Read Fore 1 Korinti 12 Bible Online

1 Korinti 12 - Fore bible

1 Korinti 12

¹Naoꞌmitaba, Awamusaꞌama aboraramintintanaga aibosabo pusanaga urimukuwa, abiyo:

²Tigeba ago abintawe. Paipa tigeba abeꞌisa kina mintiripa, kamana kampa unta ama kotiti tiba puritauguri aegaꞌma wagana kana puntawe.

³Piya, nae nabemika aogima abiyo: Kaꞌwaina nkagupipa Koti Nkawamusaꞌama mintakanaba, pi ntagaramaba: Isupa pumireri potauwema, kampa ukiye. Piya, to kaꞌwaina nkagupipa Aota Awamusaꞌamaba kampa mintakanaba, pi ntagaramaba: Isu aeba Waꞌegawema, tagapa kampa ukiye.

⁴Pigoya, Awamusaꞌama toma toma aboraramemipa, Awamusapa kaꞌantowe.

⁵Waꞌegawama toma toma yogaba aboraramemipa, Waꞌegaba kaꞌantowe.

⁶Kotiba esegiyenawapa toma toma aboraramemipa, Kotiba kaꞌanto mima, esegiyenawapa aꞌyaꞌma yugawa pukenaenaba aꞌyaꞌma kinaꞌmiteti aborama tamiwaeye.

⁷Pigoya, Kotiba Awamusapa aborama ka ka puma aꞌyaꞌma kinaꞌmite taoꞌmaekenaga tamiwaeye.

⁸Eya, Awamusaꞌama otagina kaꞌwainaba monoka aogima ntapima iye. Piya pegina, pabi Nkawamusaꞌama otagina to kaꞌwainaba monoꞌama nkagoba aogima abima iye.

⁹Piya, pabi Nkawamusaꞌama otagina to kaꞌwainaba amatitiꞌenaba tabera puma miye. Pi ka Awamusaꞌama otagina to kaꞌwainaba yoni kina kaba itakena esegiyenaba maeye.

¹⁰Piya, Awamusaꞌama otagina, kaꞌwainaba esegiyena aboragina, to kaꞌwainaba Koti nkawamutasa kamana aogima aboragina, to kaꞌwainaba toma toma awamusa aꞌyikikenaena maema aboragina, to kaꞌwainaba amiyo namiyo sukena kamana iyegina, to kaꞌwainaba pi kamana abima aꞌwae piye.

¹¹Piya, aꞌyaꞌma pi tamintintanaba pabi Aota Awamusaꞌama aewa aborama tamiye. Aewa nkabemika ka ka kinaꞌmiteti aborama tamiye. Ka auꞌama nkatunka uwainkai pune

¹²Pigoya, wasanama nkaupa kaꞌanto waiyegina, agisa ayapa uwaenaenawe. Piya, uwaenaenawa waiyegina aupa kaꞌantowe. Piya pisa puma Karaisiti nkagisa aya mpintune.

¹³Eya, ka Awamusatasa paitaratagi, ka au mintune. Piya, Yuta kinape Kariki kinape kayokaya kinape uwa kinape, aꞌyaꞌma aegaraompe kinaꞌmitaba ka Awamusapa maemagita, ka tuntana pune.

¹⁴Piya, auꞌamaba kaꞌantoba kampaye. Uwaenaena wantagaꞌenawe.

¹⁵Piya, agisamaba: Naeba aya kampa mima auꞌamantanaba kampaye, ukibipa, ayama aupa kaite abiwapa mikiye, a.

¹⁶Piya, agemaba: Naeba aoba kampa mima auꞌamantanaba kampaye, ukibipa, ayama aupa kaite abiwapa mikiye, a.

¹⁷We, aupa aomana waiyesinta, ayama abompesine. Aupa agemana waiyesinta, ayama agunta pigaompesine.

¹⁸Pigoya, Koti aeba napimagina auꞌama nkagisa ayapa aborama aewa nkabomeka ka ka antantine.

¹⁹We, aꞌyaꞌma auꞌamaba kaꞌanto waiyesinta, autakayapa ayama miyesine.

²⁰Pipa kampaye. Agisa ayapa uwaena waiyegina aupa kaꞌantowe.

²¹Piya, nana piyema aowamaba ayankamapa: Kae kampa mintagapa kanara mikuwemaba, omikiye, a. Piya, nana piyema aꞌnonkamaba agisawamapa: Kampa mintisigipa kanara mikuwemaba, uwaisimikiye, a.

²²Kampaye. Tauꞌama nkatuka anuntanawema napiyompe, kampa waiyesinta, tauꞌamaba kampa aogima miyesine.

²³Piya, tauꞌama nkatunkamaka tumiyema napiyompe, pipa aogima kabiyune. Eya, tauꞌama nkatu kakantatapa aogi awaꞌenarasa airarikaeyune.

²⁴Piya, aogi tauꞌama nkatupa igeba kanarane. Pabiyamagina, Koti aeba aꞌyaꞌma tauꞌama nkatupa atokaetamagina, tuminti nkatunkama nkageba maete iye.

²⁵Piya, tauꞌama nkatunkamaba kampa atatara punta, kaꞌena puma ka ka iyoꞌmaeye.

²⁶Pabiyamagina, ka atunkamaba kuntaena abipa kaga kuntaenaba ibiye. Eya, to ka atunkama nkageba maete iyipa, aꞌyaꞌmaba kaga iꞌmu puwaekibewe.

²⁷Pigoya, tigepa kaga aki puritama Karaisiti nkauꞌena puritagiri atunkapa ka ka mintawe.

²⁸Pigoya, Koti aeba ae tuntana punta taetisa wasanaba mayama utawaitantine: Maruꞌenaba aposoro kinana, pikaꞌisa poropete kinana, pikaꞌisa tisa kinana, pikaꞌisa esegiyena aborakena kinape, yoni kaba itakena kinape, wasana iyoꞌmaekena kinape, yogara kabiratakena kinape, tonarona kamana amiyo sukena kinape, sumagina, taetisa utawaitantine.

²⁹Pigoya, aꞌyaꞌma taepa aposoro utaratantina, a. Poropete aꞌyaꞌma utaratantina, a. Tisa aꞌyaꞌma utaratantina, a. Esegiyena aborakena kina aꞌyaꞌma utaratantina, a.

³⁰Yoni kaba itakena kina aꞌyaꞌma utaratantina, a. Tonarona kamana amiyo sukena kina aꞌyaꞌma utaratatina, a. Pi kamana aꞌwae pukena kina aꞌyaꞌma utaratatina, a.

³¹Pigoya, Awamusaꞌama asugasima yuga tamintika tigeba ebi ebi piyo. We, to ka aogi kipa tiyakikubopa, asu igaikiye.