Read Fore Yoni 13 Bible Online

Yoni 13 - Fore bible

Yoni 13

¹Aota yaga Pasoba aboraogana, Isuba aeꞌwaka mayama napima abintiye: Naeba maba atate nabati aꞌwae puma ikena kana agarosayema, napintiye. Piyama napintana, mabi aꞌyaꞌwaema aokinaꞌwa agu kaoꞌena puwaitata kanantiye:

²Pigoya, aseka naninta nakena aki puma mintuguna, ka mayaena aborantiye: Saimoni ntagara Yutasi Isikeriyoti aeba Isu kuna penema Sataniba ae antabaipinti napi napiyena atantiye.

³Piya pogana Isuba aeba mayama abintiye: Naba aeba aꞌyaꞌwaemaenaba nayapi atawaeye. Piya, naeba Kotitisa tumintoka to kake Kotiti aꞌwae puma ikuwema, napintiye.

⁴Piyama napintana, naninta mintumetisa asima eꞌero kaiwapa aboborasaba atagasima to ka kai maema amintiye.

⁵Piya pu uꞌma wani tuꞌnapi tiꞌatama, pabigo agobima abagi kinaꞌwa nkigisa paiꞌitantiye. Piya puwaitama, akapi kirintome kairasa aebago puwaigaintiye.

⁶Piya puwaitata Saimoni Pitati uma irosaogana, maya omintiye: Kaeba Waꞌegawamaga, nagisanepa wani nkaekenaga yeno, untiye.

⁷Piya yogana Isuba maya omintiye: Ma pontanama, pi nkagoba ibaba kampa abempekana, mintana aintiba abikibene, untiye.

⁸Piya yogana Pitaba maya untiye: Ibabe asabe nagisanepa taga kampa pasikibene, untiye. Piya yogana Isu maya omintiye: Naeba kampa paikatakanapa, naegeba kampa atokaema mikibene, untiye.

⁹Piya yogana Pitaba maya untiye: We, Waꞌega, piya untanapa nagisari manapa kampaye. Nayatipe naꞌnotipe kaga paso, untiye.

¹⁰Piya omogana Isuba maya ominitye: Kaꞌwaina auti wani pasikibiꞌnaba ainti agisa mana pasekanaba aꞌyaꞌma autisa nare ntare puwaewakiye. Pigoya tigeba aꞌyaꞌwaemaba kampa nare ntare puwaentawe, untiye.

¹¹Aeba kunaenawapa abibebe pu uꞌma maya uwaimintiye: Tigeba aꞌyaꞌwaemaba kampa nare ntare puwaentawe, Isu untiye.

¹²Igisaba waninkama aꞌya itate, eꞌero kaiwapa to kake maema pu uꞌma maraꞌmima maya uwaimintiye: Naeba pi puritaontanama nkagoba abewo.

¹³Tigeba: Tisa, Waꞌegawe, unamewe. We, piya kinati mpintogiri pipa kanara unamewe untiye.

¹⁴Piya, naeba Tisa, Waꞌegarimpana tigisaba paiꞌtitauwa, tige tigeri pabiyama tigisariba wani nkaeta wama kayokaya kina miyigina kanarasano.

¹⁵Naeba pintanaba puriyakuwa, tigeba iba tiyakontanaba pabiyama puma miyiyo.

¹⁶Naeba tagaka ukuwa abiyo: Kayokaya yagara kaꞌwaina aeba tabe yagarawampa nkawameta agasimagina, mikenaenaba pipa kampa waintiye. Piya, yoga kina kaꞌwaina yogawama nkabawampa ae awameta asugasima mikenaenaba pipa kampa waintiye, untiye.

¹⁷Pigoya pi kamanapa aogima abibebe pumagiri pabi nkawameta miyiginaba aogi pikiye, untiye.

¹⁸Naeba aꞌyaꞌma tigekaba kampa yuwe. Kibiꞌma ibabuwaitanto igeka abibebe puntuwe. Pigoya, mono kamana awaꞌenama nkauꞌwapa mayama aborakiye:Naege naninta kaga nai ntagarama aeba agisa wanta naekiye unti, pi kamanaꞌama nkauꞌwapa aborakiye, untiye.

¹⁹Piya, pintanaba kampa aborantegi, ibaba pika urimuwe. Piya, ainti pintana aborakiripa, kanara tigeba abimagiri: Aeba pi aobi pompe ntagarawema, naegaꞌma timatiti punatakibewe.

