Read Fore Aruku 4 Bible Online

Aruku 4 - Fore bible

Aruku 4

¹Pigoya, Yontani wanipi Yoni Isu wani paiꞌataogana, Awamusaꞌama agupinti pumaewama, kaꞌme mpari ababute wantiye.

²Wama 40 yagaba umintogana, kewama pi ntagaba amiyo potantiye. Aibogana, naninta kampa nanta iꞌmintogana, agaꞌena abugaogana,

³kewama aeti aborama maya omintiye: Kaeba Koti Ntagara mintanapa, yegana ma ntabaka paretiyena pekana nao, untiye.

⁴Piya yogana, Isu antota maya omintiye: Koti kamanaꞌama maya iye: Wasanamaba nanintarasaba kampa aꞌyaꞌma esegiyenawapa maekiye, iyema, omintiye.

⁵Piya omogana, kewamaba ababurite inati imagina, aꞌyaꞌma mampabisa kinapa asu aro ntaganto ayakimagina,

⁶maya omintiye: Aꞌyaꞌma ma nkesegiyenabe igaenabe nae namiwaentine. Pigoya nae napima kaꞌwaina amikenaba amukuwe. Piya, kaepa kamukuwe.

⁷Kaeba nae nageba asagayuyegapa pi aꞌyaꞌwaemaena waintintanaba kaeꞌenaena puwaewakiye, untiye.

⁸Piya yogana, Isu antota uma maya omintiye: Koti kamanaꞌama maya iye: Waꞌega Kotigapa, ae age asagayuma, ae abiwa kayokayaꞌena potao, iyema, omintiye.

⁹Piya omogana, kewama Isu Yerusaremi kumati ababute ima, tabe mono nama nkagari mesutama maya omintiye: Kaeba Koti Ntagara mintanapa, matasa paꞌyo puma tumo.

¹⁰Piya, Koti kamanaꞌama mayama iye: Kotiba aeba enisore kinaꞌwa uwaitakana kabigatama kaoꞌmaekibewe, iye.

¹¹Piya, kaegukena pukibipa, iyatasa kababute tumigina, yabankamaba kagisaba kampa arisakiye, iyema, untiye.

¹²Piya yogana, Isu antota uma maya omintiye: Koti kamanaꞌamaba to ka maya iye: Kaeba Waꞌega Kotigapa amiyo puma agakenaenaba a-po, iyema, untiye.

¹³Piya yogana kana amiyoꞌena aꞌya waogana, kewama Isupa atate migarakena wantiye. Isu Karariya mari yogawa agobintiye

¹⁴Pigoya, Aota Awamusaꞌama Isu esegiyena amogana, Karariya-i to wama yogawa pogini, aꞌyaꞌma pi nkaukaꞌisa kinaꞌmi ae awaga kamanapa abintawe.

¹⁵Aibuguna, aeba mono namapinti imagina, kamana uwaimogini iꞌmu potantawe. Nasareti kinaꞌmi Isupa ikabitantawe

¹⁶Piya puguna, uwaena yagaranto Isu mima anosanti mpari Nasareti wantiye. Pitaꞌi aꞌyaꞌma sabati yaga mono namapi ibomeka, ka yagaba ima Koti kamana aisikena asiyogini,

¹⁷aepa poropete Aisaya kaemaranti nkisa amintawe. Amuguna maema aparotama, maya kamana waintogana uwaimintiye:

¹⁸Pigoya, Waꞌegawamatisa Awamusaꞌama nae nantabinti tumegina, aogi kamana uwa kina uwaimo unatantiye, iye.Piya, to wainaga arakuꞌma upebe punta kinapa atagana wanoma, iyorikaenta kinapa iyogawai taoma, atabi mpiye kinapa aogima mikibewe, uwaimomagina, naisagagi tumuwe, iye.

¹⁹Piya, Waꞌegawama aokina aogi puwaitakibe ntagagaba, awaga kamana yoma unatagi tumuwe, iyema, Isu esapisa kamana piya untiye.

²⁰Piya ugaitegina, aeba kana esa akarakima amome ntagara amite maraꞌmiyogini, kana mono namapi mintume kinaꞌmiba: Ae kamanaꞌwa ukena piye, utegina, iyoba araga aragama agauguna,

²¹aeba mayama agobima uwaimintiye: Ago uriminta kamanapa auꞌwapa ibanto aboragiri abewe, untiye.

²²Piya yogini, igeba awamupisa iga kamanaꞌwapa abima pami pumagini: We, aeba Yosepe ntagarawe. Ayamabaya aogi kamanapa iye, untawe.

²³Piya yuguna, Isu maya uwaimintiye: Tigeba obisobi kamana naeka maya yepa: Tusa yagara kae kauka aogi pega kagano. Piya, Kapaniyamu kumata yoga puntampe nkawaga kamana abune. Pabiyama magata pega agano, piyama nabigakibewe, uwaimintiye.

