Read Fore Aruku 19 Bible Online

Aruku 19 - Fore bible

Aruku 19

¹Pigoya, Isu aeba wama Yeriko kumati wama agaikena puntiye.

²Pigoya, pi kumata ka yagara mintantiye. Agewapa Sakiyasi, aeba takisi maeyume kinaꞌmi paitakena yagara, piya tabe mone kutantaga yagara mintantiye.

³Pigoya, pi ntagara aeba Isu agakenagaba abugantiye. Piya aeba arogu yagaragana wasanami ainigasuguna Isupa kampa agantiye.

⁴Aibuntana, karuꞌena wasana igaite wamagina yabinti asu mima: Isuba ma kiꞌi atawaka agakuwema, napintiye.

⁵Piya pogana, Isu aeba pitaꞌi wantana, aomaraogana iyogana agate maya omintiye: Sakiyasi, kaeba karuꞌena tumo. Naeba ibantoba namakapi ampikuwe, untiye.

⁶Piya yogana, karuꞌena tumima aꞌmu purite Isu aba poginisi namankapinti wantase.

⁷Piya pusuguni aꞌyaꞌma kinaꞌmiba agate ka abiꞌma mare-u me-u puma maya untawe: Aeba nanagabaya agunta yagarama ntamapintiba uma pasiye, untawe.

⁸Piyoga, Sakiyasiba asima mintana tabe yagara maya omintiye: We Waꞌega abo, kaꞌisa mone kotantepa pako puma kusi kina imukuwe. Piya, kaꞌisa kinaꞌmi mpone iparinto pi aisarapa to tarawa tarawaki kanabi mesuba puma imukuwe, untiye.

⁹Piya yogana Isu maya omintiye: Ma ntagaraba Abaraꞌamu nkagaꞌnuwe. Pika iba ae namapi Koti aogi potakenaena ago aboragina aogi piye.

¹⁰Pigoya, Wasanama Ntagara naeba atama kaka wanto kina iguyosagaꞌma ibabuma aogi puwaitakena tumintone, untiye. Monera kabinta kinaꞌmi mpeto kamanane

¹¹Pigoya, Isu aeba Yerusaremi kuma agora ampa irosaogini, kamanaꞌwa abinta kinaꞌmi igeba: Ibanto Koti kabiratakenagana aborakiyema, napintawe. Piyama napiyuguna, pika Isu meto kamana ka maya uwaimintiye:

¹²Ka kiye yagarama to ka tabe yagaramati wama: Ma kiye asinataka aꞌwae puma kanakuwe, ute pagaso mari wantiye.

¹³Wakena puntana, kayokaya kinaꞌwa nayataraꞌmu igegaꞌe uma mone asa ka ka puma imima maya uwaimintiye: Tigeba ma moneba maema yoga pugaka pigi, naeba aintiba aꞌwae puma kanano, uwaimintiye.

¹⁴Piya uwaimite waogini, waꞌewatisa kinaꞌmiba aekaba iyekita potamagini wasana apa igarubauguni ainti wama tabe yagara mayama omintawe: Kaeba ma kiyerepa kampa miyenema napiyunema, omintawe.

¹⁵Piya yuguniba, eꞌero mparisa yagara kampa abitegina, kana yagaraba kiyaena asitantiye. Aibuguna, kana kiye yagara aꞌwae puma kanama otategina, kayokaya kinaꞌwa mone iminti, igeka ampa igegaꞌe uma maya untiye: Mone timintopa ago yoga pegana tabe pibera kampayema, ibigantiye.

¹⁶Piyama ibigaogana, kayokaya yagara kaꞌwaina aeti kanama maya untiye: We naba-o, mone asaba ka namintampetasa yoga pogana to nayataraꞌmu asa aborama waintiye.

¹⁷Piya yogana aeba maya omintiye: Kanarane. Kaeba aogi kayokaya yagaragawe. Kaeba uwaenarapa aogima kabiyempeka ibanto naeba nayataraꞌmu kuma kiye ugatakana kabikibene, omintiye.

¹⁸Pigoya, piya yogana kayokaya yagara to kaꞌwaina kanama maya omintiye: We naba-o, kaeba ka asa namintampetasaba yoga pogana to nayakaꞌmu mone aborama waintiye, untiye.

¹⁹Piya yogana aeba maya omintiye: Kanarana, nayakaꞌmu kumatasa kinaꞌmi kiye mikibene, omintiye.

²⁰Pigoya kayokaya yagara to kaꞌwaina kanama maya untiye: Naba-o, mone asagapa maye, maeyo. Naeba kairasa asaema pasema ataogana waintiye.

²¹Piyama, naeba kagaopa kaeba kamo yagaraga kana kaꞌisa kinaꞌmi atantanaba kaeba uwa maeyane. To kinaꞌmi ntugabisaba pipa uwa kubene. Piya pempeka naeba kaeka naekuru pumagi uwa atantogana waintiye, piya omintiye.

²²Piya omogana kiya yagarama maya untiye: Kaeba ata kayokaya yagarawe. Pi kaeka kamanakata koti pugatakuwe. Piya, kaeba taga ago abene, naeba namo yagaranaga, naenepa yoga pumaba kampa maeyoka, kaꞌisa kinaꞌmi puma abora maraga maekena kaga yuwe. Piya naenepa yoga kampa punta uwa miyogini kaꞌisa pegana ano nkaboragi nakena kaga yuwe.

