Read Fore Aruku 5 Bible Online

Aruku 5 - Fore bible

Aruku 5

¹Pigoya, ka yagaba Isuba Kenesareti kotu nkawamori umima Koti kamana yogini, wasanamiba ampa aki puma airakiraki puma ampa abintawe.

²Piya puguna Isu agaomepa, wanipisa kare tara kotu nkawamori waintusuguni, kana inoyanta aeyume kinaꞌmiba iroꞌma tumima kuko wanipi aemiyuguna,

³aeba Saimonintana wanipisa karebi ima asu mintana, Saimoni maya omintiye: Awamorisaba paibumanto pubasa naigina wano, yogini pubasanaꞌma metauguna, aeba kana wanipisa karebi maraꞌmima pipisa aꞌyaꞌma awamori mintume kinapa mono kamana uwaimintiye.

⁴Piyama kamanapa uwaimitegina, Saimonika maya omintiye: Tigeba wani nkakanti wamagiri, kana kukotipa metama inoyanta aeyiyo, untiye.

⁵Piya yogana, Saimoni maya untiye: Tabe Yagaramawo, taeba asekapa tabe yuga pumiyompepa, kana inoyantaba kampagi aeyune. Piya pompeka, kae yempekaba kukopa atama agakune, untiye.

⁶Utegina, kopa wanipinti motantawe. Piya pumepa, uwoma inoyanta iraꞌwaiyogini, kana kupa kunta puma aeꞌmutikena pogana,

⁷igeba iyokinaka to ka wanipisa karebi mintuguna, kegaꞌe yuguni, kanama ampa iyoꞌmaema, tarayaga wanipisa karebi uwaena atauguna, kana wanipisa kareba kunta puma ipirintakena puntase.

⁸Piya pogana, Saimoni Pitaba pintanaba agategina pami pumagina, Isu nkagisabi arakabima parokaema maya untiye: Naeba uwa agunta yagara mintuwe. Waꞌega Yagara, kaeba uwa natate wao, untiye.

⁹Pipa nanagawanane. Inoyanta maeyumeka aekuru pogini, pi aokinaꞌmibe pabiyama iyekuru puntawe.

¹⁰Piya pogana, tara yagarara Yemisige Yonigeba, Sepeti ntagara tara, isigegeba isiyekuru pusuguna, Isu mayama Saimoni omintiye: Kaeba a-kaekuruba po. Aintiba inoyanta aeyempesa puma wasana iba pikibene, piya omintiye.

¹¹Piya omogini, igeba wanipisa kareba pubasanama kepiyati me nkatama, aꞌyaꞌwaemaenawaipa kaite Isu nkaegarantawe. Isu karu yagara kaba atantiye

¹²Pigoya, Isuba ka kumata mintogana, ka yagaraba aꞌyaꞌma aupintiba karuyena abome ntagarama Isu agate, aowarisa mabi parokaema maya untiye: Waꞌegawo, kaeba kabemika kaba natakena puntanapa aogi punatao, untiye.

¹³Piya yogana, Isu aya parosuma auta uꞌma maya untiye: Piyaenaga nabiye, untiye. Piya umagina: Pabigo kata wakana aogima miyo, untiye. Piya yogana, pabi ntaga kana karuyenawapa atawantiye.

¹⁴Atawaogana Isu esegima maya omintiye: Kaeba uwa kinapa a-nkuwaimima, marupa wama kaupa mono kiye yagara uma ayakegana agano. Piya, kata wamikaba pai Mosese uramintintanaba Kotiti amegini, wasanamiba kagate: Aoso yagara miyema napikibewe, piya omintiye.

¹⁵Aibogini, aꞌyaꞌma Isu pomentanaga wasanamiba mare-u me-u puta nasuguna, uwoma kina ampa kamana abekana yonintanaba kaba atagaikiye, piya uma aeti kanantawe.

¹⁶Aibuguna, pabigo itategina kaꞌme mpari wama nunamu untiye. Isu agisa aya puꞌwanta yagara kaba atantiye

¹⁷Pigoya, ka yagaba Isu mono kamana uwaimima yogini, Karariya marisabe Yuta marisabe Yerusaremi kumatasabe, kaꞌisa Parasi kinake kamana ago abinta kinake, igeba pitisa kanama wasana abakapi ampintantawe. Ampintuguna, Waꞌega Yagaramapisa yoni kaba itakena esegiyenawapa Isu ago maentiye.

¹⁸Piya maeyogana, ka yagaraba agisa aya puꞌwanta yagara, kaꞌisa kinaꞌmi wasa yara wasirite kanamagini, Isu nkagora me nkatakena kanaumepa,

¹⁹namapa pumaewauguni, kupa kampa tantiye. Aibogini, kana yagara wasirite nama nkabobori imagini, asu akuritama, pitaꞌisa motauguna tumima Isu nkagora tumintiye.

