Read Fore Aruku 20 Bible Online

Aruku 20 - Fore bible

Aruku 20

¹Pigoya, ka yaga Isu tabe mono namapi ima wasana aogi mono kamana uwaimima mintogini, tabe mono kiye kinape mono tisa kinape kabiyume kinape aeti kanama,

²mayama abigantiye: Kaeba uramo. Mataꞌi aꞌyaꞌwaemaena pempepa, ke ugamegina esegiyenaba pene. Kebaya: Piya poma, ugatagina penema, abigantawe.

³Piyama abigauguna maya uwaimintiye: Naegeba natantigi, ka kamana tibigakiri unamiyo:

⁴Yoni mono wanipa mantarisaenabera wasanamintanawema, ibigantiye.

⁵Piyama ibigaogini, igeba: Ayawe ukune, untini: Mantarisaenawe yekanaba, aeba nana piyema kamanaꞌwapa kampa abima napiyewe, ikiye.

⁶Piya: Wasanamintanawe yekiniba, aꞌyaꞌma kinaꞌmiba igeba Yonikaba ka taga poropete yagarawema napintaka, yaba kasutasa taegukibewema, napintawe.

⁷Aibumagini igeba maya kamana antotapa omintawe: Taeba kampa abintune. Yoni mono wanipa aetasabaya aborantiye, untawe.

⁸Piya yuguna Isu maya uwaimintiye: Piya, naegeba antotapa kampa urimukuwe. Kenkawamutasa kamanapaya unamegi esegiyenaba puweba kampa urimukuwe, Isu piya untiye. Waini yugara kabinta kinaꞌmi meto kamanane

⁹Pigoya, Isu wa waya meto kamana ka maya uwaimintiye: Ka yagarama waini igaꞌna kurintiye. Kuꞌatate kana yuga wasanamiba: Kiye kabiyiyo, otate eꞌero mpari wama eꞌero kanabi umintantiye.

¹⁰Pigoya, kana waini agutaogana asikikena kana aboraogana, kayokaya yagara: Kaꞌisa asigi kamigina maete kanaoma, otantiye. Otaogana uma irosaogini, pi waini yuga kiye kinaꞌmiba aeguma agarubauguna, kana yogarisaena kampa maenta auka aꞌwae puma kanantiye.

¹¹Piya pogana, yoga ababa to ka kayokaya yagara otaugana waogini, pabiyama pi kinaꞌmi aeguma ata potama agarubauguna, kana yogarisaena pabiyama kampa maenta uwa auka kanantiye.

¹²Pigoya, to kakagara ka kayokaya yagarawa otaogana waogini, tabera aeguma awamori maebugaintawe.

¹³Piya puguna, kana waini yogawama nkababa abite maya untiye: Aya pusuwe, otantana: Piya ago napiyuwe, untiye. Ma nabugai ntagarane otakana wakiniba agama agoya potama awamu wasikibewema, napintiye.

¹⁴Piyama napimagina otaogana waogini agate, kana yoga kiye kinaꞌmi aegukena naga nikintini maya untawe: Ae ma ntuga maesanaga aegugasakana puꞌwaka, ma ntugaba taeꞌenaena puwakiye, untawe.

¹⁵Piya ute apasanaꞌurite kabubinti wama kana waini yuga awamori aeguma kaitantawe, untiye. Isu aeba piya untana pi kamanaka wasana mayama ibigantiye: Yoga agowamaba pi kiye kinapa aya puwaitakiye, a.

¹⁶Abewo, aeba kanamaba piya kiye kinapa iyegugasima, yogawatapa aogi kiye kina ibabuma itakiye, piya untiye. Piya yogini, igeba: We, igeba kampa piya pikibewe, untawe.

¹⁷Piya yuguna, Isuba igabebe puma maya untiye: Mono isapisa kamana kapa mayama waintiya, agowapa ayamawe, untiye:Nama kikena kinaꞌmiba ka ya ago kainta yawama iba waꞌega ya asima waintiye, untiye.

¹⁸To ka mayama amato puma untiye:Piya, wasana kaꞌwaina pi waꞌega yara aeguma au airisa puma aikiye, iye.Piya, kana waꞌega yaba abobora takuma tumima aeguma ata puwaikiyema, untiye, Isu untiye.

¹⁹Piya yogini, mono tisa kinaꞌmibe tabe mono kiye kinaꞌmibe, meto kawanaꞌwapa igeka yomepa abibebe puguna intawamaba ata pogini, pabi ntaga arakurikena pumepa aꞌyaꞌma kinaka iyogaru puma atantawe. Takisi monega Isu abigantawe

²⁰Pigoya, Isu kamana abite imoꞌena purite, pi mono kiye kinaꞌmiba Isuka kabintawe. Piya, pi kinaꞌmiba kampari otakena kina uwaitauguni wamagini, iyogaꞌwapa mono iga pumagini kabima mintuguna, awamupisa ka ata kamana aborakiniba abite arakurikena puma kamana abikena kinaꞌmi nkiyapi ataigina kamana otaiyema, untawe.

²¹Pigoya, igeba ampa Isu mayama abigantawe: Tisa, kamanakampaba aogima parutu pegi abune. Kaeba aꞌyaꞌma kinapa aogi kamana uwaimene. Piya, tabe igi wainta kinaꞌmikaba kaekuruba kampa pempekana, taga Kotitisa aogi kamanapa uwaimene.

