Read Fore Aruku 21 Bible Online

Aruku 21 - Fore bible

Aruku 21

¹Pigoya, Isu aeba tabe mono namapi ampima agaomepa mone kutantaga kinaꞌmiba Kotika iꞌmu mpone kankabebi atauguna, agantiye.

²Piya, yaba kampa wainta abeya wae kaꞌwaina irosaꞌma tete monento tara kankabebi atantiye.

³Piya pogana Isuba agate maya uwaimintiye: Naeba taga urimekiri abiyo, ma nkabeya kusi waeꞌmaba kaꞌisa kinaꞌmipa igasima moneba ataye.

⁴Kaꞌisa kinaꞌmiba uwoma mponewai waintegini Kotika iꞌmu moneba atagana, ma kusi abeya wae aeba monewapa naninta ika puma nakena kampa atanta, aꞌyaꞌma kasiwaegaite uwarakaꞌya mintiye, Isu piya untiye. Mampabisaena aꞌya wakena kamanane

⁵Pigoya, kaꞌisa kinaꞌmiba tabe mono namankamaka maya untawe: Mono awaꞌenaba aogiyena potama tauka pugaye, untawe. Piya yuguna, pika Isu maya untiye:

⁶Nama agama, tiꞌmu pentana aintiba kampa waikiye. Ka kana aborakiniba kama kinaꞌmi irosaꞌma nama kumatipa akasagasuba kasaigina ka yabankamaba to ka yabankama nkabobora wareꞌnaigina nama tubo aborama waikiye, untiye.

⁷Piya yogini, igeba mayama abigantawe: Tisa pintanaba ayantaga aborakiye. Nana kukantana aboraka agapa kana arosakena piyeba, ukune, untawe.

⁸Piya yuguna Isu maya uwaimintiye, tigeba tiguꞌama aꞌyugu purigaisanaga aogima kiya kabima miyiyo. Wasana uwoma aborama nae nage uma naeba Karaisiti nawe, yigini, to kaꞌisamiba kanapa ago arosawaye, ukibewe. Pigoya tigeba piya ukibe kinaꞌmipa a-nkiyegaraiyo.

⁹Piya, aintiba maꞌena puma esiba kamana abintiripa, a-pami puma tiyekuruba a-piyo. Pintanaba paitama aborawakana, aintisa kanaba agaropa kampa aborama ainti aborakiye, Isu piya untiye.

¹⁰Piya untana Isu to maya uwaimintiye: Maga maga kinaꞌmiba kamaena pigini to kaꞌisa kinaꞌmiba to ka marisa kina uma iyeguyigini kamaena purite wagana pikibewe.

¹¹Pigoya, imimapa tabera pekana, kaꞌisa aukaꞌi tabe kabu aborakana, yonintana tabera aboraurite wagana kana pikiye. Piya, mantariba ku kantanaba toma toma aborakiri agate tiyekuru puma tabaraba pikibewe.

¹²Pi aꞌyaꞌwaemaenaba kampa aborantakini, igeba tirakuꞌma karana titama ataena puritama, mono namapipe igaꞌna namapipe tibabuma kamana uritama ata puritakibewe. Pigoya nae nage uma ata punatamagini kiya kinake kamana abikena kinake ige iyobi tibaburite wama kamana uritakibewe.

¹³Pigoya piya pigiri, pi ntaga aogi kamanaꞌnepa uwaimikibewe.

¹⁴Pigoya ibaba aogima abiyo: Pi ntagaba tigeba ige iyobi uma asimaba: Ayama kamana antota ukunemaba, a-ntapiyiyo.

¹⁵Naene tigu timabi tiwamupi kamanaꞌnepa atakana aogi napi napiyenabe aborarimekiri ukibewe. Aibigini kama kinatimpiba kamanatipa kampa aeguma akaꞌyukibewe, untiye.

¹⁶Pigoya, pabi ntaga tino tibakibe, tiganto tiꞌnanto, kaꞌkura tiyoꞌmibe kama puritama, iyekita puritama, ataena puritama, tige aruyenabisa kaꞌisaba tiyegukibewe.

¹⁷Pigoya, aꞌyaꞌma kinaꞌmiba abima intabipa nae nageraka ata puma kama puritakibewe.

¹⁸Pigoya, tiꞌno nkabiyapa kaꞌantoba kampa kaka wakiye.

