Read Fore Aruku 13 Bible Online

Aruku 13 - Fore bible

Aruku 13

¹Pi kanabi, kaꞌisa Karariya marisa kinaꞌmi waꞌega yagaramanta kaoꞌena puma, muta atakena yagaba ibabute kanama aeguyuguna, Pairati yogini, irebu kinaꞌwampi kana kinapa iyeguyuguni, pi wasana kurape yaga kurape aꞌyugu puwantiye. Pigoya wasana igeba irosaꞌma Isu pabiya awaga kamana omuguna,

²maya uwaimintiye: Tigeba Karariya kinakaba ayama napiyewe. Ige aguntaenamaba to aꞌyaꞌma Karariya kinapa igaintomeka piya puwaitantawema napiyewa, a.

³Piya wanane. Abiyo. Tigege ataenaripa kampa kaite tigu kampa aꞌwae pikibepa, pabiyama ata maru mpima puꞌwaewakibewe.

⁴Piya, paipa Sairomu namapa eꞌero namapa takumagina, tonagisarisa kakaga umaema kina iyeguntiye. Pigoya, igeka ayama napiyewe. Ige ataenawaipa to aꞌyaꞌma Yerusaremi minta kinapa igaintomeka, piya puwaitantiyema napiyewa, a.

⁵Piya wanane. Abiyo. Tigege ataenaripa kampa kaite tigu kampa aꞌwae pikibepa, pabiyama ata maru mpima puꞌwaewakibewe, piya untiye. A kampa aenta yawamaka meto kamana untiye

⁶Kamana piya uma, Isu meto kamana ka maya untiye: Wasana kaꞌwaina yogawapi yamankapa ka kuꞌmaraogana iꞌma intiye. Pigoya to yaga wamagina agauka, uma agiyosa agaomepa kampa agantiye.

⁷Piya puntana, kayokaya yagarawa maya omintiye: Naeba ma ntawama nka aesanaga kabimaete kanaogana, kaboba kakaga agasaye. Ya aeba nanaga nae yugabinti uwaba taberapa wairite wakiya, a. Aerawane agaiyugaso, omintiye.

⁸Piya yogana maya omintiye: Naba, kaeba uwa atanto, ma kabuba miyeno. Piya, naeba agobintisa yonintana puma imupaena peno.

⁹Pigoya, toganaba a aesanaga agaiyo. Aeyakaraba uwa atakuse. Kampa aeyakaraba agaiꞌyugaikuse, untiye, piya kamana Isu untiye. Isu waya ka sabatira aogi potantiye

¹⁰Pigoya Isu aeba ka sabatira mono namapi ima mono uwaimintiye.

¹¹Pigoya, pi ntamapi waya ka mintantiye. Aeba kewama kaꞌwaina antabaipinti mintogana, kaboba tonagisarisa kakaga umaema kabuwa aꞌya pogana mintantiye. Piya, ayamagina ituru puma misuwe, uma parokaema nasi nasi puntiye.

¹²Pigoya, Isuba waya pipa agamagina kegaꞌe uma maya omintiye: Waya, kaeba ituru pogana, yonikapa kata wano, untiye.

¹³Piya uma ayapa aꞌnota atama yogana, pabigo ituru pumagina Koti aꞌmu potantiye.

¹⁴Pigoya, Isu aeba waya pi sabatira aogi puma kaba atantika, pi mpono nama kiye yagarama agama abogana ataena abogana, wa waya maya kamana uwaimintiye: Yogaena pikena kanaba tonaentisa kaꞌumaema yaga waintiye. Pita kanaigina aogi puritano. Sabatirapa kampaye, untiye.

¹⁵Piya yogana, Isu kamana mayama aꞌwae pomintiye: We, kumpari kina tigeba, sabatirapa purumakatino, osirino, namatipisaba iyoba urite wanitiba ibabute wawo. Ago pabiya pewe.

¹⁶Pigoya, waya mapa aeba Abaraꞌamu nkagaꞌnuwe. Piya, Satani igaꞌna ubu atagina kaboba tonagisarisa kakaga umaema kabuwa mima mintantiye. Pigoya naeba ma sabatira ataogiripa aogi tigi napiyewo. Pipa kanarane, uwaimintiye.

¹⁷Piya uwaimogini, igeba abima inintana ibogini, kamana kampa untawe. Piya, wa waya uwoma kinaꞌmiba pintana aogiyena pomeka iꞌmu puntawe. Koti kabiratakenaenaga meto kamana Isu untiye

¹⁸Isu aeba kamana kapa mayama amato puma untiye: Koti kabiratakenaenaba ayaenabayaka, nanarapaya meto puma abukune.

