Read Fore Aruku 7 Bible Online

Aruku 7 - Fore bible

Aruku 7

¹Isu aeba wasana mono kamana aꞌya uwaimitategina Kapaniyamu kumati wantiye.

²Pitaꞌi namuꞌisa irebu kinaꞌmi kiya yagarama, ae kayokaya yagara purikena puma mintantiye. Pigoya, kana tabe yagara pi ntagaraka abogana aogi puntiye.

³Piya pogana, kana irebu kiye yagara Isu nkawaga kamana abite, Yuta kinaꞌmi paitakena kinaꞌmi igarubaꞌmagina: Isuti wama kayokaya yagarane yonintanawapa atawanema, uma omiyo, uwaimima igarubantiye.

⁴Pigoya igeba Isuti wama esegi kamana maya uma omintiye: Taeba kiya yagara aeka abokana aogi piye. Pika kamanaꞌwapa abo.

⁵Aeba aguꞌwapa Yuta kina taeti waiye. Pigoya, mono nama aboranemaba, aewa monepa ataogana kanarasaogana abora tamintiye, omintawe.

⁶Piya uma omuguna Isu abite igege wantiye. Wama kiya yagarama ntamata irosakena pogana pitaꞌisa aokina uwaitaogini, kanama Isu mayama omintawe: Waꞌega, naeba tumima mintakina mintogana, pegina kaeba aꞌyugu puma namantepintiba ubasikibene.

⁷Piya, naene abogana kampa aogi pegi, kaeti ikenakaba kunta puwe. Piya, kaeba pitaꞌi uwa mima kamana yegana kayokaya yagaranepa kabareno.

⁸Piya, naeba ima minta kinaꞌmi nkiwamu wasimagi, to kaꞌisa tumima minta irebu kinaꞌnepa kabiyuwe. Piya, igetisa kaꞌwainapa: Wao uma omekanaba wakiye. To ka pa: Kanao, yekanaba kanakiye. Kayokaya yagarane: Pi ntuga po, yekanaba pikiye. Piya, kiya kinaꞌmi yosa puma yeganaba atawano, untiye.

⁹Piya yogana, Isu pi kamana abima kiya yagaraga napi napi puntana, aꞌwae pumagina aꞌyaꞌma aegaꞌma kanaume kinaꞌmipa mayama uwaimintiye: Naeba urimekiri abiyo. Isureyo kina, tigetiba ma ntagarama nkamatitiꞌena piya awametapa kampagi agauwe, uwaimintiye.

¹⁰Piya uwaimogini, kiya yagarama aokinaꞌmiba aꞌwae purite namapinti ima, kayokaya yagara yoninka ata waogini agantawe. Isu ka yagara purintapisa asitantiye

¹¹Pigoya, to ka yagaba Isu to ka kumapa agewapa Neni, pitaꞌi waogini, abagi kinaꞌwape wasana uwoma to kinape aege wantawe.

¹²Pigoya, waꞌe ikibi kabera uma irosaogini, purinta kina ka wasi maete tumintawe. Kiya waeꞌma ntagara kaꞌanto mima purintiye. Piya, ae kumatisa uwoma wa wayapa kaikena tumi puntawe.

¹³Tumi puguna Isuba pi kiya wae agama antara potama: A-kubeꞌenaba po, omintiye.

¹⁴Piya omogini, wasana wasaba wasi uꞌma mintuguna, Isu wama wasa aukaya puma maya untiye: Masimabiwo, naeba ugamota kaogama asiyo, untiye.

¹⁵Piya yogana, purintapisa asimagina kamana untiye. Pigoya Isuba anowampage miyenema amintiye.

¹⁶Piya pogini, wasanamiba agate iyekuru pumagini, Kotiti iꞌmu puma maya untawe: Poropete tabe yagara abakatepi aboranti mintiye, untawe. Pigoya kaꞌisamiba to maya untawe: Kotiba aokina tae taoꞌmaekena kanaye, untawe.

¹⁷Piya, awaga kamana Yutiya maribe to kaꞌisa maribe wagana kana puntiye. Isu Yoni nkabagi yagarara kamana uwaisimintiye

¹⁸Aibogana, Yoni mintogini, ae abagi kinaꞌmi: Isu piya mayaena pome, pi kamana omintawe.

