Read Fore Aruku 14 Bible Online

Aruku 14 - Fore bible

Aruku 14

¹Pigoya, to ka sabatira Parasi kinaꞌmi kiye kaꞌwaina Isu nanintaga kegaꞌe yogana, namankapinti iyogini, Parasi kinaꞌmiba pabipi kaga mima kamanaꞌwaka kabima mintantawe.

²Piya yamoruyena abome kina ka iyogana, Isu agantana,

³kamana ago abinta kinape Parasi kinape mayama ibigantiye: Tigeba yiyo. Sabatirapa ma ntagaraba aogi potakupera aya pukune, yogini,

⁴asabaꞌwantawe. Piya puguna, kana yagara ayata taku uꞌma aogi potama agarubaogana wantiye.

⁵Piya aogi potamagina, pi mintume kina igepa mayama ibigantiye: Yagaripe purumakatipera kabinti, sabati yaga tumekiripa uwa ataigina waikibera, pabi sabatira uwa paibigina ikiyema, ibigaogini,

⁶kamana aꞌwae puma omikenaga aguyosakate atantawe. Kaupa a-mpaete iyo, Isu untiye

⁷Pigoya wasana kaꞌisa nanintaga kaga igegaꞌe unta kina igeba napiyenawaipisa tabe yagarama yabaeba maema miyuguna igama maya meto kamana uwaimintiye:

⁸Kaeba kaꞌwaina ibaꞌena pikena kagegaꞌe yekanapa, napiyenagapisaba marusa yabaeba maemaba a-mpiyo. Piya pegana tigegaꞌe untatisa kaꞌisa kina igetisa kae kagasima minta kaꞌwaina irosakana,

⁹kaoꞌena agowamaba kaepa maya ampa ugamikiye: Pipa ae yabaewe. Aeꞌwatao, yekanapa, kaeba aꞌwae puma aintisa yabaera tumpima kani pikibene.

¹⁰Piya wanane. Kaꞌwaina kagegaꞌe yekanapa kaeba aintisa yabaera miyo. Mintagana kaoꞌena agowamaba kagama maya ugamikiye: Naoꞌanto, kaeba ima marusa yabaera paitama asu miyo, piya ugamekana, pi naninta nakibe kinaꞌmi nkiyobi kantawamaba aogi pikiye.

¹¹Pabiyama, kaꞌwaina aeba au maete ikibiꞌnapa tumikiye. Piya, kaꞌwaina aeꞌwa nkau maete tumikibiꞌnapa maema mesuba potakiye, piya untiye.

¹²Piya untana, wasana igegaꞌe yome ntagara aepa toba maya omintiye: Kaeba naninta kaoꞌena puntanapa, kao kinape kaganto kaꞌnantobe tigerupe, kumakatasa uwoma kuta wainta kinape, a-nkigegaꞌeba yo. Piya, igeba nanintaga igegaꞌe yeginiba, kaepa pabiyama antota kagegaꞌe uma atukapa kamigina aꞌya pikiye.

¹³Pibiya kampaye. Naninta kaoꞌena puntanapa, kusi kinape karaena nagainta kinape agisa antage miru kinape aorika kinape, piyama igegaꞌe yegini naigina,

¹⁴antota kampa maenta uwa aogima mintagana, aintiba taga mono kina asikibe kanabi, Koti antota kamekana kaꞌmu pikibene, Isu piya untiye. Tabe nanintama mpeto kamana untiye

¹⁵Isu aeba piya kamana yogana naninta naume kina igetisa kaꞌwaina abite maya omintiye: Koti kabiratakena kumapi naninta nakibe kina iꞌmu pikibewe, untiye.

¹⁶Piya yogana, Isu kamana ka maya omintiye: Wasana kaꞌwaina tabe nanintaena puma aki puntana, wasana uwoma kina igegaꞌe untiye.

¹⁷Piya puma yokege potate, wasana kana iminti kinati kayokaya yagarawa otaogana wama: Ago kaoꞌenaba puma aꞌya atauna kanaiyo, uma uwaimintiye.

¹⁸Uwaimogini, igeba aꞌyaꞌma uwa aꞌyugu kamana uma: Aꞌa-o untawe. Piya, kaꞌwaina aeba maya untiye: Naeba kasa ma ika pumaratoka, pitaꞌi wama yogaenane pukuwe. Pika kaeba tabe yagaragapa uma omegana abima ataba a-punatano, untiye.

