Read Fore Aruku 22 Bible Online

Aruku 22 - Fore bible

Aruku 22

¹Pigoya, yisiti kampa wainta pareti nakena yaga aborakina puntiye. Piya, nakenagana ataome ntagama nkagewapa Pasobawe.

²Aborakena pogini tabe mono kiye kinake mono tisa kinake igeba aꞌyaꞌma kinaka iyekuru pumagini: Isu ayama aegukune, untawe.

³Piya umagini mintuguna, Sataniba Isu abagi yagara ka agewapa Yutasi Isikeriyoti, aeba nagisarisa tara tumpaema kina ige arayenabisa yagara, ae antabi pasintiye.

⁴Piyama pasogana, tabe mono kiye kinake mono irebu kinake igeti aruyenabi wama Isu minaga pekini arakurikibe kamana uwaimintiye.

⁵Piya uwaimogini igeba abimagini iꞌmu pumagini, Isu nkaegukena kutaru mone amikena kamana uma aogi puntawe.

⁶Piya yuguna kamanaꞌwai wasiyuꞌma, wasanamiba kampa agama abuguna kakama minaga pikena apasa puma mintantiye. Isu abagi kinaꞌwake Pasoba naninta nantawe

⁷Pigoya, yisiti kampa wainta pareti nakena kana aborantiye. Pi ntaga sipisipi kaemagini Pasoba naninta nantawe.

⁸Pigoya, pi ntaga Isu Pitake Yonike maya uma uwaisitantiye: Tisigeba wamagirisi, Pasoba naninta maema aiꞌaru pisigi uma nano, untiye.

⁹Piya yoginisi isigeba: Ae ntamapi nanintaba maema aiꞌaru pususe, yusuguna, maya uwaisimintiye:

¹⁰Abiso. Tisigeba waꞌeri ima wasana ka wani kankabe maete wakibi ntagara pabuma aegaꞌurite waꞌeri iyisigina, namapinti uma pasekirisiba pabi ntamapi tisigeba uma pasiso.

¹¹Piya, namapi ima pi namankama nkabapa mayama omiso: Tisa yagara kaeka maya iye: Ae mparunta nabagi kinaꞌmige taeba Pasoba nanintaba nakune, iye, omiso.

¹²Piya omisigina nama mparupa inati tabe maru ka ama agumagina aogi pumaranta tisiyakekirisi, pitaꞌi maema asu aiꞌaru piso, uwaisimintiye.

¹³Piya uwaisimoginisi, isigeba wama pi yomesa pumaginisi abatama Pasoba naninta maema aeꞌarubantase. Naninta nantini Isu aeꞌwa nkaraꞌena puwaiyakintiye

¹⁴Pigoya nakena kana aboraogini, Isuge abagi kinaꞌwampige namapi ampima nantawe.

¹⁵Piya nantini maya uwaimintiye: Naukikena kanaꞌnepa agarosagi, Pasoba naninta ma tigege nakenagaba tabera nabiye.

¹⁶Naeba yekiri abiyo. Naeba Pasoba nanintaba to kake kampa nanta Koti kabiratakenaena aborakini piꞌna nkantota waikiye, untiye.

¹⁷Piya umagina, aeba wani kankabe maema, Koti aꞌmu potama, maya uma imintiye: Tigeba maema marona mona puma naiyo.

¹⁸Naeba yekiri abiyo: Waini wani to kake kampa nanta mintakana Koti kabiratakenaena aborakiye, piya untiye.

¹⁹Pi kamana umagina pareti maema, aꞌmu potama, ako puma, maya uma imintiye: Mapa nauna, tigeka uma atauwe. (Naeka napima pipa nama miyiyo, untiye.

²⁰Pi naninta nauguna waini kankabe maema pabiyama imima untiye: Ma kankabebipa Kotiti aogaso atokaekena kurante waintiye.)

²¹Piya, abewo. Nae minaga pikibiꞌnaba aeba naege ka yabaera mima naninta maema nama mintuse.

²²Wasanama Ntagara naeba wasanami nkiwamuta purikenaenaba kampa waintiye. Naeba Koti keꞌi namintemiti wakuwe. We, minaga punatakibiꞌnaba aeba antotapa atama mikiye, piya untiye.

²³Kamana piya yogini, abagi kinaꞌmi: Kebaya pikibe kina iyewa, marebiga mebiga puntawe. Abagi kinaꞌmi tabe yagaraba kebaya mikiye, untiye

²⁴Pigoya, abagi kina igeba: Taetisa kebaya tabe yagararepa mintiye, umagini maka untawe.

²⁵Piya puguna Isu maya uwaimintiye: Mabisa waꞌega kinaꞌmiba ige esegi puma uwa wasanaba aogima kabiwaitagini, uwa kinaꞌmiba iꞌmu puma kayokayaꞌena puwaitawe.

