Read Fore Aruku 8 Bible Online

Aruku 8 - Fore bible

Aruku 8

¹Pigoya, to kaꞌisa yagaba Isuba tabe kumatibe uwaena kumaꞌantontoribe nasi nasi puma mima, wasana aogi mono uwaimima Koti kabiratakena kamana uwaimintiye. Wama uwaimogini nagisarisa tara tumpaema abagi kinaꞌwampibe wauguni,

²to kaꞌisa wayapa pai yoni kinape ke kina intabaipi minta kinape mintuguna, igetisa agaruba igasogini, igege wantawe. Igetisa kapa Mariya, Matara kumatasa waene, aepa keba tonaentisa tara umaema agaruba againti nkwaene.

³Piya, to kapa agewapa Yowana, Eroti ntama kiye yagara Kusa, ae waene. Piya, to ka waepe, agewapa Susana, to kaꞌisa waepe igege wantawe. Pi waeꞌmiba Isuge abagi kinaꞌwake igeꞌwai kutatasa iyoꞌmaema kaoꞌena puwaitantawe. Aintana asigikena kamana Isu untiye

⁴Kumaka kumaka aꞌyaꞌwaema kina Isuti kanagana puma pumaeyuguna, igantana meto kamana ka mayama uwaimintiye:

⁵Wasana kaꞌwaina aeba aintana pikena wantiye. Wama aibarase pogana, kaꞌisa aowapa kepi tumpa waiyogana, wasanami igeba nasi nasi puma aerapauguni, kabarankama irosaꞌma ampa nawaegaintiye.

⁶To kaꞌisa aowapa asigiyogana yabankama nkabobori tumpa waiyogini, pipa maba kampa waintomeka iꞌmagina iyomepa asama puꞌwantiye.

⁷To kaꞌisa aowapa kabubinti tunkwaima iraogana, kabuyenama pabiyama iꞌmagina aibarusa pogana asa wantiye.

⁸Piya to kaꞌisa aowapa apa mabi tumpa waima, anonkapa uwoma aborama aosa pama 100-wa aboraogana uwoma ntaninta waintantiye, untiye. Pi kamanapa uma aꞌya atate, kegaꞌe uma maya uwaimintiye: Ageyaga kinaꞌmaba ma kamanapa abibebe peno, Isu piya untiye. Isu aintana kamanaꞌama nkagowapa uwaimintiye

⁹Pigoya, abagi kinaꞌwampiba igeba pi kamanaꞌama nkagowaka abigauguna maya uwaimintiye:

¹⁰Koti kabiratakena kamana kakama waintipa, tigemana abiyoma untine. Kaꞌisa kinaꞌmiba igeba meto kamana agowa kampa abikibewe. Piya pumagini iyoma kagagate, kaꞌenaba kampagini agabebe pikibewe. Piya, igerasaba kamana abikena pugagate agowapa kampagini abibebe pikibewe, untiye.

¹¹Piya untana ago maya untiye: Meto kamana yopa, piꞌna nkagowapa mayama waintiye: Aintanaba Koti kamanane.

¹²Pigoya, kepi aintana tunkwaintogana, kabarankama ampaema nantisa puma miye kinaꞌmiba igeba mono kamana abigina iguta waiyekana, pabigo kewamaba irosaꞌma maerite paiꞌwagini, monoꞌwai kampa wainta uwa mima ataenabi miyewe.

¹³Pigoya, to kaꞌisa aintana yaba nkabobori tumpa tagantisa puma miye kina igeba maruꞌenaba mono abima iga pewe. Piya ibigakenaena aboraginiba anuntana pewe.

¹⁴Pigoya, to kabubinti tumintisa puma miye kina igeba arirasaenama iguꞌamapa maema aꞌyugu puwaitakini, uwoma napiyenawampa mone kutankama nkigaenawampa monoꞌama aeguyegina, auꞌwapa kampa waiye.

¹⁵Aintana aogi mabi tumintisa puma miye kina igeba mono kamana abima iguꞌamapa kiya kabima, pasema aogima miyewe. Piya pumagini auꞌwapa aborawe, piya untiye. Kane igiꞌma kampa kakakena kamana untiye

¹⁶Pigoya, Isu to maya untiye: Ae kinaꞌma kane igiꞌma tusuparirasa atikaekiyebera, asipawama nkamentapinti atakana waikiye, a. Pipa kampaye. Kanepa igiꞌma abora atagana waima, nama nkagupintiba eꞌwasa puma arakini wasanamiba ima agakibewe.

¹⁷Pigoya, aꞌyaꞌwaemaena kakama waintintanaba, pipa waima kampa waikiye. Pipa mimaba ainti aborakiye. Piya, kaꞌisaena wasanama atikae kaintaꞌena wainti, pipa waimaba kampa waikiye. Pipa mimaba aꞌwaitakiye. Piya pegana agowapa pita arakiye.

