Read Fore Aruku 15 Bible Online

Aruku 15 - Fore bible

Aruku 15

¹Pigoya, takisi mone maekena kinape kamparaga kinape Isuti monowa abikena tabera irosaꞌma mintantawe.

²Piya puguni, Parasi kinape mono tisa kinape igeba pika abimagini, Isu ata potama aeka maya untawe: Ma ntagaraba kamparaga kina aoꞌena puma naninta kapisa naye, piya untawe.

³Pigoya, pika Isuba meto kamana maya uwaimintiye:

⁴Tigetisa kaꞌwaina aeba 100-wa sipisipi atama mintakana, kaꞌanto kaka wakanaba uwa kaikiya, a. Kampaye. Aeba kaꞌisaba 99 kumaꞌwaipinti itakini, kabuyena nama mintigina kakawaiꞌnaka aguyosagakiye.

⁵Aguyosama aboratama aꞌmu puma aesaga uritegina,

⁶kumati uma irosaꞌma aokinaka kegaꞌe uma maya ikiye: Sipisipine kabubi kaka wantipe ago abatamagi ababute kanauwe. Pika taꞌmu peno, ukiye.

⁷Pabiyama naeba urimekiri abiyo. Wasana 99-wa monota mintiginaba, igekaba pi mantariba aꞌmuntana waikiye. Pigoya, agunta yagara kaꞌwaina agu aꞌwae pekanaba, aeka mantariba aꞌmuntanaba ima tabera aborama to aꞌmuntanaba igaikiye, Isu piya untiye. Mone kaka wanti meto kamanane

⁸Pigoya, Isu to meto kamana maya untiye: Waya kaꞌwaina nayataraꞌmu mone uꞌma mintakana, kaꞌanto tumiwakanaba kaikiya, a. Kampaye. Aeba kane igiꞌma nama paga puma aogima aguyosagakiye.

⁹Aguyosama aborama waya aokina kegaꞌe uma maya uwaimikiye: Monene kakaꞌwaipa pi ago abatama maeyuwe. Pika taꞌmu peno, ukiye.

¹⁰Pabiyama yekiri abiyo: Mantari Koti nkenisori kina igeba pabiyama agunta yagara ka waina agu aꞌwae pekiniba iꞌmu pikibewe, Isu piya untiye. Yagaranto ka kaka wanti meto kamanane

¹¹Pigoya, to meto kamana maya untiye: Ka yagarama ntagarawapa tara mintantase.

¹²Mintana aintisa yagarama abawampa mayama omintiye: Kaeba mone kuntaka pako puma naepa nameganto, yogana, pako puwaisitantiye.

¹³Piya pogana, aintisa yagarawampaba ise yaganto mima kotanka aꞌyaꞌwaemaena aisaꞌurite eꞌero mpari maete wantiye. Pigoya pitaꞌi kupiyona puta nasima mone kutankapa nanintari kasima pusiya puwaegaintiye.

¹⁴Pusiya puwaegaite mintogana, pi mpariba tabe kabu pogana aeba kaꞌenawapa kampa waintiye.

¹⁵Aibogana, ma ago yagara kaꞌwainati wama uma atokaeyogana, aeba yogana kumaꞌwati yaga kiye kabintiye.

¹⁶Piya puntana, aeba yagama ntaninta nakena poginiba aꞌa-o otantawe.

¹⁷Piyama mintana maya aogima napintiye: Nabanempa kayokaya kinaꞌmitiba uwoma ntaninta waiyegini nama igaꞌe pama miyega, naeba yagarawampanaba mataꞌi ampima nagaꞌenaga purikena puwe.

¹⁸Pika naeba kumaꞌneti wama nabanempati irosaꞌma maya uma omukuwe: Naba, naeba aguntaena pogana kaintananempaba kaetibe Kotitibe kunta piya.

¹⁹Pipa ayama to kake kagorasa yagaragapa mikuwe. Kaeba uwa kayokaya yagaraga nababega mikuwe ukuwema, napintiye.

²⁰Piyama napima, aseꞌyo puma abawampati kanantiye. Kanamagina kuma awamori uma irosaogana abawampa ago agate antara puma karuꞌena uma aepama amo nantiye.

²¹Aibogana kana yagaramaba mayama omintiye: Naba, naeba aguntaena pogana kaintananempaba Koti nkaobipe kae kaobipe kunta piye. Pika kaeꞌyagaranawe to kampa ukuwe, untiye.

²²Piya yogana, abawampa: Pigoya aerawane, otate, kayokaya maya uwaimintiye: Tigeba karuꞌena wama aogi kai maete kanama ampa amitaiyo. Ayapipa tusapa potantiri, agisa anapa amintiri piyo.

²³Piya, purumaka nkawaroba apa yaga aeguma kaeyigi nama taꞌmu potano.

²⁴Yagaranepa aeba puꞌwantitisa to kake aogaya, pigoya aeba kaka wantitisa to kake aboraya, pika taꞌmu peno, untiye. Piya yogini kaema iꞌmu puntawe.

²⁵Pigoya, amaru yagara aeba yogari mintogini piya puntawe: Piya yogarisa aꞌwae puma nama nkakaꞌi ampima inibe waꞌenabe abintiye.

²⁶Piyama abimagina kayokaya yagara ka kegaꞌe uma: Maipa nana pewema, abigantiye.

²⁷Aeba maya aꞌwae pomintiye: Kaꞌnantogampa kanama irosaꞌma, ataenaba kampa pikana aogima mintiye. Pigo irosagina tisibarisimpaba yegi purumaka nkawaro apa yaga aeguma kaeyunema, omintiye.

²⁸Piyama omogana, amaru yagara aeba amoꞌena puma namapinti ikenagaba aꞌa-o untiye. Piya pogana abawampaba kuma awamori tumima aurintiye.

²⁹Piya pogana kampa abinta, abawampapa maya omintiye: Abeno. Naeba ayaki kabubaya mima kamanakapa kampa akaꞌyuma kayokayaꞌenaba pugatauwe. Pugataoganapa, pi kaeba uwa meme awaroba kapa kampa nameka aeguma yaga namaegigeba nama taꞌmuntanaba kampa pompene.

³⁰We, aintisa yagaragapa kupiyona puta nasima mone kutankapa pusiya puma asorisari pugaite kanagina, yekini purumaka nkawaro apa yaga aeguma kaetawe, untiye.

³¹Piya yogana, abawampa mayama omintiye: Yagarane, kaeba asi nasi miyempeka piya mayaenagaba kampa aguyosagane, aꞌyaꞌmaenaba kapiyenaresi waintiye.

³²Piya kaꞌnantoba aeba puꞌwantitisa to kake aogaye. Piya, aeba kaka wantitisa to kake aboraye. Pika tantawama asoꞌya peka taꞌmu potakana aogi pikiye, untiyema, Isu piya untiye.