²²Piya, kaeba ayama napiye ne: Mono kinaꞌmite taeba Aroma waꞌega yagara Sisa takisi mone amusupera kampaye, untawe.

²³Piya yuguna, Isuba pi meto kamanaꞌwaipa ago abite maya uwaimintiye:

²⁴Mone ka nayakiyo. Amankape awaꞌenabe mapa kewema, ibigaogini igeba: Sisantawe, untawe.

²⁵Piya yuguna aeba maya uwaimintiye: Pigo yewa, Sisantanaba Sisa amiyo. Piya, Kotintanaba Koti amiyo, untiye.

²⁶Piya yogini, wa wayaꞌmi nkiyobipa kamanaꞌwatakaba kampa arakurinta uwa pami ntami puma asabaꞌwantawe. Purintapisa asikenaenaga Isu abigantawe

²⁷Pigoya, kaꞌisa Sarusi kinaꞌmi Isuti kanantawe. Pi kina igeba: Purintapisa asikenaenaba kampa waintiye, uma miyume kinakini,

²⁸igeba Isuti irosaꞌma kamana mayama abigantawe: Tisa, Moseseba kamana awaꞌena taeka mayama ka kaentiye: Wasana kaꞌwaina waya maema yagarawa kampa aboratanta puꞌwakanaba, to aꞌnanto kiya maetama aganto antotapa yagara aborano, iye.

²⁹Pigoya, ka meto kamana ugamukune. Piya, tonaentisa tara umaema agaꞌna mintantawe. Ige iganto waya maema yagara kampa aboranta, mima puꞌwantiye.

³⁰Puꞌwaogana, ka aꞌnanto kiyawapa pabiyama maetate uwa puꞌwantiye.

³¹Puꞌwaogana, to aꞌnanto kaꞌwaina pi kiyawapa pabiyama maetate puꞌwantiye. Pigoya, pi nkagaꞌna aꞌyaꞌma tonaentisa tara umaema kinaꞌmi pabi ka wae maeta kanamagini, yagara kampa aboratanta puꞌwaewantawe.

³²Aitiba pi kiya waeꞌwaipa pabiyama puꞌwantiye.

³³Pigoya, igeba aꞌyaꞌmagini pabi ka waeꞌamana maentawe. Piya ainti asikena kanabipa ke nkwaeꞌena pikiyema, abigantawe.

³⁴Piya yuguna Isu maya uwaimintiye: Ma kanara mampabi wa wayapa maema miyewe.

³⁵Piya, ainti tabe kanabipa asikena kana aborakibipa, Koti kegaꞌe yekini aborakibi kinaꞌmiba wa wayapa kampa maekibewe. Kampaye.

³⁶Igeba enisore kina miyesa puma mimagini, to kake kampa purikibewe. Piya, Kotiba irubintisa ibage pekini ae araga yagaraena puma mikibewe.

³⁷Pigoya, paipa Mosese irubisa asima mikena kamana untiye. Aeba yabi yaku nkabusa aboranti, pi kamana kaentana Koti nkageba mayama kaentiye: Naeba Abaraꞌamu, Aisaki, Yekobu ige Koti mintuwe, untiyema, kaentiye.

³⁸Piya, puꞌwantatisa iyogama asikibewema, Mosese aeba pika napima Koti nkageba piyama kaentiye. Piya, Kotiba puꞌwanta kinaꞌnane. Aeba iyoganta kinaꞌmi Koti mintegini, esegiyenarasa iyoganta kina uwa miyewe, Isu piya untiye.

³⁹Piya uwaimogana, mono tisa kiye kina kaꞌisami pi kamana antota maya untawe: Tisa, kaeba aogi kamana yene, untini,

⁴⁰igeba to kake abigakenaba iyekuru puma atantawe. Isu Parasi kinapa Karaisiti yagaraga ibigantiye

⁴¹Pigoya, Isu maya uwaimintiye: Nana piyema Karaisitikaba aeba Tebiti nkagaꞌnuweba yewe.

⁴²Piya, mono isapi Samu isapipa Tebiti aewapa mayama kaentiye:Inatisa Tabe Yagaramaba Waꞌega yagaranepa: Kaeba nayatakanti miyo omintiye, iye.

⁴³Piya, aintiba kama kinakapa uwaitakini kae kagisa amentapinti wama mikibewe, omintiyema, piyama Tebiti kaemarantiye.

⁴⁴Pigoya, Tebiti aewapa Waꞌeganene otantiye. Aeba aya piyema agaꞌuwakaba: Waꞌeganeneba, untiyemagina Isu ibigantiye. Mono tisa kina igeꞌma kamana Isu untiye

⁴⁵Pigoya, aꞌyaꞌma wabe wayape mima Isu kamana abima mintuguna, abagi kinaꞌwa maya uwaimintiye:

⁴⁶Tigeba mono tisa kina miyesa nkawametapa a-mpima, uwa aogima miyiyo. Igeba eꞌero kai amirite keꞌi paebuta nasigini, wasana akiyenabinti wama wa waya igama iꞌmu puwaitasanaga iguꞌamaba tabera waiye. Piya puntini mono namapipe taenabikenabipe tabe kinaꞌmi ntabae maema paitama mikenaga yewe.

⁴⁷Piya untini igeba kiya waeꞌmi namankaipe kotankaipe uwa paibuntini, kampari nunamuba eꞌerota yewe. Pigoya, pi kinaꞌmipa aintiba Kotiba antotaꞌenaba tabera ka ibiꞌma kuntaenaba imikiye, Isu piya untiye.