Read Fore Aposoro 16 Bible Online

Aposoro 16 - Fore bible

Aposoro 16

¹Pigoya, Poroba Sairasi ababute wama, Tebi kumati wamaginisi, Arisitera kumata uma irosantase. Pigoya, Arisitera kuma pitapa Isuti atokaenta yagara ka uma abatantase. Agewapa Timoti, aeba anowampaba Isu nkaegaranta Yuta wae, piya abawampa Kariki yagarawe.

²Piya, Arisiteraꞌisa kinape, Aikoniyamu kumatisa kinape, pi Isu nkaegaranta kina igeba Timoti ae agoba aseyo puma, Poro omintawe.

³Omuguna, Poro aeba aekaba abogana, aege kaga wanema, omintiye. Pigoya, pi mpariba Yuta kina mirite wanta, igeba kana yagarama nkabawampaba Kariki yagarakini abiwaentaka, pika Poroba igeka napima, kana yagarama nkau kasama, Waꞌegawamatisa araꞌenaba potantiye.

⁴Pigoya, kumaka kumaka nasi nasi puma, aposorobe monota kabiyume kinaꞌmibe, Yerusaremi kumata tonkiya kamana uma atantapa, monota aiꞌaru pume kina wasiyoma, uwaimite wantase.

⁵Piyama yoga puguna, monota aiꞌaru pume kinaꞌmi imatitiꞌenaba aborama esegi pigini, aꞌyaꞌma yagaba to kaꞌisa kina abima igege atokaentawe. Poro aeba Masetoniya yagara agantiye

⁶Pigoya, Pirisiya mabe Karesiya mabe agaite, Esiya manto abeti wama mono kamana ukena yuguna, Aota Awamusaꞌama pi kiꞌi a-nkwaiyoma, akunkaitantiye.

⁷Aibogini, wama Misiya ma awamori uma irosaꞌma, ka aukaꞌi aigigi paꞌma, Pitiniya mari wakena yuguna, Isu Nkawamusaꞌamaba pabiyama kampa owe uwaitantiye.

⁸Piya pogini, Misiya maba agaite wama, kayo wani nkawamori Torowasi kumata uma irosantawe.

⁹Pitaꞌi uma irosaꞌma, Poro aseka amonta mayaena agantiye: Masetoniya yagara kaꞌwaina aeti aborama mima, agisuma maya omintiye: Kaeba Masetoniya mari ima taoꞌmaeyo, omintiye.

¹⁰Pigoya, Poro pintana agaogapa, aege aokinaꞌmitabe maya untune: Koti aeba: Masetoniya mari wama aogi mono kamana uwaimiyoma uramiye, untune. Piya ute, pabigo wakena aseyo puntune. Tete kai pome wae Aritiya Isu kamana aegarantiye

¹¹Pigoya, aseyo puma wanipisa karebi ima, Torowasi kumapa atate agasi agasima wama, Samotaresi uma irosantune. Pigoya marogapa, pitasa wama Niyaporisi kumata uma irosantune.

¹²Pigoya, pitasa wanipisa karebisa tumima, wama Piripai kumata uma irosantune. Pipa Masetoniya mari tabe kuma ka, Aroma kinaꞌmi kuma agona puma mintantawe. Pi kumata kaꞌisa yagaba mintuwakana,

¹³sabati aboraoga maya umagi, pi kuma nkagora waniti tumintune: Kuma nkawamori waniti tumima, Yuta kinaꞌmi nunamu ye kuma ka waintika, tumpa agakune, untune. Piya ute, tumima waya aki puma mintugu, tumpa ibatama, maraꞌmima kamana uwaimintune.

¹⁴Pigoya, ige aruyenabisa to marisa wae kaꞌwaina, aeba Kotitisa aogi kamana abima mintantiye. Agewapa Aritiya, ae yuga aogi tete kai pome wae, Tiyatira kumatasa, pi kana wae Waꞌegawama agu aumawamaba aseyo pogana, Poro kamana yoganaba aogima abintiye.

¹⁵Pigoya, aewape aokinape mono wani pasintini, maya uramintiye: Tigeba nagantaga Waꞌega ae tuntana poka, nae namapi kanama miyiyo, ute, tonkiya poga, awamu wasima intune. Poroke Sairasike igaꞌna namapi isiba puwaisitantawe

¹⁶Pigoya, maroga nunamu ukena kumati tumuwakana, kayokaya araga kaꞌwaina tabatantiye. Kana araga aeba kegina wantaga mima, kakantaꞌenaba uma abora putamagina, aeba igetisa ikantana uwoma maemagina, kabitaome kinaꞌmipa imibutaye.

¹⁷Pi ae tabatama, Porope taepe taegaꞌmagina, kegaꞌe maya untiye: Ma kinapa Koti ima minti tabe yagara, ae kayokaya kina mima, tauꞌikena kiꞌamaka urimima tiyakiyewe, untiye.

¹⁸Piya kegaꞌe asi nasima uyabaꞌmiyogana, Poro aeba pika aekita puma, kana kegina aꞌwae puma maya omintiye: Naeba Isu Karaisiti ae awamuta ugamekana, aragawaeꞌma nkantabisa irosaꞌma wao, yogana, pabigo irosaꞌma wagaintiye.

