Read Fore Aruku 2 Bible Online

Aruku 2 - Fore bible

Aruku 2

¹Pigoya, Aroma tabe kiye yagara Ogasita aeba kamana ataogana wagana pogini, aꞌyaꞌma kinaꞌmi nkigewai kaemagini aogi pikena puguni,

²pi ntagaba igewai kaekena maruꞌena puguna, Kariniyasi aeba Siriya kumata kiya yagara mintantiye.

³Mintogini, aꞌyaꞌma kina mawaita ige kaekena umaki ampaki puntawe.

⁴Piya puguna, Yosepeba Tebiti ayabamagana, Tebiti kumati wakena pumagina, Karariya-i Nasareti kumatasa atategina, Yutiya maru wama Petariyamu kumati wantiye.

⁵Pigoya, Yosepeba wama, maekena pome nkaragawaepa Mariyapa agaꞌentaga, ababute Petariyamu wama mintusuguna,

⁶pi ntaga yakari potakenakana aboraogana,

⁷masinto amaru yagara yakari potantiye. Yakari potamagina, kairasa asagakokima, purumakankama ntamapi naninta amume tuꞌnapi ataogana mintantiye. Pigoyema, kana wasana waikena namapa pumaewaogana, ae mikena maru kampa waintogana, piya puntiye. Enisore kinaꞌmi yaga kiye kinaꞌmiti tumintawe

⁸Pigoya, pi nkaukaꞌiba kaꞌisa sipisipi kabiyume kina pitaꞌi mimagini, sipisipira aseka kaburi kabima mintuguna,

⁹Waꞌegawama nkenisorewama igeti tumpa aboraogana, Waꞌegawama nkeꞌwasaenawampa ke iꞌma iyakogini, agategini iyekuru puntawe.

¹⁰Aibuguna, kana enisore yagarama maya uwaimintiye: Tigeba a-tiyekuru puma abiyo. Naeba aogi kamana maete tigeti tumuwe. Kana maete tumo kamanaꞌamaba aꞌyaꞌma kinati wakini, abima tabera iꞌmu pikibewe.

¹¹Pigoya, Tebiti kumata iba asenabinti, tiꞌima aogi puritakena yagara yakari potagina, Karaisiti, Waꞌega Yagara, aeba ago aboraye.

¹²Piya, kana inamugantoba taberaberasa akarakimagini, purumakankama ntaninta tuꞌnapi atama mintakiya, tigeba wama agantiripa urimo kamanapa napiyiyo, uwaimintiye.

¹³Piya yogana, mantabintisa uwoma enisore kinaꞌmi aege aboramagini igeba inirasa Koti nkage maya uma asagayuntawe:

¹⁴Inati mantari Koti taꞌmu potano. Aeba mabisa kina aꞌmu puwaitamagina, paruyena aborama imiye, piya untawe. Yaga kiye kinaꞌmi Isu uma agantawe

¹⁵Enisore kinaꞌmi ini piya utegini, pabita itate mantari intawe. Igasuguni, kana sipisipira kabiyume kinaꞌmiba maya untawe: Karuꞌena maeyigi, Petariyamu-i wama Waꞌega Yagarama nkuramemintana uma agano, untawe.

¹⁶Piya utegini, igeba karuꞌena wamagini, Mariyake Yosepeke uma isigaumepa, kana inamugantoba purumaka ntaninta tuꞌnapi waita mintogini uma agantawe.

¹⁷Uma agategini, igeba kana enisore yagarama yagarantoga yome kamanaka uwaisimuguni,

¹⁸kaꞌisa kinaꞌmiba kabiyume kinaꞌmi yume kamanaka abite, uwoma nkigi napintawe.

¹⁹Napiyuguna, pigoyema Mariyaba kana kamana kampa ageguꞌa punta, aeba napi napi puntiye.

²⁰Piya pogini, sipisipira kabiyume kinaꞌmiba aꞌwae puma wamagini, aꞌyaꞌwaemaena abima aganta kamana napimagini, Kotika iꞌmu potama age asagayuntawe. Isu nkage omintawe

²¹Pigoya, tonaentisa kakaga umaema yaga aꞌya puwaogini, au kasagasima agewapa Isuwe omintawe. Kana agewapa, kampa agaꞌe puntogana enisore yagarama pai omome nkagi, omintawe. Simiyonige Anage Isu agate isiꞌmu potantase

²²Pigoya, togana Isuke anoke isibabuma maꞌataome ntagaba aboraoginisi, Mosese kamana ago kamana wasiyuꞌmaginisi, ano aba Isu ababute Yerusaremi kumati imaginisi Waꞌegawama nkaora atakena puntase.

²³Piya, Waꞌegawama nkawamupisa ago kamana mayama waintantiye: Pipa kamaru masi aborakanapa Waꞌegawama nkaora atao, iye. Piya unti kamana abi uꞌma piya puntase.

²⁴Piya pumaginisi, pi nkago kamana wasiyuꞌma Waꞌegawama mpono awaꞌena, pipa tara pupunta tarawo, intanuma awararawo, kaema agunta abasa atakena maete wantase.

²⁵Pigoya, Yerusaremi kumata ka yagara mintantiye. Agewapa Simiyoni, aeba miyomentanawapa aogima mima Kotiti agupa amintiye. Piyama, Isureyo kina igeti aogi puwaitakenaena aborakibika, kana yagara aobi puma mintogana, Aota Awamusaꞌama agupi pumaema mintantiye.