²⁴Piya uwaimintana Isu to maya untiye: Naeba taga kauwe. Koti unti kamana yemi poropete yagarama kamanaꞌwapa mawatasa kinaꞌmiba kampa abima aegarakibewe.

²⁵Pigoya, naeba tagaka urimuwe. Iraiya mintome kanabi, kaboba kakaga pumagina opa tonaentisa kaꞌumaema u, kampa ka aemagina, pa tawaogana kaboba tabera pumagina, aꞌyaꞌma kina igaꞌenaba tabera ibuntiye.

²⁶Ibogini, pi ntaga Isureyo abeya waepa uwoma mintuguna, igetiba Koti Iraiyapa kampa agarubantiye. Aeꞌwa nkaokinatiba kampa agarubantiye. Aepa Saironi mara Sarepata kumati ka namuꞌisa abeya waeti agarubaogana, wama naninta nantiye.

²⁷Piya Iraisa mintome kanabipa, Isureyo mara uwaena karu kina mintuguna, kampa ita wantiye. Piya, ka Siriya marisa yagara, agewapa Naemani, abiwapa Iraisati waogana kaba ataogana anamopa ata wantiye, Isu piya uwaimintiye.

²⁸Piya uwaimogini, aꞌyaꞌma mono namapinti mintume kinaꞌmi ka abiꞌma,

²⁹pi kinaꞌmiba kumawaitisa agarubakena pumepa irosaꞌma ige kumati amuti ababute ima auꞌyari apasanakaikena puguna,

³⁰aeba abakapinti uwigasi ankigasi putagina wagaintiye. Isu ka yagarama nkantabintisa ke kina agarubantiye

³¹Pigoya, Isu Karariya mari tumima, Kapaniyamu kumata wantiye. Wamagina sabati yagaba wayaꞌwa kamana uwaimintiye.

³²Kana kamana uwaimomepa kiya kinaꞌmi yumesa kamana yogini abite pami puntawe.

³³Pigoya, pi mpono namapinti ka yagara, ke kina antabaipinti minta yagara, aege mintuguna, aeba tabera kegaꞌe uma maya untiye:

³⁴We Isugaba, Nasaretirisa yagaragawe. Taegukena kanapaya, nana puratakena kanane. Piya, naeba ago abopa, kaeba Kotitisa aota yagaragawe, piya untiye.

³⁵Piya yogana, Isu ka abiꞌma maya omintiye: Paka pumagina, atate irosaꞌma wagaso, omintiye. Omogana, ke kinaꞌmaba kana yagara apasara pomepa, kampa aupa airisanta uwa irosaꞌma wagaintiye.

³⁶Piya pogini, kana pi kumata mintume kinaꞌmiba pami pumagini, mare-u me-u puma maya untawe: We, aeba nana kamana iye. Aeba esegiyenawapisa kiya kinaꞌmi usu kamana uma ke kina uwaitagini atate wagasawe, piya untawe.

³⁷Aibogini, pintana pome kamanapa urite, aꞌyaꞌma pi mari wagana kana puntawe. Isu Pita aentawampa aogi potantiye

³⁸Piya puguna, mono namapisa iroꞌma, Saimoni ntamapinti iyomepa Saimoni aentawampa nkau yaku taogana mintogana, Isu yoninkapa: Kaba ataoma, abigantawe.

³⁹Abigauguna, aeba agora ampagina yoninkapa: Ata wao, yogana ata wantiye. Ata waogana, kana waeꞌmaba asima naninta maema imogini nantawe. Isu uwoma kina aogi puwaitantiye

⁴⁰Pigo papa tupasikena pogana, kaꞌisa iyokinaꞌmiba tonarona inu ibome kinapa ibabute kanagana puguna, Isuba aꞌyaꞌma iꞌnota ayapa ataogana, ita wantiye.

⁴¹Piya pogana ke kina wasanami nkintabaipintisa igarubakasogini, igeba irosaꞌma kegaꞌe uma: Kaeba Koti Ntagaragawe, untawe. Pigoya igeba: Isu aeba Karaisiti yagarawema, napiyuguna, to mare-u me-u pusanaga akunkitantiye. Isu Yutiya mari nasima kamana uwaimintiye

⁴²Pigoya, Isu abayara itate kaꞌme mpari waogini, kaꞌisa kinaꞌmiba aguyosaꞌma aeti wamagini: Taege mikibene, uma arakuruguna,

⁴³aeba maya uwaimintiye: To kaꞌisa kumatiba naeba Koti kabiratakena aogi kamanapa uwaimoma unatagi kanauwe, uwaimintiye.

⁴⁴Piya uwaimite Yutiya mari mima, aꞌyaꞌma aukaꞌi mono namapinti kamana uwaimita nasintiye.