Read Fore 1 Korinti 10 Bible Online

1 Korinti 10 - Fore bible

1 Korinti 10

¹Naoꞌmitaba, aꞌyugu pintanamaka kampa napisanaga ma kamanapa urimukuwa, abiyo: Pai Koti nkibinankama tayabamagipa aꞌyaꞌma airarikaewaitaogini wama tabe wani taꞌentawe.

²Piya puguna, Moseseti atokaekenaga ibinatasabe wani taꞌentantanarasabe Koti aꞌyaꞌma paitawaitantiye.

³Piya, Awamusaꞌamaba naninta aborawaimogini, igeba kaga aꞌyaꞌma nata wantawe.

⁴Piya, Awamusaꞌama wani aborawaimoginiba, pike kaga nata wantawe. Eya, Awamusaꞌama imintemi ntabapisa wanipa maema nantawe. We, pi ntabapa Karaisitiwe.

⁵Pigoya, pi kinaꞌmiba kamparaga puguna, Kotiba uwoma pi kinaꞌmikaba kampa aꞌmu puwaitama, kaꞌme mpari iyeguyogini puꞌwantawe.

⁶Pigoya, ataena ige puntasa tae pusanaga, Koti ige puwaitantintanaba purayakintiye.

⁷Piya, igetisa kaꞌisamiba ama koti kayokaya puntasa puma, tigeba a-piyo. Pika mono isapipa mayama kaentine: Wasana igeba maraꞌmima kaoꞌena puma nantini, asima yagawamata waꞌena puntawema, kaentiye.

⁸Piya, igetisa kaꞌisamiba kumiyena puntasa puma, a-piyo. Igeba piya puntini, ka yaga wasana 23,000 pikaba purintawe.

⁹Piya, igetisa kaꞌisamiba Waꞌegawama nkamiyo puntasa puma, a-piyo. Igeba piya puguna, maꞌama ibanaogini puꞌwaewantawe.

¹⁰Piya, igetisa kaꞌisamiba Kotika imoꞌena puntasa puma, a-piyo. Igeba piya puguna, wasana iyegukena enisore otaogana iyeguyogini puꞌwaewantawe.

¹¹Pigoya, pintana igeti aborantemintanaba wasanamite aꞌyugu ige puntasa pusanaga, Koti purayakintiye. Piya, ibasa yaga aꞌya wakenabipa, tae miyompeꞌnagiteka otaogini pi kamanapa mono isapi kaemarantane.

¹²Pintanaraka: Naene esegima asima miyuwema napiyemiꞌnaba, wareꞌnasanaga kabima miyeno.

¹³Tigeti timiyoꞌena aborata kanantemipa, pipa wasanami nkesegiyenawaitaka kaꞌmasa puma aboraye. Pigoya, Koti aeba tagantana puma, kabiyekana timiyoꞌenamaba esegiyenaripa kampa aparikiye. Eya, Koti aeba tiyoꞌmaema aguntaenamaba kampa maema tipasikena kiꞌi kaga aborarimekiri, pi kiꞌi aegaꞌma asima esegima miyiyo. Waꞌegawamape kewamape kaga isiyegarakenaenaba kampa waintiye

¹⁴Nabugai kinaꞌnempitaba, nae yo kamana abima, ama koti tikabitama wagasiyo.

¹⁵Piya, tigeba aogi napiyenayaga kina mintawe. Piya pegi, ma kamana yopa, aogima pako puma abiyo:

¹⁶Piya, waini kankabebisa wanika Kotiti taꞌmu potama naompepa, Karaisiti kora paitaratakenagaba kampa napiyewa, a. Pareti apako puma naompepa, Karaisiti nkaukeba kabo puratakenagaba kampa napiyewa, a.

¹⁷We, paretiba kaꞌantowe. Piya, uwaena kinaꞌmitaba taeba ka pareti namagi, ka auꞌena puma miyune.

¹⁸Pigoya, Isureyo kinaꞌmi pentanaga napiyiyo: Yaga kaema Kotiti agunta pasaꞌatapa, pi ntagawama nkau na kinaꞌmiba aratara kaeya kinaꞌmiti airokaema kaga Kotiti iꞌmu pewe. Pipa kampa napiyewa, a.

