Read Fore Aruku 11 Bible Online

Aruku 11 - Fore bible

Aruku 11

¹Pigoya, Isu aeba ka auꞌi ampima nunamu untiye. Nunamu aꞌya pogana, abagi kinaꞌwatisa kaꞌwaina maya untiye: Yoniba abagi kinaꞌwapa nunamu ukena kamanapa uwaimintisa puma, kaeba kapa uramo, untiye.

²Piya yogana Isu maya uwaimintiye: Tigeba nunamu ukena puntiripa, maya yiyo: Taba, kae kage aota waiyeno. Kabiratakenaenagapa aborawaeyano tabiye.

³Aꞌyaꞌma yagaba kaeba nanintarepa tamo.

⁴Kaintanarepa taeba kaintana purata kinaꞌmi nkatupa mae igasompe nkawameta kaeba aguntaenarepa maeragaso. Tamiyo pusanagaba aogima kabiratao, yiyo untiye.

⁵Piya yiyo uwaimitegina, to kapa mayama amato puma uwaimintiye: Tigetisa kaꞌwaina aseka nkabubu eꞌero mparisa kanakana, amikena nakenaba kampa waintakana irosakanaba, wama to aoꞌyagaramaka uma abage puma maya omikiye: Naoꞌyagara, ka nao kanamagina eꞌero mparisa kanamipa, nakena kampa waintegi, kaoti kabigama nakena tarawa kanaki namega amenoma, abigakiye.

⁶

⁷Piya yekana aoꞌyagaramaba napintisa maya ikiye: Kaeba nanaga ampa tabage pene. Na kabe akugasima, wayaꞌyagara iwaigasapintiba, ayama asima maema kamusuwe, piya ukiye.

⁸Pigoya, naeba yekiri abiyo. Aeba naoꞌyagaraga aoꞌmaekuwemaba kampa napikiye. Aeba ebi ebi kamana yekana, abima uwa asima ikibintanaba maema amikiye.

⁹Piya, naeba pabiyama kapa urimekiri abiyo: Tigeba Koti abigaiginaba timikiye. Aguyosagaiginaba auꞌwapa maema tigeti aborakiye. Kabera aiwakarusiginaba Kotiba aititakiye.

¹⁰Pigoya, aꞌyaꞌma kinaꞌmiba Kotiti esota kinaꞌmiba maeyawe. Aguyosaga kinaꞌmiba agawe. Kabera aiwakaruse kinaꞌmitiba Kotiba aiꞌitaye.

¹¹Pigoya, tigetisaba ae ntagarama yagarawampa inoyantaga yekanaba, antotapa kuya amikiya, a.

¹²Kokore amuka yekana ontabeni amikiya, a. Aeba kampaye.

¹³We, tigeba antage kinaꞌmitaba yagara aragaripa aogiyena imewe. Piya, mantarisa tibarimpa aeba asagasima esota kina tigepa Aota Awamusapa timikiye, Isu piya untiye. Igeba Isuka kewama esegiyena amegina yoga piye, untawe

¹⁴Pigoya wasana kaꞌwaina kewama awamu akugasogana kamana kampa yogana, Isuba pi ntagara antabaipisa ke agaruba agasogana, to kake kamana untiye. Piya yogini, wasana igeba agate pami puntawe.

¹⁵Pigoya, kaꞌisamiba Isuka maya untawe: Ke kinaꞌmi waꞌegawai Piyesiburu, ae esegiyena amegina keba agaruba igasaye, yuguna,

¹⁶to kaꞌisa kinaꞌmiba amiyo kamana maya omintawe: Kaeba yegana, mantarisa awameꞌena aboraka agano, untawe.

¹⁷Piya yuguna, aeba napiyenawaimpa abibebe purintana, maya kamana uwaimintiye: Ka marisa kina igeba kamaena piginiba, aꞌyaꞌwaemaenawaipa aguya ayigigasigini, igeba atama mikibewe. Pigoya, ka tunkama maꞌena pukibemipa, aokinaꞌmiba asorisari puma kampa aogima mikibewe.

¹⁸Piya, Satani aokinaꞌmiba pako puma maꞌena pesinta, ayama esegima miyesine. Pigoya, tigeba naekaba Piyesiburu esegiyena amegina keba igarubaye ye kauwe.

¹⁹Pigoya, naeba kewama Piyesiburutisa esegiyena maema ke agarubaosinta, tiyokinapa aetasa esegiyenaba maema agarubasine. Pika abimagiri, tiyokinaꞌmi kamanatipa etaꞌmaema, piya kampaye ikibewe.

²⁰Piya, Koti esegiyena namegi keba agaruba igasoganaba Koti kabiratakenaenaba tigetiba ago aboraye, untiye.

