Read Fore 2 Korinti 1 Bible Online

2 Korinti 1 - Fore bible

2 Korinti 1

¹Naeba Porona, Karaisiti Isu nkaposoro Koti nkabemika unatantiye. Piya, naebe taoꞌyagara Timotibe, tasigeba Korinti kumata Koti mponota aiꞌaru pe kinaꞌmititibe, Akaiya mari Kotiti atokaeya kinaꞌmititibe, tigeti ma nkisapa kaeyuse.

²Pigoya, tabarempa Koti, Waꞌega Isu Karaisiti, isigetisa awagaenabe paruyenabe tigeti waiyeno. Koti Poro aoꞌmaeyomeka aꞌmu potantiye

³Pigoya, taeba Waꞌegare Isu Karaisiti nkaba Koti taꞌmu potama agiseno. Piya, tabarempa aeba antaraꞌenama nkagowe. Pi Kotirempa aeba agoya puratakenama nkagowe.

⁴Piya, taeba aꞌyaꞌma tauki nakiyenabi mpiyompeka agoya purataye. Eya, Koti agoya puratamisa puma taeba pabiyama iki nakiyenabi mpiyeꞌnagipa kanara agoya puwaitaiyoma taoꞌmaeye.

⁵Piya, Karaisiti ae kuntuyenama nkatunkapa tabera taeti aboraisa pumagina, pabiyama Karaisitibisa agoyaenawapa taeti tabera aboraramiwaye.

⁶Piya, taeti tauki nakiyenaba aboraramemipa, pipa tigeka agoya puritama tiꞌikenaga aboraramiye. Kotiba agoya puratamipa, pipa tigeka agoya puritakenaga aboraramiye. Piya, tae puratamisa puma aborariminti kuntaenaba kaga aesagaꞌma paebuma miyigina Koti pi nkagoyaenawapa puritakiri miyiyo.

⁷We taeba tigeka tara tara tagiba kampa napinta, mayama napima esegi pune: Tigeba kuntaenarepa asima kubo pukibepa, taegeba kaga agoyaenarapa asima kabo pukibewema, abuntune.

⁸We naoꞌmitaba, taeba Esiya mari miyuwakini tauki nakiyenaba tabera aboraraminti, pika aibo pusanaga kamana urimekiri abiyo: Pitaꞌiba kuntaenama agasiya puratama esegiyenarepa asuragasima taerari kaeyoga: Mikenaenarepa nagariwakiyema, napintune.

⁹Piya, taeka: Iyeguyigini puriyoma, utaratantisa puma aboraramintiye. Pipa uwaba kampaye. Taeba taete nkesegiyenarekaba kampa napinta Kotiti atokaekenaga aboraramintiye. Eya, Koti aeba purintapisa asiwaitakena esegiyenawa nkwainta yagaramati esegima tamatiti potakenaga aboraramintiye.

¹⁰Piya, taeguyigi purikenaena pi ataenabisa Kotiba taba puratantiye. Piya, aintiba to kakema taba pukiye. Eya, esegima aeti tamatiti pekana to kakema taba pikiye.

¹¹We, tigegeba nunamubisa taoꞌmaeyiyo. Piya pigina Kotiba uwaena kinaꞌmi ntunamu abintana agoya puratakiye. Agoya puratagiri uwaena kinaꞌmitaba tigeba pika tiꞌmu potaigina kanarasano. Poro aeba Korinti kinapa ata kamana kampa uwaimintiye

¹²Piya, taeba mantanaga taꞌmupa pune: Taeba mampara aꞌyaꞌma kinaꞌmi nkikapipa aogima ntasimagi, pabiyama tige tikapi asugasima aogima ntasintompene. Piya, taeba aota puma Koti pisa puma tagantana puntune. Mabisa kinaꞌmi ntapiyenamaba kampa aboramagi, taeba Koti nkawagaenabisa kamanatepa aborantune. Eya, tagu taumarempaba: Pipa tagantanawe, iye.

¹³Ma kamanapa tigetiba kaeyompepa, agowapa pipa kampa kakantiye. Kampaye. Kaema timopa aisuma abiyo. Piya, nae nabemika tigeba agowapa abiwaekibewe.

¹⁴Eya, paipa tigeba kaꞌisa abintakina nae nabemika abiwaeyiyo. Piya pikibepa, Waꞌega Isu kanabipa taeba tigeka taꞌmu pukubompesa puma tigeba taeka tiꞌmu pukenaga napiyiyo.

¹⁵Piya, tigeba pikaba kanara napikibewema abibebe punta, paitama tigeti wakuwe, untone. Pipa kayone puritakenaga tara yaga tigeti aborakuwema napintone.

¹⁶Eya, naeba pabiyama napimagi paitama tigeti wama urigaitegi Masetoniya mari wakuwema napintone. Piti umigategi to kakema aꞌwae puma Masetoniya maba agaite to tigeti kanakiripa, Yutiya mari wakenaga naoꞌmaeyiyoma napintone.

¹⁷We, naekaba nanawe yewe. Pi kamanaꞌnepa naeba tara nagi napinta aꞌyugu kamana untona, a. We, naeba kaꞌena pikena pontanaba, pipa mampabisa kinaꞌmi yesa suwa: Owe, owe, kampaye, kampaye, kaga yesa suma yuwa, a. We, pipa kampaye.

¹⁸Kotiba tagantana puma taoꞌmaeyoga taeba urimintompe kamanatepa owebe kampayebe kaga kampa untune.

¹⁹Piya, naebe Sairasibe Timotibe taeba Koti Ntagara Isu Karaisitika kamana urimintune. Piya, Karaisiti aeba tara agi kampa napinta, owe aꞌa-o kaga kampa untiye. Kampaye. Aewapa owe uma asi nasiba tagantana piye.

²⁰Eya, aꞌyaꞌma Koti utaratanti kamanaka Karaisiti owe uma auꞌwapa aborawaeye. Pika taeba Koti kamanapa abimagi, Karaisiti nkagerapa taeba tagane uma Koti nkageba asagayuyune.

²¹Piya, Kotiba tigepe taepe Karaisititi kaga atokaeratamagina esegima asiratama yogaretapa utarataye.

²²Piya, aeꞌwa nkaraꞌena puratama Awamusaꞌwapa tagupipa ataogana tumintiye. Piya, aintiba aꞌyaꞌwaemaena aboraramikenaga awameꞌena taminti, pipa Awamusane. Poroba kampa agaropa igetiba wantiye

²³Pigoya, naeba Korinti kumatiba wama namoꞌena puritasanaga kampa wantone. Piya, kamanaꞌnepa Koti pipa abintegi taga taga yuwe.

²⁴We, taeba timatitiꞌenaritapa tabe kina kanta puritakenagaba kampa yune. Kampaye. Taeba tiyoꞌmaeyakiri tiꞌmuntanabi miyiyoma, yune. Piya, tigeba timatitiꞌenayaga esegima asima mintapa, pipa abuntune.