigeba wantiripa mayama abiyo: Tigeba sipisipi awarowama kabu yagama abakapinti wamisa puma, tigarubaogiri wawe.

⁴Pigoya, tigeba mone asabe iraꞌna kupe, to kaꞌisa tigisa anape a-mpaete waiyo. Keꞌi waigini, wasanami tigigaigiripa uwoma kamana asiyo.

⁵Pigoya, ka namapi uma pasikena puntiripa, pi namapi miye kinapa mayama uwaimiyo: Paruyenabi miyiyo uwaimigina,

⁶pigo pi ntamapi aogi paru yagara ka mintakiripa, paruyenaba aeti waiyeno. Kampa yekanaba pi paruyenaba tigetiti to aꞌwaebuma kanano, untana,

⁷namapa pasikibe pabi ntamapi miyigini, nanintabe wanipe timigiri naiyo. Tigeba nama toyaba antasima, ka namapi mima naninta timigiri naiyo. Piya, yoga kinapa yogawaitasa ikantanaba imegini maeyasa puma timigiri maeyiyo.

⁸Pigoya, ka kumata irosaigini aogi puritama naninta timigiripa nantiripa,

⁹itantiripa maya uwaimiyo: Koti kabiratakenagana mampa agarosaye, uwaimiyo.

¹⁰Pigoya to ka kumata irosaigini nankaipi kampa tiba puritaigiripa, abeꞌi irosaꞌmagiri maya uwaimiyo:

¹¹Matasa tagisarisa iꞌni pugasokana tigetiti waye. Piya, kapa mayama napiyiyo: Koti kabiratakenagana agarosaye uwaimintiye.

¹²Isu pi kamanapa uma, kapa mayama amato puntiye: Naeba urimekiri abiyo. Aintisa kanabipa Sotomu kumatasa kinapa tumimaena aborawaimikibikana, maya kumatasa kinapa tabe kuntaenaba aborawaimikiye, Isu piya untiye. Kamana abintana kampa aegarami kinaꞌmi kamanane

¹³Pigoya, Isu to kinaka maya kamana uwaimintiye: We, Korasini kina, nantarane. We, Pesaita kina, nantarane. Mebi tige mari kukantana tabera aboranti, pipa Taya Saironi kinaꞌmi kumata mayaenaba aborantosinta, igeba intara puma karuꞌena augaꞌmagini igu aꞌwae puntasine.

¹⁴Piya, aintisa Koti pakobikibi kanabipa, Taya Saironi kumatasa kinapa tumimaena aborawaimikibikana, tige kuntaenaripa mesuba puma aborarimikiye.

¹⁵We Kapaniyamu kina, tige mari uwomantana poka, mantari ikibewa, a. Kampaye. Aintiba aꞌabibinti tumikibewe, uwaimintiye.

¹⁶Uwaimintana igepa to maya uwaimintiye: Tige kamana abikibiꞌnaba nae kamana abikiye. Piya, tige aꞌa-o uritakibiꞌnaba pabiyama naepa aꞌa-o unatakiye. Piya, nae aꞌa-o unatakibiꞌnaba pipa unatantiꞌna ae aꞌa-o otakiye, piya uwaimima yogawaiti igarubantiye. Igarubanti kina igeba aꞌwae puma kanantawe

¹⁷Pigoya, pi sebentiwa ntagaramiba igeba aꞌwae puma kanama, iꞌmu purintini Isu awaga kamana maya omintawe: Waꞌegare kae kage uma kegina igarubaokiniba, tawamupa wasiyewe, untawe.

¹⁸Piya yuguna maya uwaimintiye: Pigoya pabiyama Sataniba aeba mantarisa amonta tumemisa puma wareꞌware purite tumoga agantuwe.

¹⁹Abeno. Esegiyenaba ago timintokana, piya pi kama kinaꞌma aꞌyaꞌwaemaenawampaba ataenaba kampa puritakibewe. Tigeba kuyabe ontabenipe iyebasaiginiba kampa ataenaba puritakibewe. Esegiyenaba ago timintuwe.

²⁰Pigoya, tigeba kewama tiwamu wasinta, pikaba tiꞌmupa piyo. Piya, tigeripa mantarisa esapi Koti kaemaranta wainti, pika tabera tiꞌmu piginiba aogi pikiye, untiye.

²¹Pigoya, pi ntaga Aota Awamusaꞌama anta aseyo pogana, Isu aꞌmu kamana maya untiye: Naba, mantage mage agowane. Kaeba abikenaenawaika abegana tabe pe kinapa kakawaigasane. Piya, iguꞌamaka abegana inamu kanta pe kinapa uma aborawaimene. Piya, naeba pika naꞌmu pugatauwe. Naba, kaega napimagina piyama abora urite wanema uma esegi puntampene, untana,

²²Pigoya, aꞌyaꞌmaena wainatantipa nabanempa nayapi atawaentiye. Pika wasana kaꞌwaina yagarawa naeka agoneka kampa abibebe piye. Nabanempa ae abiwapa abibebe piye. Piya, kaꞌwaina nabanempa ae agowaka kampa abibebe pega, yagarawa nae nabinto abibebe pumagi, nae napima wasanaba uma aboramekana aegeba pabiyama abibebe pikiye, piya untiye.