²⁰Tumogana, Isu imatitiꞌenawai aeti ataume igantana maya untiye: Naoꞌanto, naeba aguntaenagapa maegagasuwe, omintiye.

²¹Omogini, kaꞌisa mono tisa kinaꞌmibe Parasi kinaꞌmibe pi kamana abintini, mare-u me-u puma maya untawe: Ma ntagaraba Kotika anagiyenaba usuyenaba, aeba nana yagarawe. Koti ae abi aguntaenarepa maeragaikiye, untawe.

²²Piya yuguna, Isu kana napiyenawai nkigate maya untiye: Tigeba nanaga tigebipa napiyewe.

²³Nanaenama kunta piye. Pigoya, naeba: Aguntaenaga maegagasuwe, yokabera: Asima wao, yokawe. Asima wao, yekana, kampa asima nasekiripa kagi punatakibewe.

²⁴Pigoya, tigeba abiyo. Wasanama Ntagara naeba ma mpabi aguntaena maerigaikena esegiyenanepa waintiye. Pi nkinuntana naeba agarubakiri agamagiri, aguntaena maerigaikena esegiyenanekaba napiyiyo, uwaimintiye. Piya uwaimintana, aꞌwae puma agisa aya puꞌwanta yagaragaba maya omintiye: Naeba ugamota, kaeba asima wasagapa aesagabite waꞌegati waoma, omintiye.

²⁵Piya omogana, karuꞌena asima waitamiyome wasawapa aesagabite waꞌewati wantana, Kotiti aꞌmu potantiye.

²⁶Piya pogini, uwoma kinaꞌmiba agate pami puma, Koti nkage asagayuma: Ibasa yagaba nanabaya agaune, untawe. Isu Aribaika kegaꞌe untiye

²⁷Pigoya, pabi ntaga togana Isuba waomepa, takisi maeyome ntagara, agewapa Aribai, takisi opisibi mintogana, isu: Ampa naegarao, omintiye.

²⁸Piya omogana, asima aꞌyaꞌwaemaenawapa atategina wama Isu nkaegaꞌma wantiye.

²⁹Aegaꞌma wama, Aribaiba namankapi tabe naninta Isupa kaema amintiye. Piya pogini, uwoma takisi maeyume kinape to uwa kinape isigege ampa maraꞌmima naninta nantawe.

³⁰Piya puguni, Parasi kinaꞌmibe mono tisa kinaꞌmibe Isu abagi kinaka uwoma kamana maya untawe: Nanaga takisi maeya kinaꞌmige to aguntaena pe kinaꞌmigeba igebe nanintaba nawema, abigantawe.

³¹Piyama abigauguna, Isu maya untiye: Wasanami kampa yoni nkibemi kinaꞌmiba tusa yagaramati kampa wawe. Yonintana ibemi kinaꞌmi mana igeba wawe.

³²Piya pemisa puma: Aogi kinatawe, ye kinapa aogi puwaitakenaba kampa tumintuwe. Naeba agunta kina igu aꞌwae pikibeka uwaimikena tumuwe, piya untiye. Naninta aꞌa-o uma iꞌmikena kamana abigantawe

³³Piya yogini, kana wasanamiba Isuka maya omintawe: Yoni nkabagi kinaꞌmiba uwoma ntaga nanintaba kampa nanta, aꞌa-o uma nunamu yewa, Parasi nkaokinaꞌmigeba pabiya pewe. Pigoya kae kabagi kinaꞌmiba nanintabe wanipe asi nasi aꞌyugu nawe, piya omintawe.

³⁴Omuguna, Isu maya uwaimintiye: Pigoya, wasanami ibaꞌena puntiniba, aꞌyaꞌma kinaꞌmiba nanintaba kampa aꞌa-o ukibewe. Igeba naninta naiginaba, ibaꞌwaeꞌma nkawaewampa uwa mikibipa, pipa kanarane.

³⁵Pigoya, ainti ibaꞌwaeꞌma nkawae ampa arakurite ababute to mari wagasiginiba, pi ntagaba aoꞌmiba intara puma kampa naninta nanta uma mima aeka napikibewe, untiye.

³⁶Piya untana, Isu meto kamana pika maya uwaimintiye: Wasanama abara kai atugekanaba, to aoso kairasaba kampa kasama pitapa motama pugunikiye. Piya pukibipa pi abara kai to atuꞌwakanaba, ka aogi kai kampa waikiye, untiye.

³⁷Piya untana to maya untiye: Piya, wasanamaba kasa waini wanipa paisa yaga auꞌaribi kampa arigikiye. Piyama paisa yaga auꞌaribi arigikibemipa, namagima aiguriwakiye.

³⁸Piya, wasanamaba kasa wainina pabi kasa yaga auꞌaribi arigiye.

³⁹Pigoya, wasanama paisa waini nagaiteginaba, toba kasa wainigaba kampa abiye. Aeba: Paisaenarepa aogiyenawe, iyema, Isu piya uwaimintiye.