Read Fore Aposoro 23 Bible Online

Aposoro 23 - Fore bible

Aposoro 23

¹Pigoya, Poro aeba Yuta kanisore kina igabebe puma kamana maya uwaimintiye: Naoꞌmitaba, naeba Koti nkaobi kayokayaꞌenaba kamparagaenaba kampa punta, purite kanama mintantoka puma miyuwe, untiye.

²Piya yogana, monota paitanta kiye yagara Ananayasi aeba wasana Poro agora mintume kina ige: Awamu airisaiyo, uwaimintiye.

³Piya uwaimogana Poro maya omintiye: Arigautapa aogi pegina, kagukauꞌamaba ago abararaye. Kotiba kaepa kaegukiye. Kaeba nana piyema ago kamanaꞌama maema parutu pikena yuga puntana, pi ago kamana akayuma naeguyiyema uwaimenema, omintiye.

⁴Piyama omogini, wasana agora mintume kinaꞌmi maya untawe: Ayama kaeba Koti mponota paitanta kiye yagarawaka uma ata potane, untawe.

⁵Piya yuguna Poroba maya untiye: Naoꞌmitaba, naeba paitanta kiye yagaraba aepa kampa aogima agabebe puntuwe. Mono isaꞌama maya iye: Kaeba kiya kinakapa a-nkuma ataba potao, iye. Naeba pi kamanapa abintuwe, untiye.

⁶Pigoya, kiya kina kaꞌisa Sarusi kina mintumepe to kaꞌisa Parasi kina mintumepe, pipa Poroba napimagina, pi akiyenabi kamanapa tabe puma maya uwaimintiye: Naoꞌmitaba, naeba Parasi yagaranawe. Piya, Parasi kinaꞌmi tupisa aborantuwe. Purintapisa asikenaena wainti, pi kamana wasiyoka kaꞌisa kinaꞌmiba kamana unatawe, untiye.

⁷Kamana piya yogini, Parasi kinaꞌmibe Sarusi kinaꞌmibe igeba akakayoꞌna puguna, kiya kinaꞌmitiba atataraꞌena aborantiye.

⁸Piya, Sarusi kina igeba purintapisa asikenabe, enisore kinape, amani kinape, pika abugunaba tagantanaba kampa puntiye. Parasi kinaꞌmiba aꞌyaꞌma pika taga untawe.

⁹Pigoya, pika akiyenawaipipa tabe kamana maka untawe. Piya untini, Parasi kinaꞌmi ige iyoꞌmaeyume mono tisa kina kaꞌisa asima esegi kamana uma maya untawe: Taeba ma ntagarama ataenaga abompepa kampaye. Enisorepera amani kinaꞌma kamana omintakapa ayawe kamana otakune, untawe.

¹⁰Pigoya tabera maka yuguna, kana tabe kiye yagara aeba Poro uma paibu puma akisebasanaga aekuru pumagina, yogini irebu kinaꞌmi kanama, wasana abakapintisa Poro ampa ayakana uma paibute namankaipinti ababute intawe.

¹¹Pigoya, pabi aseka Waꞌegawama Poro agora aboramima maya omintiye: Kaeba mata Yerusaremi kumata kamanaꞌne uma aborampesa puma, pabiyama Aroma kumati uma aborao. Pika napima esegima miyoma, omintiye. Yuta kinaꞌmi Poro aeguma kaikena kamana untawe

¹²Pigoya marogini, kaꞌisa Yuta kinaꞌmi aki puma kamana uma esegi pumagini maya untawe: Taeba Poro aeguma kaikune. Kampa aeguntapa nanintabe wanipe kampa nakune, uma esegi puntawe.

¹³Wasanaba 40-wa kinaꞌmi ige atokaemagini piya untawe.

¹⁴Pigoya, pi kinaꞌmi tabe mono kiye kinaꞌmitibe monota kabiyume kinaꞌmitibe wama umagini aborawaimima maya uwaimintawe: Taeba nakenaba aꞌa-o uma mima, Poro aegugaite pintanaba nakunema uma esegi pune.

¹⁵Pika tigebe to kaꞌisa kanisore kinape, Aroma kiye yagaramati kamana mayama ataigina wano: Kaeba Poro tae akiyenabi otagana kanaka, kamanaꞌwapa to kake uma aogi penoma, omiyo. Piya, kamanati abima piya pekapa taeba Poropa keꞌi aegukune, piya untawe.

¹⁶Pigoya, Poro nkamagantawampa kana aegukena kamanapa abitegina, irebu kinaꞌmi ntamapi ima Poropa uma omintiye.

