Read Fore 1 Korinti 6 Bible Online

1 Korinti 6 - Fore bible

1 Korinti 6

¹Tigetisa kaꞌwaina aoꞌmika amo kamana otamipa, aeba Kotiti atokaeya kinapa iyemita puma, abeꞌisa kinaꞌmi nkiyobi kana kamana otaginaba, ayamabaya kampa anipa piye, a.

²We, Kotiti atokaeyompe kina taeba aꞌyaꞌma mamparasa kinaꞌmi kamana aꞌyikikune. Pipa tigeba kampa abintawa, a. Piya, aꞌyaꞌma kinaꞌmi kamanapa aintiba aꞌyikikibeka, tikapinti anagi kamanaꞌanto aboraipa, tigeba kampa abae pewa, a.

³Piya, aintiba taeba enisore kinaꞌmi kamanapa aꞌyikikune. Kampa abewa, a. We, tae mikenaenarepa arupu pukenaga abae pune.

⁴Pigoya, tigeti kamana aboragiripa, nana pegiri monota ige kampa wainta kinaꞌmiti wagana, uma aꞌya tigasawe.

⁵We, tigeba kamanaꞌnepa abigina tini penoma, urimuwe. Piya, monotasa tara yagararamisi kamanapa aborakanaba, tige tikapipa aꞌyikikena napiyena wantaga yagara kapa kampa mintiye, a.

⁶We, tigetisa kaꞌwainabe aoꞌmibe isimo kamana aborakinisiba, Isu kampa aegaranta kinaꞌmiti waisigina uma aꞌya isitakibepa, pipa kamparagaenawe.

⁷Tigetikapipa kamana aboraipa, piꞌna monotipa aeguyegina tumiwaye. Piya, ataena puritagiripa, ayama tigeba kampa uwa itawe, a. Tigeꞌenaba aꞌyugu uwa maeyagiripa, nanaga tigeba kamana uwaitawe, a.

⁸We, tigegeba antageꞌena pumagiri, tiyotimpipa ataena puwaitama, igeꞌenaba aꞌyugu uwa maeyawe. Pipa kamparagaenawe.

⁹Pigoya, aruꞌena pe kinaꞌmiba Koti kabiratakenaenabipa kampa ubasikibewe. Pipa kampa abintawa, a. Pika tigeba tara tara tigiba a-ntapiyiyo. Piya, kumiyena pe kinaꞌmibe, ama koti nkaegara kinaꞌmibe, kupiyona pe kinaꞌmibe, wami waya kanta puma kupiyona pe kinaꞌmibe,

¹⁰kuntana pe kinaꞌmibe, mampabisaenaga ibugai kinaꞌmibe, esegi wani ntama aiboꞌena pe kinaꞌmibe, akayasuwaita kinaꞌmibe, iyeguma kuntana pe kinaꞌmibe, piya kinaꞌmiba Koti kabiratakenaenabipa kampa ubasikibewe.

¹¹Pigoya, paipa kaꞌisamitaba pabiya puma mintantapa, ibaba kampaye. Piya, monotaka paititama, aota puritama, arupu puritantine. Eya, Waꞌega Isu Karaisiti ntugaraka Kotirempa Nkawamusatasa piyama aogi puritantine. Tauteka Koti nkagegaꞌe asagayukune

¹²Pigoya: Aꞌyaꞌma tae pukenaenaba kanara pukune, yepa, pipa kanarane. We, piꞌnaba kaꞌisaenaba kampa tiyoꞌmaekiye. Eya, aꞌyaꞌma nae pukenaenaba kanara pukuwe, yopa, pipa kanarane. We, aꞌyugu kaꞌisaena pekana igaꞌna punatasanagawe.

¹³Piya, nakenaba tantawama ntanawa, tantawamaba nakena maekenaenawe, yepa, pipa tagane. We, Kotiba tarayagapa kaga isigaikiye. Piya, taupa kumiyena mantanaba kampaye. Pipa Waꞌega mantana utatantine. Piya, Waꞌega aeba tauꞌamantanawe.

¹⁴Pigoya, Kotiba Waꞌega asitantemisa puma, esegiyenawatasa taepa asiratakiye.

¹⁵Pigoya, titipa amato amato puma Karaisiti nkaukanta puma, pipa kampa abewa, a. Piya, Karaisiti nkautasa kaꞌisa kasamagipa, kumiyena pemisa puma tona aegaraiyoma, otasuwa, a. Pipa kampaye.

¹⁶Piya, wasana kaꞌwaina kumi waeꞌmage atokaeyamipa, isigeba ka aukanta puma miyese. Pikaba tigeba kampa napiyewa, a. Pigoya, pikaba Kotiba maya untiye: Isigeba ka isiꞌena puma mikibese, piya untiye.

¹⁷Piya, kaꞌwainaba Waꞌegamati ato kaeyamipa, aege ka isimara miyese.

¹⁸Tigeba kumiyenaba kasigina aegaka wano. Piya, kaꞌwaina kaꞌisaena aguntaena pemiꞌnaba ka awameta piye. Piya, kumiyena pemiꞌnaba aeba to awameta puma, aeꞌwa nkagupa ata potaye.

¹⁹Pigoya, titipa Aota Awamusaꞌama mpono namane. Pipa kampa abintawa, a. Eya, pi Aota Awamusapa tigupinti miyenema, Kotiba timigaintemine. Piya, tigeba tigeꞌenaripa kampaye.

²⁰Tigepa tabe ikatasa Kotiba ika puritantemi, tigeba aeꞌenawane. Piya puntika, tigeba tititasa Koti nkagegaꞌeba asagayuyiyo.