Read Fore Aruku 3 Bible Online

Aruku 3 - Fore bible

Aruku 3

¹Pigoya, Aroma kinaꞌmi kiye yagara, agewapa Taebiriyasi, aeba nagisa kaꞌamu kabu kabiwaitama miyogana, Pontiyasi Pairati Yutiya mara kabiyogana, Erotiba Karariya mara kabiyogana, aꞌnantowampa Piripiba Ituriya mabe Tarakonaitisi mabe kabiyogana, Arisaniyasiba Abirini mara kabima mintoginisi,

²pigo Anasige Kayapasigeba mono kiye yagarara mintantase. Pigoya, pi kanabi Koti kamanapa Yoniti tumintiye. Kana yagaraba Sekaraya ntagaragana kaꞌme mpari mima, pi kamana abintiye.

³Abigaite, aꞌyaꞌma Yontani waninkama maroteri materi nasima maya uwaimintiye: Aguntaenaripa kaitegiripa aꞌwae puma wani pasigina, Kotiba aguntaenaripa maerigaikiye, uwaimintiye.

⁴Pigoya, poropete Aisaya pika kamana agoba pai maya uma kaemarantiye:Awaga kamana ukena yagara kaꞌme mpari mima kegaꞌe uma mayama aboraye: Waꞌegawamanta ke iꞌma, arupu puma amuyena piyo, iye.

⁵Aigubuntaꞌenaba kuꞌma amuyena pumagiri, aꞌyaꞌma tabe amupe amara nkamupe akusamagiri, antage nantage kipa maema asoya puma, arupu pumagiri, atumite asite punti kipa parakabaꞌmagiri, aꞌyaꞌma aogi piyo, iye.

⁶Piya, aꞌyaꞌma kinapa Koti tababuma aogi puratakena yugawapa agakibewe, piya uma kaemarantiye.

⁷Pigoya, uwoma kina Yoniti mono wani pasikena kanauguna maya uwaimintiye: Tigeba kuya awarorawe. Koti tisa amoꞌena aborarimekiri kakagaisanaga kebaya urimegiri mataꞌiba kanawe.

⁸Tigeba aguntaenaripa kaitegiri tigu aꞌwae pigina mono auꞌwapa aborakiripa, wani kanara maekibewe. We, tigeba: Abaraꞌamu nkagaꞌnuraga aogima mikunemagiripa, a-ntapima yiyo. Pabigo urimekiri abiyo: Kotiba ma ntabatasa Abaraꞌamu nkaoso agaꞌnugi iba pikenaba agantiye.

⁹Piya, ya agayukena tupa ya agobi atantiye. Pi ntawama nka kampa aogima aekanaba, agaiyuma yakupi kaekiye, Yoniba meto kamana piya untiye.

¹⁰Piya yogini, kana wasanamiba mayama abigantawe: Taeba aya pukunema, abigauguna,

¹¹aeba maya untiye: Kai tara waintakanaba, ka yagara kaiba kampa waintakanaba ameno. Nanina waintakanaba, kampa waintakibi ntagara kaꞌisa ameno, piya untiye.

¹²Pigoya, kaꞌisa takisi maeyume kinapa kanama mono wani pasikenaga abigamagini maya untawe: Tisawo, taeba aya pusune, untawe.

¹³Piya yuguna, aeba: Tigeba takisiba maekibe nkawa maeyiyo. Toba a-nkagasima maeyiyo, uwaimintiye.

¹⁴Piya uwaimogini irebu kinapa kanama: Taeba aya pusunema, abigantawe. Abigauguna, aeba maya uwaimintiye: Tigeba to kinapa imiyoꞌenaba a-puma, yabankaipa a-mpaemagiri, kampari kotiyenaba a-puma, yabankaipa a-mpaeyiyo. Pabi ikantanari maemagiri uwa miyiyo, piya uwaimintiye.

¹⁵Piya yogini, kana wasanamiba Yoni yome kamanaka abimagini aꞌyaꞌma pi kinaꞌmi mayama napintawe: Aeba aobi pompe ntagara Karaisitiwema, Yonika untawe.

¹⁶Piya yuguna, Yoni aꞌyaꞌma kinapa maya uwaimintiye: Pigoya, ka yagara nakaꞌi kanakibi ntagaramaba, agewapa asunagasima waintika, naeba mayamanaba agisa anapa kampa akubo agaikuwe. Piya, naeba wanitasa paititauwe. Aeba Aota Awamusatasage yakutasage paititakiye.

¹⁷Aeba aka maete kanama, witi naninta ampa aigaga pumagina anonkapa namapi atantana ariwapa tayaba yakupi kaegaikiye, uwaimintiye.

¹⁸Piya uwaimintana, Yoni to mono to mono aogi kamana uwaimintiye. Eroti Yonipa arakurintiye

¹⁹Pigoya, tabe kiye yagara Eroti, ae aꞌnantowampa nkwae Erotiyasi maeyogana, Yoniba: Mantanabe to kaꞌisa ataenagape a-po, omintiye.

