Read Fore 1 Korinti 14 Bible Online

1 Korinti 14 - Fore bible

1 Korinti 14

¹Tigeba agu kaoꞌenayaga mikenaga ebi ebi pumagiri, Awamusaꞌama aboraramemi ntuga pukenaga napiyiyo. Eya, Koti nkawamutasa kamana uma aborakenaga abigina asugasimaena peno.

²Piya, kaꞌwaina aeba tonarona amiyo sukena kamana yemipa, aeba wasanamipa kampa uwaiminta Koti omiye. Eya, wasanamiba pi nkagoba kampa abegana, aeba Awamusaꞌama kakanti kamana Koti nkaobi uwa iye.

³Piya, to kaꞌwaina Koti nkawamutasa kamana uma aborawaeyamipa, aeba wasanami nkigupa esegi puwaitama asiwaitamagina, paruyena puwaitaye.

⁴Pabiyamagina, amiyo kamanapisa yemiꞌnaba aeꞌwa nkagupa esegi potagina, to kaꞌwaina Koti nkawamutasa kamana uma aborawaeyamiꞌna aeba aꞌyaꞌma monota aiꞌaru pe kinaꞌmi nkigupa esegi puwaitaye.

⁵Pigoya, tigeba amiyo sukena kamanapisa uwaeyigipa abekanaba aogi pikiye. We, Koti nkawamutasa kamana uma aboraigipa, pipa abekana aogiyenarakaꞌya pukiye. Piya, Koti nkawamutasa kamana uma aborawaeyami ntagaramaba amiyo sukena kamana ukena kinapa asu igaintiye. Pigoya, kaꞌwaina aeba amiyo sukena kamanapisa yekana, to kaꞌwaina aꞌwae puma yekanaba, pipa kanarane. Piya pemipa, aꞌyaꞌma monota aiꞌaru pe kinaꞌmi nkigupa esegi puwaitakiye.

⁶We naoꞌmitaba, naeba tigeti wama amiyo sukena kamanaꞌamana yosinta, ayama tiyoꞌmaeyosine. Naeba tigeti wama kakanti kamanano, abikena kamanano, Koti nkawamutasa kamanano, tiyakikena kamanano, uma ararimikubopa kanara tiyoꞌmaekenaenawe. Mono kamanaꞌama nkagoba aogima aboraiyo

⁷Pigoya, yabeꞌyawama nkagabe kabu waeꞌama nkagabe kampa aogima ukibipa, ayama wasanamiba aogima abikibewe, a.

⁸Pikuriwama kampa aogima aga yekiniba, ayama irebu kinaꞌmiba abitegini wama maꞌenaba pukibewe, a.

⁹Piya, tigeba pabiyama to kamanapisa kamana yiginaba, ayamabaya tiyoꞌmiba abikibewe, a. Pipa kampaye. Kamanatipa ugasigina uwa mari wagaikiye.

¹⁰Pigoya, aꞌyaꞌma maga maga kamanapa toma toma waita wantipa, uwaba kampaye. Aꞌyaꞌma kamanapa agowantagane.

¹¹Piya, kaꞌwaina aeba kampa ago abukubo kamanapisa untanaba, naeka napima to marisa yagarawe yeka, aekaba pabiyama napima to marisawe ukuwe.

¹²We, tigetiba agowapa pabiyama waintiye. Piya, Awamusaꞌama nkesegiyena tigeti aborakenaga yepa, pipa kanarane. Pigoya, to marisa kina kanta puma misanaga, tigeba monota aiꞌaru pe kina esegi puwaitakena esegiyena maekenaga ebi ebi piyo.

¹³Pigoya, kaꞌwaina amiyo sukena kamanapisa ikibiꞌnaba, aeba agowapa abima aꞌwae pukena esegiyenaga nunamu otagana aborano.

¹⁴Piya, naeba amiyo sukena kamanapisa nunamu yopa, pipa naumanempaba yegina, napiyenanempaba uwa aꞌyugu piye.

¹⁵Pika ayama pukuwe. Piya, naeba naumanetasa nunamu umagi, napiyenanetasa kaga ukuwe. Naeba naumanetasa ini umagi, napiyenanetasa kaga ukuwe.

¹⁶Piya, tigeba kampa pabiya puma timamanatasa Kotiti tiꞌmu potaiginaba, ka kampa abintakibemi ntagaramaba kamanatika aibosabo pute, ayamabaya tiyoꞌmaema: Tagane, ukiye, a. Pipa kampaye.

¹⁷We, tigeba tiꞌmu kamana aogima yepa, aya pegiri tiyoꞌyagarapa kampa esegi potawe, a.

¹⁸Pigoya, naeba Kotiti naꞌmu potauwe. Pi amiyo sukena kamanaꞌnempaba tigepa asurigasaye.

¹⁹We, pipa aerawane. Naeba akiyenabi amiyo sukena kamanapisa eꞌero kamana ukenaba aerawane. Piya, nae nabemika, akiyenabi napiyenanepisa tara kamanaꞌanto uwaimekini abiyema puwe.