¹⁹Pigoya pi kamana abite, tara yagara: Waꞌega maya uma abigaisema, isigarubantiye: Karaisitiba kanakiye untapa, kaebera, to kaꞌwainaka agawa pukupayawe, uwaisitaoginisi,

²⁰Isuti wamaginisi irosaꞌma maya untase: Yoni mono wani paitakena yagarama maya uma tasigarubaye: Karaisitiba kanakiye untapa kaebera, to kaꞌwainaka agawa puma mikune, iyema, abigantase.

²¹Pigoya, Isu aeba pi ntaga to yoni kinapa kaba itantana, keba igaruba igaintana, iyorika kinapa iyo agaitantana puntiye.

²²Piya poginisi isigeba uma irosaꞌma abigausuguna mayama uwaisimintiye: Tisigeba wamagirisi agama abeme kamana Yonipa maya omiso: Iyorika kinaꞌmiba iyo agawe. Ka miyaba kinaꞌmiba keꞌi nasewe. Karu kinaꞌmiba kabarewe. Aibo kinaꞌmiba kamana abewe. Purinta kinaꞌmiba iyo agama asiyewe. Kota kampa wainta kinaꞌmiba aogi mono kamana abewe, omiso.

²³Piya, kaꞌwaina naeka abima aekita kampa pikibiꞌnaba, aꞌmuntanabi mikiye, uwaisimite isigarubantiye.

²⁴Pigoya, Yoni nkaoꞌyagara taraba aꞌwae puma wausuguna, Isu aeba wasana mintume kinaꞌmi igepa Yonika maya uwaimintiye: Tigeba kaꞌme mpari nana agakena wantawe, a. Misa kaꞌwaina pontawama maete wate kanate pogiri agakena wantawe, a. Piyaba kampaye.

²⁵Piya, ka yagara aotasaena aogiyena wantaga mintogiri agakena wantawa, a. Piyaba kampaye. Wasana aotasaena aogiyena maema miye kinaꞌmiba igeba kiye yagarama nkaogi namapi mima pita uwa miyewe.

²⁶Pigoya, poropete ka agakena wantawe. Owe, piya naeba urimekiri abiyo. Wasana aganta, aeba poropete kaꞌisa kinaꞌmi awametapa kampaye. Aeba to awametane.

²⁷Aeka kamana awaꞌena Koti yagarawapa maya omintiye: Naeba kayokaya yagarane otagana, ae paitagatama ke iꞌma aogi pugatakiye, piya untiye.

²⁸Pigoya, naeba urimukuwa, abiyo: Wayaꞌmatisa aborantiꞌna kaꞌwainaba Yonipa kampagina againtiye. Pigoya Koti kabiratakibi kanabipa tumima minta kinaꞌnempiba Yonipa agaikibewe, Isu piya untiye.

²⁹Piya, aeba piya yogini aꞌyaꞌma uwa kinaꞌmibe takisi maeyume kinaꞌmibe abimagini: Koti pikibemintanaba aogiyenawe, untawe. Pigoya pi kinaꞌmi Yoniti pai wamagini, mono wani maenta kina mintantawe.

³⁰Piya, Parasi kinake kamana ago abinta kinake igeba Koti uwaimomentanaba: Aꞌa-o, untawe. Pigoya, pi kinaꞌmi Yoniti wama, mono wani kampa pasume kinaꞌmiba igeba Koti kamanapa: Aꞌa-o, otantawe.

³¹Pigoya Isu to maya untiye: Mamparasa kina tigekaba kegita awame pusuwe. Nanarane.

³²Tigeba yagara araga piyamawe. Igeba kumati mimagini iyoꞌmi mayama uwaimewe: Ini yokiripa, nana piyema kampa waꞌenaba pewe. Tantaraꞌena puma kubeꞌena pokiripa, nana piyema kampa taoꞌmaeyawe. Tigeba pi nkawametane.

³³Yoniba mono wani pai itanti ntagara yogawa agobintanaba, kaꞌisa nanintabe waini wanipe kampa nanta, uwa aꞌa-o uma miyogiri agantiripa: Aguꞌama aꞌyugu piye, tigeba untawe.