²⁰Piya, naeba tagaka urimukuwa, abiyo. Kaꞌwaina aeba yogara otantaꞌnaba ababuma kayone potakibiꞌnaba, yoga ago nae nababumagina aogi punatakiye. Piya, kaꞌwaina aeba nae nababuma aogi punatakibiꞌnaba, unatantiꞌna ae aogi potakiye, Isu untiye. Isuba Yutasika uma aborantiye

²¹Isu aeba pi kamana untana, aumawamaba tabera kunta abuntiye. Aibogana aborama maya uwaimintiye: Naeba tagaka ukuwa abiyo. Tigetisa kaꞌwaina naepa kuna punatakiye, untiye.

²²Piya yogini, abagi kina igeba ankaobi aobi puwaentini: Pipa kekabaya iye, uma kampa napintawe.

²³Pigoya, abagi yagara ka Isu nkagora mintanto, aeba naekaba tabera abugaome ntagara,

²⁴naeka Pitaba ayatasa awame puma maya untiye: Abigagana ugameno. Kekabaya iye, untiye.

²⁵Piya yoga naeba Isu nkagora parokaema maya untuwe: Waꞌega kaeba keka yene. Yuwagana,

²⁶Isuba maya untiye: Pareti wanipi nkaema amekana maekibi ntagara, pi aeka yuwe, untiye. Piya ute pareti wanipi nkaema Saimoni ntagara Yutasi Isikeriyoti, ae amogana maentiye.

²⁷Piya maema naogana Sataniba antabaipinti uma pasintiye. Piya pogana Isuba maya omintiye: Pikena yempentanaba pipa karuꞌena po, untiye.

²⁸Piya kamana omogini pi kaga mintume kinaꞌmiba pi kamana agoba kampa abibebe puntawe.

²⁹Piya puntini kaꞌisamiba maya untawe: Yutasi aeba mone pokisire maema kabima miyikana aota yagasaena ika penema otabera, kusi kina mone imenema iyema, napintawe.

³⁰Piyama napiyuguna, Yutasiba pareti nagaite pabigo irosaꞌma aseka wagaintiye. Isu aeba kasa kamana ago untiye

³¹Yutasiba wagasogana Isuba abagi kinaꞌwa maya uwaimintiye: Mapa Wasanama Ntagara nae eꞌwasaenane aborakiye. Piya, naeka uma Kotitisa eꞌwasaenaba kaga aborakiye.

³²Naeba Kotitisa eꞌwasaena maema aborantoka Koti aewa nae eꞌwasaenaba pabiyama maema aborakiye. Pi kanapa agaro ntaganto pabigo aborakiye, untiye.

³³Piya untana, to maya untiye: We, yakarakiꞌnuntepa, naeba agaro ntaganto tigege mikuwe. Piya, aintiba naguyosagakibewe. Yuta kina uwaimintosa puma, tigepa pabiyama urimukuwe: Nae wakuboti pabiyama kampa wakibewe.

³⁴Pigoya, ma kasa ago kamana urimukuwe: Wasana agu kaoꞌena puwaitama kayone puwaitaiyoma, yuwe. Naeba agu kaoꞌena puma kayone puritama miyosa puma, pabiyama tigeba agu kaoꞌena puma kayone puwaitama miyiyo, yuwe.

³⁵Agu kaoꞌena puma kayone pigini, wasanamiba tigaiginaba nae naokinaꞌne kanta piyo, Isu piya untiye. Pita Isu akabitakena kamana untiye

³⁶Piya yogana, Saimoni Pita abigama maya untiye: Waꞌega, kaeba aeta wakibenema, abigaogana Isuba maya untiye: Nae wakubotiba pipa ma ntagaba kampa wakibene. Ainti mintana pitaꞌiba wakibene, untiye.

³⁷Piya yogana Pitaba maya untiye: Waꞌega, naeba nanaga kakaꞌiba kampa kaegaꞌma wakuwe. Naeba kaeka uma mikenaenanepa kanara kaikuwe, untiye.

³⁸Piya yogana Isuba maya omintiye: Kaeba naeka uma mikenaenagapa kaikenaga yeno. We, naeba tagaka ugamukuwa abo: Kokorewamaba kampa aga untakana, kaeba kakagara uwame unatakibene, Isu untiye.