²¹Untana Isu to ka amato puma maya uwaimintiye: Ka akentana yagarama ireguwape wantaꞌwape pumagina, na kumaꞌwapa kabiyekana, aꞌyaꞌmaenawapa aogima waikiye.

²²Pigoya, tabera esegiyena waitantakibi ntagara irosaꞌmaba, aepaꞌurintana iregu wantaꞌwapa apauꞌma, yaga kotankapa pako purikiye.

²³Pigoya, kaꞌwaina aeba kayone kampa punataiꞌnaba, pipa kama punataye. Piya, kaꞌwaina aeba yagarunte kampa ibabuma aki piꞌnaba, aeba igarubaye, Isu piya untiye. Ke kinaꞌma aꞌwae puma kanakiye, untiye

²⁴Pigoya, Isu toba maya untiye: Kewamaba wasanama antabaipisa irosaꞌma wama kaꞌme mpari maruka aguyosakate, kampa waintakana maya ukiye: Namantepa atate kanantoka, pitaꞌi to kake aꞌwae pumagi wama umikuwe, ukiye.

²⁵Otate aꞌwae puma wama agaomepa, kana namapa paga puma aogi nama uma agakiye.

²⁶Piyaena agatategina aeba wama ke aokinapa tonaentisa tara umaema kina to kake kamparagaena pe kina ibabekini, kanama pi ntamapi ampikibewe. Aibigina, pi ntagaraba aeba paipa aogi yagara mintantiꞌnaba aintiba kampa aogimagina tabera ata puwakiye, piya untiye. Aogima mikena kamana untiye

²⁷Kamana piya uma mintogana, wasana abakapintisa waya kaꞌwaina kegaꞌye uma maya omintiye: Yakari pugatama nono kaminti waepa, aeba aꞌmuntanabi miyeno, yogana,

²⁸Isu maya untiye: Pi yempepa, pipa Koti kamana abima maema miye kina ige iꞌmuntanabi mikibewe, piya untiye. Kukantana kamana untiye

²⁹Pigoya, wasana uwoma kina aeti kanama pumaeyuguna, agobima kamana maya untiye: Mamparasa antage kina tigeba kukantanaga ebi ebi punatawe. Pigoya, tigeba kukantanaba tonawanane. Yonati aboranti, pabintana aborakiri agakibewe.

³⁰Pigoya, pai Ninibe kumatasa kinaꞌmi igeba Yona puntintana agama napintasa puma, ibasa yaga mamparasa kina tigeba Wasanama Ntagaramana pukubontanaba agama napikibewe.

³¹Pigoya abiyo. Mare takaerisa tabe wae aeba pabiyamagina aꞌyaꞌma kina pako pikena yagaba mampabisa kinaꞌmiti kamparaga kamanati abora uritakiye. Pipa uwaba kampaye. Pi kana waepa aeba eꞌero mparisa kanama Soromoni aetisa mono abintiye. Piya, ma minto naeba Soromoni ae awametapa kampaye, pipa asugasima mintuwe.

³²Piya, toba abiyo. Ainti Koti aꞌyaꞌma kina pako pikibi ntagaba Niniba kumatisa kina aborama mamparisa kinaꞌmi kamparaga kamanati uma abora uritakibewe. Pipa uwaba kampaye. Niniba kumatasa kina igepa Yona aeba wasanarakaꞌyankama igeꞌma kamana uwaimogini abima igu aꞌwae puntaka, piya ma minto naeba Yona ae awametapa kampaye. Pipa asugasima mintogiri, pabi ntaga tigeba kampa piyama aꞌwae pigina, pi Niniba kina uritakibewe, Isu piya untiye. Eꞌwasa wasana ita aborakena kamana untiye

³³Pigoya, Isu to maya untiye: Tigeba kane igiꞌmaba kampa kakantiri, kaborasaba kampa akunewe, pipa kampaye. Tigeba kanepa igiꞌma marunkata atagana, na antabaipintiba eꞌwasa pekana wasanaba asu agakibewe.

³⁴Piya, kauꞌama kaneꞌwapa kaowe. Kaogapa aogima waintanaba, kauꞌamapa kanara eꞌwasa potakiye. Tikaeyakanaba kauꞌamaba pabiyama tunusu wakiye.

³⁵Pigoya, kaguꞌama kaneꞌwa tuꞌmakana tunususanaga aogima kiya kabima miyo.

