Read Fore 2 Korinti 11 Bible Online

2 Korinti 11 - Fore bible

2 Korinti 11

¹Tigeba abintigi, anagi kamanaꞌanto urimeno. We, anagi kamanaꞌantonepa aogima abiyo.

²Naeba tigeba to kiꞌi wasanaga Koti nkaobi tiba puritama, to kipa akunikena puwe. Piya, nare ntare puma miyi nkaragawaepa awaeta menkatamisa puma naeba tigepa Karaisitika agebantaka, aeti atokaeritakena puwe.

³Piya, kuyawamaba agoꞌena puma Ibi amiyo puntisa puma, kaꞌisa kinaꞌmi napiyenaripa paibusanaga kabiritauwe. Eya, Karaisititi atokaema taga nare ntare kitasa paiburitasanaga tara tara nagi napima kabiritauwe.

⁴We, tigeti kaꞌwaina irosaꞌma Isukaba tae urimintompesa pumaba kampaye. Toma urimikibipa karuꞌena aegarakibewema, napiyuwe. Piya, Aota Awamusa maentasa pumaba kampaye. To aborarimikibi nkawamusapa karuꞌenaba maekibewema, napiyuwe. Piya, aogi mono kamana taetisa aborarimintompesa pumaba kampaye. To ka monoꞌena aborarimikibipa, pipa tigeba kampa akayunta karuꞌena uma abigina aogi pukiyema, napiyuwe.

⁵Abiyo. Naeba abopa, i maete iye nkaposoro kanta kinatimpi nkimentantiba kampa miyuwe. Pipa kampaye.

⁶Tagane. Kamana ukenaba kampa aogima iyema napiyepa, pipa aerawane. Mono abikenaenagaba kampa aguyosagauwe. Piya, aꞌyaꞌma yugaretasa taeba aꞌyaꞌma abikenaenarepa ago aborariyakokiri abewe.

⁷Tigeba abintawe. Koti mpono kamanapa naeba tigepa urimintuwe. Pi ntugarisaba ikantepa kampa maentuwe. Kampaye. We, pintana popa tige tigeripa maete isanaga naeꞌne ntageba maete tumintopa, pipa Koti nkaobipa aguntaena puntuwa, a.

⁸Piya, tigeti mono yuga pikenaga tigetisa wanane. To kaꞌisa aiꞌaru pe kina igetisa taoꞌmaekena yabapa esuma iparintone.

⁹Piya, paipa tigege minta, kotakaba aisaganto ntaga kampa kuntaenaba urimima esuritantuwe. Kampaye. Mono kinaꞌmiba Masetoniya maba atate tige mari kananta, igeba maete mentamintawe. Pi ntaga kuntaenaba kaꞌenaba kampa puritantuwe. Aintigeba kaga pabiyama kampa kunta puritakuwe. Kampaye.

¹⁰We, Karaisiti taga kamanaꞌamaba naeti waintegi, naeba taga yuwe. Piya, aꞌyaꞌma Akaiya aukaꞌiba nae pontanagaba nage asagayukenaba kampa akunikibewe. Kampaye.

¹¹Nana piyema naeba piyaenaba puwe, a. Naeba tigepa agu kaoꞌena kampa aborarimuwa, a. We, naeba agu kaoꞌena puritauwemaba Kotiba aogima agantiye.

¹²Pi aꞌyaꞌmaena popa pipa pabiya puta wakuwe. Pipa uwaba kampaye. Kaꞌisa kinaꞌmi igeba: Poroge kaꞌmasa puma tabe yuga punema, untini iꞌwaipa maete iyeka akayusanaga pabiya pukuwe.

¹³Piya, pi kana kinapa kampari aposoro kina mima monotaka tiyobi airarikaeyawe. We, igeba Karaisiti nkaposoro tae kanta puma miyewe.

¹⁴Pipa aosoꞌenaba kampa puwaeyawe. Kampaye. Piya, Satani aewa tamiyoꞌena puma eꞌwasaenayaga enisore kina kanta puma miye.

¹⁵We, aeꞌwa kayokaya kinaꞌwapa igeba Koti nkarupu kayokaya kina kanta puma miyekaba a-pami piyo. Aintiba yogawaimpa pisa puma antotaꞌena maekibewe. Poroba aposoro yugawatasa tabe kuntuyenaba maentiye

¹⁶Pigoya, naeba yo kamanapa to kake ikena puwe. Piya, aꞌyugu kaꞌwainaba: Anagi yagaragawe, unatakiye. We, anagi yagaragawe unatagiripa, uwa nababiyo. Kanarane. Ibaba tiyobipa naupa uwaenanto asagayukuwe.

