Read Fore Aposoro 15 Bible Online

Aposoro 15 - Fore bible

Aposoro 15

¹Pigoya, Yuta marisa kina kaꞌisa Antiyoki kumati tumima, Isu mpono abinta kina maya uwaimintawe: Tigeba Mosese kamana uma tipa kampa kasaiginaba, Waꞌegawamaba kanara kampa tibabikiye, untawe.

²Piya yugunisi, Poroge Panabasige ka ibiꞌma, tabera maka yusuguni, pi kumatasa mono kinaꞌmi maya untawe: Porobe Panabasibe to kaꞌisa kina, tigeba aposorobe monota kabiyume kinape Yerusaremi kumati minta, igeti pi kamana maete wakibewe, piya uma uwaitantawe.

³Pi kumatasa monota aiꞌaru pume kinaꞌmi piya uma uwaitauguni wantini, wama Pinisiya, Sameriya ma againtiniba, pitaꞌi Isu mpono abinta kinapa maya uwaimita wantawe: To marisa uwoma kinaꞌmi mono abewe, uwaimuguni, abima tabera iꞌmuntanaba igetiba aborantiye.

⁴Aibogini, wama Yerusaremi kumata uma irosauguni, monota aiꞌaru pume kinape aposorobe monota kabiyume kinape, igepa ibabuma aogi puwaitauguni, igeba Waꞌega esegi puma iyoꞌmaeyogini, to marisa kinaꞌmiti mono yuga puguna auꞌwa aboranti, pi nkawaga kamana uwaimintawe.

⁵Pi kamana uma aꞌya puguni, kaꞌisa Isu nkaegaranta Parasi kina maya untawe: To marisa kinaꞌmiba mono abikena puntiniba, itapa aꞌaitama, Mosese kamana agoba wasiwaeyiginaba kanarasakiye, untawe.

⁶Piya yuguni aposorobe monota kabiyume kinape pi kamana umagina, aogi pukena to aki puntawe.

⁷Aki pumagini, uwoma kamana yuguna, Pita asima maya uwaimintiye: Naoꞌmitaba, to marisa kinaꞌmiti nasima aogi kamana uwaimikenaenaba, pipa Kotiba tige aruyenabisa nae naba punatantegi, pai agobima uwaimuwagini abima Isu nkaegarantawe. Pipa ago abintawe.

⁸Pigoya, Koti aeba taguꞌama agabebe puma Yuta kina tae Aota Awamusa taminti, pabiyama to marisa kina imima agoba tayakiye.

⁹Igeba aeka napima imatiti piginaba, iguꞌamaba waeꞌwae pekana, tae puratantisa puma, pabi nkawameta igepa puwaitantiye.

¹⁰Pika tigeba nanaga Kotipa agasima, tigeba kuntuyenaba asaema, to marisa Isu nkaegaranta kinaꞌmi ibotapa itakenagaba yewe. Pi kuntuyenaba taebe tayabamabe kampa abaebune. Pipa kampaye.

¹¹Taeba mayama abune: Aogi pikenaenaba pipa Yuta kina taebe, to marisa kinape, kaga Waꞌega Isu tauꞌikena yagara, ae awagaenawaka uma aogi pune, Pita piya untiye.

¹²Pitaba kamana piya uwaimogini, aꞌyaꞌma aki punta kina uwa pasema mintantawe. Mintuguna, Porobe Panabasibe isigeba Koti to marisa kinaꞌmiti awameꞌenabe kasaꞌenabe isiyakoginisi puntame, pi kamana uwaimintase.

¹³Pigoya, uwaimima aꞌya atausuguna, Yemisiba kamana maya uwaimintiye: Naoꞌmitaba, kamana yekiri abiyo:

¹⁴Koti aeba to marisa ige aruyenabisa wasana ibabekini, aewa mpono abikena kinaꞌena pikena ki to mari aboranti, pi kamana Saimoni yegi abune.

¹⁵Pigoya, ae kamanaꞌamaba kamana ago kamanapi uma paibuntiye. Poropete kaꞌwaina Waꞌegawama yome kamana mayama kaentiye:

¹⁶Naeba aꞌwae puma, Tebiti ae nama abararami, pi aoga aogasosima aogi pukuwe, iye.

¹⁷Piya pekini, wasana igeba Waꞌega naeka kegaꞌe uma naguyosaꞌmagini nabatakibewe, iye.Pigoya, to marisa kina igeba nage nawaga kamana ukena kinaꞌnentana pikibewe, iye.

¹⁸Waꞌega naeba kamana piyama uma aboraurite ima mintantoꞌnana, pipa yuwe, poropete yagara piyama kaentiyema, Yemisi untiye.

¹⁹Pigoya, Yemisiba poropete kamana napima mayama amato puma uwaimintiye: Taeba to marisa kina Kotiti aꞌwae puma igu ame kinaꞌmipa, kuntuyenaba kampa imenema yuwe.