²⁰Omogana aeba to tabera ata agi napintiye. Piya, piya yomeka Erotiba abitegina, Yonipa arakuꞌmagina igaꞌna namapi atantiye. Yoni Isu wani paiꞌatantiye

²¹Pigoya, aꞌyaꞌma pi kina wani paiꞌitantana, Isuge paiꞌatantiye. Piya pogana aeba nunamu yogana, manta aꞌwaiyogana,

²²Aota Awamusaꞌama pupunta kanta purite aeti tumintiye. Tumogana pi mantabintisa maya kamana tumintiye: Kaeba nae nabugami ntagaranekawe. Tabera naꞌmu pugatauwe, untiye. Isu nkayabamagi kamanane

²³Pigoya, Isu 30 kabu mimagina, yogawapa agobintiye. Pigoya, wasanamiba aekaba abugunaba Yosepe ntagara kanta puntiye.Piya, Yosepe aeba Irai ntagarawe.

²⁴Piya, Irai aeba Matati ntagarawe. Matati aeba Aribai ntagarawe. Aribai aeba Merikai ntagarawe. Merikai aeba Yanai ntagarawe. Yanai aeba to Yosepe ntagarawe.

²⁵Piya, pi Yosepe aeba Matatayasi ntagarawe. Matatayasi aeba Emosi ntagarawe. Emosi aeba Neyamu ntagarawe. Neyamu aeba Esirai ntagarawe. Esirai aeba Nagai ntagarawe.

²⁶Piya, Nagai aeba Meyati ntagarawe. Meyati aeba to Matatayasi ntagarawe. Pi Matatayasi aeba Semeni ntagarawe. Semeni aeba Yoseki ntagarawe. Yoseki aeba Yota ntagarawe.

²⁷Piya, Yota aeba Yowanani ntagarawe. Yowanani aeba Aresa ntagarawe. Aresa aeba Serababeri ntagarawe. Serababeri aeba Siyatiyeri ntagarawe. Siyatiyeri aeba Nerai ntagarawe.

²⁸Piya, Nerai aeba to Merikai ntagarawe. Pi Merikai aeba Erai ntagarawe. Erai aeba Kosamu ntagarawe. Kosamu aeba Erimetamu ntagarawe. Erimetamu aeba Eya ntagarawe.

²⁹Piya, Eya aeba Yosuwa ntagarawe. Yosuwa aeba Eriyesa ntagarawe. Eriyesa aeba Yorimu ntagarawe. Yorimu aeba to Matati ntagarawe. Pi Matati aeba to Aribai ntagarawe.

³⁰Piya, pi Aribai aeba Simiyoni ntagarawe. Simiyoni aeba Yuta ntagarawe. Yuta aeba to ka Yosepe ntagarawe. Pi Yosepe aeba Yonamu ntagarawe. Yonamu aeba Eriyakimu ntagarawe.

³¹Piya, Eriyakimu aeba Mereya ntagarawe. Mereya aeba Mena ntagarawe. Mena aeba Matata ntagarawe. Matata aeba Netani ntagarawe. Netani aeba Tebiti ntagarawe.

³²Piya, Tebiti aeba Yesi ntagarawe. Yesi aeba Obete ntagarawe. Obete aeba Powasi ntagarawe. Powasi aeba Samoni ntagarawe. Samoni aeba Nasoni ntagarawe.

³³Piya, Nasoni aeba Aminatabu ntagarawe. Aminatabu aeba Atimini ntagarawe. Atimini aeba Anai ntagarawe. Anai aeba Esironi ntagarawe. Esironi aeba Perese ntagarawe. Perese aeba to Yuta ntagarawe.

³⁴Piya, pi Yuta aeba Yekobu ntagarawe. Yekobu aeba Aisaki ntagarawe. Aisaki aeba Abaraꞌamu ntagarawe. Abaraꞌamu aeba Tera ntagarawe. Tera aeba Neyo ntagarawe.

³⁵Piya, Neyo aeba Seraki ntagarawe. Seraki aeba Ariyu ntagarawe. Ariyu aeba Pereki ntagarawe. Pereki aeba Iba ntagarawe. Iba aeba Sira ntagarawe.

³⁶Piya, Sira aeba Kenani ntagarawe. Kenani aeba Apakisati ntagarawe. Apakisati aeba Semi ntagarawe. Semi aeba Nowa ntagarawe. Nowa aeba Arameki ntagarawe.

³⁷Piya, Arameki aeba Metusara ntagarawe. Metusara aeba Inoku ntagarawe. Inoku aeba Yereti ntagarawe. Yereti aeba Maꞌarariyo ntagarawe. Maꞌarariyo aeba to Kenani ntagarawe.

³⁸Piya, pi Kenani aeba Inosi ntagarawe. Inosi aeba Seti ntagarawe. Seti aeba Antamu ntagarawe. Piya, Antamu aeba Koti ntagarawe.