Read Fore Aruku 16 Bible Online

Aruku 16 - Fore bible

Aruku 16

¹Isu abagi kinaꞌwa kamana to ka maya uwaimintiye: Tabe kutantaga yagara kaꞌwaina kiya yagarawa ababuntiye. Pigoya, kaꞌisa kinaꞌmi aeka maya yuguna aba kari abintiye: Kiya aeba kota maema aꞌyugu piyema, yuguna abintiye.

²Piya kamana abitegina kegaꞌe uma maya omintiye: Kae kamana maya yega abuwe. Kae piyamagaba kiyeba to kake kampa mikibenema yuwa, esagapa maete kanagara mone kutankama nkagowa aogi peso, untiye.

³Piya yogana, kana kiya aeba antabinti mayama napima untiye: Ma tabe yagaranempaba yogane nagarubakenaga iye. Aya pukuwe. Yogaena pusagaba naekita piye. Nauꞌama iga tumiga peka, wasanamiti nanintaga esuwaitasanagaba nani piye.

⁴Piya, tabe yagarama yogarasa nagarubakibi kanabipa, aꞌyugu wasanami ka nabiꞌma, namankaipi kampa nababuntanagaba ka nagi napiyoka, pintana pukuwe, untiye.

⁵Piya utegina, tabe yagarawampa nkireta wainta kinaka kegaꞌe umagina, kaꞌwaina mayama abigama untiye: Kaeba tabe yagaranempa ireta kaetiba ayaki waintiye, untiye.

⁶Piya yogana aeba maya untiye: Apa tabe tiniba 100-we yogana, mayama omintiye: Pigoya, ma ireta esa maema maraꞌmima 100 aegugasima 50 kaeyo, untiye.

⁷Piya untana to kaꞌwaina ampa irosaogana: Tabe yagaranempa ireta kaetiba ayaki waintiyema abigantiye. Abigaogana, 100 witi kune, untiye. Piya yogana maya omintiye: Pigoya, ma ireta esa maema 100 aegugasima 80 kaeyo, untiye.

⁸Pigoya, piya pogana, tabe yagara ata kiya yagaramaka abimagina: Aogi napiyena napima piyema, abima aogi potantiye, Isu untiye. Piya untana pi kamanaka to maya untiye: Mampabisa kinaꞌmiba mampabisaenaga tabera napi napi pewe. Piya pumagini eꞌwasaena maenta kinaꞌmipa igasima napi napi pewe.

⁹Piya yekiri abiyo. Moneba mampabisaenawe. Tigeba pika aogima napima pitasa tiyoꞌenaba puma maema miyigina, mampabi mikena kanati aꞌya pikibi ntagaba, aꞌyaꞌwaema kutatipa kampa maete Kotiti ikibewe. Pabi ntagaba miyaba mikena kumati asu aogima mikibewe, piya untiye.

¹⁰Pigoya, Isu to maya untiye: Kaꞌwaina aeba auꞌwa kampa waintaꞌena aogima kanara kabibikiꞌnaba, aeba pabiyama auꞌwantagaꞌenaba aogima kanara kabikiye. Piya kaꞌwaina aeba auꞌwa kampa waintaꞌena maema ataena pikibiꞌnaba, aeba pabiyama auꞌwa waintaꞌenaba maema aꞌyugu pikiye.

¹¹Pigoya tigeba mampabisa kuta aogima kanara kampa maema miyiginaba, mantarisa taga auꞌwantagaꞌenaba Koti kapa ayama timikiye, a. Pipa kampaye.

¹²Pigoya, aꞌyo timintaꞌena pi aogima kanara kampa uꞌma miyiginaba, tigeꞌenaripa pi Koti ayama timikiye, a. Pipa kampaye.

¹³Pigoya, ka yagarama tabe yagara taramisi kayokayaꞌena kampa kanara pikiye. Aeba kaꞌwainapa kayone potantana, to kaꞌwainapa agama aekita potakiye. Piya pumagina aeba kaꞌwainati uma atokaentana to kaꞌwainapa akabitakiye. We tigeba pabiyama Koti ntugabe mone kutankama ntugabe ka awameta kanara kampa maekibewe, Isu piya untiye. Isu aeba Parasi kinaꞌmi kamana untiye

¹⁴Pigoya Isu aeba pi kamana yogini, Parasi kina igeba mone kutaka ibugai kina abima kamanaꞌwa akayuma kagi potantawe.