¹⁷Piya, naeba ma kamana ukubopa, Waꞌegawama nkawamu wasimaba kampa ukuwe. Naeba anagiꞌena pusu puma uwaba naupa asagayukuwe.

¹⁸Eya, uwaena kinaꞌmiba arirasaenaga iꞌmu kamanapa uma iꞌwaipa maete iyeka, naeba pabiyama naupa maete ikuwe.

¹⁹Piya, anagi kinaꞌmiba kamana urimegiri abima kanara pewe. We, tigeba aogi napiyenayaga kina mintawe, a.

²⁰Piya, kaꞌwainaba tirakuꞌma kayokayaꞌenawata igaꞌna puritagiripa, kanara pewe. Eya, kaꞌwainaba timiyo puritamawo, titasaenaripa tipaꞌuꞌmawo, agebigoꞌena puritamawo, tiyobi aya kasutasa tiyeguyiripa tigeba uwa atama kanara pewe.

²¹We, taeba kampa pabiyama ataba puritaune. Kampaye. Pikaba ayama napiyewe. Taekaba: Amu kina kanta puma miyewema, napiyewa, a. We, pika nanipa puwe. Pigoya, kaꞌwaina aeba miyemintanawano, pemintanawano ukibipa, naegeba pikaba kaga uma naupa maete ikuwe. We, naeba aibo kinaꞌmi usu kamana yuwe.

²²Piya, igeꞌwaika: Yuta ago kina mintune yepa, pabiyama naegebewe. Igeꞌwaika: Isureyo ago kina mintune yepa, pabiyama naegebewe. Igeꞌwaika: Isureyo ago kina mintune yepa, pabiyama naegebewe. Igeba: Abaraꞌamu nkagaꞌnurawe yepa, pabiyama naegebewe.

²³Igeba: Karaisiti ntuga kinatawe yepa, naeba asu igasima pi ntugaba tabera puwe. We, naeba aibo kinaꞌmi usu kamana uma nau maete iyuwe. Piya, naeba araga ntuga puma asu igasimagi, igaꞌna namapi uwoma ntaga mintuwagini, kampa aisema kanara kasotasa naeguyugu, uwaena yaga puꞌwakena puntuwe.

²⁴Piya, nayakaꞌmuta Yuta kinaꞌmiba igaꞌna kasutasa tabera naeguyuguna 39 puntiye.

²⁵Kakagara eru kasutasa naeguntane. Kapa pipa yaba kasutasa maebuma tabera naeguntane. Piya, kakagara wanipisa kareba aegasagasubaoga wanipi naisuwakena puntone. Piya poga, ka asege ka pake kayo wani nkaꞌeti mintantone.

²⁶Piya, uwoma ntaga pagasa kiꞌi nasuwapa, anompankamaba ata punatakena pogini, ke kinaꞌmibe nae tupisa kinaꞌmibe to marisa kinaꞌmibe kaga ata punatakena puntawe. Eya, tabe kumapintiwo, kabubintiwo, kayo wani nkaꞌetiwo miyuwagana ata punatakenaba aborantiye. We, kampari mono kinaꞌmiba kaga ata punatakena puntawe.

²⁷Naeba araga ntugaba esegima punta, uwaena yaga asenabintisa yuga punta nauba kampa waintone. Naeba naninta wanika nagaꞌena naboga, uwaena yaga iꞌmiyuwagana, esiba naboga, kainekaba aguyosakantone.

²⁸We, piꞌna nane. Aꞌyaꞌma yagaba naeba aꞌyaꞌma monota aiꞌaru pe kina iyoꞌmaekenaga napiyogana kuntaba nabiye.

²⁹Piya, kaꞌwainaba monota kampa esegiyena waintipa, naegeba kaga nantara potauwe. We, kaꞌwainaba aguntaenabi paibemiꞌnakaba naeba namo potauwe.

³⁰Pigoya, nananetasa naupa maete ikuwe, a. We, Waꞌegawama nkesegiyena aborasanaga magimagiyenanepa maete ima aborakuwe.

³¹Eya, Koti, aeba Waꞌega Isu nkaba, agoyaenabi mpiyaba miyiꞌna, aeba kamanaꞌnepa taga yopa pipa abiye.

³²Pigoya, Tamasiko kumata mintuwapa, waꞌega yagara Aretasi otanti kiya yagaraꞌwapa uwaitaogini narakurikenaga Tamasiko kuma kabera kabintawe.

³³Piya puguni, kaꞌisa naoꞌmi igeba waꞌnu kupi iraꞌnatamagini, kagisa abakupintisa mo nagasugu, ae ayapisa naegaka wagaintone.