Read Fore 2 Korinti 10 Bible Online

2 Korinti 10 - Fore bible

2 Korinti 10

¹Nae Porona, naeba Karaisiti nkagoyaenawape anta paruyenabe napima kaꞌisaenagaba urimuwe. We, kaꞌisa kinaꞌmiba naeka maya yewe: Aeba tae taora mintanaba agewapa maete tumimagina, pagasara mintanaba aeba esegi kamanapa urataye, yewe.

²We, naeba urimekiri abiyo: Aintiba tigetiba kanakubopa kaꞌisa kina, taekaba mampabisaena aegarawema ye kinaꞌmikaba, esegi kamanapa uwaitakuwema, napiyuwe. Piya, naeba tigeke kaga esegi kamanapisa urimisanagaba kampa nabiya, pika aogima kabiyiyo.

³Tagane. Taeba mampabi nasintapa, we, mampabisa esegiyenarasaba kampa maꞌenarepa pune.

⁴Piya, maꞌena pikenaena urintompepa, pipa mabisaenaba kampaye. Pipa Koti nkesegiyenawe. Piꞌnaba kama kinatempi kagisa akasabakaikena esegiyenawe.

⁵Eya, taeba Koti nkesegiyenabisa wasanami ntapiyenawaipa akayumagi, aꞌyaꞌma Koti agakena ki akunikena agebigoꞌenaba maema metamagi, aꞌyaꞌma kinaꞌmi ntapiyenaba igaꞌna potama Karaisiti nkawamu wasiyiyomawe.

⁶Eya, taeba ago yokege pumagita kamana akayuyeꞌnagipa kamparaga antotapa imukune. We, marupa tigeba arupu puma Karaisiti nkawamu wasiyiyo.

⁷Pigoya, tiyobi waintintanaba agamagiri arirasaena manaka napiyewe. We, tigetisa kaꞌwaina aeꞌwakaba: Karaisiti nkaoꞌyagara mintuwema, napiyemiꞌnaba, aeba taekaba mayama napiyeno: Naeba Karaisiti nkaoꞌyagara miyosa puma igeba kaga aokina mintawema, taekaba napiyeno.

⁸Piya, Waꞌegamaba yoga pikena esegiyenaba tamintipa ata puritakena wanane. Pi nkesegiyenapa nama kiyesa puma esegima asiritakenaga tamintiye. We, naeba pi ntugaraka tae tage maete ikubopa, naeba kampa nanipa pukuwe. Kampaye.

⁹Piya, esa kaema timopa abigina naekaba tiyekuru punatasanagaba kampa nabiye.

¹⁰Piya, kaꞌisa kinaꞌmiba maya unatawe: Esaꞌwapipa esegi kunta kamanaꞌamana kaema tamintana, aeba taorapa ampiyemipa kampa esegima pegina kamanaꞌwampaba uwaena kanta piye, yewe.

¹¹We, piya ye kinaꞌmitaba mayama abiyo: Taeba pagasara mintata kamana kaeyompe, pi kamanaꞌama nkauwapa tikapi mpinta aborakunema, napiyiyo.

¹²We, taeba taekuru puma, kaꞌisa iꞌwai mpaete iye kinaꞌmigeba taeba kaꞌmasa puma miyunemaba, kampa yune. Piya, igeba iyokinapa agama mare-u me-u puma iꞌwaipa maete ima, aiboꞌenaba pewe.

¹³Piya, Kotiba yoga uratantinkamana pikaba taꞌmu pumagi, kamanapa ukune. Tonaraka kampa ukune. We, uratanti ntugaba tigeti kaga aboraiyoma uratantiye.

¹⁴Piya, taeba maruꞌenaba eꞌero mpari wama tigeti irosaꞌma Karaisiti nkaogi mono kamanapa urimintompene. We, taeba kampa tigeti wama irosaompesinta, kamanatipa taeti a-nkaboraiyo, uma nagaresine.

¹⁵Piya, taeba to kinaꞌmi ntugaraka wanane. Taeba Koti yoga uratantinkamana pikaba taꞌmu puma taupa maete iyune. Piya, timatitiꞌenamaba anosakana tikapi yoga agorempa nkauꞌwapa aborama tabe pusanaga tabiye.

¹⁶Piya, tikapi tabena aboraka, taeba wasana tikaꞌi mintaꞌnagiti uma aogi mono kamanapa urite wama aborasanaga tabugaye. Piya, aꞌyugu taeba ka aukaꞌi wama to waina ntugaraka tae tauꞌikune. Pipa kampaye.

¹⁷We, mono isaꞌamaba maya iye: Kaꞌwaina aeba aꞌmu kamana ikena untanaba, Waꞌegawamaka uma aꞌmu kamanapa yeno, iye.

¹⁸Piya, kaꞌwaina aeba aeꞌwa nkauꞌima asagayukibemipa, Koti nkaobipa kampa kanarasakiye. We, Waꞌegawama to kaꞌwaina nkau asagayukibiꞌnapa agegaꞌeraka waikiye.