Read Fore Aruku 24 Bible Online

Aruku 24 - Fore bible

Aruku 24

¹Pigoya, sontara abaya ase marogini, waya igeba aogi agunta masawae maerite wasana aruri wantawe.

²Wama irosaꞌma agaomepa, yaba kabiba aꞌwaewaogana uwa waintantiye.

³Pigoya, pi kana wasana arubinti uma paiꞌmagini Waꞌegawama nkauꞌwaka aguyosaꞌma kampa agantawe.

⁴Aguyosakategini pami puma mintuguna, tara yagarara kaiwaisipa waentana puwama pa kasa puwanta yagara tara igora ampa aborama mintantase.

⁵Aibusuguni, waya igeba iyekuru puma parokaema mintugunisi pi ntagarara isigeba mayama uwaimintase: Tigeba nana piyemagiri aoganta kinakaba purinta kinaꞌmitiba aguyosagawe.

⁶Aeba mataꞌiba kampa mintiye. Ago aogama asiwaye. Karariya mari mintana kamana mayama urimintemi, pika napiyiyo:

⁷Nabanempaba Wasanama Ntagara naepa aru kinaꞌmiti unatakini maripora naeguyigi, papa kakaga peka naogama asikuwe, Isu untiye. Pika napiyiyo, uwaimintase.

⁸Piya yusuguni, waya igeba pi kamanawapa napintini,

⁹wasana arurisa aꞌwae puma waꞌeri wama abagi kinaꞌwa nagisarisa ka tumpaema kinape to kaꞌisa wabe wayape kana kamana uwaimintawe.

¹⁰Pigoya, pi kana waeꞌmi nkigewaipa Mariya Matara kumatasa waena, Yowanawa, to Mariya aeba Yemisi anowampawa, to kaꞌisa igege kaga miyume waena sumagini, igeba aposoro awaga kamana uwaimintawe.

¹¹Uwaimuguna pi kamana abugunaba, kampari kamana kanta pogini kampa aogima abibebe puntawe.

¹²Pi kamanaꞌama yuguna, Pita aeba abitegina karuꞌena wasana aruri wama ama irosaꞌmagina kana ka awara ibikamagina agabinti agaumepa, kai ae amana pipi waintogana agategina uwoma agi napiritegina waꞌeri aꞌwae puma kanantiye. Tara yagararami Emaosi kiꞌi wama Isu agantase

¹³Pigoya, pabi ntaga Isu nkaokina igetisa tara yagararamisi Emaosi kumati wakena wantase. Pi kumati Yerusaremi kumatasaba wamagini nayataraꞌmu kiromita uma irosa puntawe.

¹⁴Pigoya isigeba keꞌi wantinisi pintana aborantika kamana uma abigamaka puntase.

¹⁵Piya utaginisi wausuguna, Isu aewapa isikaꞌi aboraogini kaga wantawe.

¹⁶Pigoya isiyoba airari kaegasoginisi kampa aepa aogima agama napintase.

¹⁷Piya pusuguna isibigama maya untiye: Tisigeba nana kamana uma abita kanase, untiye. Yoginisi, isintara pumaginisi isiyowawamaba murise puma mintantase.

¹⁸Piya puntirisi isigetisa ka yagara agewapa Kiriyopasi aeba mayama Isu kamana antota aꞌwae puma maya omintiye: Kaeba kampa abeno. Yerusaremi kumati ibasa yaga uwoma kina irosaꞌmagini kana kinaꞌmi tabe kamana aboragini abiwaemagini mintagana, kae kaꞌwainaga ayama kampa abinta mintanema, abigantiye.

¹⁹Piya yogana aeba: Nanaena aborayema, isibigaoginisi isigeba maya omintase: Pi Isu Nasareti kumatasa, ae kamanane. Aeba tabe poropete yagara mima Koti nkaobipe aꞌyaꞌma wasanama nkiyobipe esegiyena puma miyi ntagarawe.

²⁰Pigoya, tabe mono kiye kinatepe kabiye kinatempibe uma kiya yagarama nkayapi aegukena atagana, maripora aeguma kitauguna purintiye.

²¹Piya, taeba aeka napi napi puma: Aeba Isureyo kina taeba ataenabisa tauꞌima taba puratakiyema ago napintompene. Piyama napiyokini aeguyegana puꞌwagi, mintokana kakaga yaga aꞌya puwaye. Pipa ayabayawe.

²²Pigoya, ibaba taetisa kaꞌisa wae igeba taekuru kamana uramewe. Igeba abaya aseka wasana aruri wama uma agapa,

²³Isu nkauꞌwa kampa waintegini uma aguyosakate aꞌwae puma kanama maya yewe: Enisore tara aboraramima: Isu aogama ago asiwaye, piyama uramese.

²⁴Piya, pi kamanapa abima taetisa kaꞌisa taokina igeba wama wayaꞌmi yesa pumagini uma agapa, aeꞌwapa kampagini agawe, piya omintase.

²⁵Piya omusuguna aeba maya uwaisimintiye: We, tisigeba kampa abeso. Poropete kinaꞌmi kamana kaemarantapa, tigeba nana piyema aiboꞌenaba puma kampa aogima abibebe pewe, a.

