Read Fore 1 Korinti 4 Bible Online

1 Korinti 4 - Fore bible

1 Korinti 4

¹Pigoya, tigeba taeka napimagiri: Karaisiti kayokaya kina mima, Koti kakanta kamanaꞌama nkago aborakena kiyewema, taeka napiyiyo.

²Pigoya, kiya kinaꞌmikaba yogawaitapa aogima kabiyiyoma, iba puwaitama uwaitawe.

³We, tigebera wasana akiyenabi kaꞌwaina naeka kamana unatakibepa, pipa abekana nae naobi auꞌwantana kantaba kampa pikiye. Eya, naenekeba agonekaba kamana kampa ukuwe.

⁴Piya, nae aiboꞌenanekaba kapa kampa napintapa, pikaba: Arupu yagara mintuwemaba, kampa ukuwe. Kampaye. Nae unatakenaenaba Waꞌegawama ntuga kana unatakiye.

⁵Pigoya, Waꞌegawama kanapa kampa aborantemitapa, tigeba pintanaba a-nkaꞌyikiyo. Kampaye. Waꞌegawama aborakibipa, tununtanabi kakantintanaba maema arantaꞌenara atama, wasanami ntapiyenaba kaga maema aborakiye. Piya, pabi ntagaba Kotiba aꞌyaꞌma kinaꞌmiteti antota aꞌmuntanaba aꞌyigitatakiye. Korinti kinaꞌmi igewai nki maete intawe

⁶Naoꞌmitaba, naeba Aporoke naeke tasigeresika yuwe. We, tigeba aꞌyaꞌma kiya kinaꞌmikaba napima, mono isapisa kamana aegaꞌma a-nkasugasi tunkagasi purataiyo. Pikaba tigu maete ikenaenaba a-piyo.

⁷Pipa tabe tigigaꞌeba ketisa maeyawe, a. Tigeti waintintanaba Kotitisaba nana kampa maeyawe, a. Kotitisaena maentiripa, pipa nanaga ago kina kantaba puma titipa maete iyewe, a.

⁸We, tigeba monoꞌama igaꞌe pami kina kanta puma miyewe. Tigeba uwaena yaba mpaeya kina kanta puma miyewe. Tigeba ago tagasima, waꞌega kiye kina kanta puma miyewe. We, tigeba taga waꞌega kiye kina kanta puma kabiyesinta, taeba tigeti atokaema kaga kabiyompesine.

⁹Pigoya, taeba Koti nkaposoro kina miyokini, asi nasiba mabisa kinaꞌmi nkiyobipe enisore kinaꞌmi nkiyobipe taeguyewe. We, wasanamiba ikaꞌisa paibuma iyeguyegini pure kina kanta puma miyiyoma, Koti uratantibayawema, napiyuwe.

¹⁰Piya, wasanami nkiyobi taeba Karaisititiba aibo pompe kina miyokiri, tigeba Karaisititi atokaema aogima abe kina kanta puma miyewe. Tigeba esegi kina miyega, taeba magimagi kina miyune. Tigeba wasanami nkiyobi tige wainta kina miyega, taeba tuminta kina kanta puma miyune.

¹¹Piya, paipa agobima mirite, ibageba pabiyama taeba nanintagabe wanikabe tagaꞌena tabemintaga, aogi kai kampa amirinta kusi puma mintokana, kamaena puratagana, nama kumatepa kampa waiyegi aogimaba kampa miyune.

¹²Piya, tayapisa araga ntuga taere pune. Pigoya, wasanamiba ata kamana urataga taeba akayona puwaitaune. Karana purataga uwa itaune.

¹³Akayasurataga paru puwaitaune. Piya, wasanami nkariyena kanta purataga, taeba ibaba wasanami nkiyobi iꞌni kina kanta puma miyune. Poro Korinti kinaꞌmi nkibantana puntiye

¹⁴Pigoya, ma nkisa kaeyopa, tinintanara aeritakenawanane. Esegi puritakenaga ma kamanapa kaema nabugai ntagaranempititi urimuwe.

¹⁵We, Karaisitintanaga ukena kinapa uwaena mintapa, ibantana pe kinapa taranto mintawe. Eya, tigepa naeba mono kamana urimuwagiri, Karaisiti Isuti atokaeyugu, nae nabintone tibantana puntopa mintuwe.

¹⁶Piya, monota nae posa puma miyiyoma, uritauwe.

¹⁷Naeba pika uma Timotipa otaogana tigeti waye. Aeba Waꞌegawama nkawamu wasiyegina, nabugai ntagarane mintemi, aepa otaogana tigeti waye. Wamagina, kumaka kumaka ampima aꞌyaꞌma monota aiꞌaru pe kinaꞌmi nkaruyenabi uwaiminto kamanaꞌama nkagoba ampa urimikiye.

¹⁸Pigoya, tigetisa kaꞌisamiba naeka: Kampa kanakiye, umagini igebigoꞌena puta nasewe.

¹⁹We, Waꞌegawama abemika, naeba aro ntaganto tigeti wakuwe. Wamagi, igebigoꞌena pe kinaꞌmi kamanapa kampa abinta, esegiyenawaipa ayakipaya waintiyema agakuwe.

²⁰Piya, Koti kabiratakenaenama nkagoba, pipa uwa kamanapa kampaye. Pipa esegiyena maema aogima mikenaenawe.

²¹Pigoya, tigeba naekaba nanaga tibiye: Arupu puratakena kasu maete kanao, yebera: Agoya puma agu kaoꞌena puratakena kanaoma, yewe.