¹⁷Omogana, Poroba irebu kinaꞌmi kiye yagara ka kegaꞌe uma maya omintiye: Kaeba ma ntagaranto ababute Aroma kiye yagaramati wagana kamana ka omeno, untiye.

¹⁸Piya yogana, pi ntagara aeba kana yagaranto ababute tabe kiye yagaramati wama maya omintiye: Igaꞌna namapisa yagara Poro, aeba nagegaꞌe uma unamegi: Ma ntagaranto kamana ugamenema aba pogara kanause, untiye.

¹⁹Piya uma omogana, tabe kiye yagara aeba kana yagaranto ayakana urite abiri metamagina: Aya kamana unamikibenema, abigantiye.

²⁰Piyama abigaogana, kana yagarantoma maya omintiye: Yuta kinaꞌmiba aiba kaeti kamana atagatakena uma abewe. Igeba kaeka Poro kanisore akiyenawaipi ababute wama agowa maema aboraoma, kumpari ugamikibewe.

²¹Ugamiginapa, kamanaꞌwaipa a-nkabo. Wasanaba 40-wa kinaꞌmi Poro aeguma kaikenaga umagini, keꞌi minaena puma mintawe. Igeba nanintabe wanipe aꞌa-o uma mimagini, Poro aegugaite pintanaba nakenaga uma esegi pewe. Piya puntini ago aseyo puma, kae kamanaka agawa puma mintawe, omintiye.

²²Piyama omogana, tabe kiye yagara maya uma otantiye: Kaeba kamana aborama unamempepa, pipa wasana kapa a-nkuwaimo, piya omimagina agarubantiye. Igeba Poro ababute Sisariya kumati wantawe

²³Pigoya, Aroma kiye yagara aeba irebu kinaꞌmi kiye yagara tara isigegaꞌe uma maya uwaisimintiye: Tisigeba yisigini, irebu kina igisarasa wakena kinapa 200-wa, osi akabata wakena kinapa 70-wa, wanta ire urikena kinapa 200-wa sumagini, piꞌnagiba aseyo puma, aseka naeni kirokira Sisariya kumati waiyo.

²⁴Poronta osi yaga, mara mikenaena potaiyo. Piya potamagiri, pasema kabimagiri kiya yagara Pirikisi aeti ababute waiyo, untiye.

²⁵Piya umagina, pi kiya yagarama nkisapa ka maya uma kaentiye:

²⁶Naeba Korotiyasi Arisiyasinawe. Kaeba pi mparisa kiya yagarane Pirikisi, kaeꞌena esa mampa kaeyuwe.

²⁷Piya, Yuta kina igeba wasana ma ka arakuꞌma aegukena pugu: Aeba taga Aroma yagarawema, piyama abite, naebe irebu kinape wama iyapisa iyobatompene.

²⁸Pigoya, kamana otanta pi ago abikenaga, Yuta kanisore kinaꞌmi nkakiyenabi ababute watone.

²⁹Ababute wamagi ago kamanaꞌwaitaka otaugu mayama abitone: Pi kaꞌena mono igeꞌena maema aꞌyugu puwaitayema, otatawe. Piya, kampa ataena pogana igaꞌna namapi mikena ikape aegukena ikape kampa waintiye.

³⁰Pigoya, igeba minaena puma Poro aegukena yega abite, kaeti otaogana iye. Piya, kamana ota kina igepa pabiyama uwaitakini kaeti ima kamanaꞌwaipa ugamikibewe, piyama kaema omintiye.

³¹Pigoya, irebu kina igeba kiyawaimpa nkawamu wasimagini, Poropa aseka ababute wama Antipatirisi kumata uma irosantawe.

³²Pigoya marogini, irebu kina igeba namankaiti aꞌwae puma kanauguni, osi akabata mima waume kina ibiwai Poropa ababute wantawe.

³³Wama Sisariya kumata uma irosaꞌmagini, pi kumata kiya yagaraba esapa memimagini, Poropa ae aora ababute ampa asitantawe.

³⁴Pigoya, kiya yagarama esa aisuntana, Poro ma agowaka abigaogana: Naeba Sirisiya marisawe, untiye.

³⁵Piya yogana abite maya omintiye: Kamana ugata kina kanama ampa irosaigi, kae kamanapa ukune, untiye. Piya uma irebu kina uwaimogini, tabe yagara Eroti kimaraome aki pukena namapi ababute mesutamagini kabintawe.