²⁶Piya, Karaisiti aeba ayamagina kampa puremisinta manta eꞌwasaenama nkagupipa uma pasisine. Pipa aeba tagane, uwaimintiye.

²⁷Piya umagina, Mosese kamanape poropete kinaꞌmi kamanape aꞌyaꞌma aeka uma kaemaranta kamana amato pumagina kana kamana agoba kaga uwaisimiwaentiye.

²⁸Pigoya, igeba wama wakena pume kumati irosantawe. Pigoya, Isu aeba kumapa agaitegina wakena poginisi,

²⁹isigeba arakuꞌma maya untase: Ago pankaoba pasikena puma ase ikena piye. Kaeba tasigege mata miyo, untase. Pigoya, isigege mikenaga owe yoginisi, namapinti kaga intawe.

³⁰Pigoya naninta nakena maraꞌmimagina pareti maema aꞌmu potama ako puma isimintiye.

³¹Piya pogana, isiyowamaba araoginisi Isu agabebe pusuguna, pabigo Isu kaka wantiye.

³²Aiboginisi, isigeba pi kamanapa uma abigamaka puma maya untase: Keꞌi kamana urasimintana mono ago urasimeginaba tasintama abarutama aogi pemi kamana iye.

³³Piya umaginisi, pabi ntaga asima to kake Yerusaremi kumati aꞌwae puma wantase. Wama uma irosaꞌma aeꞌwa nkabagi kina nagisarisa ka tumpaema kinape to kaꞌisa iyokinape aki puma mintuguna uma ibatantase.

³⁴Piya pusugini igeba to kamana mayama uwaisimintawe: Waꞌega aeba taga asiwagina Saimoni agaye, untawe.

³⁵Piya yugunisi, isigeba: Pabiyama Waꞌegawama keꞌi aborarasimima wama namapinti pareti maema aꞌmu potama apako pegira tasigeba ago agause, piya uma uwaimintase. Abagi kinaꞌmi Isu agantawe

³⁶Pigoya, abagi kina igeba pi kamana uma mintuguna, Isu aewa abakankaipi aborantiye.

³⁷Piyama aboraogini, igeba agamagini pami puma iyekura puma: Kewama aboraye, untawe.

³⁸Piya yuguna Isu maya uwaimintiye: Tigeba nanaga tiyekuru puma tiguꞌamaba tara tara piye, a.

³⁹Mapa naene mintuwe. Tigeba nagisa nayapa agaiyo. Piya pumagiri kanama nauta aukaya puma nagaiyo. Naeꞌne ntauꞌnentagane. Nae nagasa piyo. Piya, ke kinaꞌma awasebe ayampube kampa waintiye, umagina agisa ayapa uma iyakintiye.

⁴⁰

⁴¹Piya pogana, igeba intawama aogi pogini kamanaꞌwapa kampa abinta, uwa napi napi puma iꞌmu puma mintuguna: Nanintaripa kaꞌisa waintiyo, untiye.

⁴²Piya yogini igeba inoyanta kaemaranta amuguna,

⁴³aeba maema naogini agantawe.

⁴⁴Pigoya, to ka maya uwaimintiye: Naeba tigege mima maya uma uwaimima mibuntone: Mosese kamanapipe poropete kinaꞌmi kamanapipe Samu ini isapipe aꞌyaꞌma naeka meto kamana kaemaranta, pipa tagantana puwaikiye, urimintone, untiye.

⁴⁵Piya uma pi mono agowapa uma aborawaimogini abintawe.

⁴⁶Aibuguna to maya uwaimintiye: Karaisiti naekaba mayama kaemarantane: Aeba auki nakiyena puma puꞌma, puꞌwakibipisa papa kakaga pekana aogama asiwakiye.

⁴⁷Piya pekini aokinaꞌmi awaga kamana uma aꞌyaꞌwaema marisa kina mono uwaimima, igu aꞌwae puma aguntaenawaipa uma asuꞌa pikenaena aborano, uwaimikena wakibewe, mayama kaemarantane. Piya, pi kamana uwaimikena yugaba Yerusaremi kumatasa agobiritegiri wagana kana pubewe.

⁴⁸Piya tigeba aogi kamanaꞌne uwaimikena kinaꞌnepa tigewe.

⁴⁹Pigoya abewo. Nabanempa kaꞌena timikenaga untemika otaꞌkana tumikiye. Pika tigeba ma kumapa a-nkatantiri uwa agawa puma mintigina inatisa esegiyena tigeta tumekiri wama aogi piyo, piya uwaimintiye. Isu mantari intiye

⁵⁰Pigoya pi kamana ugaitegina, waꞌerisa ibabute wama Petani kuma agora uma irosaꞌma aya nkasabuma: Aogima miyiyo, uma aꞌmu puwaitantiye.

⁵¹Piyama aꞌmu puwaitategina itate intiye.

⁵²Piya pogini, igeba tabera iꞌmuntana purite Yerusaremi kumati aꞌwae puma wama,

⁵³tabe mono namapi asi nasi uma mima Koti iꞌmu potantawe.