Read Fore Aruku 18 Bible Online

Aruku 18 - Fore bible

Aruku 18

¹Pigoya, abagi kinapa iyekita kampa punta asi nasima igeba esotakibeka, Isu meto kamana ka maya uwaimintiye:

²Piya, ka kumata ka kamana abikena yagara mintantiye. Pi ntagara aeba Kotikaba kampa aekuruba puntana, aꞌyaꞌma kinakaba kampa aogima napintiye.

³Piya, pabi kumata kiya wae ka mintantiye. Aeba asi nasima pi kamana abikena yagaramati kanama: Kama kinaꞌnempi ata punatasanaga, naoꞌmaeyoma, ampa omi puntiye.

⁴Pigoya, marupa pi kamana abikena yagaramaba aekita potama kampa aoꞌmaentana, aintiba aeba mayama antabintiba napima untiye: Naeba Kotikaba kampa naekuruba puma, wasanamikaba pabiyama kampa napiyuwe.

⁵Pigoya, ma nkawae puꞌwanta waepa aeba asi nasi kanama ampa nabigayaba miyekanaba nauꞌamaba aekita pusanaga iba kamanaꞌwa abima aoꞌmaekuwe, untiyema, untiye.

⁶Piya umagina, Tabe yagara amato puma maya untiye: Ata kamana abikena yagarama unti kamanapa ago abewo. Pipa ayabayawe.

⁷Kotika kagipe asekape asi nasima aegarakibe kinaꞌmi agisaiginaba Kotiba kanara kampa tiyoꞌmaekiya, a. Aeba agawa puma miyabaꞌmiyigina karuꞌenaba kampa iyoꞌmaekiya, a.

⁸We, urimuwe: Pipa kampaye. Aeba agaro ntaganto tiyoꞌmaekiye. Piya, aintiba Wasanama Ntagara naeba to kake aborama mabi tumukubopa, igeba imatitiꞌena pe kinapa taranto aogima mikibewe, piya untiye. Parasi yagaramake takisi maekena yagaramake meto kamanane

⁹Pigoya, kaꞌisa kinaꞌmiba igeꞌwaikaba: Aogi kinatawema napintini, to kinaꞌmikaba: Pipa ata kina takaꞌyanema napinta, pi igi napiye kinakaba Isuba mono kamana maya umintiye:

¹⁰Tara yagararamisi nunamu ikena tabe mono namapinti intase. Pigoya, kapa Parasiwa, to kapa takisi maekena yagarawa sumawe.

¹¹Parasi yagara aeba asima mima aeꞌwaka mayama napima nunamu untiye: Koti, wasana kaꞌisa kinaꞌmiba kuntana maꞌenaba pewe. Kamana kampa aogima abewe. Wayaꞌwa taramisiba atataraenaba puma ata aguntaena pewe. Naeba piya kinapa kampaye. Piya takisi maeyi ntagara mare, ae piyamaba kampa mintuwe. Pika naeba naꞌmu pugatauwe.

¹²Piya, aꞌyaꞌma sontarapa tara yagaba naeba monoka napima nanintaba aꞌa-o uma miyuwe. Piya, aꞌyaꞌwaemaena maeyopa, naeba pipa pako puma nayataraꞌmupisa agento kamuwe, piya untiye.

¹³Aiyogana, takisi maenta yagara aeba pagasara asima mintana mantari aomarakenagaba ani puma kampa piya puntiye. Aeba aibira aima maya untiye: Koti, naeba agunta kina miyoka, kaeba kantara punatama naoꞌmaeyo, untiyema, Isu piya untiye.

¹⁴Pigoya naeba urimekiri abiyo: Pi takisi maenta yagaragaba Kotiba aguntaena maegasogana waꞌewati uwa wantiye. Piya pi to ka yagaraba kampaye. Abiyo. Kaꞌwainaba aeꞌwa nkau maete iyekanaba, Kotiba merunkaba potakiye. Piya, to kaꞌwaina aeꞌwa nkage au maete tumekanaba, Kotiba ababuma mesuba potakiye, Isu piya untiye. Isu inamu ntakarantonto akayona puwaintiye

¹⁵Pigoya igeba inamu ntakarantontowai Isuti ibabute kanantawe. Igeba: Ayapa ita aukaya pikiyema, napima kanauguni abagi kinamiba igate ka ibirantawe.

¹⁶Piya yuguna, Isuba igegaꞌe uma igeka maya untiye: Tigeba uwa itaigini yakarantonto igeba naeti kanaiyo. Tigeba a-nkakunkitaiyo. Piya miye kinaꞌmikaba Koti kabiratakenaenaba utawaitantine.

¹⁷Naeba taga urimuwa abiyo. Kaꞌwaina aeba yakarantonto miyesa nkawameta kampa Koti aegarakibiꞌnaba Koti kabiratakenaenama nkagupi kampa uma pasikiye, Isu untiye. Kutantaga kiye yagarama Isu aegarakenaga kunta puntiye

¹⁸Pigoya kiya kaꞌwaina Isu mayama abigantiye: Aogi tisa, naeba aya pukubotisa Koti nkeꞌwasaenaba maekuwema, abigantiye.

¹⁹Abigaogana Isu piya omintiye: Nana piyema naeba aogi tisaweba yene. Aogiyenama nkagoba Koti kaꞌantowe.