²⁶Pigoya, tigetiba piyaenaba a-nkaborano. Tigetisa tabe kinaꞌmiba uwa kina miyesa, pi nkawameta miyeno. Piya, tabe yagara aeba kayokaya kina miyesa, pabi awameta miyeno.

²⁷Pigoya tigeba napiyiyo. Aeꞌna asugaintaꞌenawe. Wasanami nakibepa maraꞌmima naninta nakibiꞌna asugaintaꞌenabera, kaoꞌena pikibiꞌna asugaintaꞌenawe. Uwa maraꞌmimagina nakibiꞌna pipa asugaintaꞌenawema, ago abintawe. Piya, naeba tige tibakapi kayokaya kina miyesa puma miyuwe.

²⁸Pigoya, kuntaenama nkagupi miyogiri kampa natate wanta naegaꞌma nasima miyewe.

²⁹Pipa nabanempa naepa kabikenaenama nkagowampa unatagi, naeba pabiyama tigepa paitakena kina uritauwe.

³⁰Piya, tigeba aintiba kabiritakena kumata naege naninta wani ntantiri tiꞌmu pikibewe. Pigoya, pi ntaga kiya puma mikena yabaera mima Isureyo kina ige nagisarisa tara tumpaema kinaꞌmi kamanata kabikibewe, Isu piya uwaimintiye. Pita auꞌnana kamana omintiye

³¹Piya uwaimintana toba Pitapa maya omintiye: Saimoni, Saimoni, witi ao asari pegina iꞌnintanawapa paꞌwamisa puma, Sataniba tigepa maema timiyoꞌena puritakenaga Kotipa abigaoga,

³²pigo naeba kamatitiꞌenaga aꞌyugu pusanaga kaeka uma nunamu yuwe. Pika kaeba mono kita to kake aꞌwae puma aogi mimagina, kaokinapa iyoꞌmaema esegi puwaitao, omintiye.

³³Piya yogana Pita maya omintiye: Waꞌega, kaeba igaꞌna namapipera purikenaenaripera wagapa, kaegaꞌma wakuwe, untiye.

³⁴Piya yegana, Isu maya untiye: Pita, naeba ugamekana abo: Kokorewamaba iba asekapa kampa aga untakana, kaeba kakagara kampa agao ntagarawe unatagana aga ukiye, Isu piya untiye.

³⁵Piya untana, abagi kinaꞌwapa to ka maya uwaimintiye: Naeba monebe iraꞌna kutipe tigisanape kampa wainta urita wagiri, wama uma aguyosagantawoma, ibigantiye. Ibigaogini: Piyaba kampaye, untawe.

³⁶Piya yuguna, maya meto kamana amato puma untiye: Piya, ma kanabipa ibaba tigetisa kaꞌwaina aeba mone waintakanaba, maemagina miyeno. Piya, to kaꞌwaina aeba iraꞌna ku waintakanaba, arakae puma miyeno. Pigoya, kaꞌwaina aeba maꞌena kasupa aguyosagantanaba, kaiwa ka kasakana, ika puma piꞌnaba ka kaso mae ameno.

³⁷Naeba yekiri abiyo: Naeka meto kamana ka mayama pai kaemarantine: Aeba antage kinaꞌmi nkaruyenabi atakibewema, kaemarantiye. Pigoya pipa nae kamana untakana mampa aboraye, untiye.

³⁸Piya yegini abagi kina igeba maya omintawe: Waꞌega, agao, Mampa kasopa tara waintiyema, omuguna Isu: Pabigoye, otantiye. Isu Kesemani yugabi nunamu untiye

³⁹Pigoya, Isu aeba asi nasi kumapa atategina Oribesi amuti ibomekini, pi nkaseba abagi kina aepa aegaꞌma intawe.

⁴⁰Umibometi uma irosaꞌma abagi kina maya uwaimintiye: Tigeti timiyoꞌena aborakiri wareꞌnasanaga nunamu uma esegi piyo, piya untiye.

⁴¹Piya utegina, arompari umimagina uma arakabima maya uma nunamu untiye:

⁴²Naba, kaeba ukenaba kanara yegana ma nauki nakiyenaba naparo. Piya, nae napiyenakaba kampaye. Kaeka ntapiyena uma esegi penemawe, piya untiye.

⁴³(Piya yegana mantabintisa enisore ka tumima tumpa esegi potantiye.

⁴⁴Piya, napiyenawapa to kunta puwaogana to kake esegima nunamu untiye. Piya pogana, tete aiseba paꞌuritegina tipe puma mabi tumintiye.)

⁴⁵Nunamu ugaite, asima abagi kinaꞌmiti wama igaomepa, igeba intaraꞌena puma iwaita mintantawe.

⁴⁶Iwaita mintuguna maya uwaimintiye: Tigeba nana piyema tiwaiba waitamintawe. We, tigeti timiyoꞌena aborakiri wareꞌnasanaga asima tiyogama mima nunamu iyiyo, Isu piya untiye. Isu arakurintawe

⁴⁷Piya umagina mintogini kama kina igeba kanantawe. Pigoya, nagisarisa tara tumpaema kina ige aruyenabisa ka yagara, agewapa Yutasi, aeba paitama ibabute Isuti wama uma amo nantiye.

