Read Fore Aposoro 10 Bible Online

Aposoro 10 - Fore bible

Aposoro 10

¹Pigoya, Sisariya kumata ka yagara, agewapa Koniriyasi, mintantiye. Aeba Itari marisa irebu kinaꞌmi kiye yagara mintantiye.

²Pigoya, aewape aege mintanta kinape aꞌyaꞌma igeba Kotika karu pumagini, monotapa aogima mintantawe. Pigoya, Yuta kinapa monebe kotape imima aogima iyoꞌmaentana, asi nasiba Kotiti esotama mintantiye.

³Pigoya, Koniriyasi piya pogana, ka yagaba atamaita Kotitisa enisore kaꞌwaina ampa aboraogana, agegaꞌe: Koniriyasi, untiye.

⁴Piya yogana, aekuru puma: Waꞌega, nanagawe, untiye. Piya yogana, aeba maya untiye: Nunamube kaoꞌenagape Kotiti iyegina, abima aogi pugataye.

⁵Pika kaeba Yopa kumati wasana uwaitagini wama, ka yagara agewapa Saimoni, aoso agiba Pita, ae uma ababute kanaiyo, uwaitao.

⁶Aeba auka Saimoni, purumaka ari pemi ntagara, ae namapi wani nkawamori aꞌyo umintakiya, uma ababute kanaiyo uwaitao, uma omintiye.

⁷Enisorewamaba kamana piyama omite waogana, kayokaya yagara tarawa, irebu kinaꞌwampitisa mono waintaga yagara kana, suma, igegaꞌe uma,

⁸pi kamanapa uwaimiwaetama, Yopa kumati uwaitaogini wantawe. Waꞌegawama Pita amonta kiꞌi kaꞌena ayakintiye

⁹Pigoya, pi kina igeba wama keꞌi uma waimarategini, maroginiba to kake wama kuma agora uma irosakena puguna, kagi abebe pogana, Pitaba nama nkabobori ima nunamu asu untiye.

¹⁰Nunamu asu yogana, agaꞌena abogana, yogini naninta kaoꞌena potauguna, aesaroꞌena puma ayampuga kampa abogana, amonta mayaena agantiye:

¹¹Mantaba aꞌwaiyogana, kaꞌena kaiba taberakaꞌya atunkatapa igaꞌna ubuꞌatama atauguna, mabi tumintiye.

¹²Pigoya, kana antabaipintiba yaga kuya kabara uwoma toma toma kina atamagina pugasanaogana mintometa tumogana,

¹³maya kamana aborantiye: Pita, kaeba asima aeguma nao, yogana,

¹⁴Pita maya untiye: Waꞌega, naeba uwa aꞌyugu kinaꞌmi ntanintabe iꞌni ntanintabe kampa naontanawe, untiye.

¹⁵Piya yogana, to kake maya kamana aborantiye: Kotiba uma aogi piya, pi ntanintagaba kaeba uma ataba a-po, untiye.

¹⁶Pintana kakagara aboraogana, pabigo pi kaiba mantari aꞌwae puma intiye.

¹⁷Pigoya, Pitaba pi kasaꞌena agaomeka, uwoma nkagi napiyogini, pabigo kana Koniriyasi nkaokina igeba waꞌeri uma irosaꞌma, Saimoni ntamaka ibigata wama uma abatamagini, kabera uma asima mima,

¹⁸agegaꞌe uma aguyosaꞌma maya untawe: Saimoni, aoso agiwapa Pita, aeba ma ntamapi mintiyo, piya untawe.

¹⁹Pigoya, Pita pi kasaꞌena agaomeka napi napima mintogana, Awamusaꞌama maya omintiye: Kaeba abo. Kakaga kina kanama ampa kaguyosagawe.

²⁰Pika kaeba irosaꞌma timimagina, igege wakenagaba a-kuntaba po. Pi kinapa nae uwaitaogini kanawe, omintiye.

²¹Piya omogana abite, Pitaba kana kinaꞌmiti irosaꞌma tumima, maya untiye: Naguyosagapa naeba maye. Nanaga kanawe, yogini,

²²pi kina igeba maya omintawe: Irebu kinaꞌmi kiye yagara Koniriyasi uratagi kanaune. Aeba Kotika karu puma aogiyenabi miyegini, aꞌyaꞌma Yuta kinaꞌmiba aeka abeganaba, aogi pemi, aeti aota enisore kaꞌwaina aboramima, kaeka namankapi kanama ampa kamana ugamekana aboma, omegina, tagarubagi kanaune, untawe.

²³Piya yuguna, Pitaba namankapi ibabuwaitama, pi nkaseka aogima kabiwaitaogini waimarantawe. Waimarauguna, maroginiba, aeba Yopa kumatasa kaꞌisa Isu mpono abinta kinape, kaga wantawe. Pita Koniriyasi ntamapinti intiye

²⁴Pigoya, igeba keꞌiba ka ase uma waitategini, wama Sisariya kumata uma irosantawe. Pigoya, pita Koniriyasi aeba ae tunkape to kaꞌisa aokinape igegaꞌe uma, igawa pumagini mintuguni uma irosantawe.

²⁵Uma irosaꞌma, Pitaba namapinti iyogana, Koniriyasiba kanama agisabi ampa parokaema, aꞌmu potantiye.

²⁶Aibogana, Pitaba ababuma asitama maya omintiye: Asiyo. Naeba wasananawe, omintiye.