¹⁹Piya, tigeba esegima mima tigu timapa to kake maekibewe, Isu piya untiye. Yerusaremi kuma ainti ataena pikibi kamanane

²⁰Pigoya, aintiba tigeba agakibepa irebu kina kanama Yerusaremi kuma kobe pigiripa agamagiripa: Kuma aiꞌnere aguya aikena kana agarosaye, yiyo.

²¹Pigoya Yutiya mari mikibe kinaꞌmiba tiyegaka wama amu mari iyiyo. Piya Yerusaremi kumati mikibe kinaꞌmiba pabiyama karuꞌena paiꞌma wakibewe. Piya uwaena kumati kampa wakibewe.

²²Pigoya pi ataga Koti wasana aꞌyikiki pemi ntaga aborakiniba, mono kamanapa untaꞌenamaba esegi puma aborawaekiye.

²³We, igaꞌentaga waeꞌmibe yagaranto nono aꞌmikibe waeꞌmibe kamparagama mikibewe. Mampara mikibe kinaꞌmiti kuntaena aborakanaba, Koti agobintanaba mampara aꞌyaꞌma mikibe kinaꞌmipa pabiyama aborawaimikiye.

²⁴Piya, kasotasa irisakibewe. Aibumagini, igaꞌna ubuꞌurite wama uwoma to kinaꞌmi nkibakapi metaigini kayokayaꞌena puwaitama mikibewe. Piya, namuꞌisa kinaꞌmiba Yerusaremi kumapa aguya aima mima ataena puyabaꞌmiyigina, ainti namuꞌisa kinaꞌmi igeꞌwaipa aꞌya puwaitakiye, Isu piya untiye. Wasanama Ntagara aborakena kamanane

²⁵Pigoya, pi ntagaba pape, ope, noribe awameꞌenawa tonarona aborakiye. Piya mabipa kayo waninkama aigaꞌyoꞌya puma tapo uma agayemisa pekini, aꞌyaꞌma mampabisa kinaꞌmiba karu puma iyekuru pikibewe.

²⁶Pigoya, pi ntagaba mantaba kuru pekana esegiyenawapa iyobaꞌma kareko pigini, mara aꞌyaꞌma kinaꞌmiba uwoma nkigi napikibewe. Eya, kaꞌena mabi aborakenaenaga napima karu puma iyekuru pigina iyonantaꞌena pikiye.

²⁷Pintana aborakapa, Wasanama Ntagara naeba ibinankama nkagupinti tabe esegiyenanentaga eꞌwasaenanentaga aborakini nagakibewe.

²⁸Piya, ainti pintana agobima aborakiri, asimagiri tiyowa aisesama agate: Koti tababikena kana agarosaye, yiyo.

²⁹Pigoya piya untana, Isu meto kamana ka amato puma maya uwaimintiye: Tigeba piki yage, to kaꞌisa yawamake agoga napiyiyo.

³⁰Piya, aꞌno mparagiri agantiripa: Kabo yagawe, yewe.

³¹Piya yesa puma, pi yontana aborakiri agateba: Koti kabiratakena kana agarosaye, yiyo.

³²Naeba taga urimekiri abiyo: Mamparasa kinapa kampa purintigina pi yontanaba aꞌyaꞌma aborakiye.

³³Pigoya mage mantageba aꞌya wakana, kamanaꞌnepa waiyaba waima kampa kakakiye, Isu piya untiye. Abagi kinaꞌmiba aogima kabiyiyo, Isu untiye

³⁴Pigoya, Isu to maya untiye: Asi nasi esegi wani ntama aiboꞌena puma mampabisaenaga napi napi puma Kotika tigeguꞌa pusanaga, tigeba aogima napima kabima miyiyo. Aꞌyugu uwasuwa puma mintigina aborasanaga kabima miyiyo.

³⁵Piya, mampabisa kina aꞌyaꞌma kinati pintanaba aborakiye.

³⁶Piya, asi nasi aogima kabima miyiyo. Asi nasi Koti esotaigina esegiyenaba timeno. Piya pigina, pi aꞌyaꞌma ataenamaba uwa tigasakiri, Wasanama Ntagaramante naobi aogima asikibewe, Isu piye untiye.

³⁷Pigoya Isu aeba aꞌyaꞌwaema yagaba tabe mono namapi mima aꞌyaꞌma kina Kotitisa aogi kamana uwaimima mintantiye. Pigoya, ase yoganaba Oribesi amuti ima waibutaye.

³⁸Piya pogini, abaya aseka aꞌyaꞌma wabe wayape irosaꞌma Isuti kanama tabe mono namapi ampima aetisa aogi kamana abi puntawe.