¹⁵Aibuguna maya uwaimintiye: Pi tige wasanami nkiyobi aogi tiyuwa kanta piye. Kotiba tiguꞌama nkagoba agama abiye. Wasana ige iyobi iꞌmaete ima mikenaenagaba pi Koti nkaobi ata aguntaena piya.

¹⁶Piya, paipa Mosese ominti ago kamanape poropete kinaꞌmi kamanape kaeta kanantagana Yoniba aborantiye. Aboramagina Koti kabiratakena aogi awaga kamana untika, ibaba aboraye. Piya ebi ebi peꞌnagiba agasiya puma uma pasawe.

¹⁷We, mage mantage isigeba aꞌya pikenaba untanaba aꞌya pikiye. Piya, Koti kamana kapa kampa kakakibikana aꞌyaꞌma uwa waiyaba mikiye, Isu piya untiye. Waya kaikena kamanane

¹⁸Pigoya, kaꞌwaina wayaꞌwa kaite to wae maekibiꞌnaba, kupiyonaba pikiye. Piya, to kaꞌwaina aeba pi kainta wae maekibiꞌnaba, aeba pabiyama kupiyonaba pikiye, Isu piya untiye. Tabe yagaramage Arasarusige kamana untiye

¹⁹Pigoya Isu to ka kamana maya untiye: Tabe kutantaga yagara ka mintantiye. Aeba kaiwapa waepe teteba aogiyenamana puꞌma mintana, asi nasi aogi nanintamana namagina igaenabi mintantiye.

²⁰Pigoya, kusi yagara ka mintantiye. Agewapa Arasarusiwe. Aeba autiba anamosura yagarawe. Pigoya, aeba tabe yagarama ntama kabera waibomekana,

²¹tabe yagarama ntamapintisa ariyena atuntana tumogana: Pabipa maema nakuwema, napintiye. Waitamintogana karamiba irosaꞌma anamopa inteburasa kiꞌma nantawe.

²²Pigoya, mima pi kusi yagaraba purogini enisore kina igeba ababute ima abaraꞌamu nkagora atauguna mintantiye. Pigoya ainti pi tabe yagara aeba purogini kaitauguna,

²³aeba aꞌabibinti tumima tabera auki naki puma mintantiye. Piya puntana, inati aomaraomepa Abaraꞌamu nkagora Arasarusi pa agantiye.

²⁴Agantana Abaraꞌamu nkagisuma maya untiye: Abaraꞌamu nabanempagawo, naeba mataꞌi yakupi nauki naki puma mintuwa, kaeba naeka kantara puma Arasarusi otagana aya nkawarasa wanipi aerite kanama nantebura atakana paru peno, untiye.

²⁵Piya yogana Abaraꞌamu maya untiye: Yagarane, abeno. Kaeba mara igaenabinti mintanti pipa pabiyama aꞌya puwantiye. Pigoya Arasarusi antaraꞌenabinti mintanti, pipa pabiyama aꞌya puwantiye. Pigoya pika aeba anta asoyaenabi mpintiya, piya kaeba kauki nakiyenabi mpiyene.

²⁶Pigoya abakatepi tabe aꞌabi waintiye. Pika matisamiba tigetiba ayama tumikibewe, a. Piya tigetisamiba matiba ayama ikibewe, a. Pipa kampaye, untiye.

²⁷Aiyogana, kana tabe yagarama maya untiye: Nabanempa kanarana, kamanakapa ago abuwe. Piya, ka yekana abo. Maroti nae kumati naꞌnatabarantonto nayakaꞌmu mintawe. Igeba mataꞌi auki naki kumati tumisanaga Arasarusi otagana wama tonkiya kamana uwaimeno, untiye.

²⁹Piya yogana Abaraꞌamuba maya untiye: Kampaye. Mosesebe poropete kina ige mono kamana wainti, pi igeba abiyo, untiye.

³⁰Piya yogana aeba to maya untiye: Abaraꞌamu nabanempa, pipa kampaye. Purinta kina kaꞌwaina wama uwaimekini kanara igu aꞌwae pikibewe, untiye.

³¹Piya yogana maya omintiye: Igeba Mosesebe poropete kinaꞌmibe kamanapa aꞌa-o yekini, piya purinta kina kaꞌwaina asima wama uwaimemisinta, pabiyama aꞌa-o iyesine, Abaraꞌamu untiyema, Isu piya kamana untiye.