¹⁹Piya yo kamanakaba ayama napiyewe: Ama koti aeba auꞌwantagana, a. Ama kotiti kaema agunta pasaꞌatapa tiyoꞌmaekiya, a. Pipa kampaye.

²⁰Piya, abeꞌisa kinaꞌmiba kaema agunta pasaꞌatapa, Kotitiba kampaye. Ke kinaꞌmiti agunta pasaꞌatawe. We, tige ke kinaꞌmiti uma atokaesanaga kampa nabegi, yuwe.

²¹Piya, Waꞌegawama kankabebisa nate, ke kinaꞌmi kankabebisa nate pukenaenaba, pipa kanarapa kampa pukiye. Piya, Waꞌegawamati atokaema ara nanintaba nate, ke kinaꞌmiti atokaema nate pukenaenaba, pipa kampa kanara pukiye. Pipa kampaye.

²²We, taeba ataena pekanaba Waꞌegawama nkantawamaba agobi puratakiya, a. Tae esegiyenamaba ae esegiyenaba asugaikiya, a. Tigetintanaba a-ntapima Waꞌegawamati napiyiyo

²³Pigoya, aꞌyaꞌmaena pukenaenagaba kanarane, yewe. We, kaꞌisaena pukubompentanamaba kampa taoꞌmaekiye. Eya, aꞌyaꞌmaena pukenaenagaba kanarane, yewe. We, kaꞌisaena pukubompentanamaba kampa esegi puratakiye.

²⁴Tigeba tigetikaba a-ntapima, tigege miye kinaꞌmikaba aogima kabiwaitama iyoꞌmaeyiyo.

²⁵Pigoya, tigeba ika kumatasa awase ika puntiripa: Aetasawemaba, a-nkibigama, uwa maema naiyo. Aꞌyugu ibigaigina napiyenarimpa ata pusanaga, uwa maema naiyo.

²⁶Pika mono isaꞌamaba maya iye: Mampabe aꞌyaꞌmaena waintintanabe, pipa Waꞌegawamantanawe, iye.

²⁷Piya, kaꞌwaina kampa amatiti punta yagarama kaoꞌena puritantana kegaꞌe yekiri wakena puntiripa, kanara wama naninta timikibintanaba uwa maema naiyo. Aetasawema ibigaigina napiyenarimpa ata pusanaga, uwa maema naiyo.

²⁸Piyama nama miyiginaba, kaꞌwaina aeba: Ma ntanintaba ama kotiti kaema agunta pasaꞌatantintanawe, yekiripa, urimikibi ntagaragaba napima pipa a-ntaiyo.

²⁹Piya, tigeti ntapiyena ata pusanagaba kampaye. Urimikibi ntagarama ntapiyena ata pusanaga yuwe. Piya, taeba Koti nkaobi aꞌyaꞌmaenaba pune. We, nae pukubontanaba ayamabaya to yagarama napiyenawapipa aꞌyigimpa nagakiye.

³⁰Piya, naeba Kotiti naninta nama naꞌmu potakubokaba, nana piyema kaꞌwainaba abima ata punatakiye, a.

³¹Pigoya, tigeba naninta nantiripe, wani ntantiripe, to kaꞌisaena puntiripe, aꞌyaꞌwaemaena pukibentanagaba Koti nkagegaꞌe uma asagayuma piyo.

³²Piya, Yuta kinaꞌmi nkiyobipe, Kariki kinaꞌmi nkiyobipe, Koti mpono aiꞌaru pe kinaꞌmi nkiyobipe, paebuma miyiyo. Aꞌyugu pami puma wareꞌnasanaga iyobi paebuma miyiyo.

³³Piya, aꞌyaꞌma kinaꞌmi nkiyobi nae pukubontana agaigina kanara penemawe. Naeꞌnentanaba kampa aogima puwe. Kampaye. Naeba uwaena kina iꞌiyekana Kotiba iba penemawe. Piya, nae posa puma, paebuma miyiyo.