Read Fore 1 Korinti 2 Bible Online

1 Korinti 2 - Fore bible

1 Korinti 2

¹Naoꞌmitaba, naeba tigeti irosaꞌma Koti nkage awaga kamana urimintopa, aogi napiyenanetasabe tabe kamanaꞌnetasabe kampa aborarimintone.

²Naeba to kaꞌisa kamanapa kampa uma, Isu Karaisiti nkago kamanaꞌamana urimikena napintone. Piya, aeba yara purinti kamana urimintone.

³We, pai tigege mintantopa, esegiyenanepa kampa waima tabera naekuru puma tabaraba puma mintantone.

⁴Piya, monopa urimintopa, aogi napiyenayaga yagarama kamanapisaba kampa napiyenaripa aꞌwae puntone. Kampaye. Awamusaꞌama nkesegiyenarasa aboraramintuwe.

⁵Piya, aꞌyugu timatitiꞌenarimpa wasanama kamanaꞌamati atakibewe. Koti nkesegiyenamanati ataiyoma, piya puntone. Koti kakamaranta kamanapa Awamusaꞌama aboraramintiye

⁶We, Kotitisa aogi napiyenagaba taga sune. Eya, mono aogima abinta kinaꞌmiba pipa abintawe. Pipa mabisa napiyenaba kampa uma, mabisa kiye kinaꞌmi ntapiyenaba kampa yune. Kampaye. Mampabisa kinaꞌmi ntapiyenaba nagariwakiye.

⁷Pigoya, taeba Koti kakanta kamanaꞌama nkagoba uma aboraune. Piya, pi eꞌwasa puratakena kamanapa Kotiba paitakaꞌya, ma kampa aboranti ntagaba, napima wasanami nkiyobi kakantemine. Pipa ibaba uramega agowapa uma aboraune.

⁸We, mampabisa kiye kinaꞌmiba pi kamanaꞌama nkagoba kampa abibebe puntawe. Abibebe puntasinta, eꞌwasa Waꞌegaba maripo yarapa kampa aeguntasine.

⁹Pikaba mono isaꞌamaba maya iye:Wasana aorasa kampa agama, agebisa kampa abima, antabaipinti kampa napiyemintanaba, pipa Kotiba aborama, ae agu kaoꞌena pota kina, igeꞌena Koti maema aiꞌaru puwaitaye, iye.

¹⁰Pigoya, pi kamanaꞌama nkagoba Kotiba otaogana Awamusaꞌama uma aboraramintine. Eya, Awamusaꞌamaba aꞌyaꞌmaenama nkagowapa abiwaemagina, Koti kakamarantapa kaga abintiye.

¹¹Piya, kaꞌwaina aoꞌma nkagutasa agowapa abikiya, a. Pipa kampaye. Aguꞌwama nkagowama aewa abikiye. Pabiyama wasana Koti nkagoba kampa uwaba abegina, Koti Nkawamusaꞌwampa abiwa abiye.

¹²Piya, taeba mampabisa awamusapa kampa maeyune. Kampaye. Taeba Koti Nkawamusa maeyompepa, Koti aꞌmuntana tamemika abiyomawe.

¹³Eya, Koti aboraramintemintanama nkagoba kampa wasanami ntapiyenabisa aboraune. Kampaye. Pi nkagoba Awamusaꞌama uramegi uma aboraune. Piya, Awamusaꞌama taga kamanapa uwaimokini, Awamusa maeya kinaꞌmiba abewe.

¹⁴Pigoya, Awamusa kampa wainta yagaramaba Koti Nkawamusaꞌama nkaboraramintanaba kampa maekiye. Pipa kampaye. Aeba pika abekanaba: Aibo kamanane, umagina kampa aogima abikiye. Kampaye. Pipa Awamusaꞌamatasa agoba abokana, uwa kinaꞌmi abikenaenaba kampaye.

¹⁵Piya, Awamusaꞌwantaga yagarama aꞌyaꞌmaenama nkagoba agama kanara aꞌyikikiye. Aibekana, Awamusa kampa wainta kinaꞌmiba pi ntagarama nkagoga aibosabo pikibewe.

¹⁶We, mono isaꞌamaba maya iye: Waꞌegawama ntapiyenaba kebaya aꞌyaꞌma abima amato puma omikiye, iye. Pigoya, taeba Karaisiti ntapiyenaba maema miyune.