Read Fore 2 Korinti 13 Bible Online

2 Korinti 13 - Fore bible

2 Korinti 13

¹Pigoya, ibaba naeba tigeti iyekana kakagasa pukiye. Wama uma irosakini, kaꞌwaina kamanaꞌwapa otamaginiba mono isaꞌama kamana aegaꞌma, tarawo kakagawo ka tiwamu yiginaba arupu peno.

²Piya, paipa tigeti wantopa, wasana agunta punta kinape to kaꞌisa kinape obina kamanapa urimintone. Piya, tarasa puma wanto ntagaba obina kamana urimintosa puma, naeba to kakema pagasara yuwe. Piya, wama tigeti uma agakanaba, ka aguntaena pukibi ntagara uwaba kampa atakuwe.

³We, Karaisiti nae nawamupisa aboramipa kampa napiyewa, a. We, Karaisiti aeba tigeti yogawapa yubu yabuba kampa piye. Aeba tige tikapipa esegi yuga pusu pipa, agaiyo.

⁴Piya, aeba yubu yabu pusu pogini maripo yarapa aeguyuguna, to asintikana Koti nkesegiyenara mintiye. Taeba pabiyama yubu yabu puma miyune. Eya, aeti atokaema mima, aega kaga Koti nkesegiyenara mima, tigetiba yogaba pune.

⁵Tigeba timatitiꞌenayaga miyebera aya pewe. Piꞌna tigupa aegasama agantana agowapa aboraiyo. Piya, Isu Karaisitiba tigupipa mintipa, piꞌna nkauꞌwapa kampa abewa, a. We, timatitiꞌena kampa waintisinta aeba tigupipa kampa mintisine.

⁶Pigoya, tigeba taepa tagama taeka: Igeba mono kiꞌisa kampa paga pawe, usanaga nabugaye.

⁷Pigoya, Kotiba kabiritakiri ataenaba kampa aboranema, nunamuba otamagita miyune. Taepa tagaigita, monoꞌama nkauꞌwantagaꞌena aborawe, usanagaba kampa yune. Kampaye. We, wasanami nkiyobi taeba paga pasu pompepa, aerawane. Tigeba arupuyenama nkauꞌwantagaꞌena penoma, kaꞌantoga nunamu yune.

⁸Eya, taeba tagantana akayukena wanane. Taeba tagantana mana pukena pune.

⁹Piya, taeba yubu yabuba puma miyokiri, tigeba esegiyenayaga miyepa pikaba tantawamaba aogi piye. Piya, tigupa esegima anosanema, Waꞌegamapa nunamu otaune.

¹⁰Piya, naeba tigeti wama tiki nakiyena puritasanaga maruꞌena pagasarasa obina kamana kaema timuwe. Piya, Waꞌegawamaba esegiyena naminti pipa akasabakasasa puma tiyebaꞌmarakena wanane. Uwa kiyesa puma imatitiꞌena esegima anosanema, namintine. Nagarikena kamanane

¹¹We naoꞌmitaba, kamanaꞌnepa uma mayama nagari yuwe: Tigeba aogi tintabarima miyiyo. Piya, obina kamanaꞌnepa abintiri, tigupa maema aewarama miyiyo. Tigeba ka tintabarima paruyenabi mpiyiyo. Piya pukubepa, Koti aeba agu kaoꞌenamape paruyenamape agowamaba tigege miwaema miyeno.

¹²Aꞌyaꞌma mono kinapa tiyapa imima aogima tiyoꞌena piyo.

¹³Aꞌyaꞌma matasa Kotiti atokaeya kinaꞌmiba: Aya pewe, yewe.

¹⁴Pigoya, Waꞌega Isu Karaisiti nkawagaenawampage, Koti nkagu kaoꞌenawampage, Aota Awamusaꞌama ka tintabariritama atokaeritakenaenabe, aꞌyaꞌma tigeti waima waiyeno.Poro piya isa kaentiye.