²⁷Piya kamana utaginisi, namapinti ima wasana aki puma mintuguna, asu igama maya uwaimintiye:

²⁸Tigeba Yuta kina tae agoba abintawe. Taeba to marisa kina tigege taoꞌena puma umisanagaba akutatantane. Pigoya, naeba tigekaba aꞌyugu kina iꞌni kinaneba kampa uritakuwe. Kotiba agowapa unamima nayakintika,

²⁹naeba kamanatipa kampa akayunta, uwa kamanati wasima kanauwe. Pika naeba ibaba tibigauwe: Tigeba nanaga nagegaꞌe yega kanauwema, ibigantiye.

³⁰Piyama ibigaogana, Koniriyasiba maya omintiye: Naeba kasaꞌena agategi mirite kanaogana, tarawa tarawaki yaga aꞌya piye. Pi kamana ugamukuwe. Naeba atamaita nunamu yuwagana, ka yagara kaiwapa waeꞌwae puwanta naeti aborama,

³¹maya unamitaye: Koniriyasi, Kotiba nunamugapa abima, wasana mone kotatasa iyoꞌmaeyampekaba abima aogi pugataye.

³²Pika kaeba Yopa kumati wasana uwaitagini, Saimoni, aoso agiba Pita, ababute kanaiyo. Aeba auka to Saimoni, purumaka ari pemi ntagara, ae namapi miyemi, kana namankapa wani nkawamori waintiye. Pi kana Pitaba mataꞌi kanama kaꞌisa kamana ugameno, yoga abituwe.

³³Pigoya, naeba pika wasana uwaitaogini, kaetiba watagana, kaeba kamanaꞌnepa abima, kanampeka nantawama aogi piye. Pigoya, mapa Waꞌegawama kamana ugaminti, pi yega abenemagi Koti nkaobi aki puma mintune, piya untiye. Pita Koniriyasi ntamapi mono uwaimintiye

³⁴Pigoya, Pitaba awamu aseyo puma maya uwaimintiye: Koti aeba wasana taukaba abeginaba iyegina tumeginaba kampa piye. Pipa abibebe puwe.

³⁵Piya, toma toma kinaꞌmitisa kaꞌisa kinaꞌmiba aeka karu puma aegaꞌma, ae aobi aogima miyiginaba, igegaꞌe ukiye.

³⁶Kotiba Isureyo kina taeti kamana auꞌwapa maema aboranti, pi nkawaga kamana tigeba abewe. Aeba Isu Karaisiti, aꞌyaꞌwaemaenama Nkwaꞌega otaogana, paru aogi kamanapa uramiwaentiye.

³⁷Pigoya, Yuta mari aboranti, pi nkawaga kamanapa mayama abewe: Yoni aeba wasana mono waninkama kamana uwaimogini abuguna, Isu, Nasareti kumatasa, ae Koti Aota Awamusape esegiyenawape amogana, Karariya mari mono yugawapa agobintiye. Piya, aꞌyaꞌma maba ainkima nasi nasi puma wasana iyoꞌmaentiye. Aibumagina, aꞌyaꞌma ke kinaꞌma intabaipinti minta kinapa aogi puwaitantiye. Kotiba aoꞌmaema, wage aetaogana pi ntugaba puntiye.

³⁸

³⁹Pigoya, Yuta kina tae maribe Yerusaremi kumatibe unti puntintanaba, pipa taeba agama abiwaentune. Pigoya, ainti maripora aeguyuguna purintiye.

⁴⁰Puꞌma mintogana, kakaga yaga aꞌya pogana, Koti abage puntiye. Abage puma asitaogana, aborate kakate puntiye.

⁴¹Pigoya, aꞌyaꞌma kinaꞌmitiwanane. Wasana aogi kamanaꞌwa ukena kina Koti pai ibabumaranti, taetimana aborantiye. Pi purintapisa asiyoga, aege naninta kaga nama, kamanapa uma abintompene.

⁴²Pigoya, Kotiba aepa aoso kina purinta kina tae tabe kiya yagara asitantiye. Pi nkawaga kamana aꞌyaꞌma kina uma aborama uwaimiyoma, uratantiye.

⁴³Pigoya, aeka napima imatiti pikibe kina age awaga kamanaꞌwaka uma aguntaenawaipa Koti asuꞌa puwaigaikiye. Pipa aꞌyaꞌma poropete kina ige uma aborantawe, Pita piya untiye. To marisa kinaꞌmiti Aota Awamusa tumintiye

⁴⁴Pigoya, Pita piya yogini, aꞌyaꞌma abima mintume kina igeti Aota Awamusa tumintiye.

⁴⁵Pigoya, Koti to marisa kinaꞌmiti Aota Awamusapa tiꞌma imogini, kaꞌisa Yuta kina, Isu nkaegaranta Pita abagi punta kina, igeba agate pami puntawe.

⁴⁶Piya, to marisa kinaꞌmiti Awamusa tumogini, to kamana to kamana umagini Koti uma tabe potauguni, abima pami puntawe. Piya puguna, Pita maya uwaimintiye:

⁴⁷Taeti Aota Awamusa tuminti, pabiyama ma kinaꞌmiti tumemika, mono wanipa kampa akunkitakune, untiye.

⁴⁸Piya uma yogini, aoꞌmiba ibabuwaitama Isu Karaisiti nkagera mono wani paiꞌitantawe. Piya puguni, igeba Pita arakuruguni, kaꞌisa yagaba igege mintantiye.