²³Piya umagina, aꞌwaebuma abagi kina igewaipa maya uwaimintiye: Tigeba kasaꞌena agaka tiꞌmupiyo.

²⁴Piya, naeba urimekiri abiyo. Pai aꞌyaꞌma poropete kinape kiya kinape uwomampi igeba tige pi agama abentanaba, pipa agowa agama abikenagaba ibugagate itantiye. Igeba kampa agama abintawe, piya untiye. Sameriya yagara tupu kinaꞌwa aoꞌmaenti kamana untiye

²⁵Pigoya, kamana ago abinta yagarama ka asima, Isu amiyo kamana mayama abigantiye: Tisa, naeba ayabuma eꞌwasaena maemagi asi nasi aogima mikuwema, abigaogana,

²⁶Isuba maya omintiye: Mono ago kamana awaꞌena kamanapipa ayama waintegina aisene, omogana,

²⁷kamana ago abinta yagarama maya untiye: Kaeba aꞌyaꞌma kagu kaumakape esegiyenagape napiyenagape, Waꞌega Kotigapa aꞌyaꞌma amegana waiyeno, piya kaegaka kabemisa puma, pabiyama kae kaokinaka kabeno. Kamanapa piyama waintiye, untiye.

²⁸Aiyogana, Isu maya omintiye: Kaeba kamanapa kanara yene. Pipa wasima mima aogima mikibene, omintiye.

²⁹Pigoya, pi ntagara kamanapa abintanaba aewa age maema aogi puma to kake: Wasana naopa kewema, abigantiye.

³⁰Aiyogana pika Isu kamana kapa maya omintiye: Wasana kaꞌwaina waꞌewapa Yerusaremi kumatisa Yeriko kumati tumikena tumogini, kama kinaꞌmi minaena puma mintuguna, pipi uma pasintiye. Piya, igeba aegumagini, kaiwape kotankape apawaeritegini, atauguna purikena puma mintantiye.

³¹Mintogana, mono kiye yagara kaꞌwaina pabi kiꞌi wama agamagina, auꞌakana naerite maroteri wama againtiye.

³²Aeba waogana, Aribai yagara kaꞌwaina irosaꞌmagina pabiyama agama auꞌakana naerite maroteri wama againtiye.

³³Piya pusuguna, Sameriya marisa yagara kaꞌwaina pabi kiꞌi wama uma abatantiye. Uma agamagina antara potama

³⁴agora wama masawaetasabe waini wanitasabe anamopipa paiꞌatama asaetantiye. Piya potama, ababuma yagawampa akabata atama ababute wama, wami ntamapinti metama aogima kabitantiye.

³⁵Pigoya, maroganaba wakena puntanaba, waba ntama kiye yagaraba tu tora amintana maya omintiye: Kaeba ma ntagara aogima kabiyo. Piya, to kaꞌisa ae auta kaikibempepatakaba, to kake kanamagi amato puma kamukuwe, untiye.

³⁶Pigoya, wasana tarawa kanaki kina igetisaba ku kinaꞌmi aegunta ntagaraba mapa aoꞌenaba ke potantiyema, napiyenema abigantiye.

³⁷Piyama abigaogana, kamana ago abinta yagara aeba maya untiye: Antara potama aoꞌmaenti ntagara, aewe, yogana Isu abite: Kaeba wama pabiya puma miyo, omintiye. Mariyake Matake isige kamanane

³⁸Isube abagi kinaꞌwampibe igeba wama to kumata uma irosaumepa, ka wae agewapa Mata aeba nankapi Isu ababotama maruntakiꞌena potantiye.

³⁹Pigoya, aꞌnantoba ka mintantiye, agewapa Mariya, aeba Waꞌega yagarama agisabi mima monoꞌwa abintiye.

⁴⁰Piya pogana Mata aeba naninta kaoꞌena puntana uwoma agi napima mima, kaoꞌenaba pugategina Isuti wama maya untiye: Waꞌega, nana pegina naꞌnantoba natagi, nae nabi kaoꞌenaba pumiyoganapa, kaeba agantanapa kampa napiyeno. Kaeba omegana naoꞌmaeyano, omintiye.

⁴¹Piya omogana Isu maya omintiye: Mata, Mata, kaeba uwomantanamaka abima, uwoma kagi napima kauki nakiyena puma miyene.

⁴²Abeno, kaꞌena aogiyena tabera waintiye. Mariya aeba pi aogi auꞌwantagaꞌena ago maeye. Pipa a-nkapareno, Isu omintiye.