Read Fore Aruku 17 Bible Online

Aruku 17 - Fore bible

Aruku 17

¹Pigoya, Isuba abagi kinaꞌwa kamana maya uwaimintiye: Aguntaena pukena amiyoꞌena asi nasi aborakiye. Aibekana aguntaena aborakibi ntagarama ataenabi mikiye.

²Pipa aeba maya yagaranto ayakekana kamparagaena pukibemipa, kana ayakikibi ntagara arakuꞌma tabe yabantama anaꞌmubi ubaꞌatama tabe wanipi apasanakasasinta: Pipa kanara pewe, yesine.

³Tigeba kiya kabima miyiyo. Kaoꞌyagara ataena pekanapa ka abirao. Piya pegana aeba agu aꞌwae peno. Piya yegana antara kamana ugasakana asuꞌa pugaso.

⁴Piya, ka yagaba tonaentisa tara umaema aguntaena pugatantana, to kake kaeti irosaꞌma tonaentisa tara umaema yaga: Naeba nantara puma nagu aꞌwae puwe, ikibipa, kaeba aguntaenawapa uwa asuꞌa pugaso, Isu piya untiye. Amatitiꞌenaga Isu untiye

⁵Pigoya, aposoro kinaꞌmi igeba Waꞌega Yagara maya esotantawe: Kaeba tamatitiꞌenarepa maema tabe puratao, untawe.

⁶Piya yuguna Waꞌega Yagarama maya uwaimintiye: Taga timatitiꞌena uwaenanto waintesinta, maro ntawamaka: Kaeba igiritegina tabe wanipi tumpa waiyeno, yeganaba, tiwamu wasima pabiya pemisine, Isu piya untiye. Waꞌegawama ntuga kamana Isu untiye

⁷Pigoya, Isu to maya untiye: Tabe yagara kaꞌwaina aeba kayokaya yagarawa yogaenaba puntana yaga kiye kabintana puma mintakibitisa atamaita kanakanaba, mayaba kanara omikiyo: Kaeba namapinti iyega naninta kaoꞌena pugameno, omikiya, a.

⁸Pipa kampaye. Aeba maya omikiye: Piya, aogi kai maema amirintana asekasa naninta kaenataga nagasakana, ainti uma kaeꞌenagapa kaema nao, ukiye.

⁹Pigoya kayokaya yagara aeba yoga otanta pipa pekana, tabe yagarawampaba uwa abekana aya pikiye. Pika kampa aꞌmupa potakiye. Kampaye.

¹⁰Piya, tige agoba pabiyama waintiye. Tigeba uritantaꞌena pi puwaegaitekiripa maya yiyo: Taeba uwa kayokaya yagararawe. Pintana pompepa tae yugare pune, to naumabisa napima to kaꞌisaenaba ae yugaba kampa pune, yiyo, Isu uwaimintiye. Isu nayataramu karu kina aogi puwaitantiye

¹¹Pigoya, Isu aeba Yerusaremi kumati wakena Karariya maba agaite Sameriya ma awamori uma irosantiye.

¹²Irosaꞌma ka kumati iyogini karu kina nayataraꞌmu igeba pagasari mima agategini,

¹³kegaꞌe uma agisuma maya untawe: We, kiya yagara Isu, kaeba taeka kantara po, untawe.

¹⁴Piya yuguna igama: Tigeba wama tipa mono kiye kina iyakiyo, uwaimintiye. Piya yogini, wauguna iꞌamaba aogi puwantiye.

¹⁵Piya puwaogana agate igetisa kaꞌwaina aꞌwae puma tabera uma Koti aꞌmu potama,

¹⁶Isu nkagisabi parokaema aꞌmu potantiye. Piya, pi ntagaraba Sameriya marisa yagarawe.

¹⁷Pigoya Isuba maya untiye: Wasanaba nayataraꞌmu aogi pene. Kaꞌisa tonaentisa ka megasima kinapa aempaye.

¹⁸Igeba aꞌwae puma Kotika: Taꞌmu pugatauneba, kampa otanta uwa wagana, to marisa yagarama abinto kanamagina ampa aꞌmu potaya, a, piya untiye.