²⁰We naoꞌmitaba, napiyenarimpaba inamu kantaba a-peno. Kaintanaripa inamu kanta puma mimagiri, napiyenarimpaba anasa kina kanta puma aborano.

²¹Pigoya, mono ago kamanapipa Waꞌegawamaba maya untiye:To kinaꞌmi kamanapisabe namuꞌisa kinaꞌmi nkiwamutasabe naeba ma kinapa kamanaꞌne uwaimekini, igeba ikabinatama kampa abikibewe, Waꞌegawama piya untiye, iye.

²²Piya, amiyo sukena kamanapa mono kinaꞌmintana wanane. Yigina, pipa kampa imatiti pe kinaꞌmi pami pukenaenawe. Eya, Koti kamana uma aborakenaenaba abeꞌisa kinaꞌmintanaba kampaye. Pipa mono kinaꞌmintanawe.

²³Piya, monota aiꞌaru pe kinaꞌmiba ampa aki puma to kamana to kamanapisa ampa amiyo siginiba, abeꞌisa kinaꞌmibe kampa imatiti pe kinaꞌmibe ampa tigantiniba: Aiboꞌnabo pewe, ukibewe.

²⁴Piya, tigeba aki puma Koti nkawamutasa kamana uma aborama mintigina, kampa amatiti pemi kinano, abeꞌisa kinano, tigeti ampima mono kamanatipa abekiniba, pi kamanaꞌamaba ae aupi pima agowapa uma ae aobi aborakibewe.

²⁵Piya, kamanaꞌwapa agupi kakantipa aborama arawaekiye. Arawaeyakanaba, aowamaba mabinti maete tumimagina Koti nkagegaꞌe uma asagayumagina: Taga, taga, Koti aeba tigege mintiye, ukiye. Monota aki pikenaenaba arupu puma aborano

²⁶We, naoꞌmitaba, pikaba aya pewe. Tigeba aki puntiripa kaꞌwainaba mono ini yegina, to kaꞌwaina mono kamana urimegina, to kaꞌwaina Koti nkawamutasa kamana uma aboragina, to kaꞌwaina amiyo sukena kamana yegina, to kaꞌwainaba pi kamana aꞌwae piye. Pintanaba pepa, mono kina esegi puwaitakenaga napima piyo.

²⁷Piya, amiyo sukena kamanapisaba kamana ukena puntiripa, uwaenamiba kampaye. Tara kakagami ukibewe. Piya, ka ka yigina, kaꞌwainaba agowapa aꞌwae puma urimeno.

²⁸Pigoya, kamana aꞌwae pukena kina aisakateba, amiyo sukena kamanapa a-suma, paibuma mima Kotiti uwa yeno.

²⁹Pigoya, Koti nkawamutasa kamana untiripa, pabiyama tara kakagami yigiri, to kaꞌisamiba pi kamanapa aꞌyikiyo.

³⁰Pigoya, kaꞌwainaba aeba mintegina Awamusaꞌama agupi mono atagina ukena puntanaba, maru kamana yemiꞌnaba nagariyekanaba yeno.

³¹Piya, aꞌyaꞌma kinaꞌmiba mono abima esegiyena maekenaga, tigeba Koti nkawamutasa kamana ka ka uma kanara aboraiyo.

³²Eya, Koti kamana uma abora kinaꞌmiba igewai nkaborantanarapa kabiyewe.

³³Eya, Koti aeba napiyenarepa kampa aꞌyugu puratama, aeba agoya Kotiwe. Pigoya, to kaꞌisa Kotiti atokaeya kinaꞌmi nkakiyenabi pesa puma,

³⁴tige akiyenabi wayaꞌiyaba kamanapa paka puma miyiyo. Piya puma, paisa ago kamana wasima wayaꞌiyaba kamana kampa untiri wami nkimentanti miyiyo.

³⁵Piya, wayaꞌmiba mono akiyenabi kamana uma inintana aborasanaga, igeba kaꞌisaena abikena puntiniba, namankaipi iwaegipa ibigaiyo.

³⁶We, ayama napiyewe. Koti kamanaꞌamaba tigetisa aborantina, a. Tibinto abegana kaꞌisamiba kampaya, a.

³⁷Pigoya, tigetisa kaꞌwainaba aeꞌwaka Koti kamana unta poropetewo, Awamusaꞌwantagano, napiyintanaba, kamana kaema timo kamanapa Waꞌegawama nkuntemika, aewa abibebe peno.

³⁸Piya, kaꞌwaina aeba ma kamanaꞌnekaba kampa owe yekanaba, aeꞌwa kamanakaba owe a-seno.

³⁹Piya, naoꞌmitaba, tigeba Koti nkawamutasa kamana uma aborakenaga ebi ebi pumagiri, amiyo sukena kamana ukena kipa aꞌnkakuniyo.

⁴⁰Eya, aꞌyaꞌma yugaba arabama pigina aborama arupu peno.