³⁴Pigoya, Wasanama Ntagara naeba kanama nanintabe wanipe naogiripa, nagantiri nanagabaya maya yewe: Aeba uwoma nanintabe wanipe nai ntagarawe. Takisi maeya kinake aru kinake ige iyoꞌyagarawe, tigeba naeka yewe.

³⁵Pigoya abiyo. Mono agowapa iguꞌama kintarama miye kinaꞌmi, ige aogima aegaragiri agawe, Isu piya untiye. Waya kaꞌwaina Isu nkagisari wani paiꞌatantiye

³⁶Pigoya, Parasi kaꞌwaina Isu nanintaga agegaꞌe yogana, nankapinti ima naninta nantiye.

³⁷Pigoya, pi kumatasa aruꞌwae kaꞌwaina, Isu aeba Parasi ntamapi ima naninta naogana abitegina, aogi agunta masawae yaba kankabe wantaga ka maete,

³⁸akaꞌi asima mimagina, kubeꞌena pogana, aoꞌnuwama agisari pasogana aꞌno nkabiyatasa aebago puntiye. Pumagina agisaba amoꞌnantana, agunta wanipa paiꞌatantiye.

³⁹Wayaꞌma piya pogana, Parasi yagara Isuka agegaꞌe unti ntagara aeba antabaipinti mayama napintiye: Ma nkaepa ataena pemi waene. Piya, Isu aeba poropete miyemisinta, agowapa abibebe pemisinema, napintiye.

⁴⁰Pigoya, napiyogana Isuba abite mayama omintiye: Saimoni, naeba kamana ka ugamekana abo, omogana: Tisa, yega abeno, omintiye.

⁴¹Omogana Isu meto kamana maya untiye: Mone kina kaꞌwaina tara yagara moneba uwa isimintiye. Kaꞌwainapa wanantareti tora amintiye. Pigoya to kaꞌwaina nayataraꞌmu tora amintiye.

⁴²Pigoya, isigeba antota amikena monega aguyosagantase. Aibusuguna, atunkisipa uwa aerawane utegina, isitantiye. Pigoya, isigetisa kaꞌwaina mone isimintemi ntagaragaba aꞌmupa taberapa potakiye. Kaeba keka yenema, abigantiye.

⁴³Piyama abigaogana, Saimoni maya untiye: Mone uwoma aꞌa-o otantemi, aeka yuwe. Piya yogana Isuba: Kaeba kanara yenema, omintiye.

⁴⁴Piya ute, wayaꞌmati aꞌwaebuma Saimoni maya omintiye: Ma nkaepa agano. Naeba namakapinti iyoganapa, kaeba nagisari pasikena wanipa kampa atanatampene. Pigoya ma nkae aeba nagisaba aoꞌnurasa paiꞌnatama aꞌno nkabiyatasa aebago punagasaye.

⁴⁵Kaeba kampa namo nampene. Piya, ma nkae aeba nagisanepa ebi ebima namo naye.

⁴⁶Kaeba naꞌnotiba uwa masawaepa kampa paiꞌnatampene. Piya, ma nkae aeba nagisanepa aogi agunta masawaetasa paiꞌnataye.

⁴⁷Pika ugamekana abo: Waya aeba kaoꞌenaba uwoma punatamika, aruꞌenawapa uwoma asuꞌa pogasuwe. Pigoya, kaꞌwaina aeba aruꞌenaba iseꞌanto asuꞌa potakibi naba, kaoꞌenaba uwaenanto piye, omintiye.

⁴⁸Piya umagina, waya maya omintiye: Aruꞌenagapa asuꞌa pugagasuwe, omintiye.

⁴⁹Piya omogini, wasana naninta kaga nama mintanta kina igeba mayama mare-u me-u puntawe: Aeba nana yagara kana aruꞌenaba asuꞌa piye, untawe.

⁵⁰Piya yuguna, Isuba pi nkwaekaba maya omintiye: Kamatitiꞌenagampaba aogi pugataye. Kaeba wamagina paruyenabi miyo, omintiye.