²⁰Pigoya kaeba nayataraꞌmu kamana agoba mayama abene: Kumiyenaba a-poma, wasanaba a-nkaeguma kaiyoma, kuntanaba a-poma, kumpari kamanapa to wainapa a-sotaoma, kano kaba kamana wasiyo. Pipa abintanema, omintiye.

²¹Piyama omogana kiya yagarama maya untiye: Pipa uwaena yagarantomana pi kamana agoba abima wasita kanantone, untiye.

²²Aiyogana Isuba pi kamana abintana, maya omintiye: Kaꞌenaba kampa puntana, pintanaba po. Kaeba wama kotakapa to kina imima mone maemagina kusi kina imegana, mantari aogiyena ainta abora kamikiye. Kaeba piya potate kanama ampa naegarao, piya omintiye.

²³Pigoya, piya omogana kana kiye yagaraba tabe kutankapa uwoma waintomeka, pi kamana abogana kunta abuntiye.

²⁴Piya pogana Isu agantana pika maya untiye: Tabe kutantaga kinaꞌmiba Koti kabiratakena kumati ikenagaba igigaba tabera pewe.

²⁵Pigoya tabe kamoro yagamaba naꞌama agepinti uma pasikenaba pipa esegiyenawe, piya tabe kutantaga kanaꞌmi Koti kabiratena kumati ikenaenaba pipa to awameta, tabe kuntaenawe, Isu piya untiye.

²⁶Piya yogini abume kinaꞌmiba maya untawe: We, pipa kepaya Kotiba auꞌima aba pikiye untawe.

²⁷Piya yuguna Isu maya uwaimintiye: Wasana piya pikenaba kampaye. Koti kaꞌwaina piya pikenaenaba waintiye, piye untiye.

²⁸Piya yogana Pita maya omintiye: Abo. Taeba waꞌerepe aꞌyaꞌwaemaenarepe kasima takabitate kaegaraune, untiye.

²⁹Piya yogana, Isu aꞌyaꞌma kinapa maya uwaimintiye: Naeba taga urimekiri abiyo. Aꞌyaꞌma kina Koti kabiratakenaenaga aegaꞌmagini, pika waꞌewaipe, waya yagarawaipe, igagabagipe, ino ibagipe, uma itakibeꞌnagiba

³⁰igeba piꞌnakaba mamparasaenaba agasimagina antotapa mesuba puma Kotiba imikiye. Piya, aintiba mantarisa aogi eꞌwasaena asu maekiye, Isu piya untiye. Purintapisa asima mikena kamana kakagara uwaimintiye

³¹Pigoya, Isu aeba nagisarisa tara tumpaema kinaꞌwa igegaꞌe uma ibabute wama maya uwaimintiye: Abiyo. Taeba iba Yerusaremi kumati ikune. Iyekana aꞌyaꞌwaema kamana pai poropete kinaꞌmi Wasanama Ntagara naeka uma mono isapi kaemaranta, pi kamanaꞌama nkauꞌwapa aborakiye.

³²Nabanempaba namuꞌisa kinaꞌmiti unatakini, naeguma ata punatama, karana natama, kaisa punatakibewe.

³³Piya pumagini kasotasa naeguma naiburikibewe. Piya piginaba papa kakaga yaga aꞌya peka, purintapisa to kake naogama asikuwe, piya untiye.

³⁴Aiyogini abagi kina igeba pi kamana kampa abintawe. Kana kamanaꞌama nkagobe kakawaogini igeba aogimaba pi yome kamanapa kampa napintawe. Isu aorika yagara aogatantiye

³⁵Pigoya Isu aeba Yeriko kuma agora waogana, ke awamori aorika yagara ka mima aꞌyaꞌma kina wagana pugunaba mone kutaka esuwaitama mintantiye.

³⁶Piya, aeba abomepa uwoma kina kanagana puguna, aeba kaꞌisa kina ibigama: Maepa nana pewe, untiye.

³⁷Piya yogini igeba maya omintawe: Isu aeba Nasaretirisa yagara tagora kanama nasiyema, omintawe.

³⁸Piya omuguna aeba tabera kegaꞌe uma maya untiye: Isu, kaeba Tebiti nkagaꞌnu, kaeba naeka kantara punatao, untiye.

³⁹Piya yogini paitanta kinaꞌmiba: Paka po, uma kabiraugunaba, aeba ige kamana kampa abinta ebi ebima kegaꞌe uma: Kaeba Tebiti nkagaꞌnu, naeka kantara punatao, untiye.

⁴⁰Piya yogana Isuba abite, keta asima mintana: Tigeba naeti ababute kanaiyo, untiye. Yogini aorika yagara aeti ampa aboragana, Isu mayama abigantiye:

⁴¹Naeba nana pugatasanaga kabiyema, abigantiye. Abigaogana, pigo aorika yagarama: Waꞌega, naeba nao agasanaga nabiye, untiye.

⁴²Piya yogana Isu maya omintiye: Kaoba agano. Kamatitiꞌenagampa aogi pugataye, omintiye.

⁴³Piya omogana aowamaba aogi pogana agate Isu aegarantana Koti aꞌmu potaogini, aꞌyaꞌma kinaꞌmiba pintana agategini pabiyama Kotiti iꞌmu potantawe.