¹⁹Piya umagina aꞌwae puma pi ntagarapa: Kamatitiꞌenagampa aogi pugataya, kaeba asima waoma, omintiye. Koti kabiratakena yaga aborakibika Isu untiye

²⁰Pigoya Parasi kinaꞌmi: Koti kabiratakena yaga ayantaga aborakiyema, Isu abigantawe. Abigauguna Isu maya uwaimintiye: Koti kabiratakena yaga aborapa kampagina aborakiye.

²¹Pintaga mayama kampa ukibewe: Agaiyo. Mataꞌi aboraye. We, marotaꞌi aboraye, piyaba kampa ukibewe. Abiyo, Koti kabiratakenaenaba tigupi ago aboraye, untiye.

²²Piya umagina, abagi kina to maya uwaimintiye: Tigeba toganaba ka yagaba Wasanama Ntagara nagakenagaba tibugagate kampa nagakibewe.

²³Pi kanabipa naekaba maya urimikibewe: Mataꞌi taeti aboraye. We, marotaꞌi igeti aboraye, igiripa a-nkwaiyo. Piya abigiripa a-nkuma iyegaraiyo.

²⁴Wasanama Ntagaraba naeba kakamaba kampa irosakuwe. Apayaenaba aeba manta ka aukaꞌi apaya pegina to aukaꞌi eꞌwasa purite wagana pemi, pabi nkawameta naeba aborakuwe.

²⁵Marupa mamparasa kinaꞌmiba ikabinataigini nauki nakiyena tabera punataigina, asaba pi yontana aborakiye.

²⁶Piya, Nowa mintanti kanabi wasana igeba puntasa puma Wasanama Ntagara nae irosakena kanaꞌnepa aborakiniba, pabiya pikibewe.

²⁷Igeba nanintaba nantini, wanipa nantini, wayapa ika pumagini, ibaꞌenaba puntini, puma kampa aogima napima mintuguna, Nowa aeba wanipisa karebi ima paiwaogana wanipa tabera paꞌma ipirinta waegasogini, wabe wayape aꞌyaꞌma puꞌwaewantawe.

²⁸Pigoya to Aroti mintanti kanabipa pabiya puntawe. Nanintaba nantini, wanipa nantini, ikantanaba puntini, to kinapa kaꞌisaenaba imuguni, ika puntini, yoga aintanaba puntini, namapa kintini, puma kampa aogima napima mintuguna,

²⁹ka yaga Aroti aeba Sotomu kumapa akabitate waogana yakupe yakupisa kagupe mantarisa tumima aꞌyaꞌma kinapa wabe wayape iyeguma aꞌya kaintiye.

³⁰Piya pi ntaga igeba pika kampa napintasa puma, Wasanama Ntagara nae aborakena kanaꞌnekaba kampa napikibewe.

³¹Pigoya, pi ntagaba kaꞌwaina aeba namankampa nkabobori mintakibitisaba tumima nama nkantabaipintisaba kotankapa a-mpaeyano. Pigoya, to kaꞌwainaba pabiyama yogari mintakibitisaba aꞌwae puma namankatiba a-nkwano.

³²Piya, tigeba Aroti nkanarimpa yabantana puwantemika napima kabiyiyo.

³³Kaꞌwaina aeba mikenaenawa ka abugakibemiꞌnaba pipa aguꞌamankapa kaikiye. Mikenaenawampa aꞌa-o otakanaba, aguꞌamaba aogima waikiye.

³⁴Naeba yekiri abiyo: Pi nkagogo yaga maruta tara yagara waitamintisiginaba Kotiba kaꞌwainapa ababurintana to kaꞌwainapa atakiye.

³⁵Piya, tara wae taramisi naninta kaoꞌena puma mintisiginaba kaꞌwainapa Kotiba ababurintana to kaꞌwainapa uwa atakiye.

³⁶(Piya, yogari tara yagara taramisi mintisiginaba Kotiba kaꞌwainapa ababurintana to kaꞌwainapa uwa atakiye, Isu piya untiye.)

³⁷Piya yegini abagi kinaꞌmiba: Tabe yagara, pintanaba aeta aborakiyema, abigantawe. Piyama abigauguna Isu meto kamana maya uwaimintiye: Purinta kinaꞌmi nkau waintiti kegeba aki pesa pumawe, untiye.