¹⁹Aibogini, kana aragawaeꞌma kabitaome kinaꞌmiba mone kuta aborama, imomentana pabigo kampa to kake aboraogini agate, Poroke Sairasike ka isibiꞌma, isibabute kuma akanti kiya kinaꞌmi nkauꞌi isibabute wama,

²⁰kiya yagaramiti uma kamana uwaisitama, maya untawe: Isigeba Yuta yagara taramisi, ma kumateti kanama ataena puratase.

²¹Piya pumaginisi, awameꞌenaba kasaꞌena pese. Aroma kinaꞌmitaba aꞌyugu pompentana, aꞌyugu maema miyompentana, piya ampa aborase, untawe.

²²Pigoya, uwoma kina mintume kinaꞌmiba igobipa tabera puwaisitama isiyegukena puguna, kiya yagara aeba kaiwaisipa atisa puwaisigasima, yogini eru kasutasa isiyeguntawe.

²³Eru kasutasa tabera isiyegumugasima, igaꞌna namapi isibabuwaisitama, kiya yagara aepa: Kabeba esegima kigasima pasema kabiwaisitanema, omintawe.

²⁴Omuguna, igaꞌna namapa abakapisa marupi isitama, isigisaba ya atuta kirokae isitama, isitaoginisi waintase.

²⁵Pigoya, aseka nkabubu Poroge Sairasige isigeba ini nunamu uma Koti isiꞌmu potantase. Piya pusuguni, igaꞌna namapisa kaꞌisa kinaꞌmiba isiwamusa aga abintawe.

²⁶Piya pusuguna, pabigo imimapa tabera pogana, kana igaꞌna namankamaba kurukuru pogana, aꞌyaꞌma kabeba aꞌwaiwaogana, aꞌyaꞌma kinaꞌmi nkigisa iyapisa igaꞌnaba iyoba wantiye.

²⁷Piya pogana, igaꞌna nama kiye yagara aeba awaibintisa pami puma asima, kabeba aꞌwaiwaentogana agama: Igaꞌna kina ago paiꞌma wawaegasawe, ute, yoginka abamu kantabintisa aꞌyubuma, aewa auꞌwa aerisakena puntiye.

²⁸Piya pikena pogana, Poro tabera maya kegaꞌe uma untiye: Kaukapa a-nkaguya aiyo. Taeba aꞌyaꞌma uwa kanara mintune, untiye.

²⁹Piya yuguna, kana kiya yagara aeba aoꞌmika eka yogini, igiꞌma amuguna, nama nkantabaipinti karuꞌena wama aekuru puma, tabaraba purite ima, Poroke Sairasike isigisabi asu parokaentiye.

³⁰Aibuntana, nama nkantabaipintisa isibabute tumima isibigama maya untiye: Tabe yagara tarane, nauꞌikenaga ayama aogi puma misuwema, isibigaoginisi,

³¹isigeba maya omintase: Waꞌega Isuka kamatiti puma aegarakibempepa aogi pugatakini, kaoꞌmiba pabiyamagini aogima mpikibewe, untase.

³²Piya ute, aepe aokinape Waꞌegawama mpono kamana uwaimintase.

³³Uwaimusuguna, kana kiya yagara aeba pabi aseka isibabuma, eru kasutasa isiyeguntaꞌenaba wani paiꞌma aeyoba isigasimagina, yoginisi aeꞌwape aokinape mono wani paiꞌitantase.

³⁴Piya pusuguna, aeꞌwa ntamapi isibabuwaisitama yogini, kaoꞌena puma isimintawe. Pigoya aewape aokinaꞌmiba Koti ae tuntana pumeka, intawamaba aogi puntiye. Poroge Sairasige irosaꞌwantase

³⁵Pigoya maroginiba, kamana umarisakena kinaꞌmi igeba irebu kinapa kaꞌisa uwaitauguni, wama igaꞌna namatasa kiye yagara maya omintawe: Kaeba tara yagarara uwaisitaginisi waiso, yuguna,

³⁶pi kana kiya yagarama Poro maya omintiye: Naeka uwaisitaginisi waisoma, kiya yagarama kamana atagina kanaya, pika tisigeba kanara wama umiyiso, yogana,

³⁷Poro irebu kinapa maya uwaimintiye: Igeba agoresipa kampa abinta wasana aruyenabi tasiyeguma, tasu airisa purasitama, igaꞌna namapi tasibaburasitawe. Tasigeba Aroma yagara tara mintuse. Pabiyama tasigepa kampa kotiyena purasitanta, tasiyeguma uwa ataena purasitawe. Pigoya mapa nanaga waisomaba, kakamaba urasitawe. Pipa kampaye. Igewai kanama ampa tasibabigiraba wakuse, untiye.

³⁸Poro kamana piya yogana, irebu kinaꞌmi aꞌwae puma wama, kiya yagarape to tabe kinape uwaimuguni igeba kana yagara tara isigeba Aroma aruyenabi aborantame, pi kamana abite iyekuru puntawe.

³⁹Iyekuru pumagini, kana yagara taramisiti kanama intara kamana uwaisitama, igaꞌna namapisa isibabute tumima, kumaꞌwaipa atate waisema, uwaisimintawe.

⁴⁰Piya pugunisi, isigeba igaꞌna namapisa irosaꞌma tumima, Aritiya ntamati wama, Isu mpono abume kinapa igama iꞌnana kamana uwaimite wantase.