²⁶Pigoya, ago pai Awamusaꞌama maya omintiye: Kaeba toganaba Waꞌegawamatisa Karaisiti aborakana, agate purikibene, piya omintiye.

²⁷Pigoya, pi ntaga Awamusaꞌama Simiyoni: Tabe mono namapi iyo, omintiye. Omogana abite iyoginisi, anoge abage kamana ago wasiyuꞌma Isupa ababurite kana namapinti ima Koti nkaora atakena pusuguna,

²⁸Simiyoni Isu uma ababurintana, Koti nkage asagayuma aꞌmu puntiye.

²⁹Aꞌmu pumagina, aeba maya untiye:Waꞌegawo, naeba kayokaya yagaragapa, naonepisa kaetisa aogi puratakena yagara agaogana, mampabi mikenaenanepa aꞌya piye, iye.Pai utampe kamanakaga napima agaogana, nantawama paru piye, iye.

³⁰

³¹Kaeba mono maga maga kinaꞌmi igeꞌena iba aborane, iye.

³²Isureyo kinakaba taetiba eꞌwasaena aboragi taꞌmu pune, Simiyoni piya untiye.

³³Isuka piya yoginisi, anoge abage isigeba uwoma nkisigi napintase.

³⁴Piya, Simiyoniba igepa akayona puwaitamagina, kana yagarantowampaka Mariya mayama omintiye:Abeno. Ma ntagara aepisa Isureyo kina pako pikibeka Koti ago untine, iye.Uwoma Isureyo kinapa aetasa asesepaꞌma wareꞌnakibewe, iye.Piya, kaꞌisa kina igeba aeti uma atokaema asikibewe, iye.Pi ntagaraba uwoma kinaꞌmi ntapikenaenawaipa aborakiye, iye.Piya, aeba Kotipisa aboragini, aeka uwoma kinaꞌmiba imo kamana otaigina, pigo kaegapa tabera kantara pikibene, Simiyoni piya omintiye.

³⁵

³⁶Pigoya, ka Koti kamana uwaimi punti nkwae, aeba Panuwero nkaraga, Asa pi nkigaꞌnabisa aboranta wae, agewapa Ana, ago aenta tantiye. Pigoya, aeba ibaꞌena kasatauguna, tonaentisa tara umaema kabo awaege mintogana puꞌwaogana,

³⁷aeba uwa mimagina 84-wa kabu aentarama mimagina, aꞌyaꞌma yaga tabe mono namapi ampima, asenabintibe arape nanintagaba kampa napinta, Kotiti napi napi puma mintantiye.

³⁸Pigoya pabi ntaga mintogini, Yerusaremi aogi pukena yagaraga kaꞌisa kinaꞌmi aobi puma mintantawe. Mintuguna, pabi ntaga kana aentaba ampimagina, Koti aꞌmu potama, aobi punta kinapa: Aobi pompe ntagaraba ago aboraye, uwaimintiye. Nasareti kumati aꞌwae puma wantawe

³⁹Pigoya, Waꞌega Yagarama nkago kamanaka aꞌyaꞌma pugaitegini, Karariya Nasareti kumati waꞌewaiti wantawe.

⁴⁰Wama umiyuguna, kana yagarantoba pita anosama, esegi pogana, Koti aꞌmuntana potamagina tabera aogi napiyena amintiye. Isu ababute Yerusaremi kumati wantase

⁴¹Pigoya, aꞌyaꞌma kabo yagaba anoge abage Yerusaremi wama, Isureyo kina iyoꞌmaenti kana aboraoginisi wantase. Pi iꞌmu punta ntaga nkagewapa Pasoba naninta nakena yagawe.

⁴²Pigoya, Isuba nagisarisa tara tumpaema kabo miyomekana, kana iꞌmu pumeti ababute wantase.

⁴³Wama mintusuguni, pigo iꞌmu taenaba isoꞌma nagaitegini, waꞌewaiti wauguna kana yagaranto Isuba pabi Yerusaremi mintantiye. Aeba mintoginisi anoge abageba: Aokinake wagasayema, napima wantase.

⁴⁴Wausuguna, ka yaga aꞌya waoginisi aguyosakate, to kaꞌisa aokina ibigausuguni: Kampaye, untawe.

⁴⁵Piya yugunisi to aꞌwae puma Yerusaremi kumati to wama aguyosagantase.

⁴⁶Aguyosagausuguna, kakaga yaga aꞌya waoginisi mono namapinti asu agama abatantase. Pigoya, aeba kaꞌisa mono tisa kinake mintogini, kaꞌisa kamana abigauguna aeba yume kamanapa aogima aꞌwae puma uwaimintiye.

⁴⁷Piya uwaimogini abite aꞌyaꞌma pi kinaꞌmiba pami puntawe.

⁴⁸Piya pugunisi, anoge abageba kana kamana abite pami puntase. Pigoya, anowampa maya omintiye: Yagarawo, nanaga piya pekara tasigeba kaguyosaꞌma tasu nkairaporuse, piya untiye.

⁴⁹Piya yogana Isu maya omintiye: Nanaga naguyosagase. Aꞌyugu naeba nabanempa ntamapinti kampa misanaga mintuwe, untiye.

⁵⁰Piya yogana, anoge abage kana yome kamanapa isigeba kampa aogima abintase.

⁵¹Pigoya, Isu aeba isigege irosaꞌma Nasareti kumati wama isige kamana abibebe puntiye. Piya pogana, anowampaba kanaenaga napi napi puntiye.

⁵²Aibogana, Isuba aupe napiyenawape anosaogini, wasanamibe Kotibe agauguna aogi puntiye.