⁴⁸Amo naogana Isu maya omintiye: Yutasi, kaeba nana piyema Wasanama Ntagara naepa namo nama minaga pene, untiye.

⁴⁹Pigoya, Isu nkaokina igeba pintana aborakena pogini agate, maya untawe: Waꞌega kaeba abega, kasotasa iyeguyeno, untawe.

⁵⁰Piya yuguna, igetisa kaꞌwaina monota paitanta kiye yagarama kayokaya yagara kasotasa aegumagina ageba ayatakantisa arisakaentiye.

⁵¹Piya pogana Isu agate: Uwa miyiyo, untiye. Aibumagina, pi ntagarama nkagiba maemagina mayo atama asuꞌa potantiye.

⁵²Pigoya, mono namapisa tabe kiye kinape irebu kiye kinape kabiyume kinape, ae arakurikena kananta kina, igepa Isu maya uwaimintiye: Tigeba naeka abeganaba ku kina kanta pogiri, tigeba maꞌena pikena irebu kasutintaga kanama naegukena pewo.

⁵³We, naeba asi nasi tabe mono namapi mima mono urimone. Piya, pi ntagaba nana piyema kampa narakurintane. We, ibaba tige kanapa aboragina, tununtanama nkesegiyenaba aboraye, Isu piya untiye. Pita Isuka kampa agantuwe untiye

⁵⁴Pigoya, igeba Isu arakuꞌma ababute wama monota paitanta kiye yagarama ntamapi ababute intawe. Piya puguna, Pita aeba ainti ikaꞌi wantiye.

⁵⁵Pigoya, pi kama kinaꞌmi kagisa kagopi uma paiꞌma yaku kaima tapima mintantawe. Umintuguna Pita aeba pabiti wamagini ige ibakapi umintantiye.

⁵⁶Umintogana kayokaya araga kaꞌwaina kanama yaku nkabura agabebe puma maya untiye: Ma ntagaraba aege miyemi ntagarawe, yogana,

⁵⁷Pita awamu abarisaꞌma: Waya, naeba aepa kampa agantuwe, untiye.

⁵⁸Piya otate mintogana, kampagina eꞌero kanaba kampa mintogana, to kaꞌwaina agate maya untiye: Pi kaeba ige aruyenabisawe, yogana, Pita: Ma ntagara, naeba kampaye, untiye.

⁵⁹Pigoya ainti to kaꞌwaina irosaꞌma uma esegi puma maya untiye: We, ma ntagara taga aege mibemine. Aeba Karariya marisawe, yogana,

⁶⁰Pita maya untiye: Ma ntagara, kaeba kamana yempe kamanapa kampa abintuwe, untiye. Piya yogana kokore ka aga untiye:

⁶¹Pigoya, Waꞌega aeba aꞌwae pumagina Pitati aomaraogana, Pita aeba Waꞌegama ominti kamana napintiye. Piya: Kokore aga kampa untakana, kaeba kakagara naeba aepa kampa agao ntagarawe ukibene ominti,

⁶²pi kamana napimagina antara purite abeꞌi irosaꞌma wama tabera kubeꞌena puntiye. Mono kanisore akiyenabi kamana otantawe

⁶³Pigoya, Isuta kiya kabima minta kina igeba pumireri potama aegumagini,

⁶⁴aowaba airari kaetama aeguntini: Kaeba poropete mintanapa ma kaeguyemi ntagarama nkagewapa yo, untawe.

⁶⁵Pigoya, igeba to pumireri puma uwoma ata kamana otantawe.

⁶⁶Piya puguna marogini, tabe mono kiye kinape mono tisa kinape to kaisa kabiyume kinape aꞌyaꞌma aki puma kamana otakena yuguni, Isu ige aruyenabi ababute wantawe. Piya puguni kamana mayama omintawe:

⁶⁷Kaeba Koti utaratanta yagara Karaisiti mintanapa, uma aboraramo, untawe. Piya yuguna aeba maya uwaimintiye: We naeba urimosinta tigu kampa namesine.

⁶⁸Piya, tibigakiripa antotapa kampa unamikibewe.

⁶⁹We, Wasanama Ntagara naeba ibasa yaga tabe esegi yagara Koti nkayatakanti mikuwe. Pi kanaꞌne ago aboraye, untiye.

⁷⁰Piya yogini, aꞌyaꞌma abite: Kaeba Koti Ntagaragawoma, abigantawe. Abigauguma: Tigeba ago yewe. Pipa naewe, untiye.

⁷¹Piya yogini maya untawe: Nana piyema to kake kamana ukune. Aeꞌwa nkawamupisa pabigo yegi abune, untawe.