Read Fore 1 Korinti 3 Bible Online

1 Korinti 3 - Fore bible

1 Korinti 3

¹We, naoꞌmitaba, Awamusa waintaga kinaꞌmi kamanapa uwaimintopa, pabiyama tigepa paipa kampa urimintone. Pipa kampaye. Marusa napiyenayaga kina uwaimosa puma tigepa paibuma urimima, tigeba inamu kanta puma Karaisitintanabipa mintugu, paibuma urimintone.

²Eya, naeba esegi nanintaba kampa timima, inamu ntagara nono amemisa puma kamanapa paibuma urimintone. Piya, esegi naninta nakenaba paipa kampa kanara puntiri, ibaba piyaba kampa pewe.

³We, tigeba marusa napiyenayaga kina kanta puma mintiri, kampa esegima abintawe. Piya, tigeba tigobipa tabera puma maka kamana ukenaena aborantiripa, tigeba marusa napiyenayaga kina kanta puma miyewe.

⁴We, tigepisa kaꞌwainaba: Naeba Poro nkaegarao kinaꞌnawe yegina, to kaꞌwainaba: Naeba Aporo nkaegarao kinaꞌnawe yemipa, tigeba uwa kina kanta puma miyewe.

⁵Pigoya, nanawema tigeba napiyewe. Aporo aeba aya yagarawema, Poronteka aya yagarawema, napiyewe. We, tasigeba yoga kinatasawe. Piya, Waꞌegawamaba urasitantemi ntuga puma mono urimuwagiri, abima Kotiti timatiti puntane.

⁶Piya, naeba aintana puwagana, Aporo aeba yonintana pogana, Kotiba aborataogana iꞌma auꞌwa aborantiye.

⁷Piya, aintana pemiꞌnakaba a-so. Ae agegaꞌeba kampaye. Yonintana pemiꞌnakaba a-so. Ae agegaꞌeba kampaye. Koti ae abintowa pegina iꞌma auꞌwa aboraye. Aeka yo.

⁸Pigoya, aintana pemiꞌnabe yonintana pemiꞌnabeba, isigeba pemepa kaꞌmasa pese. Piya, yogawaisimpa pemesa puma nakenaba antotapa pabiyama maekibese.

⁹Eya, tasigeba Koti ntuga ka yuga pogiri, tigeba Koti ntuga mintiri, Koti kimaranti ntama mintawe. Tasigeꞌenaba kampaye. Yogarempa nkagowapa aborakiye

¹⁰Pigoya, Kotiba unatantemi ntugaba naeba puwe. Piya, na kikena kinaꞌmi pesa puma, naeba Kotiti maruntana aogi potaogini kiyewe. Pigoya, tigeba ka aukaꞌisa amato potama kintiri, ka ka kinaꞌmitaba aogi potama kabiyiyo.

¹¹We, Isu Karaisiti aeba tige marune. To ka maruntana pukenaba toba kampaye.

¹²Piya, pi mparuta wasanamiba korirasawo, siribarasawo, aogi yabatasawo, yarasawo, kabirasawo, aꞌnorasawo, amato puma kikibewe.

¹³Pigoya, aꞌyaꞌma na kiye kinaꞌmi ntugawama nkagowaipa ka ka aborakiye. Piya, ainti tabe kanabipa yakutasa agowaipa aborakiye. Eya, pi tabe yaku kaemagina, yogama nkagowapa aogiyenawo aya pumabaya aborakiye.

¹⁴Pigoya, kaꞌwaina pi mparuta kiyekana yakunkamaba kampa tawaenta uwa waiyekanaba, aogi ikanka mpaekiye.

¹⁵Piya, to kaꞌwainanta yakunkama tawaeyakanaba, ikankapa kampa maeyakana, aewapa aoꞌmaema yakupisa isoꞌatama uwa auꞌikiye. Wasanama nkageba a-nkasagayuyiyo

¹⁶We, tigeba Koti nkaota nama miyegana, Koti Nkawamusaꞌama tikapi miyaba miye. Pikaba kampa abintawa, a.

¹⁷Pigoya, tigeba Koti mpono nama mpimagiri, pipa aota nama mpintawe. Pika kaꞌwaina aeba Koti ntamapa ata potakibemipa, Koti aepa antotapa ata potama kaikiye.

¹⁸Tigeba tigutimpapa amiyoꞌenaba a-piyo. Piya, tigetisa kaꞌwaina aeba: Wasanama kamana aogima abo ntagaranawema napiyemipa, pi ntapiyenaba kasano. Eya, mampabisaena kampa abe kina kanta puma mintanaba, taga abikenaenaba inatisa maeyano.

¹⁹We, mabisa napiyenaba Koti nkaobipa aiboꞌenawe. Pika mono isaꞌamaba kapa maya iye:Napiyenayaga kinaꞌmiba igewaintana pegana, Kotiba igeꞌwai ntapiyenarasa aꞌwae puma ko pawaitaye, iye.

²⁰Piya untana to kapa maya iye:Waꞌega aeba wasanami ntapi napiyena abemipa, anagiyena kanta puwaye, iye.

²¹Pika abima, mabisa kinaꞌmi nkigeba a-mpaete iyeno. We, aꞌyaꞌmaenaba tigeti Kotiba ataye.

²²Piya, Porontepe, Aporope, Pitape, mabisaenabe, aogantaꞌenabe, purintaꞌenabe, waintintanabe, aborakenaenabe, aꞌyaꞌmaenaba Kotiba tiyoꞌmaema aborantipa, tigeꞌenawe.

²³We, tigeba Karaisitintanarawa, Karaisitiba Kotintanawe.