Read Fore Aruku 9 Bible Online

Aruku 9 - Fore bible

Aruku 9

¹Isu aeba nagisarisa tara tumpaema kinaꞌwa igegaꞌe yogini irosauguna, keba agaruba igaintana, yoni kinapa kaba itakibeka esegiyena imima yoga kamana uwaitantiye.

²Pigoya, wasana Koti kabiratakena kamana uwaimima, yoni kina kaba itakibeka maya uwaimima

³igarubantiye: Tigeba keꞌiba wantape titasaena ampaete wantiri iraꞌna kupe, nanintabe monebe kai tarabe, a-nkurite waiyo.

⁴Pigoya, ka kumata irosaꞌmaba namapi pasikibepa, pabipi miyiyo. Mima irosaꞌma waiyo.

⁵Piya, tori uma irosaigini, aꞌa-o uma uritaigiripa, iroꞌma tigisarisa iꞌni pugaitegiri waigini, ataenabi miyentanaga abima napiyiyo, Isu piya uwaimima igarubantiye.

⁶Piya uwaimima igarubaogini, igeba aseꞌyo puma wantawe. Piya puma kumaka kumaka nasi nasi puma, wasana aogi mono kamana uwaimintini, yonintanabe iki naki pomentanabe kaba itantawe. Eroti Isu nkawaga kamana abintiye

⁷Wasana kiye yagara Eroti aeba Isu piya mayaena pome, pi nkawaga kamana aboganaba kunta abuntiye. Pipa kaꞌisa wasanamiba maya yumeka puntiye: Yoni aeba purintapisa asima mima, pintanaba piye, yuguna,

⁸kaꞌisamiba akayotama maya untawe: Kampaye. Iraiya to kake aborama mintiye, yuguni, piya kaꞌisamiba maya untawe: Kampaye. Poropete tayabama kaꞌwaina aogama mintiye, untawe.

⁹Piya yuguna, abogana Eroti kunta abogana maya untiye: Yonipa naeba ago yuwagini aeguntawe. Pigoya, ke piya pemi nkawaga kamanapa abuwe. Piya uma, kaꞌenaga umaba Isu agakena puwe, untiye. Isu 5,000 kina naninta imintiye

¹⁰Pigoya, aposoro kina igeba yogawaitisa aꞌwae purite kanama, pi punta kamana Isu omintawe. Omuguna Isuba ibabute Petisaita kuma mari ibiwai umikena wantiye.

¹¹Waogini, wasanami agate aegaꞌma wantawe. Piya Isuti irosauguna, aoꞌena puwaitaogini mintuguna, Koti kabiratakena kamana uwaimimagina, yoni kinapa kaba itantiye.

¹²Piya puma mintuguna, pankaoba pasikena pogini, nagisarisa tara tumpaema kinaꞌwa aeti wama maya omintawe: Mapa kabubinti mintompeka, kaeba wasana itagini kuma wairite wanti, pitaꞌi wama namape nanintabe aguyosaꞌma aboraiyo, uwaimo untawe.

¹³Piya yuguna Isu: Tigeri kapa nanintaba imiyo, uwaimintiye. Uwaimogini igeba maya omintawe: Amana paretintontoba nayakaꞌmuna, inoyanta tarawa suma, piyakiꞌanto waintiye. Pika aya pukune. Kumati wama ma uwoma kinaꞌminta ige nanintaba wama ika pukuno, untawe.

¹⁴Pigoya, pi waba 5,000 kina mintumeka, abagi kinaꞌwampiba piya untawe. Yugana: Wasana uwaitaigini arabamagini, 50 kina aki puma mirite waiyo, uwaimintiye.

¹⁵Piya uwaimimagini, igeba wasana uwaitauguni, arabama maraꞌmintantawe.

¹⁶Aibuguna, pareti nayakaꞌmupe inoyanta tarape maema mantari ao maꞌmagina Kotiti aꞌmu potamagina, apako puma abagi kinaꞌwa imogini igeba pako puma wasana imintawe.

¹⁷Pigoya, igeba aꞌyaꞌwaema nama igaꞌe pantawe. Piya nauguna, aritapa kibiꞌmagini, waꞌnu kupa nagisarisa tara tumpaema ku iraguguna awaitantiye. Pitaba Isu nkagowa uma aborantiye

¹⁸Pigoya, ka yaga Isu aeba abagi kinaꞌwa ibabute tori umima, Isu aewa nunamu untiye. Piya puntana: Wasanami naekaba kewe yewema, ibigama untiye.

¹⁹Ibigaogini mayama omintawe: Kaꞌisa kinaꞌmiba Yoni mono wani paiꞌatakena yagarawe ugatawa, piya kaꞌisamiba Iraiyawe ugatawa, piya kaꞌisami igeba Poropete tayabama kaꞌwaina aogama asima mintiye, piya ugatawe, omintawe.