¹⁹Piya yogana to kaꞌwaina maya untiye: Naeba purumaka nayataraꞌmu ika pumaratoka pitaꞌi wama uma yoga pukuwe. Pika kaeba wama tabe yagaragapa uma omegana abima ataba a-punatano, untiye.

²⁰Pigoya to kaꞌwaina maya untiye: Naeba waya maetoka, ayama wakuwe, untiye.

²¹Piya yuguna, kayokaya yagara aeba abite aꞌwae puma kanama, tabe yagara pi kamana omogana abima ata puntiye. Ata potamagina kayokaya yagarawa maya omima agarubantiye: Kaeba karuꞌena waꞌega waꞌega nasi nasi puma aꞌyaꞌma kiꞌi wama kusi kinape karaena nanta kinape igisa antage miru kinape, ibaburite kanagini nanintanepa ampa naiyo, untiye.

²²Piya yogana, kayokaya yagara wagaite kanamagina, aeba tabe yagarawa to maya omintiye: Tabe yagara, kaeba kamana yempesa puwe. Piya popa namapa marupa uwa waiye, untiye.

²³Piya yogana kana yagarama kayokaya yagarawa maya omintiye: Pigoya, kaeba to kiꞌi wama yogari mintakibe kinape kakama kumati wasana mintakibe kinape, tutusuwaitagini kanawaema namantepa ampa pumaeyiyoma uwaimo, untiye.

²⁴Piya, ka kamana yekiri abiyo. Paitama maru igegaꞌe unta kina, igeba nanintanepa kampa nakibewe, Isu piya untiye. Isu aegarakena kamanane

²⁵Pigoya, uwoma kina Isu aegarauguna aꞌwae puma maya uwaimintiye:

²⁶Kaꞌwaina aeba naege mikena puntanaba, ano abape waya yagarawape, aganto aꞌnanto amanaꞌmape, igepa aekita puwaitantana, aeꞌwa nkauꞌwapa pabiyama aekita potakibiꞌna, aeba kayokaya yagarane mikiye.

²⁷Kaꞌwaina aeba kampa maripowa aesagaꞌurite, kampa naegarakibiꞌnaba nae kayokaya yagaranepa kampa mikiye, Isu piyama meto kamana untiye.

²⁸Piya untana to maya untiye: Pigoya, tigetisa kaꞌwaina tabe nama amato puma kirite ikena puntanaba, marupa ikantanamaka napima, yabankapa maema aisumagina kanara kikube kampabayawema, piꞌna nkagowapa abima napikiye.

²⁹Piya kampa punta, namanka kuꞌma kaitantanaba yabaka aguyosagate kasakini, wasanamiba kampa kimaranta namapa agama, kagi potama,

³⁰maya ikibewe: Ma ntagaraba kampa napimagina aganta namapa kuꞌma kaitate kasagina kasipama waintiye, piya ikibewe.

³¹Pigoya, ka marisa waꞌega yagarama to ka marisa waꞌega yagarama aokinaꞌmige kamaena pikena puntini, uwa aꞌyuguba kampa uma iyegukibekana, aeba paitama maya ikiye: Taeba 10,000 kina mintokini, igeba 20,000 kina mintawe. Pigoya igepaya igasima iyeguwaegaikupe, taepaya tagasima taeguwaegaikibewema, napigaitegini kana kamaena pikibewe.

³²Kampa igaintini uwa atate, ayaki kuta timima uwa aiyekana uwa aema paru pukuwe. Piyama wasana agarubakana apa nkakiye, untiye.

³³Piya untana, amato puma maya untiye: Pigoya tigetisa kaꞌwainaba aeba ayama aꞌyaꞌwaemaenawapa kampa kasiwaentapa, aya puma yagaranentanaba puma mikiye. Pipa kampaye, Isu piya untiye. Kampa iga wainta kayowe

³⁴Pigoya to urimuwe: Kayoba aogi igaenawe. Piya, iꞌnisama kasigabekapa, aya pekana to kake asabama iga pikiye, a. Pipa kampaye.

³⁵Pipa piyaena pikenaba kampa waintegini, uwa mariba asunu kaekasawe. Ageyaga kinaꞌmaba ma kamanapa abibebe peno, Isu piya untiye.