Read Fore Yoni 21 Bible Online

Yoni 21 - Fore bible

Yoni 21

¹Pigoya, ainti Isu nkabagi kinaꞌwa Taibiriyasi kotu nkawamora mintuguna aborawaimintiye: Aeba ampa aborawaimintipa pipa mayamawe:

²Saimoni Pitawa, Tomasi to ka agiwapa Agaiyawa, Nataniyeri aeba Karariya mari Kena kumatasawa Sebeti ntagara tarawa, to Isu nkabagi yagara tarawa sumagini, piya kinaꞌmi kaga mintantune.

³Piya mimagi, Saimoni Pita aoꞌmipa maya wamintiye: Naeba inoyanta aekena wauwe, untiye. Piya yogi taeba: Taegeba kaga wakune, untune. Piya ute wanipisa karebi ima wantune. Wama umima pi nkasekapa inoyantaba kampa aentune.

⁴Piya puma mintuwakana marogana, Isuba kepari ampintantiye. Ampintogira Isu nkaowarapa kampa aogima agabebema agantune.

⁵Piya puwakana tabigama maya untiye: Yakarakiꞌnupa, inoyantaripa kapa waintiyoma, tabigantiye. Tabigaogira taeba: Kampaye, untune.

⁶Piya yuwakana mayama kegaꞌe uma uramintiye: Wanipisa karewama nkayatakanti kukopa motama inoyantaba aeyiyo, untiye. Yogi kukopa motauwakana inoyantaba uwoma iraꞌwaiyogira, taeba kanara kampa paibu maete intune.

⁷Piya pumagira, Isu nkabugaome nkabagi yagara naeba Pita maya omintuwe: Waꞌegarepa piye, untuwe. Yuwagana Saimoni Pitaba kaiwapa akubotama inoyanta aeyometisa, pi Waꞌegawe kamana abite autasaenaba maema purite wanipinti paꞌyo puma tumima wantiye.

⁸Pigoya, abagi kina to kaꞌisa taeba pi kepari awamori mintumetisa wanipisa kareba pubasanaurite kukopa inoyantage paiburite wantune.

⁹Pigoya, kepari ima uwa mari mayena agantune: Yaku eꞌnora inoyantabe paretibe kaemaranta tama miyogira agantune.

¹⁰Wama uma irosaꞌma Isu maya uramintiye: Inoyanta aeyepa ka ka maete kanaiyo, untiye.

¹¹Piya yogana, Saimoni Pita aeba wanipisa karebi ima kukopa uwa mari paibogana intiye. Piya pomepa kuko antabaipintiba tabe inoyantaba 153 waintantiye, piya pomepa kukopa kampa airisaꞌwantiye.

¹²Piya pogana Isuba maya uramintiye: Tigeba ampa naninta nabisugaito yiyo, untiye. Yoginiba, aꞌyaꞌma abagi kinaꞌmiba: Kaeba kegawemaba, kampa abigantune. Piya, taeba: Aeba Waꞌega yagarawema, ago napintune.

¹³Pigoya, Isu ampima kana inoyantabe paretibe maema pako puma imintiye.

¹⁴Piya, purintapisa aogama abagi kinaꞌwa aborawaimogana kakaga puntiye. Isu Pitaka sipisipine naninta imo, omintiye

¹⁵Pigoya, taeba naninta nagasuwakana, Isuba Saimoni Pita maya omintiye: Saimoni, Yoni ntagara, kaeba ma kinapa asugasima tabera kagupa nameno, untiye. Piya yogana Pitaba maya omintiye. Owe, Waꞌega, kaeba abene. Naeba kaekaba nabiye, untiye. Piya yogana Isu maya omintiye: Kaeba sipisipi awaro kinunte kabiwaitama naninta imo, untiye.

¹⁶Piya untana to kake maya omintiye: Saimoni, Yoni ntagara, kaeba kagupa nameno, untiye. Piya yogana Pita maya omintiye: Owe, Waꞌega, kaeba abintane. Naeba kaekaba nabiye untiye. Piya yogana Isu maya omintiye: Kaeba Sipisipi kinunteta kiya kabiyo untiye.

¹⁷Piya untana to kake kakagara omima maya untiye: Saimoni, Yoni ntagara, kaeba naekaba taga kabiyoma, abigantiye. Abigaogana Pita: Naekaba taga kabiyoma yome kamana abite, antawamaba ata pogana maya untiye: Waꞌega, kaeba aꞌyaꞌwaemaenaba abiwaentane. Naeba nagu kaeti atama paibutopa, pipa abintane, untiye. Piya yogana Isu maya omintiye: Kaeba sipisipi kinunteta kiya kabiyo, untiye.

¹⁸Piya untana to maya untiye: Tagaka ugamukuwa abo: Kaeba aoso yagara mintanapa, kaega iraꞌna kukapa arakae pu uꞌma, keꞌiba pitaꞌi mataꞌiba nasikenaga kabeginapa wama nasi nasi pene. Pigoya ainti karenarantanapa, kaya tara aebara pegana, to yagarama kaegapa maema amigatama, kampa wakena napikibempe kiꞌi kababute wakiye, untiye.

¹⁹Piya, Isu aeba Pita ainti purikena ki aborama omintiye. Purikenaenawampaba Koti nkage asagaꞌyuyenema, untiye. Kamana piya untana Pitakaba: Ampa naegarao, omintiye.

²⁰Piya yogana, Pitaba aeba aꞌwae puma Isu nkabugaome nkabagi yagara naeba akaꞌi wauwagana nagantiye. Piya, naeba paipa Pasoba naninta nanta ntagaba naꞌnopa Isu nkaibira aisage puma abigama maya untuwe: Waꞌega, kaepa ke kunapa pugatakiyema abiganto,

²¹pi ntagarana akaꞌi wauwagana Pitaba nagantana Isupa abigama maya untiye: Waꞌega, ma ntagaraba pipa aya pikiyema, abigantiye.

²²Abigaogana Isuba maya omintiye: Aeba uwa mintaka naeba aꞌwae puma kanakena abimogana wainteginapa, ae kaba nanaga yene. Kaega uwa kanama ampa naegarao, untiye.

²³Pigoya, kaꞌisa mono kinaꞌmiba igeba naekaba maya uma kamparaga puntawe: Ma nkabagi yagara aeba kampa purikiye, untawe. Pigoya, Isu aeba pipa naekaba: Kampa purikiye kamana kampa untine. Kampaye. Aeba maya kamanaꞌamana untine: Aeba uwa mintaka naeba aꞌwae puma kanakena abimogana wainteginapa, ae kaba nanaga yene, untine.

²⁴Piya, abagi yagara mana nae ma kamanapa abibebe pumagi, ma esapa kaentuwe. Pigoya, mono kinaꞌmiba naekaba kamanaꞌwapa taganema abune, untawe.

²⁵Pigoya, Isuba toma toma puntipa esaꞌnepinti kampa kaeyuwe. Pipa esaꞌamana waewaeyemisinta, naeba abopa wasanamiba kampa aisuma aꞌya pesine, Yoniba piyama kaentine.