¹⁸Pigoya, kaꞌwaina amintaꞌena kanara maema miyekanaba, to kake tabe puma amikiye. Piya, to kaꞌwaina amintaꞌena kampa aogima kabima miyekanaba, aparikiye. Pika tageba aogima abibebe puma napi napi puma miyiyo, Isu piya untiye. Isu ano aꞌnatabaraga kamana untiye

¹⁹Pigoya, uwoma kina Isu ainkima asima mintuguni, anobe aꞌnatabarabe kanama wasanabi igiga puma pagasara mintantawe.

²⁰Piya puguna, ka yagarama igategina Isupa maya omintiye: Kanobe kaꞌnatabarabe takaꞌi kagakena ampintawe, untiye.

²¹Piya yogana Isu abite maya untiye: Koti kamana abima wasiye kina mampa nanobe naꞌnatabarabe mintawe, piya untiye. Pontawamage waninkamage Isu nkawamu wasintase

²²Pigoya, ka yagaba Isube abagi kinaꞌwape wanipisa karebi intana, maya uwaimintiye: Taeba kotupa taꞌema maroteri wane, yogini abuguni wantawe.

²³Waumepa Isupa awaiga abogana waintiye. Waitamintogana pontaba tabera puma, kotunkamaba ataena purite, waninkamaba wanipisa karewama nkantabaipinti tumima awaitama ipirintakena puntiye.

²⁴Aibogini, igeba wama Isu abage pumagini: Tabe yagara, tabe yagara, taeba naisukena pune, untawe. Piya yuguna, aeba asima pontawamake tabe waninkamake tabe kamana uwaisimoginisi uwasuwa puwantase.

²⁵Aibusuguna Isu maya uwaimintiye: Tigeba timatitiꞌenaripa aeta waintegiri yewe, antiye. Piya yogini, igeba aꞌyaꞌma iyekuru pumagini tabe igi napintawe: We, aeba nana yagaragana, pontawamake waninkamake kamana uwaisimeginisiba awamu wasiyese, uma mare-u me-u puntawe. Isu ke kina igarubaogini yagama nkantabaipinti pasintawe

²⁶Pigoya, igeba kotupa taꞌerite wama Kerasa kinaꞌmi auꞌi irosantawe. Pigoya pi auꞌi Karari kotunkama maroteri irosantawe.

²⁷Pitaꞌi uma irosaꞌma wauguna, kumatisa ka yagara aeti kanantiye. Pi ntagara aeba antabaipinti ke kinapa uwoma miyuguna, eꞌero ntagaba aotasaena kampa maema punta auka mimagina, piya namapinti kampa mima, aeba wasana irubintimana umi mpi puta nasintiye.

²⁸Pigoya, aeba Isuti kanamagina agama, tabera kegaꞌe uma mabi wareꞌnama agisabi mima tabe kamanatasa maya untiye: Isu, kaeba inatisa tabe Koti Ntagaragawe. Kaeba nana punatakena kanane. Kaeba a-nkata punatao, untiye.

²⁹Pigoya pai asi nasi kewama aeba eꞌero ntagaba pi ntagaraba aguꞌamapa ataena potaogana, esegi puma miyogini, wasanamiba agisa ayatapa esegi igaꞌnarasa kirokaetama kiya kabima mibuntawe. Aibuguna, igaꞌnaba arisa narisa potate, paiꞌma kaꞌme mpari uma mibuntiye. Pigoya, Isu kana yagarama nkantabaipisa ke agarubakena pogana, agama piyama: A-nkata punatao, untiye.

³⁰Piya yogana Isu: Kagegapa kegawema, abigaogana: Nagenepa Uwomane, untiye. Piya, keba uwoma pi ntagarama nkagupi paiꞌma mintaka, untiye.

³¹Piya, igeba Isu uwa uwaitakini, aꞌabibinti tumisanaga kampa ibogini agisuntawe.

³²Pigoya, pi mpariba uwoma ntagamiba amu ararabinti mima naninta nama mintuguna, pika ke kina igeba abirataga yaga intabaipi tumeno, piyama abigauguna: Kanarane, owe, uwaitantiye.

³³Piya uwaitogini, igeba wasana antabaipisa irosaꞌmagini, yaga intabaipinti ubasintawe. Ubasuguni, pi ntagamiba karuꞌena ausari tumima, tumpa wani naisuwaewantawe.

³⁴Piya puguni, yaga kiye kinaꞌmiba agate karuꞌena wama wasana waꞌeribe yogaribe wama uwaimintawe.