¹⁹Aeba masiteti aꞌwa piyamawe. Wasana kaꞌwaina yogawati ainka asikitaogana, iꞌma yaena peganaba, kabarankamaba kanama ayampuwatapa ampima anapa kiye, piya untiye.

²⁰Pigoya, to ka amato puma maya untiye: Koti kabiratakenaenaba ayama to meto puriyakikuwe.

²¹Aeba paretibi atama kaekenaena agewapa yisiti piyamawe: Piya, waya kaꞌwaina pi yisiti maemagina uwoma parawabinti atama, paegu potama ataogana, kana paretiba anosakiye. Aeba piyama waintiye, untiye. Uwaena kabintobinti pasikena kamana Isu untiye

²²Pigoya, Isu Yerusaremi kumati wakena tabe kumatibe uwaena kumaꞌantontoribe nasi nasi puma mono uwaimintiye.

²³Pigoya wasana kaꞌwaina mayama abigantiye: Waꞌega, wasanaba tarantomibaya iba pekini ikibebe, ayabaya pikibewema, abigaogana, Isuba maya omintiye:

²⁴Uwaena kabintori uma pasikenaba iyampuba pabi pabi puma uma pasiyo. Wasana uwomampi uma pasikena ikibepa, umaba uwa kampa pasikibewe.

²⁵Piyama na nkagowamaba aeba asima kabe akunkatama mintakiripa tigeba na komari uma, asima mima aiwakaru suma maya ikibewe: Waꞌega kabe aꞌwairatao, yiginaba maya urimikiye: Tigeba kegitawe. Kampa tigao kinatawe, urimikiye.

²⁶Urimekiripa, antotapa maya omikibewe: Taeba kaege kaga mima nanintabe wanipe nantompene. Pigoya kumatetiba monopa yuku abintompene, yiginaba,

²⁷abintanaba maya urimikiye: Piya urimuwe. Tigeba kegitawe. Kampa tigao kinatawe. Tige aguntaena pe kinatawa natate waiyo, urimikiye.

²⁸Pigoya, Abaraꞌamuwa, Aisakiwa, Yekobuwa, to aꞌyaꞌma poropete kinana, suma, Koti kabiratakena kumati mintikiri igaigina, tigeba tigarubaigiripa mima, tiwara upaba puma, kubeꞌena puma mikibewe.

²⁹Pigoya, pa nkirosamitisabe tupasemitisabe marenkauꞌisabe menkauꞌisabe, pitaꞌisa wasanaba irosaꞌma Koti kabiratakena kumati ima naninta nama iꞌmu pikibewe.

³⁰Piya, abiyo. Pitaꞌi kaꞌisa kayokaya kinaꞌmi kiya mikibewe. Piya, kaꞌisa kiya kinaꞌmiba kayokaya kina mikibewe, Isu piya untiye. Yerusaremi kinaka antara kamana Isu untiye

³¹Pigoya, Isu aeba kamana piya yogana, pabi kanabi Parasi kina kaꞌisa irosaꞌma maya uma omintawe: Eroti kaegukenaga iye. Pika ma mpaba kaite karuꞌena wao, untawe.

³²Piya yuguna maya uwaimintiye: Tigeba aꞌwae puma wama, kana kabu karamapa maya omiyo: Abeno. Naeba ibabe aibe wasana ke kina agaruba igasima kaba itakuboka, magaba yoganepa aꞌya wakuwe iye, omo.

³³Pigoya ibabe aibe magabe naeba keꞌi wakuwe. Aꞌyugu uwa mari wakini poropete aegusanaga, Yerusaremi kumati wakini aeguyigina purikibipa kanarane, Isu aeꞌwaka piya untiye.

³⁴Piya untana to maya untiye: We, Yerusaremi kinane, Yerusaremi kinane, tigeba nana pewema poropete kamaena puwaitama, mono kina tigeti uwaitanta kinapa yaba kasutasa iyeguyewe, a. We, kokorewama awa kiꞌnunka ibabuma agagapinti itama isamu pemisa puma, naeba tibabuma aki puritakena pogiri, aꞌa-o urite kanantawe.

³⁵Abiyo. Pika nama kumatipa atakana agamaena puma kabu isubikiye. Piya, naeba to yekiri abiyo. Naeba titakiri to kake kampa nagamagiri mirite wamagiri, ainti naeka: Waꞌegawama nkagera kanaya, aeka taꞌmu potano, ukibepa to kake nagakibewe, Isu piya untiye.