Read Fore 1 Korinti 9 Bible Online

1 Korinti 9 - Fore bible

1 Korinti 9

¹Pigoya, kaꞌenama narakuꞌma keꞌnepa akuniya, a. Naeba aposoroba kampa mintuwa, a. Naeba Waꞌegare Isupa kampa agantuwa, a. Waꞌegama ntuganempa nkauꞌwapa tigeba kampaya, a.

²We, Waꞌegama nkaposoro mintogiri, tigeba aꞌne mpintawe. Piya, naeka: Aposoro kampa mintiyema, kaꞌisa kinaꞌmi yepa, pipa aerawane. Tigeba ago abintawe. Naeba tige aposoronawe.

³Pigoya, kamana unata kinaꞌmika mayama antota uwaimuwe:

⁴Piya, taeba tigetisa: Naninta wani a-mpaeyiyoma, uratantiye, a.

⁵Piya, to kaꞌisa aposorobe, Waꞌegawama nkaꞌnatabarabe, Pitabe, igeba wayaꞌwaipa mono yugara iba purite wantasa puma: A-piyoma, uratantiya, a.

⁶Piya, naebe Panabasibe tasibintoga: Tisiyatasa yuga a-kasima, mono yugabisa naninta a-mpaeyisoma, urasitantiya, a.

⁷Pigoya, ae nkirebu yagaramabaya aeꞌwa mponerasaba ikantana pukiye, a. Kebaya aintana pegina auꞌwapa aboraginaba, kampa maema naye, a. Kebaya purumaka kabintana, kampa nonoꞌwa maema naye, a.

⁸Pi yo kamanapa wasanami kamanataka yubera, Koti nkago kamanaꞌamaba pika kaga iye.

⁹Eya, Mosese ago kamana kapa mayama kaemarantipa waintiye: Purumakankama witi nakena aerapaꞌma nakiriba, a-nkakunkagasiyo, Koti iyema, kaemarantiye. We, Koti aeba purumakankama ibiga napima untipera, wasana taeka untiye.

¹⁰Pipa taeka untine. Piya, oꞌena pe kinaꞌmibe, naninta nagaregini maeya kinaꞌmibe, igeba kaga yugawaitasa maekenaga agawa pukenaba kanarane.

¹¹Piya, taeba tigeti ampa inatisaenaba tigupinti aintana puntompeka, antota tigetisa arirasaena maeyanema napiyegana, kunta piya, a.

¹²Eya, to kaꞌisa kinaꞌmiba tigetisa naninta kota maeyaga, tae pi ntuga agobintompeꞌnagitaba maeyompesinta, kanara posine. Pigoya, taeba kampa piyaba pune. Piya, Karaisiti mpono yugawa akunkatasanaga tigetisa naninta kota maekenaenaba kasimagi, uwa tumima pugara miyune.

¹³Pigoya, tabe mono namapi yoga peꞌnagiba igeba mono namapisa nanintaba nawe. Piya, aratara kaema agunta pasakena yuga peꞌnagiba igeba aratarasaena maema nawe. Pipa tigeba kampa abintawa, a.

¹⁴Pabiyamaba, aogi mono kamana yompe kina taeba pi mpono yugarasa mikena arirasaena maeyiyoma, Waꞌegawama uratantine.

¹⁵Piya, pi uratantintanaba naeba kampa maeyuwe. Kampaye. Tigeba ibaba kabirataiyoma, kampa napinta kaeyuwe. Kampaye. We, aꞌyugu tigeꞌena maeyakana, naꞌmuntananepa maete tumisanaga kampa nabiye. Iꞌmima purukubopa kanarane.

¹⁶Piya, mono kamana uwaimokaba, nae nageba kampa maete ikiye. Kampaye. Naeba pi mpono yugaba kampa posinta, ata maru mpiyosine. Naetiba to kipa kampa waintiye.

¹⁷Eya, naeꞌne ntapiyenarasa pi ntugaba posinta, ikapa maeyosine. Piya, naeꞌne ntapiyenarasa kampa maentoka, kiyaenara punatantegi,

¹⁸nana ika mpaeyuwe, a. Ikantepa mayamawe: Naeba mono yuga puma antota arirasaena kampa maenta, naꞌmuntanabisa pi kamana wasana uwa uwaimopa, pi ntaꞌmuntananepa nae ikantene. Poro aeba wasanami kayokaya puwaitantiye

¹⁹Pigoya, aꞌyaꞌma kinaꞌmiti iretanepa kampa waintipa, aꞌyaꞌma kinaꞌmita kayokayaꞌenaba uwa pumagi, mono uwaimima uwaena kina iba pusanaga nabiye.

²⁰Piya, Yuta kina iba pukenaga, ige iyobi Yuta kina kanta puntone. Piya, naeba paisa mono kamanaꞌama nkigaꞌna yagara kampa minta, pi paisa ago kamana wasiye kina iba pukenaga, ige iyobi wasiye kina kanta puntone.

²¹Piya, ago kamana kampa abinta abeꞌisa kina iba pukenaga, ige iyobi abeꞌisa kina kanta puntone. Naeba Koti nkago kamana kampa ataopa, Karaisiti nkago kamanapa aegaꞌma piya puntone.

²²Piya, magimagi napiyena pe kina iba pukenaga, ige iyobi magimagi kina kanta puntone. Eya, kaꞌisamipa toma toma kiꞌisa iꞌikenaga, naeba toma toma kina miyesa puma ige iyobi toma toma puntone.

²³Piya, mono kamana maema aborakenaga pabiya pumagi, mono aꞌmuntanabi kaga mikenaga puwe. Esegima a imarantata uma irosao

²⁴Tigeba ankagasi agasi pukenaba agawa, a. Piya, aꞌyaꞌma yagaramiba karuꞌena wama ankagasi agasi puma, kaꞌwaina igasima aꞌmuntana maeyamipa, kampa agawa, a. We, tigegeba pabiyama mara esegima wama aꞌmuntanaba maeyiyo.

²⁵Pigoya, piya yagarami igaikena aꞌmuntana maekenaga, ibemintanaba maete tumima ipa kabiwaitawe. Piya pepa, awasawakenaena maeyawe. We, taeba mantarisa agora waiyaba taꞌmuntanaba maekune.

²⁶Pigoya, naeba keꞌi karuꞌena waopa, kampa uwa mari aganta arupu puma agaurite wauwe. Piya, maꞌena puma asugaikena puntapa, uwa mariba kampa nayapa maebuwe.

²⁷Piya, naeba wasana mono uwaimigaitegi, togana wareꞌnasanagaba maꞌena kinaꞌmi pesa puma naeꞌne ntaupa esegi potamagi kabiyuwe.