Read Fore 1 Korinti 11 Bible Online

1 Korinti 11 - Fore bible

1 Korinti 11

¹Eya, naeba Karaisiti ki aegaraosa puma, tigeba pabiyama nae ki naegaraiyo.

²Pigoya, tigeba aꞌyaꞌma yagaba nae unto kamana napimagiri, mono urimintoka aogima wasiyewe. Pika abogana kanarasaye.

³Pigoya, nae nabemika ma kamanapa aogima abiyo: Aꞌyaꞌma wami nkaiꞌneba Karaisitiwe. Wayaꞌmi nkaiꞌneba iwaegiwe. Karaisiti nkaiꞌneba Kotiwe.

⁴Piya, kaꞌwaina aeba kai maema aꞌnontaga atikaetanta mima nunamu ukibino, Koti nkawamutasa kamana uma aborakibino, aeba aiꞌnewapa nkageba ata potakiye.

⁵Piya, ka waeꞌmaba kampa kai maema aꞌnontaga atikaetama mima nunamu ukibino, Koti nkawamutasa kamana uma aborakibino, aegeba kaꞌmasa puma aiꞌnewapa ata potakiye. Eya, wayaꞌma aꞌno nkabiya aiyagaiba kasisa puma kasaisinta, kaꞌmasa puma aiꞌnewapa ata potasine.

⁶Piya, ka waeꞌmaba kampa kai atikaetama mintanaba, abiyapa kasagasano. Piya, aeba kasama aiyagaiba kaekibika ani puntanaba, kai maema aꞌnoti atokaetama miyeno.

⁷Pigoya, wamaba Koti nkauga puma mima, ae age asagayukenawe. Pika wamaba aꞌnopa a-nkatikaeyano. Pigoya, wayaꞌmaba aeba wama nkage asagayukenawe.

⁸Piya, marupa Kotiba wayaꞌma nkautasaba waba kampa aborantine. Kampaye. Wayapa wama nkautasa aborantine.

⁹Piya, wayaꞌma nkaoꞌmaeyanemaba, waba kampa aboratantine. Kampaye. Wayapa wama nkaoꞌmaeyanema aboratantine.

¹⁰Piya, wama amentanti mintika wayaꞌmaba aꞌnota atikaema araꞌena potama mimagina, enisore kinakaba piyaba puma miyeno.

¹¹Piya, Waꞌegawama nkaobipa wayaꞌamanapa kampaye. Wamanapa kampaye.

¹²Piya, maru wayapa wama nkautasa aboratantegina, ibaba wayaꞌmi nkitasa waba aborawe. Piya, aꞌyaꞌmaena Kotipisawe.

¹³Pigoya, tigeripa napima aꞌyigimpa agaiyo: Waya kaꞌwainaba kampa kai maema aꞌnontaga atikaenta mima Kotiti nunamu ukibipa, kanarasakiya, a.

¹⁴Piya, wa kaꞌwainaba wayaꞌma pisa puma aꞌno nkabiya eꞌero atama miyekanaba, pabiyama agaiginaba kampa aogi puma auꞌama mpaema ata potaye.

¹⁵Piya, ka waeꞌmaba aꞌno nkabiyapa eꞌero atama mikibemipa, aogi awaꞌenawane. Eya, Koti eꞌero nkabiyatasa atikaetanema atantine.

¹⁶Pigoya, kaꞌwaina aeba ma kamana akayukena pekiripa, mayama napiyiyo: Pi yo kamanapa taebe aꞌyaꞌma Koti mponota aiꞌaru pe kinaꞌmibe aegaꞌma, to kakeba kampa punema, napiyiyo. Monoka aki puma mintini nanintaraka ata puntawe

¹⁷Pigoya, to kaꞌisa kamana urimintapa tigegaꞌeba kampa asagayukuwe. Piya, tigeba aki puma aogiyena kantaba kampa punta ataena pewe.

¹⁸Piya, monoka aki peganaba, tikapipa atataraena aboraye. Piyama unamega aboganaba, uwaenanto tagantana kanta piye.

¹⁹Atataraenaba pipa uwaba kampaye. Piya, tikapi monoꞌama nkago tagantana maenta kinapa aboraigiri agakibeka atataraenaba aboraye.

²⁰We, tigeba Waꞌegawama nkara naninta nakenaga aki puma anagiꞌena pewe.

²¹Piya, tigeti ntaninta maete ampa irosaꞌma kampa akiyena punta, uwa tige ka ka nawe. Eya, kaꞌwainaba aeba agaꞌena abegina, to kaꞌwainaba waini wani uwaena namagina agaꞌe pagina aiboꞌena piye.

²²We, tigeba naninta wani ntakena puntiripa, namatipintiba kampa nawa, a. Tigeba Koti mponota aiꞌaru pe kinaꞌmikaba anagiyena pewema, napima, kusi pe kinaꞌmi nkige maete tumewa, a. Pikaba nanawe urimukuwe. Tige tigeba maete isuwa, a. We, piyaenaba kampaye. Tigeba ata pewe. Ara nanintawama kamanane

²³Pigoya, pi kamana urimintopa Waꞌegawamatisa maentone. Pipa mayamawe: Waꞌega Isupa Yutasi aeba minagaꞌena potanti nkase marupa pareti maema,

²⁴Kotiti aꞌmu potama, apako puma maya untiye: Mapa nauꞌnepa tiyoꞌmaekenawa, naeka napima nama miyiyo, untiye.

²⁵Pigoya, igeba naninta nauguna, waini kankabe pabiyama maema maya untiye: Ma kankabebisa korantetasa kasa araꞌena aborama puritauwe. Pabiyama nantiripa, naeka napima nama miyiyo, untiye.

²⁶Piya, tigeba pi paretibe wainibe nantiripa, Waꞌega purinti kamanapa uma aborama mimagiri mirite wama, tumikibi ntaga uma nagarikiye.

²⁷Pigoya, pika kaꞌwaina aeba Waꞌegawama paretibe wainibe anagiꞌena potama namiꞌnaba, aeba Waꞌegawama nkaupe korankape iꞌnintana potama maete tumiye.

²⁸Piya, kaꞌwaina aeba paretibe wainibe nakena puntanaba, maruꞌenaba aeꞌwa nkagowapa aꞌyigimpa aogi pugaite napima nano.

²⁹Piya, kaꞌwaina aeba Waꞌegawama nkaukaba kampa aogima napima paretibe wainibe uwa namiꞌnaba, aeꞌwa nkaiboꞌenawampa aboramegina kamana aepi waiye.

³⁰Eya, pintanama nkagowama tigepisa kaꞌisamiba yonintana ibegini magimagi pegana, kaꞌisamiba puꞌwawe.

³¹Piya, taere nkagorepa aꞌyigimpa agama aogima pompesinta, kampa kamanatepa waiyesine.

³²Eya, Waꞌegawamaba agorepa aborama aꞌyigitatamitasa arupu purataye. Piya pumagina, mampabisa kinaꞌmikeba kampa mintakana aꞌyigimpa tagarubakaisanaga, arupu purataye.

³³Piya naoꞌmitaba, tigeba naninta nakena aki puntiripa, kaꞌisamika iyobi puntigini kanaigirino.

³⁴Eya, kaꞌwaina aeba agaꞌena abekanaba aeꞌwa ntamapi nano. Aꞌyugu aki pukibepi kamana maerimisanagawe. Pigoya, toganaba tigeti naene wamagi, to kaꞌisa kamanapa arupu puma urimukuwe.