²³Kaeba aya pemika monenepa pisinisi kinapa kampa imekini yoga puma aꞌmu mponenepa maenataga ampa maeyuwo, untiye.

²⁴Piya umagina, agorasa kinapa maya uwaimintiye: Tigeba mone asaba apama nayataraꞌmu urinti ntagara amiyo, untiye.

²⁵Piya yogini igeba: We naba-o, aeba nayataraꞌmu asa ago urintiye, untawe.

²⁶Pigoya naeba aꞌyaꞌma kinaka urimekiri abiyo: Wasanama urintantana aogima maema mintigipa, to kake maekibewe. Piya, kaꞌisa kampa aogima maema mintigipa, ipaꞌma kaikiye.

²⁷Pigoya kama kinaꞌnempiba kiyarepa ampiyoma unata kinapa ibabute kanama naora iyeguyigini puꞌwae waiyo, untiye, Isu meto kamana piya untiye. Isu yaga akabata Yerusaremi kumati intiye

²⁸Pigoya, Isu aeba pi kamanapa uma aꞌya potate, Yerusaremi kumati irosakena wantiye.

²⁹Wama Oribesi amupa amentapinti wama Petipaesi kumake Petani kumake agora wantana, tara abagi yagararamisi uwaisitaoginisi paitama wantase.

³⁰Aeba mayama uwaisimoginisi wantase: Wamagirisi maro kumati wama, tonki aikeri wasanami kampa mima nasi nasi aogaso aikeri uma abatama, iyobaꞌurite kanaiso.

³¹Iyobaisigina wasana kaꞌwaina kamana uma: Nana pikena iyobase yekirisiba, maya omiso: Waꞌega yogawa waintegina yegira ampa ababuse yiso, uwaisimintiye.

³²Piya yoginisi kayokaya yagara tara isigeba wama yomesa puntase.

³³Pigoya, pi tonki yaga aikeri uma iyobausuguni, kana yagama nkababa: Nana pikena iyobase, untawe.

³⁴Piya yugunisi isigeba: Waꞌega yagarama yogawa waintegina yegira ababuse, untase.

³⁵Piya uteginisi ababurite Isuti wama, akabatiba kaiwaipa atama ama agutama Isu ababuma mayotauguna mima wantiye.

³⁶Piya pogini, aꞌyaꞌma kinaꞌmiba kaiwaipa akubuma keꞌi ama agurite wauguna piꞌna nkabobori wantiye.

³⁷Aeba wamagina Oribesi amu ararabira kanama keꞌi waogini, aꞌyaꞌma aokinaꞌmiba iꞌmu puma, aꞌyaꞌwaemaena aogiyena pogini agaumeka Koti tabera uma iꞌmu potantawe.

³⁸Piya tabera uma maya untawe:We, Waꞌegare Koti nkawamuta taeti kanaika, aeka taꞌmu potano.Mantari anta paruyena waiyekana, inatisa kumati asagayukenaena waiyeno, untawe.

³⁹Piya uma iꞌmu puguni, Parasi kina kaꞌisa igeba wasana abakapinti mintanta kinaꞌmiba maya omintawe: Tisa, kaeba kabagi kina uwaimegini kamanapa pakama miyiyo, untawe.

⁴⁰Piya yuguna ige kamana antota maya uwaimintiye: Naeba urimekiri abiyo. Igeba paka puma miyesinta, yabankamaba kamanapa piyama tabera yesine, Isu piya untiye. Isu aeba Yerusaremi kinaka kubeꞌena puntiye

⁴¹Pigoya, Isu aeba Yerusaremi kuma agora irosaꞌma agate pi kinaka antara puma kubeꞌena puntana

⁴²maya untiye: Tigeba ma kanabipa asoyama mikena kiꞌamapa aogima agasanawe. Tigeba pipa tiyorikatagiri aꞌyaꞌwaemaenaba kampa aogima agawo.

⁴³Pigoya tigeba abiyo. Aintiba kanaka aꞌya pekini, kama kinaꞌmi irosaꞌma minaena puma ke akukasigiri igiga pikibewe.

⁴⁴Piya pigina, nama kumatipe aꞌyaꞌwaemaenaripe, tigege yagararipe iyeguma karana titama aguya aema ataena puritaigiri Koti kanama tiyoꞌmaentintanagaba kampa napiyigini ata puritakibewe, Isu piya untiye. Tabe mono namapi ikantana puguna Isu igarubantiye

⁴⁵Pigoya, Isu aeba wama tabe mono namapinti iyomepa, kota ikantana puma mintuguna igarubaꞌmagina,

⁴⁶maya uwaimintiye: Mono isaꞌama maya iye: Mono namantepa nunamu ukena namantana peno, iye. We, tigeba piya pegana kuntana pe kinaꞌmi ntamantana piye, uma igarubantiye.

⁴⁷Pigoya, pi ntagaba tabe mono namapi asi nasima mono kamana uwaimima mintantiye. Piya pogini, tabe mono kiye kinaꞌmibe, mono tisa kinaꞌmibe, to kaꞌisa kiye kinaꞌmibe, igeba Isu aeguyigina purikibi kamana untawe.

⁴⁸Aiyuguna, kamanaꞌwa yogini aꞌyaꞌma uwa kinaꞌmiba abima aeka tabera ibuntika, aegukena kipa kapa kampa aborantawe.