²⁰Igeka kampari kotintana a-mpaemagini, ankagaba ankagabaenaba aꞌa-o umagini, kobama kampa ima maema puꞌwami kinape korape aꞌa-o umagini, a-ntaiyema esegi puma, pi kamanaꞌanto esa kaema imukunema, uwaimintana,

²¹to ka maya untiye: Mosese kamana pi iyabamagibe igaꞌnugibe paitakaꞌya agobima, aꞌyaꞌma kumaka kumaka aisurite kanama mintantane. Piya, ibaba pabiyama aꞌyaꞌma sabatirapa mono namapipa aisuma, aꞌyaꞌma kinaꞌmiba abewe. Pika pi aꞌyugu pusanaga taguꞌamaba tara taraba a-peno, Yemisi piya untiye. To marisa kinaꞌmi nkisa kaema atauguna wantiye

²²Pigoya, uwaimogini aposorobe monota kabiyume kinape aꞌyaꞌma pi monota aiꞌaru pume kinape, abuguna aogi puma asoya pogini, igetisa tara yagara uwaisitaugunisi, Poroke Panabasike isibabuntase. Ka yagarama, agewapa Yutasi, to ka agiwapa Pasabasiwa, Sairasiwa sumaginisi, monota paitakena yagara tara isibagi puma, kaga Antiyoki kumati waiyema, uwaitantawe.

²³Piya puntini, esa ka maya uma kaema imuguni maete wantawe: Aposorobe monota kabiyompe kinape, taeba taokina to marisa Antiyoki kumatasabe, Siriya marasabe, Sirisiya mari minta kinape, tige taꞌmu puritama, ma nkisapa ataritaune.

²⁴Taeba kampa abintokini, mataꞌisa kaꞌisa kinaꞌmi tigeti ima kamana urimima, tiguꞌama aꞌyugu purigasuguri, tigeti atatara kamana aborantiye.

²⁵Pigoya, taeba pi abite aki puma, taetisa tara uwaisitaokinisi, tabugai ntagara tara, Panabasike Poroke, isibagi puma iyewe.

²⁶Pi ntagara tara, Waꞌega Isu Karaisiti aeka uma isiꞌwaisipa kaintase.

²⁷Pigoya, pi wasana isibabumaraumpe, Yutasige Sairasige isigeba ima isiwamupisa kamana urimisigiri, abiyo.

²⁸Aota Awamusa taeti waintegi, taeba maya kamana yune: Taeba to kaꞌisa kuntuyenaba kampa tige tikabapipa atakune. Pintanamana piyo:

²⁹Tigeba kampari kotintana amikenaenabe, yaga korape, kobama kampa imu maema puꞌwami kinape, pi ntanintaga a-ntaiyoma ankagaba ankagabaenaba aꞌa-o uma kaitegiri, aogima miyiyo. Pintana tikabitakibepa, aogima mikibewema, esapa kaema imintawe.

³⁰Pigoya, pi nkisa isimima isigarubauguni, igeba pi nkisa maete tumima, Antiyoki kumata uma irosaꞌma, monota aiꞌaru pume kina igegaꞌe uma aki puwaitama, kana esapa imintawe.

³¹Imuguni aisuma abite, paru kamana kaema imume, pika intawamaba asoya puntiye.

³²Pigoya, Yutasige Sairasige isigeba poropete puntase. Piya pumaginisi, uwoma aogi kamana Isu mpono abinta kinapa uwaimima esegi puwaitantase.

³³Pigoya, igege miyusume kanaba aꞌya pogini, pi isiyokinaꞌmiba intawama paruyenabisa isitaugunisi, uwaisitaugunisi, wausume kina igeti aꞌwae puma kanantase.

³⁴(Sairasiba aewa aumawampa aegaꞌma, Antiyoki kumata umintantiye.)

³⁵Aibusugunisi, Poroge Panabasige isigeba Antiyoki kumata to kake amato puma mima, Isu nkaegaranta ige iyoꞌmaema, mono uma Waꞌegawama kamana wasana uwaimima iyakintase. Poroge Panabasige isigeba pako puntase

³⁶Pigoya, aintiba Poroba Panabasi maya omintiye: Tasigeba mono kayokayaꞌenara wama yuwagini, aꞌyaꞌma kumatisa tasiyokina aboranta, igeba ayamabaya miyewe. Pika wama abukuse, untiye.

³⁷Piya ute, Panabasiba Yoni Maka aege kaga wakenaga untiye.

³⁸Pigoya, Maka aeba paipa isigege wama Pampiriya mari kasa yugari uma irosaꞌma, isitate aꞌwae puma kanantika, Poro aeba piya yagaraga aboganaba kampa aogi puntiye.

³⁹Piya pumaginisi, isimawamaba tabera tara tara puma pako puntase. Pako puma, Panabasiba Maka ababoginisi wama wanipisa karebi ima, Saiparasi mari wantase.

⁴⁰Pigoya, Poro aeba aoꞌmaeyanta kinaꞌwapa Sairasi ababogini, pi Isu mpono abinta kinaꞌmiba: Waisiginaba, Waꞌegawama kabirisitakiye, uma uwaisitaugunisi wantase.

⁴¹Wamaginisi, Siriya mabe Sirisiya mabe againtinisiba, monota aiꞌaru pume kina iyoꞌmaema esegi puwaitata wantase.