³⁵Uwaimuguni igeba pintana aborantika agakena irosaꞌma kanama, Isuti ampa agantawe. Pigoya, pi uwoma ke kina antabaipisa irosaꞌwaume ntagaramaba aotasaena wantaga kamana wantaga Isu nkagora mintantiye. Piya pogini, wa wayaꞌmiba agate iyekuru puntawe.

³⁶Piyama mintuguni, pintana agama abinta kinaꞌmiba pi ntagara aogi potaome kamana uwaimintawe.

³⁷Piya, pi Kerasa marasa kinaꞌmiba tabera iyekuru pogini, Isu aeba mawaipa kaite wanema omintawe. Omuguna, aꞌwae puma itate wanipisa karebi iyogana,

³⁸ke wantaga miyome ntagaramaba aegaꞌma aege wakena esotantiye. Esotaogana Isuba agarubaꞌma maya omintiye:

³⁹Kaeba waꞌegati wama, Koti kaeti piyaena pugatami, pi awaga kamana uwaimo, untiye. Piya yogana, pi ntagara aeba aꞌwae puma, Isu maema aogi potanti pi awaga kamana kumaꞌwatisa kina uwaimiwaentiye. Isu puꞌwanta aragage yoni waeke kaba isitantiye

⁴⁰Pigoya, wasanami igeba Isuka agawa puma mintuguna, irosaogini agama iꞌmuntana potantawe.

⁴¹Aibuguna, mono nama kiye yagara ka, agewapa Yairasi, aeba kanama Isu nkagisabi parokaema aragawaka abigantiye.

⁴²Pigoya, aragawapa kaꞌanto kabowapa nagisarisa tara tumpaema kabu pugasomekana, purikena puma mintogana, Isuka: Nae namati kanao uma, agegaꞌe untiye. Piya yogana Isuba abite waogini, uwoma kinaꞌmi pumaewauguna,

⁴³pi kinaꞌmi nkabakapi waya ka mintanti, aeba iyegari tumiyaba miyogana, kabowapa nagisarisa tara tumpaema kabu pabiya mintantiye. Mintogini, tusa kinaꞌmiba aoꞌmaekenaba pugagate uwa atantawe.

⁴⁴Piya, kana waeꞌmaba aeba Isu akaꞌi wama kaiwampa atuta aukaya puntiye. Aukaya pogana, pabigo korankapa tabago puntiye.

⁴⁵Piya pogana, Isu: Ke naukaya piye yogini, wasanamiba uwamega yuguna, Pita maya untiye: We, Tabe Yagara, uwoma kinaꞌmi kobe puma mintini kaukaya pewe, untiye.

⁴⁶Piya yogana, Isu maya untiye: Kampaya, kaꞌwaina naukaya pegina esegiyenanepa wagi agauwe, untiye.

⁴⁷Aibogana: Aeba agonepa pabigo aboraye, wayapa ute, tabaraba purite Isu nkagora uma parokaema, yoninkampa kamanape aukaya pogana koranka tabago punti kamanape, kaga uma aboraogini abiwaentawe.

⁴⁸Pigoya, Isuba maya omintiye: Araganepa, kamatiti punatampeka aogi kabiye. Pika wama aogima miyo, omintiye.

⁴⁹Pigoya, Isu piya uma mono nama kiye yagarama ntamati wakena pogana, pi ntagarama ntamatisa ka yagara kanama maya ampa omintiye: Aragagapa ago puriye. Pika tisa yagaraba uwampapa a-nkotagana kanano, untiye.

⁵⁰Piya yogana, Isu pi kamanapa abima mono nama kiye yagarapa mayama omintiye: A-kaekuruba po. Kamatiti punataganaba, aragagapa aogama asikiye, untiye.

⁵¹Piya ute, napinti ima kaꞌisaba waitaogini abeꞌi mintuguna, Pitake Yonike Yemisike kana aragama nkanoge abage isigege igeꞌmana ibabogini, wama napi uma pasintawe.

⁵²Uma pasuguni, wa waya igeba kubeꞌena puma mintuguna, Isu maya uwaimintiye: Kubeꞌenaba a-piyo. Aragaba kampa purintiye. Aeba uwa awaitamintiye, untiye.

⁵³Piya yogini, igeba agora puꞌwantika agaume kinaꞌmi kagi potantawe.

⁵⁴Piya puguna Isuba kana aragama nkayata uꞌma kegaꞌye uma: Araga, kaeba asiyo, omintiye.

⁵⁵Piya omogana, amankampaba aꞌwae puma kanaogana asintiye. Asiyogana: Naninta amigina nano, uwaimintiye.

⁵⁶Piya yoginisi, anoge abage isigeba tabera pami puntase. Aibusuguna Isuba: Pi kamana wasana a-nkuwaimiyo, uma akunkaitantiye.