²⁰Piya yuguna, igewai ibigama maya untiye: Piya, tige tigeripa napiyepa naekaba kewe yewema, ibigaogana, Pita: Kaeba Kotitisa utaratanti ntagara Karaisitigawe, untiye.

²¹Piya yogana, wasana to kina kampa uma abora uwaimikibeka, uwame uma esegi puwaitantiye.

²²Piya mayama amato puma uwaimintiye: Wasanama Ntagaramantepa tabe kuntaenabi punataigini, mono kabiye kinape tabe mono kiye kinape kamana ago abinta kinape, igeba karana natama naeguyigi, papa kakaga mima purintapisa asikuwe, untiye.

²³Piya untana, wasana aꞌyaꞌwaema toba maya uwaimintiye: Kaꞌwaina nae naegarakena puntanaba, auꞌwama kamana akabitate, wasanami igobi potakibikaba a-nkaekuru puma maripowa aesagabite naegarano, ute,

²⁴piya, kaꞌwaina mikenaenawaka owe yekanaba aꞌyugu potakiye. Naeka napima, mikenaenawaka aꞌa-o yekanaba, aboramikiye, untiye.

²⁵Piya untana maya untiye: Pigoya, kaꞌwaina aeba mabi aꞌyaꞌwaemaena maemagina, aguꞌamankapa aeguma kaiyekanaba, aya pikiye, a.

²⁶Piya, ka yagarama kamanaꞌneka ani punatakibipa, Wasanama Ntagaramanageba pabiyama nani potakuwe. Pigoya, tumukubopa, nabanempa nkeꞌwasaenabe enisore kinaꞌmi nkeꞌwasaenayaga naeba eꞌwasa puma tumukubopa, pi ntagaba ani potakuwe.

²⁷Naeba taga tagaꞌya urimekiri abiyo: Ma minta tigetisa kaꞌisamiba purikenaenaba kampa aborantigina, Koti kabiratakenaenaba aborakiri agakibewe, piya untiye. Isu manta auga puntiye

²⁸Isu aeba pi kamana uma mintogana, tonaentisa kakaga umaema yaga aꞌya pogana, Pitake Yonike Yemisike ibabute amuti nunamu ukena intiye.

²⁹Ima nunamu asu yogana, aowawamaba to auga pumagina, kaiwampaba waentana puma eꞌwasa puwantiye.

³⁰Piya poginisi, wasana tara aborama aege kamana untase. Pi isige isigewaisipa Mosesege Iraiyage,

³¹isigeba manta eꞌwasaenawaisintaga irosaꞌmaginisi, Isu Yerusaremi kumati mampa atate ikena kamanapa tumpa Isuge untase.

³²Piya pusuguni, Pitabe ao taramisibe iwaigaba tabera ibogini waintawe. Pigoya, ibegu pumiyumetisa agantapa, Isube eꞌwasaenawape tara yagararamisibe igantawe.

³³Pigoya isigeba wakena pusuguna Pita maya omintiye: Kiya yagarama-o, taeba mataꞌi miyokanaba igabiye. Pika namapa kakaga kiyeno. Kaeꞌena kane. Mosesenta kane. Iraiyanta kane, untiye. Pigoya, aeba kamana kampa aogima napinta, uwa untiye.

³⁴Piya yogana, ibina kaꞌwaina tumima airari kae igaintiye. Ibina kima itikaewaogini, igeba iyekuru puma mintuguna,

³⁵ibinankama antabaipintisa kamana mayama aborantiye: Mepa utatanta yagaranene. Tigeba kamanaꞌwapa abiyo, untiye.

³⁶Piya kamana yogini abintini, agaumepa Isu abintowa mintogini agantawe. Piya, pi abagi kinaꞌwapa pintana agantapa, pi kanabipa kampa wasanaba uwaiminta, uwa igupi napima mintantawe. Abagi kina ke agarubakena pugagate atantawe

³⁷Pigoya marogini, amutisa tumima wasana uwoma kina ibatantawe.

³⁸Piya puguna, ige abakapintisa kaꞌwaina maya uma Isu agisuntiye: Tisa, kaeba kamanaꞌnepa abima, yagaranepa aoꞌmaeyo, aeba kaꞌantowe.

³⁹Abeno. Kewama aepagina pamintami puma, a-e a-e uma miye. Piya paisusu pegina akagawaba iꞌwaegasaye. Piya, kewamaba kampa agarosamaba atatewaikana, tabera amiyo amayo puma anuntana potaye.

⁴⁰Pigoya, kabagi kinaka uwaimogini, igeba ke agarubakena pugagate atawe, untiye.

⁴¹Piya yogana, Isu maya untiye: We, timatitiꞌena kampa wainta, aibo kina mintigi, naeba ayaki yaga tigege mintakiri, napiyenaripa kaitegiri nae kamana abikibewe, untana: Pigoya, kana yagaraga ababute kanao, omintiye.