³⁶Kiya kabiyegana, kaetiba tununtanaba kapa kampa aborano. Kagu kauꞌamaba eꞌwasaenamana waikiye. Pigoya, kane uwaenama eꞌwasa pemisa puma, kagu kaneꞌamaba eꞌwasa pugatakana mikibene, Isu piya untiye. Parasi kinake mono tisa kinakega: Ataena pewe, Isu untiye

³⁷Pigoya, kamana uma miyogana, Parasi kaꞌwaina Isu nanintaga nankapi agegaꞌe untiye. Agegaꞌe yogana, nankapinti ima pabi naninta asu nantiye.

³⁸Asu naomeka, ayapa kampa wani nkaema aeyobanta naogana, Parasi yagara agategina, uwoma agi napima: Nanabaya pemika monoka kampa napiye, untiye.

³⁹Piya yogana, Waꞌega aeba abite maya omintiye: We, Parasi kina tigeba, tuꞌnatipa kankabepe aririsamana aeyobawe. Pigoya, tigupipa kuntanaripe ataenaripe pumaema waintiye.

⁴⁰We, aibo kina tigeba, kampa napiyewo. Koti ariribe antabaipintibe pumarantine.

⁴¹Pika tigeba antabaipinti waintintana kusi kina imigina tigeti iꞌnintana kampa waikiye.

⁴²We, Parasi kina tigeba atama mikibewe. Tigeba aꞌyaꞌwaemaenaripa aisurite wagana, naya taraꞌmu pegiripa, agentoba Koti amintiri, kaipe marababe aꞌyaꞌwaema anintabe pabiyama kampa tigeguꞌa pekiri amintiripa, Kotige atokaema mikenaenagaba nanaga kampa napiyekiri, aogima arupu puma mikenaenaba nanaga agasawe. Pi ariwape aguꞌwape tarayaga aogimakiri wasiyesinta, aogiyenabi miyesine.

⁴³We, Parasi kina tigeba atama mikibewe. Nanagabaya mono namapi waꞌega kinaꞌmi yabaera paitama mikenaga yewe. Piya keꞌi wa waya uwa kinaꞌmi tigamagini uma iꞌmuntana puritasanaga pintanaga tiguꞌamaba waiye.

⁴⁴We, tigeba atama mikibewe. Tigeba wasana iru kaigainta piyama, pitaꞌi wasana igeba kampagini napinta abobori nasi nasi pewe, Isu piya untiye. Pai poropete kina iyeguma karana itanta kamanane

⁴⁵Isu aeba kamana piya yogana, kamana ago abinta yagara kaꞌwaina abima maya omintiye: Tisa, kaeba kamana piya yekanaba, kamana ago abinta kina tae uma tarakuriye, untiye.

⁴⁶Yogana Isuba maya aꞌwae pomintiye: We, kamana ago abinta kina tigege tiyekuru piyo. Tigeba kuntaenaba wasana ibobori aesaga itategiri, tigeripa uwa mima, aesagabikena tigiba kampa napiyewe.

⁴⁷We, atama mikibewe. Tiyabamagiba poropete kina iyeguma kaintakiri, tigeba ibaba iyeguma kaisubewe.

⁴⁸Piya puma, tiyabamagi iyoꞌmaemagiri, maꞌenawaika abegana aogi piye. Igeba iyeguma karana itantawe. Pigoya tigeba kamana agowai aeguma kaiyewe.

⁴⁹Pigoya, pika Kotiba aogima napima kapa maya untiye: Naeba igeti poropetebe aposorobe uwaitauwagini wauguripa, kaꞌisaba iyeguma ata puwaitakibewe, untiye.

⁵⁰Pigoya, pipa pai wasana aboranta kanabi, agobima poropete kina iyeguma koranka airigita kananta, pi kaintanaba pipa tigeti kanakiri kamana maekibewe.

⁵¹Pi maꞌenaba pai Eboropisa agobima aboraurite kanama, Sekaraya aepa tabe mono nama antabaipinti aeguma aꞌya puntane. Naeba taga yekiri abiyo. Pi kamaena piꞌna kaintawapa mampa ago tigeti ampa aborakana kamana maekibewe.

⁵²We, kamana ago abinta kina, tigeba atama mikibewe. Tigeba monoꞌama agowapa kakatamagiri miyewe. Tigeripa kabe aiꞌma kampa uma paiꞌma abewe. Piya, wa waya pasikena yegiripa, kabeba akunkigasawe, piya uwaimintiye.

⁵³Pigoya, Isu kamana piya uma aꞌya atate abeꞌi irosaogini, kamana ago abinta kinape Parasi kinape Isuka ataena otama, igeba to kamana to kamanaꞌwa abigategini, ige atakae puma mintantawe. Piya puma mintogini tabera uma abigantawe.

⁵⁴Pipa maya uma puntawe: Ka kamana awamupisa irugekapa abima kamana otakune, untawe.