Read Fore 2 Korinti 12 Bible Online

2 Korinti 12 - Fore bible

2 Korinti 12

¹Pigoya, tae tage asagayukena kamana yokanaba, kampa aogi purataye. Aerawane. Naeba tiyobi nae nage to kake asagayukuwe. Eya, naeba amato puma to kaꞌisa kamana, Kotiba amonta kamanake kakama kamanake aborantika ukuwe.

²Naeba Karaisititi atokaenta yagarama nkagoba kapa agantuwe. Pi ntagaraba naewe. Piya, paipa miyuwagana Kotiba inatisa mantara nababute ima nayakogana, 14-wa kabu aꞌya wantiye. Pigoya, naeba nauꞌyagape, naupa kampa waintape ima agantopa, pipa naeba kampa abintuwe. Koti mana abintine.

³Piya, Kotiba Paratisibinti, aeꞌwa ntauka yugabinti nababute ima nayakoga agantuwe. We, naeba nauꞌyagape, naupa kampa waintape ima agantopa, pipa naeba kampa abintuwe. Koti mana abintine.

⁴Piya, aeba nayakoga, mabisa kinaꞌmi kamanatepisa kampa ukenaenaba abuntuwe. We, pika mabisa kinaꞌmiba aborakenaga akumpaꞌma mintiye.

⁵Piya, aboranamintintanagaba nageba asagayukuwe. We, uwa nauꞌnekaba kampa maete ikuwe. Kampaye. Waꞌegawamaba esegiyenawapa magimagi nauꞌnepisa aborantika, asagayukuwe.

⁶Pigoya, nae nage maete iyosinta, naeba anagi yagara kantaba kampa posine. Kampaye. Naeba taga kamana yosine. We, aꞌyugu wasanamaba pi kamana abima nae nage uwa maete inati isanaga, nae nage asagayukena kamanapa kampa uwaba ukuwe. Kampaye. Piya, nae mikenaenanepa yoga kamana ukenaenanepe abima, pi nkawameta nae nage asagayuyekana kanarasano. Poro nkaupi akena waintasu puntiye

⁷We, Waꞌegawamaba uwaena kasaꞌenaba abora nayakintiye. Pika naeꞌne nagebigoꞌena pusanaga nae naupi akena atantegina waintasu piye. Pipa Satani kayokaya yagara kanta puma naeguma asi nasi nageba maete tumemika, kampa nagebigoꞌena pukuwe.

⁸We: Pipa nagasanema, Waꞌegawamaka kegaꞌe yuwagana kakaga puntiye.

⁹Piya yuwagana aeba kamanaꞌwapa mayama aꞌwae punamintiye: Awagaenanempaba kanarasagataye. Piya, esegiyenanempa nkauꞌwampaba wasanami mpagimagiyenabisa aboraye, untiye. Piya, Karaisiti nkesegiyenamaba naeti waisanaga magimagiyenanekaba napima tabera naꞌmu pukuwe.

¹⁰Piya, Karaisititaka esegiyenanepa kampa waintipe, wasanami akayasunatape, toma toma kuntuyenama aboranamemipe, karana punatape, ataenaba naeti aboramipe, pikaba nantawamaba aogi piye. We, esegiyenane kampa waintegipa, pi ntagaba karuꞌena esegiyenaba maeyuwe. Poroba Korinti kinaꞌmi nkimatitiꞌena esegi puwaitantiye

¹¹Pigoya, naeba anagi yagara kanta puma mima ma kamana yuwe. We, tigeba uma aogi punatasinta naeba esegimaba piyaba kampa urimosine. Piya, i maete iye nkaposoro kanta kinatimpi nkimentantiba kampa miyuwe. Pipa kampaye. Naeba Koti nkaobi mana uwaena kanta puma mintuwe.

¹²Piya, tige tikapi mintantopa, naeba paebuma mima taga aposoro yugama nkauꞌwapa aborarimintuwe. Eya, toma toma awameꞌenabe kasaꞌenabe, tabe esegiyenabe aborarimintuwe.

¹³Pigoya, to monota aiꞌaruyenabi aborantontanaba kaꞌantoba tigeti kampa aborarimintuwe. Pipa mayamawe: Naeba kotatipa kampa paibuma, pi kuntuyenaba kampa aborarimintone. We, pi aiboꞌenanekaba nantara puwa, maenagasiyo.

¹⁴Piya, naeba tarara ago tigantuwe. Pigoya, ibaba to kake wama tigakenaga yokege puwe. Wamagi, kuntaenaba kampa aborarimukuwe. Kampaye. Kotati paibukena wanane. Uwa tige tigekenagawe. Piya, yagaramiba igeba maema aki puma ino ibagi iyoꞌmaekena yugaba kampa pegini, ino ibagi igeba aki puma yagarawaipa imima kabiyewe. We, naeba tige tiba mintuwe.

¹⁵Piya, tige timankama tiyoꞌmaekenaga naeba aꞌyaꞌmaenanepe kasiwaekubopa, kanarane. Eya, naeba agu kaoꞌena tabera puritaogiri, ayabaya pegiri agu kaoꞌenaba antotaꞌena tarantoba punatawe.

¹⁶We, kaꞌisa kinaꞌmitaba naekaba maya yewe: Tagane. Aeba kaꞌenarepa kampa paibuntine. We, aeba karoꞌne karaꞌne suma agoꞌena puratama tabaibiyema, yewa, a.

¹⁷Pigoya, naeba kaꞌisa kinapa ago uwaitauwagini tigetiba wantane. Piya, ige yugarisa kaꞌisaenaripa paibuntuwa, a. Pipa kampaye.

¹⁸Piya, naeba Taitasipa otauwagana tigeti wantine. Eya, to ka mono yagara otauwagana aege wantine. Pigoya, Taitasiba kaꞌenaripa kampa paibuntine. Kampaye. Aebe naebe ka taumarasa mono yuga pumagira, tikapipa aogima nasintomene. Pipa ago abintane.

¹⁹Pigoya, aꞌyaꞌma kamana kaema timompepa, pika tigeba: tae taobi kamanaꞌwai uma aogi pikena pewema, napiyewe, a. Piyaba kampaye. We, nabugai ntaoꞌmitaba, taeba Karaisititi atokaemagi, Koti nkaobipa kamanatepa uma tige timatitiꞌenaripa asiritanema, uma kaeyune.

²⁰Piya, naeba tigeti kanakiripa mikenaenarimpa kampa arupu pusanaga, naekuruba puwe. Eya, naeba tigeti aborama aꞌyugu puritasanaga aogima kabiyiyo. We, tigeti kanama maka kamanana, tigobi pikenaenawa, kabirakenaenawa, agintanawa, akaya kamanana, wasana ikaꞌi kamana uwaitakenaenawa, tigebigoꞌenaenawa, atataraenawa, suma tikapi agasanaga naekuruba puwe.

²¹Aꞌyugu tigeti to kake wakana Kotinempa tige tiyobi nae nage maete tumisanaga, naekuruba puwe. Piya, tikapisaba uwaena kinaꞌmiba aguntaenawaipa kampa ikabitama mintigipa, pai punta nkiꞌnintanawaipe kumiyenawaipe kupiyonawaipe kampa ikabitama kampa asuꞌa puntaka, naekuruba puwe.