⁴²Piya omogana kana yagara ababute Isuti wakena pogana, kewamaba abai pogana, agisa ayapa paropara puwantiye. Piya pogana, Isu kewama kabiraogana, aegaka waogana, pi ntagaraba aogi potamagina abawampa amintiye.

⁴³Piya pogini, wasanami agamagini, Koti esegiyenawampa agowapa agamagini pami puntawe. Isu purikena kamanaꞌwa uwaimintiye

⁴⁴Pigoya, ma kamana urimekiri abibebe piyo. Wasanama Ntagara naepa to kinaꞌmi iyapi natakena unatantemi kanaꞌnepa ago agarosaye, untiye.

⁴⁵Piya uma uwaimogini, igeba kamana kampa aogima napima abuguna, kakawaogini kampa abima aogi puntawe. Pigoya abigakenaba iye kuru puma atantawe. Tabe mikena kamana untiye

⁴⁶Pigoya, abagi kina igeba: Taetisa ke tabeba mikiye, uma maka untawe.

⁴⁷Piya yuguna Isuba imabinti agowai abimagina, uwaena yagaranto ka ababuma, agora atama

⁴⁸maya uwaimintiye: Kaꞌwaina naeka napima, ma uwaena yagaranto aoꞌmaekibipa, pipa nae naoꞌmaekiye. Pigoya, naoꞌmaekibipa nae Inatisa nagarubanti Ntagara aoꞌmaekiye. Piya, tigetisa kaꞌwaina aeba tumima mikibiꞌnakaba, aeba naobi tabeba mikiye, piya untiye. Kampa karibirakibe kinapa tigeti tiyone, untiye

⁴⁹Pigoya, Yoni maya omintiye: Tabe yagara, taeba wasana aogaso kaꞌwaina kae kage uma, ke agarubagi agaompepa, aeba taepa kampa taegaramika akunka ataune, untiye.

⁵⁰Piya yogana, Isu maya omintiye: Tigeba a-nkakunka ataiyo. Piya, yogari kampa aguya aikibiꞌnapa tiyoꞌena potaiyo, untiye. Sameriya kinaꞌmi Isu a-kanaoma akunkatantawe

⁵¹Pigoya, Isu aeba yogawapa aꞌya kaite iyekana, Koti ababikenagana agarosakena pogana, Yerusaremi kumati wakena uma esegi puntiye.

⁵²Umagina, tonkiya potate apa igarubaogini paitama wantawe. Paitama wama, Sameriya kinaꞌmi ka kumata irosaꞌma Isunta uwaikena nama ka aboraiyema uwaimintawe.

⁵³Pigoya Isu aeba Yerusaremi kumati wakena piye kamana abitegini, nama akunintawe.

⁵⁴Akunuguna, abagi yagarawa tara Yemisige Yonige isigeba abiteginisi, Isu abigama maya untase: Waꞌega, kaeba abegarao. Kae kabukibika, kegaꞌe yekana, mantarisa yaku tumima ma kina irabateno, untase.

⁵⁵Piya yusuguna, aꞌwae puma ka isibiꞌatate,

⁵⁶igeba to kumati wantawe. Isu aegarakena kamena untiye

⁵⁷Pigoya, igeba keꞌi wauguna, wasana kaꞌwaina ibatama Isu mayama omintiye: Kaeba pitaꞌi mataꞌi wakena yegapa naeba kaegarakuwe, untiye.

⁵⁸Piya yogana, Isu maya omintiye: Kabu kara igeba ageꞌwaintaga waintiye. Piya, inatisa kabara igeba inaꞌwaintaga waintiye. We, Wasanama Ntagara nawaikena maruntepa kampa waintiye, omintiye.

⁵⁹Pigoya Isu to wasana ka abatama: Kaeba kanama naegarao, omintiye. Omogana aꞌwae pomintiye: Waꞌega, abintaga marupa wama nabanempapa puꞌwaka uma kaitate kaegarano, untiye.

⁶⁰Piya yogana Isu maya omintiye: Monota puꞌwasu puma miye kinapa purikibe kinapa kanara kaiwaitakibewe. Kaeba kanama naegaꞌma, Koti kabiratakena kamana aborawaimo, omintiye.

⁶¹Pigoya, to kaꞌwaina maya omintiye: Waꞌega, nae kaegarasanaga nabiye. Piya abega, paitama aꞌwae puma wama, naoꞌmipa: Pigo miyiyoma, naya imite kaegarano, untiye.

⁶²Yogana Isu maya omintiye: Kaꞌwaina aeba kaꞌena pubasanantana akaꞌi aomarakibi kinaꞌmaba pemisa puma, Koti kabiratakena yugaba kampa pikiye, Isu piya untiye.